Աստուածատուր ազատութեան նպատակէն մի՛ շեղիք
«Ուր որ Տէրոջը հոգին կայ, հոն ազատութիւն կայ»։—Բ. ԿՈՐՆԹԱՑԻՍ 3։17
1. Եսայեայ 65։13, 14–ը ինչո՞ւ կը կիրարկուի Եհովայի Վկաներուն։
եՀՈՎԱ ազատութեան Աստուածն է։ Իսկ աստուածատուր ազատութիւնը ի՜նչ օրհնութիւն է։ Քանի որ իր նուիրուած ծառաները այսպիսի ազատութիւն ունին, Գերիշխան Տէր Եհովայի հետեւեալ խօսքերը անոնց կը կիրարկուի. «Ահա իմ ծառաներս պիտի ուտեն, բայց դուք անօթի պիտի մնաք։ Ահա իմ ծառաներս պիտի խմեն, բայց դուք ծառաւ պիտի մնաք։ Ահա իմ ծառաներս պիտի ուրախանան, բայց դուք պիտի ամչնաք։ Ահա իմ ծառաներս սրտի ուրախութեամբ պիտի ցնծան, բայց դուք սրտի ցաւէ պիտի աղաղակէք եւ հոգիի ճնշումէ պիտի ոռնաք»։—Եսայեայ 65։13, 14
2. Եհովայի ծառաները ինչո՞ւ հոգեւոր բարգաւաճ վիճակ մը ունին։
2 Իր հոգիով կամ իր գործօն ոյժով առաջնորդուելով, Աստուծոյ ծառաները այս հոգեւոր բարգաւաճ վիճակը կը վայելեն։ Պօղոս առաքեալ ըսաւ. «Տէրը Հոգին է եւ ուր որ Տէրոջը հոգին կայ, հոն ազատութիւն կայ»։ (Բ. Կորնթացիս 3։17) Ի՞նչ է աստուածատուր ազատութեան նպատակը։ Ի՞նչ կը պահանջուի մեզմէ զայն լիովին գործածելու համար։
Ազատութիւնը զոր Աստուած Ունի
3. Աստուած ինչպի՞սի ազատութիւն ունի եւ ինչո՞ւ։
3 Միմիայն Եհովա բացարձակ ազատութիւն կը վայելէ։ Իր արարածներէն ո՛չ մէկը կրնայ իր ազատութիւնը սահմանափակել, քանի որ ան Ամենակալ Աստուած եւ Տիեզերական Գերիշխանն է։ Ինչպէս հաւատարիմ Յոբը ըսաւ. «Ո՞վ կրնայ զանիկա արգիլել։ Ո՞վ կարող է ըսել անոր՝ ‘Ի՞նչ կ’ընես’»։ (Յոբայ 9։12) Բաբելոնի Նաբուգոդոնոսոր թագաւորը պարտաւորուեցաւ ընդունելու. «Անոր [Աստուծոյ] ձեռքին դէմ դնող, կամ անոր ‘Ի՞նչ կ’ընես’ ըսող չկայ»։—Դանիէլ 4։35
4. Եհովա իր ազատութիւնը ի՞նչ կերպով կը սահմանափակէ։
4 Այսուհանդերձ, Եհովայի արդար սկզբունքները այդ բացարձակ ազատութիւնը կը սահմանափակեն։ Ասիկա ցոյց տրուեցաւ երբ Աբրահամ մտահոգութիւն յայտնեց Սոդոմի բնակիչներուն մասին, ու հարցուց. «Միթէ բոլոր երկրի Դատաւորը արդարութիւն պիտի չընէ՞»։ Աստուծոյ պատասխանը կը նշէ թէ ինք կ’ընդունի արդարութիւն ընելու իր պատասխանատուութիւնը։ Ան Սոդոմը կործանած պիտի չըլլար եթէ անոր մէջ արդարներ գտնուած ըլլային։ (Ծննդոց 18։22–33) Աստուած նաեւ կը սահմանափակէ իր ազատութիւնը, քանի որ իր սէրն ու իմաստութիւնը պատճառ կ’ըլլան որ ան բարկութեան երկայնամիտ ըլլայ եւ ինքզինք զսպէ։—Եսայեայ 42։14
Մարդկային Ազատութեան Սահմանափակումները
5. Մարդկային ազատութիւնը սահմանափակող կարգ մը ազդակները ի՞նչ են։
