Ո՛վ երիտասարդներ, որո՞ւ ուսուցումին կը հետեւիք
«Մէկ քանիները հաւատքէն պիտի ապստամբին եւ ... դեւերու ուսմունքներու ուշադրութիւն պիտի ընեն»։—Ա. ՏԻՄՈԹԷՈՍ 4։1
1. (ա) Երիտասարդները ի՞նչ ընտրութեան դիմաց կը գտնուին։ (բ) Եհովա ինչպէ՞ս կը սորվեցնէ։
ԵՐԻՏԱՍԱՐԴՆԵՐՈՒՆ հետեւեալ հարցումը կ’ուղղենք. Որո՞ւ ուսուցումին կը հետեւիք։ Ասիկա կը թելադրէ որ երիտասարդները ընելիք ընտրութիւն մը ունին. Աստուածային ուսուցումին ընդառաջել կամ դեւերու ուսմունքներու հետեւիլ։ Եհովա կը սորվեցնէ իր Խօսքին՝ Աստուածաշունչին, ինչպէս նաեւ՝ երկրի վրայ իր ներկայացուցիչներուն մատուցած ծառայութեան, միջոցաւ։ (Եսայեայ 54։13. Գործք 8։26–39. Մատթէոս 24։45–47) Բայց կը զարմանա՞ք որ դեւերն ալ կը սորվեցնեն։
2. Ինչո՞ւ կենսական է դեւերու ուսմունքներէն զգուշանալ, մանաւանդ մեր օրերուն։
2 Պօղոս առաքեալ գրեց. «Վերջին ատենները մէկ քանիները հաւատքէն պիտի ապստամբին եւ մոլորեցուցիչ ոգիներու ու դեւերու ուսմունքներու ուշադրութիւն պիտի ընեն»։ (Ա. Տիմոթէոս 4։1) Քանի որ «վերջին ատեններ»ուն մէջ կ’ապրինք, երբ Սատանան եւ իր դեւերը մասնաւորաբար գործունեայ են, կը հասկնաք ի՛նչու կը հարցնենք թէ Որո՞ւ ուսուցումին կը հետեւիք։ (Բ. Տիմոթէոս 3։1–5. Յայտնութիւն 12։7–12) Քանի որ Սատանան եւ իր դեւերը շատ խորամանկ են, անոնց գործառնութիւնը չափազանց մոլորեցուցիչ է, ուստի կենսական է որ այս հարցումը ուշադրութեամբ նկատի առնէք։—Բ. Կորնթացիս 11։14, 15
Դեւերը եւ Անոնց Ուսմունքները
3. Դեւերը որո՞նք են, եւ անոնց նպատակը ի՞նչ է, եւ անոնք ինչպէ՞ս կը ջանան զայն իրագործել։
3 Ժամանակ մը, դեւերը Եհովայի հրեշտակներն էին, բայց անոնք ըմբոստացան իրենց Ստեղծիչին դէմ եւ այսպիսով Սատանայի զօրավիգ կանգնեցան։ (Մատթէոս 12։24) Անոնց նպատակն է մարդիկը ապականել եւ զանոնք հեռացնել Աստուծոյ ծառայութենէն։ Ասիկա իրագործելու համար, դեւերը մարդկային ուսուցիչներ կը գործածեն, Եհովայի կողմէ դատապարտելի անձնասէր, անբարոյ ապրելակերպ մը խրախուսելու համար։ (Բաղդատել Բ. Պետրոս 2։1, 12–15։) Հաւատարիմ հրեշտակներուն դեւեր դառնալու կերպը աչքէ անցնելը ձեզի պիտի օգնէ անոնց ուսմունքները եւ այդ ուսմունքներուն խրախուսած ապրելակերպը բնորոշելու։
4. (ա) Նոյի օրերուն, անհնազանդ հրեշտակները ինչո՞ւ երկիր եկան։ (բ) Ջրհեղեղի ընթացքին ի՞նչ պատահեցաւ չար հրեշտակներուն եւ անոնց զաւակներուն։
