Միջին Արեւելքին մէջ պատերազմ. Աստուածաշունչը ի՞նչ կ’ըսէ

Ամբողջ աշխարհի մէջ մարդիկ մտահոգ են Միացեալ Նահանգներու, Իսրայէլի եւ Իրանի միջեւ եղած պայքարին մասին։ Արդեօք ատիկա պիտի ընդլայնի՞ եւ ուրիշ երկիրներ պարփակէ՞։ Եւ արդեօք կառավարութիւնները կրնա՞ն վայրագ կռիւներուն վերջ դնել ու մնայուն խաղաղութիւն բերել։

Անոնք՝ որոնք Աստուածաշունչի մարգարէութիւններուն ծանօթ են, թերեւս հարց տան. ‘Կրնա՞յ ըլլալ որ Միջին Արեւելքին մէջ պատահածը առաջնորդէ Արմագեդոն պատերազմին, որ յիշուած է Յայտնութիւն գրքին մէջ’։

Աստուածաշունչը ի՞նչ կ’ըսէ։

Կառավարութիւնները Միջին Արեւելքի մէջ պատերազմին վերջ պիտի դնե՞ն

Աստուածաշունչը կ’ըսէ. «Մի՛ յուսաք իշխաններուն, մարդու որդիին՝ որուն քով փրկութիւն չկայ» (Սաղմոս 146։3)։

Չենք գիտեր եթէ կառավարութիւնները պիտի կարենան որոշ չափով խաղաղութիւն բերել Միջին Արեւելքին մէջ։ Բայց եւ այնպէս, Աստուածաշունչը յստակ կը դարձնէ որ չկայ քաղաքական առաջնորդ մը, մարդկային կառավարութիւն մը կամ խումբ մը մարդիկ, որոնք կրնան պատերազմներուն վերջ դնել եւ մնայուն խաղաղութիւն բերել։ Միայն Աստուած կրնայ ‘պատերազմները դադարեցնել մինչեւ երկրի ծայրը’ (Սաղմոս 46։9)։

• Աւելի տեղեկութիւններ առնելու համար, կարդա՛ «Պատերազմները ինչպէ՞ս պիտի վերջ գտնեն» վերնագրով Դիտարան պարբերաթերթը (արաբ.)։

Աստուածաշունչը մարգարէացա՞ծ է Միջին Արեւելքի մէջ պատերազմին մասին

Աստուածաշունչը կ’ըսէ. «Պիտի լսէք պատերազմներ ու պատերազմներու լուրեր։ ...Ազգ ազգի վրայ պիտի ելլէ ու թագաւորութիւն թագաւորութեան վրայ» (Մատթէոս 24։6, 7)։

Միջին Արեւելքի մէջ հիմա տեղի ունեցող պայքարը այն դէպքերէն մէկն է, որ ցոյց կու տայ թէ կ’ապրինք «աշխարհի վախճան» կոչուած ժամանակին մէջ, որուն մասին Աստուածաշունչը նաեւ կ’ըսէ՝ «վերջին օրեր» (Մատթէոս 24։3, ՆԱ. Բ. Տիմոթէոս 3։1)։ Ներկայիս պատահած պատերազմները ցոյց կու տան, որ Աստուած շատ մօտ ատենէն վերջ պիտի դնէ պատերազմներուն եւ մարդիկը չարչարող բոլոր խնդիրներուն։

• Աւելի տեղեկութիւններ առնելու համար, կարդա՛ «‘Վերջին օրեր’ուն կամ ‘վերջի ժամանակին’ նշանը ի՞նչ է» յօդուածը։

Արմագեդոնը Միջին Արեւելքի՞ն մէջ պիտի սկսի

Աստուածաշունչը կ’ըսէ. «Զանոնք տեղ մը հաւաքեցին, որ Եբրայեցերէն Արմագեդոն կը կոչուի» (Յայտնութիւն 16։16)։

Արմագեդոնը պատերազմ մը չէ, որ Միջին Արեւելքի մէջ կը սկսի՝ մարդկային կառավարութիւններու միջեւ։ Անիկա համաշխարհային պատերազմ մըն է՝ բոլոր մարդկային կառավարութիւններուն եւ Աստուծոյ միջեւ։

• Աւելի տեղեկութիւններ առնելու համար, կարդա՛ «Արմագեդոն պատերազմը ի՞նչ է» յօդուածը։

Ի՞նչը կրնայ մեզի օգնել մտահոգեցուցիչ ժամանակներուն

Աստուածաշունչը կ’ըսէ. «Բանի մը համար հոգ մի՛ ընէք, հապա ամէն բանի մէջ աղօթքով ու աղաչանքով, գոհութիւնով մէկտեղ, ձեր խնդրանքը Աստուծոյ յայտնի ըլլայ» (Փիլիպպեցիս 4։6)։

Եհովաa Աստուած մեզ կը քաջալերէ որ իրեն աղօթենք։ Քանի՛ որ Աստուած մեզմով հետաքրքրուած է, մեր աղօթքները պիտի լսէ եւ մեզի պիտի օգնէ որ մեր մտահոգութիւններուն հետ գլուխ ելլենք (Ա. Պետրոս 5։7)։ Ան ինչպէ՞ս մեզի կ’օգնէ։ Օրինակ, ան մեզի կը բացատրէ թէ ինչո՛ւ պատերազմներ կ’ըլլան, ինչպէ՛ս ատոնց վերջ պիտի դնէ եւ ինչպէ՛ս մեր չարչարանքին եւ ցաւերուն վերջ պիտի տայ (Յայտնութիւն 21։3, 4)։

• Աւելի տեղեկութիւններ առնելու համար, կարդա՛ «Սուրբ Գիրքին մէջ կրնա՞մ մխիթարական խօսքեր գտնել» յօդուածը (արաբ.)։