5 Թէեւ Եհովա բացարձակ ազատութիւն ունի, բայց բոլոր արարածները կը գործեն իրենց բնութեան, կարողութիւններուն, բնակութեան, ինչպէս նաեւ մեղաւոր մարդոց ներկայիս սահմանափակուած կեանքի երկարութեան ծիրին մէջ դրուած սահմաններէն ներս։ Աստուած մարդը կատարեալ ազատութեամբ ստեղծեց որպէսզի ան գործէ այն ծիրին մէջ զոր Եհովա սահմանած էր իրեն համար։ Ուրիշ բազմաթիւ պատճառներ կան թէ ինչո՛ւ մարդկային ազատութիւնը սահմանափակուած է եւ ոչ թէ բացարձակ։
6. Աստուծոյ հանդէպ համարատու ըլլալը ի՞նչ ազդեցութիւն ունի մեր ազատութեան վրայ։
6 Առաջին. մարդուն ազատութիւնը սահմանափակուած է, քանի որ Աստուած մարդը ստեղծեց Իր նպատակին ծառայելու համար։ Եհովա ‘արժանի է փառք ու պատիւ եւ զօրութիւն առնելու, վասնզի ամէն բան ինք ստեղծեց եւ իր կամքովը եղան ու ստեղծուեցան’։ (Յայտնութիւն 4։10) Հետեւաբար, մարդը համարատու է իր Արարիչին որ արդարացիօրէն օրէնքներ ըրաւ, որոնցմով մարդիկ պէտք է կառավարուին։ Վաղեմի Իսրայէլի մէջ, Մովսիսական Օրէնքին ներքեւ, Աստուած կը պահանջէր որ անհատներ մահուան դատապարտուէին եթէ իր անունը սրբապղծէին, կամ Շաբաթի օրէնքը բեկանէին։ (Ելից 20։7. 31։14, 15. Ղեւտացւոց 24։13–16. Թուոց 15։32–36) Թէեւ մենք որպէս Քրիստոնեաներ Օրէնքին տակ չենք, սակայն մեր ազատութիւնը սահմանափակուած է, քանի որ համարատու ենք Եհովային որ մեր Դատաւորը, Օրէնսդիրը եւ Թագաւորն է։—Եսայեայ 33։22. Հռովմայեցիս 14։12
7, 8. (ա) Ֆիզիքական օրէնքները ինչպէ՞ս կը սահմանափակեն մարդկային ազատութիւնը։ (բ) Աստուծոյ ուրիշ ո՞ր օրէնքները կը սահմանափակեն մեր՝ մարդկայիններուս՝ ազատութիւնը։
7 Երկրորդ, մարդկային ազատութիւնը սահմանափակուած է Աստուծոյ ֆիզիքական օրէնքներուն պատճառաւ։ Օրինակի համար, ծանրութեան օրէնքին պատճառաւ, մարդ մը չի կրնար երկնաքարէ մը վար նետուիլ առանց վնասուելու կամ մեռնելու։ Յստակ է, ուրեմն, որ Աստուծոյ ֆիզիքական օրէնքները որոշ բաներ ընելու մարդուն ազատութիւնը կը սահմանափակեն։
8 Երրորդ, մարդկային ազատութիւնը սահմանափակուած է Աստուծոյ բարոյական օրէնքներուն պատճառաւ։ Շատ հաւանաբար, փորձառաբար նկատած էք Գաղատացիս 6։7, 8–ի մէջ Պօղոսի գրածին ճշգրիտ ըլլալը. «Մի՛ խաբուիք, Աստուած ծաղր չըլլար։ Վասընզի ինչ որ մարդ կը սերմանէ, նոյնը պիտի հնձէ։ Ան որ իր մարմնին կը սերմանէ, այն մարմնէն ապականութիւն պիտի հնձէ ու ան որ հոգիին կը սերմանէ, այն հոգիէն յաւիտենական կեանք պիտի հնձէ»։ Անվիճելիօրէն, Եհովայի բարոյական օրէնքներն ալ կը սահմանափակեն մեր ազատութիւնը, բայց անոնց պէտք է հնազանդինք, եթէ կ’ուզենք կեանք ստանալ։
9. Մարդկային ընկերութեան մեր մէկ մասը ըլլալը ինչպէ՞ս կը սահմանափակէ մեր ազատութիւնը։
