Եհովայի ընտանիքը թանկագին միութիւն կը վայելէ
«Ահա ո՜րչափ բարի ու ո՜րչափ վայելուչ է որ եղբայրները իրարու հետ միաբանութեամբ բնակին»։—ՍԱՂՄՈՍ 133։1
1. Ներկայիս շատ մը ընտանիքներու կացութիւնը ի՞նչ է։
Ներկայիս ընտանեկան կառոյցը տագնապի մէջ է։ Շատ մը ընտանիքներու մէջ, ամուսնական կապը խզուելու վրայ է։ Երթալով սովորական կը դառնայ ամուսնալուծումը, իսկ ամուսնալուծուած զոյգերուն զաւակները մեծ տխրութեան մէջ են։ Միլիոնաւոր ընտանիքներ կան որոնք տխուր եւ անմիաբան են։ Սակայն, կա՛յ ընտանիք մը որ իրական ուրախութեան եւ միութեան ինչ ըլլալը գիտէ։ Անիկա Եհովա Աստոուծոյ տիեզերական ընտանիքն է։ Անոր մէջ, միլիառաւոր անտեսանելի հրեշտակներ, աստուածային կամքին հետ ներդաշնակ, իրենց պարտականութիւնը կը կատարեն։ (Սաղմոս 103։20, 21) Սակայն, երկրի վրայ ալ կա՞յ ընտանիք մը որ այսպիսի միութիւն կը վայելէ։
2, 3. (ա) Հիմա ո՞վ Աստուծոյ տիեզերական ընտանիքին մաս կը կազմէ եւ ներկայիս Եհովայի բոլոր Վկաները ի՞նչ բանի կրնանք նմանցնել։ (բ) Ո՞ր հարցումները նկատի պիտի առնենք։
2 Պօղոս առաքեալ գրեց. «ծունկի գալով մեր Տէր Յիսուս Քրիստոսին Հօրը առջեւ, ուրկէ ամէն ազգատոհմ երկնքի մէջ ու երկրի վրայ անուն կ’առնէ»։ (Եփեսացիս 3։14, 15) Երկրի վրայ ամէն ազգատոհմ իր անունը կը պարտի Աստուծոյ, քանի որ ինքն է Ստեղծիչը։ Թէեւ երկնքի մէջ մարդկային ընտանիքներ չկան, բայց փոխաբերական իմաստով, Աստուած ամուսնացած է իր երկնային կազմակերպութեան հետ, իսկ Յիսուս երկնքի մէջ իրեն միացած հոգեւոր հարս մը պիտի ունենայ։ (Եսայեայ 54։5. Ղուկաս 20։34, 35. Ա. Կորնթացիս 15։50. Բ. Կորնթացիս 11։2) Երկրի վրայ հաւատարիմ օծեալները հիմա Աստուծոյ տիեզերական ընտանիքին մաս կը կազմեն, եւ Յիսուսի «ուրիշ ոչխաներ»ը անոր ապագացու անդամներն են։ (Յովհաննու 10։16. Հռովմայեցիս 8։14–17. Դիտարան 15 Յունուար 1996, էջ 31) Սակայն, Եհովայի Վկաները որպէս ամբողջութիւն, ներկայիս կարելի է նմանցնել համաշխարհային միացած ընտանիքի մը։
3 Դուք ալ Աստուծոյ ծառաներուն միջազգային հոյակապ ընտանիքին մաս կը կազմէ՞ք։ Եթէ այո, ուրեմն մեծագոյն օրհնութիւններէն մէկը կը վայելէք։ Միլիոնաւոր անհատներ կը վկայեն որ Եհովայի համերկրային ընտանիքը՝ իր տեսանելի կազմակերպութիւնը՝ պայքարներու եւ անմիաբանութեան աշխարհային անապատին մէջ, խաղաղութեան եւ միութեան ովասիս մըն է։ Եհովայի համաշխարհային ընտանիքին միութիւնը ինչպէ՞ս կարելի է նկարագրել։ Իսկ ի՞նչ ազդակներ կը նպաստեն այս միութեան։