4 Նոյի օրերուն, կարգ մը հրեշտակներ այնքան հրապուրուեցան մարդոց աղջիկներուն գեղեցկութենէն որ անոնք երկնքի մէջ իրենց դիրքը ձգեցին ու երկիր եկան։ Կիներու հետ սեռային միութենէն յառաջ եկաւ Նէֆիլիմներ կամ հսկաներ կոչուած խառնածին սերունդ մը։ Քանի որ բնական չէր որ հոգեղէն արարածներ մարդոց հետ բնակէին, հետեւաբար այդ անհնազանդ հրեշտակներուն արարքը համահաւասար էր միասեռականութեան զոր հետագային Սոդոմի մարդիկը եւ տղաքը գործեցին։ (Ծննդոց 6։1–4. 19։4–11. Յուդա 6, 7) Թէեւ հրեշտակներուն կենակիցները իրենց խառնածին զաւակներով կործանեցան Ջրհեղեղի ջուրերուն մէջ, բայց ամբարիշտ հրեշտակները իրենց նիւթականացած մարմիններէն ձերբազատուեցան ու երկինք վերադարձան, ուր անոնք Բանսարկու Սատանային դեւ ընկերները դարձան։—Բ. Պետրոս 2։4
5. Դեւերը ի՞նչպիսի արարածներ են, եւ անոնք ինչպէ՞ս կը փորձեն Աստուծոյ օրէնքները բեկանել։
5 Դեւերու ծագումին մասին այս պատմականը ընելէ ետք, հիմա կը հասկնա՞ք թէ անոնք ի՛նչպիսի արարածներ են։ Անոնք սեռային գետնի վրայ մոլորածներ եւ այս սեռի–խենդ աշխարհին աներեւոյթ ղեկավարներն են։ Թէեւ անոնք զրկուեցան որպէս մարդ նիւթականանալու կարողութենէն, սակայն հաճոյք կ’առնեն երկրի վրայ իրենց ապականած մարդոց սեռային խեղաթիւրումէն։ (Եփեսացիս 6։11, 12) Դեւերը կը ջանան մաքրութեան եւ բարոյականութեան մասին Եհովայի օրէնքները բեկանել, այնպէս ցոյց տալով որ անոնք անտեղիօրէն կաշկանդիչ են։ Այս ամբարիշտ հրեշտակները սեռային անբարոյութիւնը կը ջատագովեն որպէս բնական, հաճելի ապրելակերպ մը։
Դեւերու Ուսմունքներ Քաջալերել
6. Ինչո՞ւ մեզ պէտք չէ զարմացնէ որ դեւերը խորամանկ կերպով յառաջ կը քշեն իրենց ուսմունքները։
6 Մեզ պէտք չէ զարմացնէ որ դեւերը իրենց ուսմունքները խորամանկ կերպով յառաջ պիտի քշէին, քանի որ այս կերպը իրենց առաջնորդը՝ Բասարկու Սատանան՝ գործածեց Եւան խաբելու համար։ Յիշեցէք որ ան Եւային հետ խօսեցաւ որպէս թէ կը կամենար անոր օգնել։ «Իրա՞ւ Աստուած ըսաւ թէ ‘Պարտէզին որեւէ ծառէն պիտի չուտէք’», հարցուց Սատանան։ Ապա ան փորձեց խորամանկօրէն նսեմացնել Աստուծոյ ուսուցումը Եւային ըսելով որ եթէ ան արգիլուած ծառէն ուտէր, իրեն ի նպաստ պիտի ըլլար։ Բանսարկուն անոր ըսաւ. «Այն օրը որ անկէ ուտէք, աչքերնիդ պիտի բացուին եւ աստուածներու պէս պիտի ըլլաք՝ բարին ու չարը գիտնալով»։ (Ծննդոց 3։1–5) Այս կերպով Եւա հրապուրուեցաւ, այո, ան Աստուծոյ անհնազանդ ըլլալու մղուեցաւ։—Բ. Կորնթացիս 11։3. Ա. Տիմոթէոս 2։13, 14