9 Չորրորդ, մարդուն ազատութիւնը սահմանափակուած է, քանի որ ան մարդկային ընկերութեան մէկ մասն է։ Հետեւաբար, իր ազատութիւնը վերջ կը գտնէ հոն ուր ուրիշներուն ազատութիւնը անիրաւօրէն կը խանգարուի։ Քրիստոնեաները պէտք է հպատակին կառավարական վերին «իշխանութիւններ»ուն, անոնց հնազանդելով այնքան ատեն որ անոնք չեն պահանջեր որ մենք Աստուծոյ օրէնքները բռնաբարենք։ (Հռովմայեցիս 13։1. Գործք 5։29) Օրինակի համար, պէտք է հնազանդինք տուրքեր վճարելու, ինքնաշարժ վարելու արագութեան եւ ասոնց նման օրէնքներու։ Այն իրողութիւնը թէ «Կայսրին» այսպիսի օրէնքներուն պէտք է հնազանդինք յաւելեալ կերպով ցոյց կու տայ թէ մեր աստուածատուր ազատութիւնը բացարձակ չէ։—Մարկոս 12։17. Հռովմայեցիս 13։7
Ինչո՞ւ Յարաբերական Ազատութիւն մը
10, 11. Եհովա ինչո՞ւ մարդոց յարաբերական ազատութիւն մը տուաւ։
10 Աստուած ինչո՞ւ մարդոց տուաւ յարաբերական ազատութիւն մը։ Պատճառներէն մէկն էր որ Արարիչը երկրին վրայ մտացի արարածներ ունենար, որոնք իրենց բարի խօսքերով եւ վարքով փառք ու պատիւ բերէին իրեն։ Մարդիկ կարելիութիւնը ունին ասիկա ընելու, մինչդեռ անասունները՝ ոչ։ Անասունները, բնազդով կառավարուելով, բարոյական վարքին մասին գաղափար չունին։ Կրնանք շուն մը մարզել որ բան մը չառնէ, բայց չենք կրնար անոր սորվեցնել թէ գողնալը սխալ է։ Որպէս թէ յայտագրուած արարքներով, անասուն մը չի կրնար Աստուծոյ փառք ու պատիւ բերող որոշումներ առնել, մինչդեռ մարդը կրնայ, սէրէ եւ գնահատութենէ մղուելով, ազատօրէն ընտրել իր Արարիչին ծառայել։
11 Աստուած մարդոց այս ազատութիւնը կու տայ անոնց օգտին եւ ուրախութեան համար։ Անոնք կրնան իրենց յարաբերական ազատութիւնը գործադրել ստեղծական, հնարամիտ, բարեմիտ եւ համագործական ըլլալով։ Մարդիկ նաեւ ունին ընտրելու ազատութիւն որոշ մարզերու մէջ, ինչպէս իրենց գործի ասպարէզին եւ բնակելու վայրին մէջ։ Այսօր, տնտեսական եւ քաղաքական ազդակներ յաճախ կը սահմանափակեն այս ընտրելու ազատութիւնը, բայց ասիկա կրնայ մարդկային ընչաքաղցութեան պատճառաւ ըլլալ, ոչ թէ քանի որ Աստուած սկիզբը մարդկութիւնը այսպէս ստեղծեց։
12. Մարդոց մեծամասնութիւնը ինչո՞ւ գերութեան մէջ է։
12 Թէեւ Եհովա մարդոց մեծ ազատութիւն տուաւ, բայց անոնց մեծամասնութիւնը այսօր յուսախաբիչ գերութեան մը մէջ է։ Ի՞նչ պատահեցաւ։ Մարդկային առաջին զոյգը՝ Ադամն ու Եւան՝ աստուածատուր ազատութեան նպատակէն շեղեցան։ Անոնք սահմանէն անդին անցան զոր Աստուած դրած էր իրենց ազատութեան եւ իրենց վրայ որպէս Գերիշխան Տէր Եհովայի իրաւացի իշխանութեան դէմ ասպարէզ կարդացին։ (Ծննդոց 3։1–7. Երեմեայ 10։10. 