Ո՜րքան Բարի եւ Ո՜րքան Վայելուչ Է
4. Ձեր բառերով ըսէք որ 133–րդ Սաղմոսը ի՞նչ կ’ըսէ եղբայրական միութեան մասին։
4 Սաղմոսերգու Դաւիթ խորապէս կը գնահատէր եղբայրական միութիւնը։ Ան նոյնիսկ ներշնչման ներքեւ անոր մասին երգեց։ Զինք երեւակայեցէք իր քնարին հետ որ կ’երգէ. «Ահա ո՜րչափ բարի եւ ո՜րչափ վայելուչ է որ եղբայրները իրարու հետ միաբանութեամբ բնակին։ Այն ազնիւ իւղին պէս է, որ գլխուն վրայէն մօրուքին վրայ, Ահարոնին մօրուքին վրայ վազեց ու մինչեւ անոր զգեստներուն ծայրը իջաւ։ Սիօնի լեռներուն վրայ իջած Հերմոնի շաղին պէս է, վասնզի Տէրը հոն հաստատեց օրհնութիւնը ու կեանքը մինչեւ յաւիտեան»։—Սաղմոս 133։1–3
5. Սաղմոս 133։1, 2–ի հիման վրայ, ի՞նչ բաղդատութիւն կարելի է ընել Իսրայելացիներուն եւ Աստուծոյ արդի ծառաներուն միջեւ։
5 Այս խօսքերը կիրարկուեցան Աստուծոյ վաղեմի ժողովուրդին՝ Իսրայելացիներուն՝ վայելած եղբայրական միութեան։ Երբ իրենց տարեկան երեք տօներուն առիթով Երուսաղէմ կ’երթային, հոն միաբանութեամբ իրարու հետ կը բնակէին։ Թէեւ տարբեր ցեղերէ հաւաքուած կ’ըլլային, բայց մէկ ընտանիք կը կազմէին։ Իրար հետ գտնուիլը լաւ ազդեցութիւն մը կ’ունենար իրենց վրայ, ճիշդ հաճելի բուրող օծանելիքի նման։ Երբ այսպիսի իւղ մը Ահարոնի գլխուն վրայ թափուէր, անիկա կը հոսէր անոր մօրուքէն վար, մինչեւ իր զգեստներուն օձիքին վրայ։ Իրարու հետ հաւաքուած ըլլալը Իսրայելացիներուն վրայ լաւ ազդեցութիւն մը կ’ունենար եւ ասիկա զգալի կ’ըլլար հոն հաւաքուած ամբողջ ժողովուրդին վրայ։ Թիւրիմացութիւնները կը հարթուէին եւ միութիւն կը յառաջանար։ Ներկայիս նոյնանման միութիւն գոյութիւն ունի Եհովայի համերկրային ընտանիքին մէջ։ Իրար հետ կանոնաւորաբար ընկերակցիլը հոգեւոր գետնի վրայ լաւ ազդեցութիւն մը կ’ունենայ անոր անդամներուն վրայ։ Որեւէ թիւրիմացութիւն կամ դժուարութիւն կը հարթուի, երբ Աստուծոյ Խօսքին խրատները կիրարկուին։ (Մատթէոս 5։23, 24. 18։15–17) Եհովայի ծառաները մեծապէս կը գնահատեն իրենց եղբայրական միութենէն քաղուած փոխադարձ քաջալերութիւնը։
6, 7. Իսրայէլի միութիւնը ինչպէ՞ս Հերմոն Լերան շաղին պէս էր, իսկ ներկայիս Աստուծոյ օրհնութիւնը ո՞ւր կարելի է գտնել։