7. Դեւերուն խորամանկ ուսմունքներուն ազդեցութիւնը ի՞նչ եղած է, եւ ասիկա ի՞նչ ազդարարութիւն կը հնչեցնէ։
7 Վերջերս ալ շատեր խաբուած են։ Դեւերը սեռային անբարոյութիւնը այնքան խորամանկութեամբ յառաջ քշած են որ զայն դատապարտողներէն շատեր սկսած են ընդունիլ զայն։ Օրինակի համար, Միացեալ Նահանգներու մէջ, համբաւաւոր խրատատու սիւնակագիր կին մը, չամուսնացած անձեր սեռային յարաբերութիւն ունենալու մասին հարցուցած նամակի մը պատասխանելով, գրեց. «Բնաւ չէի խորհեր որ այս հարցին մէջ ես ինծի պիտի հակասէի, բայց հիմա կը հաւատամ որ ամուսնութեան մասին լրջօրէն խորհող զոյգեր քանի մը շաբաթավերջեր միասնաբար պտոյտի պէտք է երթան, փորձելու համար թէ իրարու կը յարմարի՞ն»։ Ապա ան աւելցուց. «Չեմ հաւատար որ այսպիսի բան մը գրեցի»։ Այո, ան չհաւատաց որ պոռնկութիւն յանձնարարեց, բայց այս էր պարագան։ Որոշ է ուրեմն որ զգոյշ պէտք է ըլլանք որ դեւերու ուսմունքները Աստուծոյ կողմէ դատապարտելի սովորութիւններու նկատմամբ մեր տեսակէտը չխեղաթիւրեն։—Հռովմայեցիս 1։26, 27. Եփեսացիս 5։5, 10–12
8. (ա) Աստուածաշունչին մէջ «աշխարհ» բառը ինչպէ՞ս գործածուած է։ (բ) Ո՞վ կը ղեկավարէ աշխարհին, եւ Յիսուսի հետեւորդները ինչպէ՞ս պէտք է նկատեն աշխարհը։
8 Բնաւ պէտք չէ մոռնանք որ Սատանան է «այս աշխարհի իշխանը»։ Արդարեւ, Յովհաննէս առաքեալ ըսաւ որ ‘ամբողջ աշխարհ չարին իշխանութեան տակ է’։ (Յովհաննու 12։31. Ա. Յովհաննու 5։19, ՆԱ) Ճիշդ է որ Յիսուս երբեմն «աշխարհ» բառը գործածեց ամբողջ մարդկութեան ակնարկելու համար։ (Մատթէոս 26։13. Յովհաննու 3։16. 12։46) Սակայն, շատ աւելի յաճախ, ան «աշխարհ» բառը գործածեց Քրիստոնէական ժողովքէն դուրս գտնուող մարդկային ամբողջ կազմակերպուած ընկերութեան ակնարկելու համար։ Յիսուս ըսաւ որ իր հետեւորդները ‘աշխարհէն (մարդկային անիրաւ ընկերութենէն) չեն’ եւ թէ քանի որ անոնք աշխարհէ չեն, աշխարհ զիրենք պիտի ատէր։ (Յովհաննու 15։19. 17։14–16) Աստուածաշունչը նաեւ զգուշացուց մեզ որ Սատանայի կողմէ կառավարուած այս աշխարհին բարեկամները ըլլալէ խուսափինք։—Յակոբու 4։4
9, 10. (ա) Աշխարհային ո՞ր բաները սեռային անպատշաճ ցանկութիւն կ’արթնցնեն։ (բ) Ինչպէ՞ս կարելի է գիտնալ թէ աշխարհի զբօսանքներուն ետին եղողը ո՛վ է։
