Ամուրիութիւն. բոլորանուէր կերպով ծառայելու պատեհութիւն մը

«Առանց զբաղումի Տէրոջը ծառայել»։—Ա. ԿՈՐՆԹԱՑԻՍ 7։35

1. Կորնթոսի Քրիստոնեայ ժողովքէն ի՞նչ խռովեցուցիչ լուր հասաւ Պօղոսի։

ՊՕՂՈՍ առաքեալ Յունաստանի Կորնթոս քաղաքի իր Քրիստոնեայ եղբայրներով մտահոգուած էր։ Շուրջ հինգ տարի առաջ, անբարոյութեամբ համբաւաւոր եղած այդ բարգաւաճ քաղաքին մէջ ան հաստատած էր այդ ժողովքը։ Արդ, Հ.Դ. 55–ի ժամանակները, մինչ Փոքր Ասիոյ Եփեսոս քաղաքը կը գտնուէր, ան Կորնթոսէն վատ լուրեր ստացաւ. ժողովքին մէջ երկպառակութիւններ կային եւ լուրջ անբարոյութեան մը հանդէպ աչք գոցուած էր։ Ասկէ զատ, Պօղոս նամակ մը ստացած էր Կորնթացի Քրիստոնեաներէն, որոնք ուղղութիւններ կը հայցէին սեռային յարաբերութեանց, ամուրիութեան, ամուսնութեան, բաժանումի եւ վերամուսնութեան մասին։

2. Կորնթոսի մէջ համատարած անբարոյութիւնը երեւութապէս ինչպէ՞ս կ’ազդէր այդ քաղաքի ժողովքին։

² Կորնթոսի մէջ տիրական եղող անբարոյութիւնը երեւութապէս տեղւոյն ժողովքին վրայ երկկողմանի ազդեցութիւն կ’ունենար։ Կարգ մը Քրիստոնեաներ մեղկ բարոյական մթնոլորտին տեղի տալով, անբարոյութեան կը հանդուրժէին։ (Ա. Կորնթացիս 5։1. 6։15–17) Այնպէս կը թուի որ ուրիշներ, քաղաքին մէջ վխտացող մարմնաւոր հաճոյքներուն հակազդելով, միւս ծայրայեղութեան գացած էին, նոյնիսկ ամուսնացած զոյգերու յանձնարարելով սեռային ամէն յարաբերութենէ զերծ մնալ։—Ա. Կորնթացիս 7։5

3. Կորնթացիներուն գրած իր առաջին նամակին մէջ, Պօղոս նախ ի՞նչ նիւթեր շօշափեց։

³ Կորնթացիներուն գրած իր երկար նամակին մէջ, Պօղոս նախ անմիաբանութեան հարցը ձեռք առաւ։ (Ա. Կորնթացիս 1–4–րդ գլուխները) Զանոնք յորդորեց որ մարդոց հետեւորդ չըլլան, ինչ որ միայն վնասակար հերձուածողութեան կրնար առաջնորդել։ Անոնք որպէս «Աստուծոյ գործակից»ներ՝ միացած պէտք էր ըլլային։ Ապա՝ ժողովքը բարոյապէս մաքուր պահելու մասին մասնայատուկ հրահանգներ տուաւ անոնց։ (Գլուխ 5, 6) Անկէ ետք առաքեալը նկատի առաւ անոնց յղած նամակին բովանդակութիւնը։

Ամուրիութիւն կը Յանձնարարուի

4. Պօղոս ի՞նչ ըսել ուզեց, երբ ըսաւ որ «աղէկ է մարդուս որ կնոջ չմօտենայ»։

⁴ Ան կը սկսի, ըսելով. «Արդ՝ այն բաներուն համար, որ դուք ինծի գրեցիք, աղէկ է մարդուս որ կնոջ չմօտենայ»։ (Ա. Կորնթացիս 7։1) Հոս գործածուած՝ ‘կնոջ չմօտենալ’ արտայայտութիւնը կը նշանակէ, կնոջ հետ մարմնաւոր շփում չունենալ՝ սեռային յագեցման համար։ Քանի որ Պօղոս արդէն դատապարտած էր պոռնկութիւնը, արդ, ան ակնարկութիւն կ’ընէր ամուսնական կարգադրութեան մէջ սեռային յարաբերութեանց։ Հետեւաբար, Պօղոս ամուրիութիւն կը յանձնարարէր։ (Ա. Կորնթացիս 6։9, 16, 18. բաղդատել Ծննդոց 20։6. Առակաց 6։29։) Անկէ քիչ ետք, ան գրեց. «Բայց չամուսնացածներուն ու որբեւարիներուն կ’ըսեմ. ‘Աղէկ է անոնց՝ եթէ ինծի պէս կենան’»։ (Ա. Կորնթացիս 7։8) Պօղոս ամուսնացած չէր, թերեւս այրի մըն էր։—Ա. Կորնթացիս 9։5