6 Իսկ Իսրայէլի միաբանութեամբ բնակիլը ինչպէ՞ս Հերմոնի շաղին պէս էր։ Քանի որ այս լերան գագաթը ծովու մակերեսէն 2,800 մ. բարձր է, գրեթէ ամբողջ տարին ձիւնով ծածկուած է։ Հերմոնի ձիւնապատ գագաթը, գիշերուան շոգիները կը խտացնէ եւ այս կերպով առատ շաղ արտադրելով բուսականութիւնը կը պահպանէ երկարատեւ չոր եղանակէն։ Հերմոնի լեռնաշղթայէն եկած պաղ օդի հոսանքները այս շոգիները կը տանին մինչեւ հիւսիս, Երուսաղէմի շրջանը, ուր անոնք խտանալով շաղի կը վերածուին։ Ուստի սաղմոսերգուն հասկնալով խօսեցաւ «Սիօնի լեռներուն վրայ իջած Հերմոնի շաղին» մասին։ Եհովայի երկրպագուներու ընտանիքին միաբանութեան յառաջացուցած թարմացուցիչ ազդեցութեան մասին ի՜նչ գեղեցիկ վերյիշեցում մը։
7 Քրիստոնէական ժողովքը հաստատուելէ առաջ, Սիօն, կամ Երուսաղէմ ճշմարիտ պաշտամունքի օրրանն էր։ Քանի որ Աստուած պատուիրած էր որ հոն ըլլար օրհնութիւնը։ Քանի որ բոլոր օրհնութիւններու Աղբիւրը այլաբանօրէն Երուսաղէմի սրբարանին մէջ կը բնակէր, օրհնութիւնները անկէ պիտի բխէին։ բայց, քանի որ այլեւս ճշմարիտ պաշտամունքը վայրէ մը կախեալ չէ, Աստուծոյ ծառաներուն օրհնութիւնը, սէրը եւ միութիւնը համայն երկրի վրայ կարելի է գտնել ներկայիս։ (Յովհաննու 13։34, 35) Այս միութեան նպաստող ազդակներէն ոմանք ի՞նչ են։
Միութիւն Յառաջացնող Ազդակներ
8. Յովհաննու 17։20, 21–ի մէջ միութեան մասին ի՞նչ կը սորվինք։
8 Եհովայի երկրպագուներու միութիւնը հիմնուած է Աստուծոյ Խօսքին եւ Յիսուս Քրիստոսի ուսուցումին ճշգրիտ հասկացողութեան եւ հնազանդութեան վրայ։ Ճշմարտութեան համար վկայելու եւ զոհաբերական մահով մեռնելու համար Եհովա իր Որդին երկիր ղրկելով, Քրիստոնէական միացած ժողովքի կազմութեան ճամբան բացուեցաւ։ (Յովհաննու 3։16. 18։37) Բացայայտ էր որ անոր անդամներուն միջեւ իրական միութիւն գոյութիւն պիտի ունենար, քանի որ Յիսուս աղօթեց. «Միայն անոնց համար չեմ աղաչեր, այլ բոլոր անոնց համար ալ, որոնք անոնց խօսքով ինծի պիտի հաւատան. որպէսզի ամէնքն ալ մէկ ըլլան, ինչպէս դո՛ւն, ո՛վ Հայր, իմ մէջս՝ ու ես քու մէջդ, որպէսզի անոնք ալ մեր մէջ մէկ ըլլան եւ աշխարհ հաւատայ թէ դուն ղրկեցիր զիս»։ (Յովհաննու 17։20, 21) Յիսուսի հետեւորդները, այնպիսի միութեան մը հասան որ գոյութիւն ունի Աստուծոյ եւ իր Որդւոյն միջեւ։ Ասիկա Աստուծոյ Խօսքին եւ Յիսուսի ուսուցումներուն ենթարկուելուն հետեւանքն էր։ Ներկայիս ալ, նոյն կեցուածքը, Եհովայի համերկրային ընտանիքին միութեան նպաստող գլխաւոր ազդակներէն մէկն է։