9 Յովհաննէս առաքեալ հետեւեալ յորդորը տուաւ. «Մի՛ սիրէք աշխարհը, ոչ ալ ինչ որ աշխարհի մէջ է»։ Ան նաեւ ըսաւ. «Ամէն բան որ աշխարհի մէջ է՝ մարմնի ցանկութիւնը ու աչքերու ցանկութիւնը եւ այս կեանքին ամբարտաւանութիւնը՝ Հօրմէն չէ, հապա այս աշխարհէն է»։ (Ա. Յովհաննու 2։15, 16) Պահ մը խորհեցէք. աշխարհի մէջ ի՞նչ կայ որ սխալ ցանկութիւն կը յառաջացնէ, ինչպէս ապօրինի սեռային յարաբերութիւնը։ (Ա. Թեսաղոնիկեցիս 4։3–5) Ի՞նչ կրնանք ըսել աշխարհի շատ մը երաժշտութիւններուն մասին։ Գալիֆորնիոյ դատաքննիչ պաշտօնեայ կին մը ըսաւ. «Երաժշտութիւնը հիմնականօրէն կը սորվեցնէ որ մեր ծնողներուն մտիկ ընելու պէտք չունինք եւ թէ մեր կեանքը պէտք է ապրինք ի՛նչպէս կ’ուզենք»։ Այսպիսի երաժշտութեան տուած ուսուցումին աղբիւրը ծանօ՞թ է ձեզի։
10 Մի՛ մոռնաք որ Սատանան Եւայի ըսաւ. ‘Առիթը կը փախցնես։ Կեանքդ վարէ քու ուզած կերպովդ։ Դուն քեզի որոշէ թէ ի՛նչը լաւ է եւ ի՛նչը՝ գէշ։ Աստուծոյ մտիկ ընելու պէտք չունիս’։ (Ծննդոց 3։1–5) Այսօր աշխարհի շատ մը երաժշտութիւններուն մէջ, նոյնանման պատգամ մը չե՞նք գտներ։ Բայց դեւերը միայն երաժշտութեան միջոցաւ չեն սորվեցներ։ Անոնք կը գործածեն նաեւ հեռատեսիլի առեւտրական յայտագիրներ, շարժապատկերներ եւ պատկերիզներ։ Ինչպէ՞ս։ Աշխարհի հաղորդակցական խողովակները այնպիսի ժամանցներ կը ներկայացնեն, որոնք այն տպաւորութիւնը կու տան թէ Աստուծոյ բարոյական ուսուցումները կաշկանդիչ են։ Պոռնկութեան վրայ շեշտ դնելով, անոնք զայն կը ջատագովեն եւ կը ներկայացնեն որպէս ցանկալի բան մը։
11. Հեռատեսիլը բարոյական գետնի վրայ ի՞նչ կը սորվեցնէ։
11 Պարբերաթեր մը (U.S.News & World Report) նշեց. «1991–ին, [Ամերիկայի] պատկերասփիւռի երեք կայանները աւելի քան 10,000 սեռային արկածախնդրութիւններ ցուցադրեցին ամենէն շատ դիտուած ժամերուն. ամուսնացած անձերու միջեւ սեռային յարաբերութեան իւրաքանչիւր տեսարանի դէմ անոնք ամուսնութենէ դուրս 14 սեռային տեսարաններ ցոյց տուին»։ Հեռատեսիլին սորվեցուցած բաներուն մասին ի՞նչ կրնանք ըսել, երբ մէկ տարուան ընթացքին, 9,000–է աւելի ապօրինի միջադէպեր կը ցուցադրուին ամենէն շատ դիտուած ժամերուն։ Պէրի Ս. Սափոլսքի որ իր մասնակցութիւնը բերաւ «Սեռ՝ Հեռատեսիլի Ամենէն Շատ Դիտուած Ժամուն. 