50։31) Փոխանակ իրենց ազատութիւնը զԱստուած պատուելու համար գործածելու, չգոհանալով, անոնք զայն անձնասիրաբար գործածեցին, անկախօրէն որոշելու ինչ որ շիտակ եւ ինչ որ սխալ էր եւ այս կերպով Սատանային միացան Եհովայի դէմ իր ըմբոստութեան մէջ։ Սակայն, փոխանակ աւելի ազատութիւն ձեռք ձգելու, մեղաւոր Ադամն ու Եւան փորձիչ սահմանափակումներու եւ գերութեան ենթարկուեցան, իրենց ազատութեան նուազում մը եւ վերջապէս մահացան։ Անոնց սերունդը ժառանգեց այս ազատութեան կորուստը։ «Վասնզի ամէնքը մեղք գործեցին ու Աստուծոյ փառքէն պակսեցան»։ «Մեղքին վարձքը մահ է»։—Հռովմայեցիս 3։23. 5։12. 6։23
13. Սատանան ինչո՞ւ ի վիճակի եղաւ մարդիկը գերեվարել։
13 Եդեմի մէջ ըմբոստութեան պատճառաւ, Ադամն ու իր սերունդը Բանսարկու Սատանային գերութեան մէջ եկան։ Այո, «բոլոր աշխարհ չարին մէջ [զօրութեան ներքեւ (ՆԱ)] է»։ (Ա. Յովհաննու 5։19) Իր գերազանց զօրութեան եւ կարողութեան պատճառաւ է որ Սատանան ի վիճակի եղաւ Աստուծմէ բոլոր հեռացած մարդիկը խաբել եւ գերիներ դարձնել։ Ասկէ զատ, անձնասէր մարդիկ իրենց նմաններուն վրայ տիրեցին անոնց թշուառութեանը համար։ (Ժողովողի 8։9) Հետեւաբար, ներկայիս բոլոր մարդիկը մեղքին եւ մահուան, Սատանային եւ իր դեւերուն, աշխարհի քաղաքական, տնտեսական եւ կրօնական դրութիւններուն գերութեան մէջ են։
Իրական Ազատութիւնը Կարելի Դարձած
14. Իրական ազատութեան համար մարդոց յոյսը ի՞նչ բանի հետ կապուած է։
14 Մեղքէն, մահէն, Բանսարկուէն եւ անոր աշխարհէն ազատութիւն ձեռք ձգելը կապուած է իր տիեզերական գերիշխանութեան իրաւացի ըլլալուն առնչութեամբ հարցը լուծելու Աստուծոյ վճռակամութեան հետ։ Քանի որ Սատանան այս հարցը յարուցանեց, Եհովա թոյլատրեց որ ան գոյատեւէ, ճիշդ ինչպէս որ թոյլատրեց Փարաւոնին որ գոյատեւէ ժամանակ մը։ Եհովա ասիկա ըրաւ որպէսզի իր զօրութիւնը լիովին ցոյց տայ եւ ամբողջ երկրի մէջ իր անունը պատմուի։ (Ելից 9։15, 16) Աստուած շուտով իր անձը պիտի ջատագովէ որպէս Տիեզերական Գերիշխանը եւ իր սուրբ անունը պիտի սրբացնէ Սատանայի, Ադամի ու Եւայի ըմբոստութեան անոր վրայ բերած նախատինքը վերցնելով։ Այս կերպով, Եհովայէ վախցողները մեղքի եւ մահուան գերութենէն պիտի ազատագրուին, աստուածատուր ազատութեան նոր աշխարհի մը մէջ պիտի բերուին։—Հռովմայեցիս 8։19–23
15. Մարդկութեան ազատութիւնը վերահաստատելուն մէջ Յիսուս ի՞նչ դեր խաղցաւ։
15 Մարդկութեան ազատութիւնը վերահաստատելու համար, Աստուած իր Որդին որպէս մարդ երկիր ղրկեց։ Իր կատարեալ մարդկային կեանքը յօժարակամօրէն տալով, Աստուծոյ Որդին՝ Յիսուս Քրիստոս փրկանքի զոհը՝ մարդկութիւնը ազատագրելու հիմը՝ հայթայթեց։ (Մատթէոս 20։28) Ան նաեւ ազատութեան պատգամ մը հրատարակեց։ Իր ծառայութեան սկիզբը, ան իր անձին կիրարկեց հետեւեալ խօսքերը. «Տէր Եհովային հոգին իմ վրաս է, վասնզի Տէրը զիս օծեց ու զիս ղրկեց աղքատներուն աւետիս տալու, կոտրած սիրտ ունեցողները բժշկելու, գերիներուն՝ ազատութիւն եւ բանտարկեալներուն բանտին բացուիլը հրատարակելու»։—Եսայեայ 61։1. Ղուկաս 4։16–21