9. Եհովայի ժողովուրդին միութեան մէջ, սուրբ հոգին ի՞նչ դեր ունի։
9 Եհովայի ժողովուրդը միացնող ուրիշ ազդակ մը՝ իր սուրբ հոգին կամ գործօն ոյժն է։ Անիկա կ’օգնէ մեզի որ Եհովայի Խօսքին յայտնաբերուած ճշմարտութիւնը հասկնանք եւ միաբանութեամբ իրեն ծառայենք։ (Յովհաննու 16։12, 13) Սուրբ հոգին մեզի կ’օգնէ որ անմիաբանութիւն յառաջացնող մարմնաւոր գործերէն խուսափինք, ինչպէս՝ կռիւ, նախանձ, բարկութիւն եւ վէճեր։ Փոխարէն, Աստուծոյ հոգին մեր մէջ կը յառաջացնէ սիրոյ, ուրախութեան, խաղաղութեան, երկայնամտութեան, քաղցրութեան, բարութեան, հաւատարմութեան, հեզութեան եւ ժուժկալութեան միացնող պտուղները։—Գաղատացիս 5։19–23
10. (ա) Ի՞նչ զուգահեռ կարելի է տեսնել մարդկային միացած ընտանիքի մը մէջ գոյութիւն ունեցող սիրոյ եւ Եհովայի նուիրուածներու միջեւ գոյութիւն ունեցող սիրոյ մէջ։ (բ) Կառավարիչ Մարմնի անդամներէն մէկը, իր հոգեւոր եղբայրներուն հետ ժողվուելու մասին իր զգացումները ի՞նչպէս արտայայտեց։
10 Միաբան ըմտանիքի մը անդամները իրար կը սիրեն եւ իրարու հետ ըլլալը իրենց ուրախութիւն կը պատճառէ։ Նմանապէս, Եհովայի երկրպագուներու միացած ընտանիքին մէջ գտնուողները կը սիրեն Զինք, իր Որդին եւ իրենց հաւատակիցները։ (Մարկոս 12։30. Յովհաննու 21։15–17. Ա. Յովհաննու 4։21) Ճիշդ ինչպէս որ մարմնաւոր ու սիրալիր ընտանիքի մը անդամները միասնաբար ճաշելէն հաճոյք կը զգան, նոյնպէս ալ Աստուծոյ նուիրուած անհատները Քրիստոնէական ժողովներուն, համաժողովներուն ներկայ ըլլալով կ’ուրախանան եւ լաւ ընկերակցութենէն ու հոգեւոր բարձրորակ կերակուրէն կ’օգտուին։ (Մատթէոս 24։45–47. Եբրայեցիս 10։24, 25) Եհովայի Վկաներու Կառավարիչ Մարմնի անդամներէն մէկը անգամ մը հետեւեալ կերպով բացատրեց. «Ինծի համար, եղբայրներուն հետ հաւաքուիլը կեանքիս մեծագոյն հաճոյքներէն մէկն է եւ քաջալերութեան աղբիւր մըն է։ Եթէ կարելի ըլլայ, կը սիրեմ Թագաւորութեան Սրահ առաջին հասնողներէն եւ վերջին մեկնողներէն ըլլալ։ Երբ Աստուծոյ ծառաներուն հետ կը խօսիմ, ներքին ուրախութիւն մը կը զգամ։ Երբ անոնց մէջ կը գտնուիմ, ընտանիքիս հետ հանգիստ կը զգամ»։ Դուք ալ նոյնպէս կը զգա՞ք։—Սաղմոս 27։4
11. Եհովայի Վկաները ո՞ր գործին մէջ մասնաւորաբար ուրախութիւն կը գտնեն եւ երբ Աստուծոյ ծառայութիւնը մեր կեանքին առանցքը դարձնենք, արդիւնքը ի՞նչ կ’ըլլայ։