1979–ն Բաղդատած 1989–ին Հետ» տեղեկագրութեան մէջ կ’ըսէ. «Եթէ պատանի մը տարիներ հեռատեսիլ դիտէ, ուր մարդիկ քծնող կամ բացէ ի բաց սեռային ընթացք ունին, տարիներու ընթացքին այս հազարաւոր պատկերները իրեն պիտի սորվեցնեն որ սեռը հաճելի բան մըն է եւ առանց հետեւանքի»։ Կասկած չկայ այս մասին. աշխարհի զբօսանքները երիտասարդներուն կը սորվեցնեն թէ օրէնքը գոյութիւն չունի, թէ պոռնկութիւնը ընդունելի է եւ թէ Աստուծոյ կողմէ դատապարտելի կերպով ապրիլը ոչ մէկ գէշ հետեւանքներ ունի։—Ա. Կորնթացիս 6։18. Եփեսացիս 5։3–5
12. Աշխարհի զբօսանքները ինչպէ՞ս սպառնալիք մըն են մանաւանդ Քրիստոնեայ երիտասարդներուն համար։
12 Աշխարհի երաժշտութիւնը, շարժապատկերները, պատկերիզներն ու հեռատեսիլը ծրագրուած են երիտասարդները հրապուրելու համար։ Անոնք դեւերու պիղծ ուսմունքները կը փոխանցեն։ Բայց ասիկա մեզ պէ՞տք է զարմացնէ։ Պահ մը խորհեցէք. եթէ սուտ կրօնքը եւ քաղաքականութիւնը Սատանայի աշխարհին մէկ մասն են, իրապէս ալ են, իմաստ ունի՞ հաւատալ թէ աշխարհի կողմէ մատուցուած զբօսանքները դիւային ազդեցութենէ զերծ են։ Մանաւանդ դուք, ո՛վ երիտասարդներ, արթուն պէտք է կենաք որ ձեզ շրջապատող «աշխարհը ձեզ իր կաղապարին մէջ չառնէ»։—Հռովմայեցիս 12։2, Նոր Կտակարանը Արդի Անգլերէնով, Ֆիլիբբս։
Անձնաքննութիւն Կատարեցէք
13. Ի՞նչ անձնաքննութիւն պէտք է կատարենք։
13 Ոչ միայն ձեր խօսակցութեամբ, այլ նաեւ ձեր արարքներով ալ կ’որոշուի թէ դուք որո՛ւ ուսուցումներուն կը հետեւիք։ (Հռովմայեցիս 6։16) Ուստի, դուք ձեզի հարց տուէք. ‘Իմ կեցուածքս եւ ընթացքս անպատշաճօրէն ազդուա՞ծ են աշխարհի քարոզչութեան խողովակներէն իմ սորվածներէս։ Կրնա՞յ ըլլալ որ դեւերու ուսմունքները սկսած են կեանքէս ներս մուտք գործել’։ Այս հարցումներուն պատասխանելու համար, Աստուածաշունչը ուսումնասիրելու, Քրիստոնէական ժողովներու յաճախելու եւ ուրիշներուն հետ Աստուծոյ Թագաւորութեան մասին խօսելու ձեր անցուցած ժամանակը բաղդատեցէք հեռատեսիլ դիտելու, երաժշտութիւն մտիկ ընելու, ձեր նախասիրած մարմնամարզանքին մասնակցելու, կամ նման գործունէութիւններու ձեր տրամադրած ժամանակին հետ։ Քանի որ շատ բան, արդարեւ ձեր կեանքն իսկ, վտանգի տակ է, ուրեմն պարկեշտօրէն անձնաքննութիւն մը կատարեցէք։—Բ. Կորնթացիս 13։5
14. Ի՞նչ բան պիտի ազդէ մեր հոգեւոր առողջութեան, եւ ո՞ր լուրջ իրողութիւնը ի մտի պէտք է ունենանք։