16. Առաջին դարու Հրեաները ի՞նչ քայլեր պէտք էր առնէին իրական ազատութիւն ձեռք ձգելու համար։
16 Մարդիկ ինչպէ՞ս ձեռք պիտի ձգէին այդ ազատութիւնը։ Յիսուս ըսաւ. «Եթէ դուք իմ խօսքիս մէջ կենաք, ճշմարտապէս իմ աշակերտներս կ’ըլլաք։ Եւ ճշմարտութիւնը պիտի գիտնաք ու այն ճշմարտութիւնը ձեզ պիտի ազատէ»։ Այս կերպով, Յիսուսի հետեւորդները սկսան հոգեւոր ազատութիւն վայելել։ (Յովհաննու 8։31, 32, 36) Աւելի ետք, Յիսուս Հռովմէացի կուսակալ Պոնտացի Պիղատոսին ըսաւ. «Ես այս բանին համար ծնած եմ եւ ասոր համար աշխարհ եկած, որպէսզի ճշմարտութեան համար վկայեմ։ Ամէն մարդ որ ճշմարտութենէն է՝ իմ ձայնիս ականջ կը դնէ»։ (Յովհաննու 18։37) Այն Հրեաները որոնք ճշմարտութիւնը կ’ընդունէին, զոր Յիսուս կը քարոզէր բերանացի եւ օրինակով, իրենց մեղքերէն կը զղջային, իրենց մոլորեալ ընթացքը կը փոխէին, իրենք զիրենք Եհովայի կը նուիրէին եւ Յիսուսի նման կը մկրտուէին։ (Մատթէոս 3։13–17. Գործք 3։19) Այս կերպով, անոնք կը սկսէին աստուածատուր յարաբերական ազատութիւնը վայելել։
17. Եհովա ինչո՞ւ իր ծառաներուն ազատութիւն կու տայ։
17 Եհովա իր հաւատարիմ ծառաներուն ազատութիւն կու տայ գլխաւորաբար իր գերիշխանութիւնը ջատագովելու համար, ինչպէս նաեւ անոնց հանգըստութեան կամ օգտին համար։ Ան Իսրայելացիները ազատագրեց Եգիպտական գերութենէն, որպէսզի անոնք կարենան զինք փառաբանել որպէս քահանաներու թագաւորութիւն մը, որպէս իր վկաները։ (Ելից 19։5, 6. Եսայեայ 43։10–12) Նմանապէս, Եհովա իր ժողովուրդը Բաբելոնական աքսորէն բերաւ, գլխաւորաբար իր տաճարը վերաշինելու եւ մաքուր պաշտամունքը վերահաստատելու համար։ (Եզրասայ 2։2–4) Քանի որ աքսորեալները իրենց հոգը միայն նիւթական հանգըստութիւններու վրայ կը դնէին, Եհովա Անգէ եւ Զաքարիա մարգարէները ղրկեց Աստուծոյ հանդէպ անոնց պարտականութիւններուն մասին զգաստացնելու համար զանոնք։ Իրենց աստուածատուր ազատութիւնը այս կերպով պատշաճ տեղը դնելով տաճարին շինութիւնը ամբողջացաւ, Եհովայի փառք բերելով, իսկ ժողովուրդին՝ հանգստութիւն եւ բարօրութիւն։
Աստուածատուր Ազատութեան Նպատակէն Մի՛ Շեղիք
18. Ինչո՞ւ կրնայ ըսուիլ որ Եհովայի արդի ծառաները իրենց աստուածատուր ազատութեան նպատակէն չեն շեղած։