11 Միացած ընտանիքի մը համար միասնաբար աշխատիլը ուրախութիւն կը պատճառէ։ Եհովայի երկրպագուներու ընտանիքին մէջ եղողներուն համար ալ ուրախութիւն է միասնաբար քարոզել ու աշակերտել։ (Մատթէոս 24։14. 28։19, 20) Անոր կանոնաւորաբար մասնակցիլը Եհովայի ուրիշ Վկաներու հետ մեզ աւելի կը մտերմացնէ։ Աստուծոյ ծառայութիւնը մեր կեանքին առանցքը դարձնելը եւ իր ժողովուրդին բոլոր գործունէութիւններուն թիկունք կանգնիլն ալ մեր մէջ ընտանեկան հոգի կը յառաջացնէ։
Աստուածպետական Կարգապահութիւնը Անհրաժեշտ Է
12. Ուրախ եւ միացած ընտանիքի մը յատկանիշները ի՞նչ են, իսկ առաջին դարու Քրիստոնէական ժողովքներուն մէջ ի՞նչ կարգադրութիւն միութիւն յառաջացուց։
12 Ընտանիք մը որ զօրաւոր բայց սիրալիր գլխաւորութիւն մը ունի ու կարգապահ է, հաւանական է որ միացած եւ ուրախ ըլլայ։ (Եփեսացիս 5։22, 33. 6։1) Եհովա անդորր կարգապահութեան Աստուած մըն է եւ իր ընտանիքի բոլոր անդամները զինք կը նկատեն որպէս «Բարձրեալ»։ (Դանիէլ 7։18, 22, 25, 27. Ա. Կորնթացիս 14։33) Անոնք նաեւ կ’ընդունին որ իր Որդին՝ Յիսուս Քրիստոսը՝ բոլոր բաներու ժառանգորդ նշանակած է եւ երկնքի մէջ ու երկրի վրայ ամէն իշխանութիւն անոր յանձնած է։ (Մատթէոս 28։18. Եբրայեցիս 1։1, 2) Քրիստոսի Գլխաւորութեան ներքեւ, Քրիստոնէական ժողովքը կարգապահ, միացած կազմակերպութիւն մըն է։ (Եփեսացիս 5։23) Առաջին դարու ժողովքներու գործունէութիւններուն հսկելու համար, առաքեալներէ եւ ուրիշ հոգեւոր «երէցներ»է բաղկացած կառավարիչ մարմին մը կար։ Ամէն մէկ ժողովք նշանակուած տեսուչներ եւ օգնական ծառաներ ունէր։ (Գործք 15։6. Փիլիպպեցիս 1։1) Այս առաջնորդներուն հնազանդիլը միութիւն կը յառաջացնէր։—Եբրայեցիս 13։17
13. Եհովա անհատները ինչպէ՞ս իրեն կը քաշէ եւ ասոր արդիւնքը ի՞նչ կ’ըլլայ։
13 Բայց այսքան կարգապահութիւնը կը թելադրէ՞ որ Եհովայի երկրպագուներու միութիւնը ուժեղ, պաղ առաջնորդութեան մը հետեւանքն է։ Արդարեւ ո՛չ։ Աստուած, կամ իր կազմակերպութիւնը չի կրնար անսիրալիր ըլլալ։ Եհովա սէր ցոյց տալով անհատներ իրեն կը քաշէ եւ ամէն տարի հարիւր հազարաւորներ կամովին եւ ուրախութեամբ Եհովայի կազմակերպութեան մաս կը կազմեն, Աստուծոյ մատուցած իրենց ամբողջական նուիրումը մկրտութեամբ խորհրդանշելով։ Անոնք Յեսուի մտավիճակը ունին, որ իր ազգակիցները յորդորեց. «Ձեզի ընտրեցէք այսօր թէ ո՞վ պիտի պաշտէք . . . բայց ես ու իմ տունս Եհովան պիտի պաշտենք»։—Յեսուայ 24։15