14 Դուք լաւ գիտէք որ ձեր կերած նիւթական կերակուրը պիտի ազդէ ձեր ֆիզիքական առողջութեան։ Նմանապէս, ձեր հոգեւոր առողջութիւնը կ’ազդուի այն բաներէն որոնցմով կը կերակրէք ձեր միտք ն ու սիրտը։ (Ա. Պետրոս 2։1, 2) Իրապէս ի՛նչ բանով հետաքրքրուելու հարցին մէջ կրնաք թերեւս դուք ձեզ խաբել, բայց չէք կրնար խաբել մեր Դատաւորը՝ Յիսուս Քրիստոս։ (Յովհաննու 5։30) Ուստի, դուք ձեզի հարց տուէք. ‘Եթէ Յիսուս երկրի վրայ ըլլար եւ երբ սենեակս մտնէր եւ լսէր այն երաժշտութիւնը զոր մտիկ կ’ընեմ, կամ տեսնէր ի՛նչ որ կը դիտեմ, արդեօք պիտի շփոթէ՞ի’։ Սակայն լուրջ իրողութիւնը այդ է որ Յիսուս կը դիտէ մեզ եւ գիտէ մեր արարքները։—Յայտնութիւն 3։15
Դեւերու Ուսմունքներուն Ընդդիմացէք
15. Քրիստոնեաները ինչո՞ւ ծանր պէտք է պայքարին դեւերու ուսմունքներուն ընդդիմանալու համար։
15 Դեւերը շատ մեծ ճնշում կը բանեցնեն, որպէսզի երիտասարդները անոնց ուսմունքներուն հետեւին։ Այս չար ոգիները անմիջական բաւարարութիւն կը մատուցանեն՝ հաճելի ժամանց եւ հաճոյք։ Անցեալին, Մովսէս, Փարաւոնի տան կարկառուն մէկ անդամը ըլլալով, «մեղքին ժամանակաւոր զուարճութիւնը վայելել»ու կարելիութիւնը մերժեց Աստուծոյ հաճելի ըլլալու համար։ (Եբրայեցիս 11։24–27) Դիւրին չէ մերժել ի՛նչ որ դեւերը կը մատուցանեն, ուրեմն շիտակը ընելու համար ծանր պայքար պէտք է մղէք։ Մանաւանդ որ մեղք ժառանգած ենք եւ մեր սրտերը չար բաներ ընելու կը տենչան։ (Ծննդոց 8։21. Հռովմայեցիս 5։12) Մեղաւոր հակումներու պատճառաւ, նոյնիսկ Պօղոս առաքեալ իր անձին հետ խիստ վարուեցաւ թոյլ չտալու համար որ իր մարմնաւոր ցանկութիւնները տիրապետեն իրեն։—Ա. Կորնթացիս 9։27. Հռովմայեցիս 7։21–23
16. Պատանիները ինչպէ՞ս կրնան ընդդիմանալ անբարոյ վարքի առաջնորդող ճնշումներուն։
16 Թէեւ կրնայ ըլլալ որ փորձուիք ‘չարութիւն ընելու համար բազմութեան հետեւիլ’, սակայն Աստուած կրնայ օգնել ձեզի որ ձեր շրջապատի սխալ ընթացքին հետեւելու ճնշումներուն ընդդիմանաք։ (Ելից 23։2. Ա. Կորնթացիս 10։13) Սակայն, Աստուծոյ տուած ուղղութիւններուն պէտք է հետեւիք, ձեր սրտին մէջ իր խօսքերուն վրայ գուրգուրալով։ (Սաղմոս 119։9, 11) Պէտք է գիտակցիք որ երբ երիտասարդ մը մեկուսանայ, թերեւս իր մէջ սեռային ցանկութիւն զարգանայ եւ մղէ զինք որ Աստուծոյ օրէնքը բեկանէ։ «Երբ ընկերոջս հետ առանձին ըլլամ, մարմինս բան մը կը փափաքի, իսկ ուղեղս ուրիշ բան մը կ’ըսէ ինծի», խոստովանեցաւ պատանուհի մը։ Ուստի, գիտցէք ձեր սահմանները եւ գիտակցեցէք որ սիրտը խաբեբայ է։ (Երեմեայ 17։9) Մի՛ առանձնանաք։ (Առակաց 18։1) Ձեր գուրգուրանքի արտայայտութիւններուն սահմաններ դրէք։ Իսկ մանաւանդ, միայն Եհովան սիրողներուն եւ անոր օրէնքներուն հանդէպ խոր յարգանք ունեցողներուն հետ մտերիմ եղէք։—Սաղմոս 119։63. Առակաց 13։20 Ա. Կորնթացիս 15։33
17. Ի՞նչ բան կրնայ օգնել Քրիստոնեայ երիտասարդներուն որ դեւերու ուսմունքներուն ընդդիմանան։
17 Ձեզ հոգեւորապէս զօրացնելու մտքով պատրաստուած Քրիստոնէական գրականութիւնները ուշադրութեամբ սերտեցէք։ Օրինակի համար, Երիտասարդները կը Հարցնեն—Գործնական Պատասխաններ խորագրով գիրքը (Անգլ.), կամ՝ Դուք Կրնաք Յաւիտեան Ապրիլ Երկրային Դրախտի մը մէջ գրքին «Շիտակը Ընելու Պայքարը» վերնագրով գլուխը նկատի առէք։ Թող որ հոն տրուած սուրբ գրային խրատները ձեր մտքին ու սրտին թափանցեն. անոնք պիտի զօրացնեն ձեզ։ Պէտք չէ մոռնաք այն իրողութիւնը թէ դեւերուն կողմէ ղեկավարուած այս աշխարհին մէջ դիւրին չէ շիտակը ընել։ Ուստի ծանր պայքար մղեցէք։ (Ղուկաս 13։24) Ձեր հոգեւորականութիւնը զօրացուցէք։ Մի՛ ընդօրինակէք տկար, վախկոտ անհատները որոնք բազմութեան կը հետեւին։
Աստուածային Ուսուցումէն Օգտուեցէք
18. Աստուածային ուսուցումին հետեւելուն կարգ մը օգուտները ի՞նչ են։
18 Մի մոռնաք որ Եհովայի ուսուցումին հետեւելով, որեւէ արժէքաւոր բան պիտի չկորսնցնէք։ Ան իրապէս կը սիրէ ձեզ եւ անոր համար է որ ‘ձեզի օգտակար եղածը կը սորվեցնէ’։ (Եսայեայ 48։17) Ուստի, Եհովայի ուսուցումին հետեւեցէք, դուք ձեզ զերծ պահելով փճացած խղճմտանքէ, արժանապատուութեան կորուստէ, անփափաքելի յղութենէ, սեռային գետնի վրայ տարափոխիկ ախտերէ, կամ նման ողբերգութիւններէ։ Եհովա կ’ուրախանայ, երբ իր ծառաները պատասխան մը հայթայթեն Սատանայի մարտահրաւէրին թէ մարդիկ փորձի ներքեւ Աստուծոյ հաւատարիմ պիտի չմնան։ (Յոբ 1։6–12) Եթէ Եհովայի հաւատարիմ ըլլալով իր սիրտը ուրախացնէք, այս աշխարհին վրայ դատաստան ի գործ դրուելու ատեն պիտի վերապրիք, երբ բոլոր անոնք որոնք իր օրէնքները կ’անարգեն՝ պիտի բնաջնջուին։—Առակաց 27։11. Ա. Կորնթացիս 6։9, 10. Ա. Յովհաննու 2։17
19. Ի՞նչ արժէք ունի Եհովայի ուսուցումին օգուտները գնահատողներուն հետ ընկերակցիլը։