18 Ի՞նչ է պարագան Աստուծոյ արդի ծառաներուն։ Որպէս կազմակերպութիւն մը, անոնք իրենց աստուածատուր ազատութեան նպատակէն չեն շեղած։ 1870–ական թուականներուն, անոնք սկսան Բաբելոնական սխալներէն ազատագրուիլ եւ յաւելեալ Քրիստոնէական ազատութիւն վայելել։ Ասիկա Առակաց 4։18–ի հետ ներդաշնակ էր, ուր կ’ըսէ. «Արդարներուն ճամբան ծագող լոյսի պէս է, որ երթալով կը լուսաւորուի, մինչեւ կատարեալ օրը ըլլայ»։ Սակայն, ինչպէս որ Աստուծոյ վաղեմի ժողովուրդը ժամանակ մը Բաբելոնական գերութեան մէջ մնաց, նոյնպէս 1918–ին, Եհովայի ծառաները որոշ չափով Մեծն Բաբելոնի գերութեան մէջ եկան։ (Յայտնութիւն 17։1, 2, 5) Սուտ կրօնքի այդ համաշխարհային կայսրութեան անդամները ցնծացին երբ այլաբանական «երկու վկաներ»ը հոգեւորապէս մեռան։ Սակայն, Աստուծոյ անարժան ողորմութեամբ, 1919–ին, իր օծեալ ծառաները վերակենդանացան, հոգեւորապէս ազատագրուելով։ (Յայտնութիւն 11։3, 7–11) Իրենց աստուածատուր ազատութիւնը գործածելով, անոնք Բարձրեալին նախանձախնդիր վկաները եղան։ Ուստի, որքա՜ն պատշաճ էր որ, 1931–ին, անոնք ուրախութեամբ որդեգրէին «Եհովայի Վկաներ» անունը։ (Եսայեայ 43։10–12) Մասնաւորաբար 1935–էն ի վեր, օծեալ Վկաներուն միացած է «մեծ բազմութիւն մը», որ կը յուսայ երկրի վրայ յաւիտենական կեանք ստանալ։ Անոնք ալ իրենց աստուածատուր ազատութեան նպատակէն չեն շեղիր։—Յայտնութիւն 7։9–17
19, 20. (ա) Եհովայի ծառաները իրենց աստուածատուր ազատութիւնը լաւ կերպով գործածելուն ակներեւ կերպերէն մէկը ի՞նչ է։ (բ) Ուրիշ ի՞նչ ուշագրաւ կերպով Եհովայի Վկաները Աստուծոյ իրենց տուած ազատութիւնը լաւ կերպով կը գործածեն։
19 Եհովայի ծառաները իրենց աստուածատուր ազատութիւնը լաւ կերպով կը գործածեն, մասնաւորաբար երկու ակներեւ կերպերով։ Նախ, անոնք զայն կը գործածեն շիտակ ընթացք մը հետապնդելու համար։ (Ա. Պետրոս 2։16) Եւ ի՜նչ լաւ համբաւ մը ունին։ Օրինակի համար, Զուիցերիոյ Զիւրիխ քաղաքին մէջ, անգամ մը, մարդ մը Թագաւորութեան Սրահ մտաւ եւ ըսաւ որ կ’ուզէր Եհովայի Վկաներէն մէկը ըլլալ։ Երբ իրեն հարցուեցաւ պատճառը, ան ըսաւ որ իր քոյրը Վկայ մըն էր եւ անբարոյութեան համար վտարուած էր։ Ան ըսաւ. ‘Ես կ’ուզեմ այսպիսի կազմակերպութեան մը միանալ, կազմակերպութիւն մը՝ որ գէշ վարքի չի հանդուրժեր’։ Լաւ պատճառով էր որ Կաթողիկէ Նոր Համայնագիտարանը (Անգլ.) դիտել տուաւ թէ Եհովայի Վկաները «աշխարհի մէջ ամենէն լաւ վարք ու բարք ունեցող խումբերէն մէկը» ըլլալու համբաւը ձեռք ձգած են։
20 Եհովայի Վկաները իրենց աստուածատուր ազատութիւնը կը գործածեն Թագաւորութեան բարի լուրը քարոզելու իրենց պաշտօնը կատարելու համար, ինչպէս Յիսուս ըրաւ։ (Մատթէոս 4։17) Բերանացի եւ տպագրուած էջով, թէ՛ պաշտօնապէս եւ թէ անպաշտօն կերպով, անոնք Եհովայի Թագաւորութիւնը կը ծանուցանեն։ Այսպէս գործելը մեծ օգուտներ կը բերէ, քանի որ անոնց հաւատքը կը զօրացնէ եւ անոնց յոյսը վառ կը պահէ։ Ասկէ զատ, անիկա կը ծառայէ թէ՛ իրենք զիրենք եւ թէ իրենց մտիկ ընողները ապրեցնելու։ (Ա. Տիմոթէոս 4։16) Այս գործունէութեան առնչութեամբ, գիրք մը (Dynamic Religious Movements) կ’ըսէ. «Դժուար է ուրիշ որեւէ խումբի մը անդամները գտնել, որոնք այսքան ծանր կ’աշխատին որքան Վկաները իրենց կրօնքին մէջ»։
21. Ի՞նչ ապացոյց կայ թէ Եհովա իր ծառաներուն ծառայութիւնը կ’օրհնէ։
21 Եհովա որքա՜ն կ’օրհնէ մեզ մեր աստուածատուր ազատութեան նպատակին հասնելու համար։ Ասիկա կրնայ տեսնուիլ անցեալ տարուան ծառայութեան տեղեկագրութենէն. չորս միլիոնէ աւելի Թագաւորութեան հրատարակիչներու գագաթնակէտ մը եւ Յիսուսի մահուան Յիշատակատօնին՝ աւելի քան տասը միլիոն ներկաներով։ Ըստ փորձագիտանքի մը, Իրլանտան հրատարակիչներու 29 ամսեայ յաջորդական գագաթնակէտեր ունէր. Մեքսիկան՝ 80 ամսուան մէջ 78 գագաթնակէտեր, իսկ Ճաբոնը՝ յաջորդաբար 153 գագաթնակէտեր։
Ձեր Աստուածատուր Ազատութիւնը Լաւ Կերպով Գործածեցէք
22. Ի՞նչ է միտք գրգռող կարգ մը հարցումներուն նպատակը, զորս կրնանք մենք մեզի հարցնել։
22 Եթէ Եհովայի նուիրուած Վկաներէն մէկն էք, Աստուծոյ ձեզի տուած ազատութիւնը լաւ կերպով կը գործածէ՞ք։ Իւրաքանչիւրս կրնայ ինքն իրեն հարց տալ. ‘Արդեօք Աստուածատուր ազատութիւնս կը գործածե՞մ այնպիսի կերպով մը որ ոեւէ մէկը չգայթակղեցնեմ սխալ վարքովս։ Արդեօք խղճմտօրէն կը հնազանդի՞մ Կայսրին օրէնքներուն, թերեւս Աստուծոյ օրէնքը առաջին տեղը դնելով։ Արդեօք լիովին կը համագործակցի՞մ ժողովքի երէցներուն հետ։ Արդեօք իմ աստուածատուր ազատութիւնս լիովին կը գործածե՞մ բարի լուրի քարոզչութեան մէջ։ Արդեօք միշտ կ’աւելնա՞մ «Տէրոջը գործին մէջ»։ Արդեօք աշխարհային ասպարէզ մը կը հետապնդե՞մ, երբ կրնամ իմ աստուածատուր ազատութիւնս աւելի լաւ կերպով գործածել ծառայութիւնս ընդլայնելով, ժողովքին մէջ աւելի մեծ պատասխանատուութիւններու կամ լիաժամ ծառայութեան ցանկալով’։—Ա. Կորնթացիս 15։58
23. Ի՞նչ պէտք է ընենք որպէսզի մեր աստուածատուր ազատութեան նպատակէն չշեղինք։
23 Բոլորս ալ ‘ճաշակե՛նք ու տեսնե՛նք թէ Տէրը բարի է’։ (Սաղմոս 34։8) Իրեն ապաւինինք, իր օրէնքներուն համակերպինք եւ իր սուրբ անունը փառաւորենք նախանձախնդրաբար իր Թագաւորութիւնը ծանուցանելով։ Յիշենք որ «ան որ առատութիւնով կը սերմանէ՝ առատութիւնով պիտի հնձէ»։ (Բ. Կորնթացիս 9։6) Ուստի, ամբողջ սրտով ծառայենք Եհովայի եւ ցոյց տանք որ մեր աստուածատուր ազատութեան նպատակէն չենք շեղած։
Ինչպէ՞ս Պիտի Պատասխանէիք
◻ Աստուած ինչպի՞սի ազատութիւն ունի։
◻ Մարդկային ազատութիւնը ի՞նչ սահմանափակումներ ունի։
◻ Իրական ազատութիւնը ինչպէ՞ս կարելի դարձած էր։
◻ Ի՞նչ պէտք է ընենք աստուածատուր ազատութեան նպատակէն շեղելէ խուսափելու համար։
[Նկար՝ էջ 9]
Մարդկային ազատութիւնը կը սահմանափակուի ծանրութեան օրէնքին նման ազդակներով