14. Ինչո՞ւ կրնանք ըսել որ Եհովայի կազմակերպութիւնը աստուածպետական է։
14 Եհովայի ընտանիքին մէկ մասը ըլլալով, ոչ միայն ուրախ ենք, այլ նաեւ՝ ապահով, քանի որ իր կազմակերպութիւնը աստուածպետական է։ Աստուծոյ Թագաւորութիւնը աստուածպետութիւն (Յունարէն թէոս աստուած եւ գրաթոս՝ պետութիւն) մըն է։ Անիկա Աստուծոյ պետութիւնն է որ իր կողմէ յանձնարարուած եւ հաստատուած է։ Եհովայի օծեալ «սուրբ ազգ»ը իր իշխանութեան կ’ենթարկուի, հետեւաբար՝ ան ալ աստուածպետական է։ (Ա. Պետրոս 2։9) Մեծ Աստուածպետը՝ Եհովան՝ ունենալով որպէս Դատաւոր, Օրէնսդիր եւ Թագաւոր, ապահով զգալու ամէն պատճառ ունինք։ (Եսայեայ 33։22) Սակայն, եթէ վէճ մը ծագի եւ մեր ուրախութեան, ապահովութեան եւ միութեան սպառնայ, այդ պարագային ի՞նչ։
Կառավարիչ Մարմինը Քայլեր Կ’առնէ
15, 16. Առաջին դարուն ի՞նչ վէճ ծագեցաւ եւ ինչո՛ւ։
15 Ընտանիք մը մէջ միութիւնը պահպանելու համար, երբեմն հարկ կ’ըլլայ վէճ մը դադրեցնել։ Ենթադրենք որ առաջին դարուն, Աստուծոյ երկրպագուներու ընտանիքին միութիւնը պահպանելու համար հոգեւոր հարց մը պէտք էր լուծուէր։ Ասիկա ինչպէ՞ս կ’ըլլար։ Կառավարիչ մարմինը գործի կը լծուէր, հոգեւոր հարցերու շուրջ որոշումի մը յանգելով։ Այսպիսի գործընթացի մը սուրբ գրային արձանագրութիւնը ունինք։
16 Հ.Դ. 49–ի ժամանակները, կառավարիչ մարմինը Երուսաղէմի մէջ հաւաքուեցաւ լուրջ խնդիր մը լուծելու եւ այսպիսով «Աստուծոյ ընտանիք»ին միութիւնը պահպանելու համար։ (Եփեսացիս 2։19) Ասկէ շուրջ 13 տարի առաջ, Պետրոս առաքեալ Կոռնելիոսի քարոզած էր եւ առաջին անգամ ըլլալով հեթանոսներ մկրտուած հաւատացեալներ եղած էին։ (Գործք գլուխ 10) Պօղոսի միսիոնարական առաջին շրջապտոյտի ընթացքին, բազմաթիւ հեթանոսներ Քրիստոնէութիւնը ողջունեցին։ (Գործք 13։1–14։28) Արդարեւ, Սուրիոյ Անտիոք քաղաքին մէջ հեթանոսներէ բաղկացած ժողովք մը կազմուած էր։ Քրիստոնեայ դարձած Հրեաներէն ոմանք խորհեցան որ նորադարձ հեթանոսները պէտք էր թլփատուէին եւ Մովսիսական Օրէնքը պահէին, իսկ ուրիշներ ասոր համամիտ չէին։ (Գործք 15։1–5) Այս վիճաբանութիւնը կրնար անմիաբանութեան դուռ բանալ, նոյնիսկ Հրէական ու հեթանոսական անջատ ժողովքներու կազմութեան պատճառ ըլլալով։ Հետեւաբար, կառավարիչ մարմինը արագ քայլեր առաւ, Քրիստոնէական միութիւնը պահպանելու համար։