19 Եթէ սերտօրէն ընկերակցիք անոնց հետ, որոնք կը գնահատեն ի՛նչ որ Եհովա ըրած է իրենց ի նպաստ, կրնաք անոնց փորձառութիւններէն սորվիլ։ Նախապէս թմրեցուցիչի մոլի եւ անբարոյ եղած կին մը բացատրեց. «Եթէ ես Եհովայի մտիկ ըրած չըլլայի, մեռած պիտի ըլլայի։ Այդ անհատը որու հետ պիտի ամուսնանայի, ԱԴԱ–է [AIDS] մահացաւ։ Նախկին բոլոր աշխարհային ընկերներս ԱԴԱ–էն մեռան կամ մեռնելու վրայ են։ Յաճախ զիրենք կը տեսնեմ փողոցը եւ ամէն օր Եհովայի շնորհակալութիւն կը յայտնեմ իր օրէնքներուն համար, որոնք կը ղեկավարեն իր ծառաները եւ մեզ սուրբ կը պահեն, եթէ զանոնք կիրարկենք։ Կեանքիս մէջ ոչ մէկ ատեն այսքան ուրախ, գոհ եւ ապահով չեմ զգացած»։ Արդարեւ, Եհովայի ուսուցումին հետեւիլը միշտ օգտակար է մեզի համար։
Շիտակ Ընտրութիւն Ըրէք
20, 21. (ա) Երիտասարդները ո՞ր երկու ընտրութիւնները ունին։ (բ) Աստուածային ուսուցումին հետեւիլը մնայուն ի՞նչ օգուտ պիտի բերէ։
20 Ո՛վ երիտասարդներ, հետեւեալ յորդորը կու տանք ձեզի. Եհովայի ծառայելով, շիտակ ընտրութիւն ըրէք։ Ապա վճռեցէք այդ որոշումին կառչած մնալ։ (Յեսուայ 24։15) Իրականութեան մէջ, երկուքէն մէկը պիտի ընտրէք։ Յիսուս ըսաւ որ լայն եւ ընդարձակ ճամբայ մը կայ. դիւրին ճամբան, որու մէջ ձեզի հաճելի եղածը կ’ընէք, որ մահուան, կործանումի կը տանի։ Միւս ճամբան նեղ է. այս անբարոյ, դեւերու կողմէ ղեկավարուած աշխարհին մէջ դժուար է այդ ճամբէն քալել։ Բայց այդ ճամբան բռնողները վերջապէս պիտի հասնին Աստուծոյ հոյակապ նոր աշխարհին։ (Մատթէոս 7։13, 14) Ո՞ր ճամբան պիտի բռնէք։ Որո՞ւ ուսուցումին պիտի հետեւիք։
21 Եհովան ընտրութիւնը ձեզի կը ձգէ։ Ան չի ջանար ստիպել ձեզ որ իրեն ծառայէք։ «Կեանքն ու մահը ... ձեր առջեւ դրի», ըսաւ Աստուծոյ մարգարէն՝ Մովսէս։ Ապա յորդորեց. «Կեանքը ընտրէ»։ Այդ ընտրութիւնը կ’ըլլայ ‘Եհովա Աստուածդ սիրելով, անոր խօսքին հնազանդութիւն ընելով եւ անոր յարելով’։ (Բ. Օրինաց 29։2. 30։19, 20) Ուրեմն, իմաստութեամբ ընտրեցէք աստուածային ուսուցումին հետեւիլ եւ Աստուծոյ փառաւոր նոր աշխարհին մէջ անվերջ կեանքը վայելեցէք։
Ինչպէ՞ս Պիտի Պատասխանէիք
◻ Դեւերը որո՞նք են, եւ անոնք ի՞նչ կը սորվեցնեն։
◻ Այսօր դեւերը իրենց ուսմունքները ինչպէ՞ս յառաջ կը մղեն։
◻ Ինչպէ՞ս կարելի է դեւերուն ուսմունքներուն ընդդիմանալ։
◻ Եհովայի ուսուցումին հետեւելու օգուտները ի՞նչ են։
[Նկար՝ էջ 31]
Եթէ Յիսուս լսէր ձեր նախասիրած երաժշտութիւնը, պիտի շփոթէ՞իք։