17. Գործք Առաքելոց 15–րդ գլուխին մէջ, աստուածպետական ի՞նչ համերաշխ գործընթաց նկարագրուած է։
17 Գործք Առաքելոց 15։6–22–ի համաձայն, «Առաքեալներն ու երէցները հաւաքուեցան այս մասին խորհելու»։ Ուրիշներ ալ ներկայ էին, ինչպէս՝ Անտիոքէ եկած պատուիրակներ։ Նախ Պետրոս բացատրեց որ ‘իր բերնով հեթանսոները աւետարանը լսեցին եւ հաւատացին’։ Ապա, «բոլոր ժողովուրդը» մտիկ կ’ընէր, մինչ Բառնաբաս եւ Պօղոս կը խօսէին, պատմելով թէ «Աստուած ո՛րչափ նշաններ ու հրաշքներ ըրեր էր հեթանոսներուն մէջ իրենց ձեռքով»։ Ապա Յակոբոս հարցին լուծման շուրջ թելադրութիւն տուաւ։ Կառավարիչ մարմինը որոշումի մը յանգելէ ետք, «առաքեալներուն ու երէցներուն՝ բոլոր եկեղեցիին հետ մէկտեղ աղէկ երեւցաւ որ իրենցմէ մարդիկ ընտրելով Անտիոք ղրկեն Պօղոսին ու Բառնաբասին հետ»։ Այս ‘ընտրուած մարդիկը’՝ Յուդան եւ Շիղան՝ իրենց հաւատակիցներուն քաջալերական նամակ մը տարին։
18. Կառավարիչ մարմինը Մովսիսական Օրէնքին մասին ի՞նչ որոշումի յանգեցաւ եւ ասիկա ի՞նչ ազդեցութիւն ունեցաւ Հրեայ եւ հեթանոս Քրիստոնեաներու վրայ։
18 Կառավարիչ մարմնին որոշումը յայտնող նամակը հետեւեալ բառերով կը սկսէր. «Առա՛քեալներ ու երէ՛ցներ եւ ե՛ղբայրներ, Անտիոքի ու Սուրիոյ եւ Կիլիկիոյ մէջ հեթանոսներէն եղած եղբայրներուդ ողջո՛յն»։ Թէեւ ուրիշ եղբայրներ ալ ներկայ գտնուեցան այս պատմական ժողովին, բայց երեւութապէս կառավարիչ մարմինը կը բաղկանար ‘առաքեալներէ ու երէցներէ’։ Աստուծոյ հոգին առաջնորդեց զիրենք, քանի որ նամակը կը նշէր. «Աղէկ երեւցաւ սուրբ հոգիին ու մեզի ալ ձեր վրայ աւելի բեռ չդնել այս հարկաւոր բաներէն զատ, որ ետ կենաք կուռքերու զոհուածէ եւ արիւնէ ու խեղդուածէ եւ պոռնկութենէ»։ (Գործք 15։23–29) Քրիստոնեաներէն պահանջուած չէր թլփատուիլ ու Մովսիսական Օրէնքը պահել։ Այս որոշումը օգնեց Հրեայ եւ հեթանոս Քրիստոնեաներուն որ միաբանութեամբ գործեն ու խօսին։ Ժողովքները ուրախացան եւ անոնց թանկագին միութիւնը պահպանուեցաւ, ինչպէս ներկայիս՝ Եհովայի Վկաներու Կառավարիչ Մարմնին հոգեւոր առաջնորդութեան ներքեւ գտնուող Աստուծոյ համերկրային ընտանիքին մէջ։—Գործք 15։30–35
Աստուածպետական Միութեան մէջ Ծառայենք
19. Եհովայի երկրպագուներու ընտանիքին մէջ ի՞նչու միութիւնը ծաղկած է։
19 Երբ ընտանիքի մը անդամները կը համագործակցին, միութիւնը կը ծաղկի։ Նոյնն է պարագան Եհովայի երկրպագուներու ընտանիքին մէջ։ Աստուածպետական ըլլալով, առաջին դարու ժողովքներու երէցները եւ ուրիշներ, Աստուծոյ ծառայեցին սերտօրէն համագործակցելով կառավարիչ մարմնին հետ եւ անոր որոշումները ընդունեցին։ Կառավարիչ մարմնին օգնութեամբ, երէցները ‘խօսքը քարոզեցին’ եւ ժողովքներու անդամները ընդհանուր առմամբ ‘միեւնոյն խօսքը ունէին’։ (Բ. Տիմոթէոս 4։1, 2. Ա. Կորնթացիս 1։10) Այս կերպով, սուրբ գրային նոյն ճշմարտութիւնները ներկայացուեցան քարոզչութեան ընթացքին եւ Քրիստոնէական ժողովներուն մէջ, ըլլայ Երուսաղէմի, Անտիոքի, Հռովմի, Կորնթոսի մէջ, կամ՝ այլուր։ Այսօր ալ այսպիսի աստուածպետական միութիւն գոյութիւն ունի։
20. Մեր Քրիստոնէական միութիւնը պահպանելու համար, ի՞նչ պէտք է ընենք։
20 Մեր միութիւնը պահպանելու համար, բոլորս որ Եհովայի համերկրային ընտանիքին մաս կը կազմենք, միասնաբար պէտք է աշխատինք, աստուածպետական սէր ցոյց տալու համար։ (Ա. Յովհաննու 4։16) Պէտք է Աստուծոյ կամքին ենթարկուինք եւ խոր յարգանք ցոյց տանք ‘հաւատարիմ ծառային’ ու Կառավարիչ Մարմնին հանդէպ։ Աստուծոյ ըրած մեր նուիրումին նման, մեր հնազանդութիւնն ալ սիրայօժար եւ ուրախութեամբ պէտք է ըլլայ։ (Ա. Յովհաննու 5։3) Սաղմոսերգուն որքա՜ն լաւ կերպով ուրախութիւնը կցորդեց հնազանդութեան։ Ան երգեց. «Ալէլուիա՜։ Երանի՜ այն մարդուն, որ Տէրոջմէն կը վախնայ ու անոր պատուիրանքներուն շատ կը հաւնի»։—Սաղմոս 112։1
21. Անձնապէս ինչպէ՞ս կրնանք փաստել որ աստուածպետական ենք։
21 Յիսուս՝ ժողովքին Գլուխը՝ շատ աստուածպետական է եւ միշտ իր Հօրը կամքը կը կատարէ։ (Յովհաննու 5։30) Մենք ալ ուրեմն, մեր Տիպարին հետեւինք, աստուածպետականօրէն եւ միակամօրէն կատարելով Եհովայի կամքը, լիովին համագործակցելով իր կազմակերպութեան հետ։ Այդ պարագային, սրտաբուխ ուրախութեամբ եւ երախտագիտութեամբ կրնանք արձագանգել սաղմոսերգուին երգը. «Ահա ո՜րչափ բարի ու ո՜րչափ վայելուչ է որ եղբայրները իրարու հետ միաբանութեամբ բնակին»։
Ի՞նչպէս պիտի պատասխանէիք
◻ Մեր Քրիստոնէական միութիւնը ի՞նչպէս կրնանք կապել 133–րդ Սաղմոսին հետ։
◻ Միութիւն յառաջացնող կարգ մը ազդակներ ի՞նչ են։
◻ Աստուածպետական կարգապահութիւնը ի՞նչու անհրաժեշտ է Աստուծոյ ժողովուրդին միութեան համար։
◻ Առաջին դարու կառավարիչ մարմինը միութիւնը պահպանելու համար ի՞նչպէս գործի լծուեցաւ։
◻ Աստուածպետական միութան մէջ ծառայելը ի՞նչ կը նշանակէ ձեզի համար։