5, 6. (ա) Ինչո՞ւ յստակ է որ Պօղոս ճգնաւորական կեանք մը չէր յանձնարարեր։ (բ) Պօղոս ինչո՞ւ ամուրիութիւն յանձնարարեց։

⁵ Հաւանաբար, Կորնթոսի Քրիստոնեաները յունական փիլիսոփայութեան հետ շփման մէջ եկած էին, որոնց դպրոցներէն ոմանք խիստ ճգնաւորութիւն կամ անձնամերժութիւն կը քաջալերէին։ Արդեօք անո՞ր համար Կորնթացիները Պօղոսի հարցուցած էին թէ Քրիստոնեաներուն համար «աղէկ» պիտի ըլլար սեռային ամէն յարաբերութենէ խուսափիլ։ Պօղոսի պատասխանը Յոյն փիլիսոփայութեան միտքը չէր ցոլացներ։ (Կողոսացիս 2։8) Կաթողիկէ աստուածաբաններուն հակառակը, ան ո՛չ մէկ տեղ յանձնարարեց վանքի մը կամ մենաստանի մը մէջ ամուրի ճգնաւորական կեանք մը, որպէս թէ ամուրի անհատներ մասնաւորաբար սուրբ ըլլային եւ իրենց ապրելակերպով ու աղօթքներով կարենային նպաստել իրենց անձնական փրկութեան։

⁶ Պօղոս ամուրիութիւն յանձնարարեց՝ այն ատեն գոյութիւն ունեցող «նեղութեանը համար»։ (Ա. Կորնթացիս 7։26) Ան թերեւս ակնարկում կ’ընէր այն դժուարութիւններուն, որոնցմէ կ’անցնէին Քրիստոնեաները, եւ ամուսնութիւնը կրնար աւելի բարդացնել հարցը։ (Ա. Կորնթացիս 7։28) Չամուսնացած Քրիստոնեաներուն ան հետեւեալ խրատը տուաւ. «Աղէկ է անոնց՝ եթէ ինծի պէս կենան»։ Իսկ այրի տղամարդոց ան ըսաւ. «Արձակուա՞ծ ես կնոջմէ, կին մի՛ փնտռեր»։ Քրիստոնեայ այրի կիներուն, ան գրեց. «Իմ կարծիքովս՝ աւելի երանելի է եթէ այնպէս կենայ։ Կարծեմ թէ ե՛ս ալ Աստուծոյ Հոգին ունիմ»։—Ա. Կորնթացիս 7։8, 27, 40

Ամուրիութիւնը Պարտադրուած Չէ

7, 8. Ի՞նչ բան ցոյց կու տայ որ Պօղոս ոեւէ մէկուն չէր ստիպեր ամուրի մնալ։

⁷ Երբ Պօղոս այս խրատը տուաւ, անկասկած Եհովայի սուրբ հոգին կ’առաջնորդէր զինք։ Երբ ան ամուրիութեան եւ ամուսնութեան հարցը կը շօշափէ, անոր մէջ կը տեսնուի հաւասարակշռութիւն եւ չափաւորութիւն։ Զայն չի ներկայացներ որպէս հաւատարմութեան կամ անհաւատարմութեան հարց մը։ Հապա որպէս ազատ ընտրութեան հարց մը, աւելի զարկ տալով ամուրիութեան, անոնց համար՝ որոնք կրնան այդ վիճակին մէջ մաքուր մնալ։

⁸ «Աղէկ է մարդուս որ կնոջ չմօտենայ» ըսելէն անմիջապէս ետք, Պօղոս աւելցուց. «Բայց պոռնկութիւնը արգիլելու համար ամէն մարդ թող իր կինը ունենայ ու ամէն կին՝ իր այրը»։ (Ա. Կորնթացիս 7։1, 2) Չամուսնացածներուն ու այրիներուն խրատելէ ետք որ ‘իրեն պէս մնան’, ան անմիջապէս աւելցուց. «Բայց եթէ ժուժկալութիւն չունին՝ թող ամուսնանան, վասն զի աղէկ է ամուսնանալ, քան թէ կրքով բորբոքիլ»։ (Ա. Կորնթացիս 7։8, 9) Դարձեալ, ան այրի տղամարդոց խրատեց. «Կին մի՛ փնտռեր։ Իսկ եթէ ամուսնանաս՝ չես մեղանչեր»։ (Ա. Կորնթացիս 7։27, 28) Այս հաւասարակշռուած խրատը ընտրութեան ազատութիւն կը ցոլացնէ։

9. Յիսուսի եւ Պօղոսի խօսքերուն համաձայն, ինչպէ՞ս թէ՛ ամուսնութիւնը եւ թէ ամուրիութիւնը Աստուծմէ պարգեւներ են։

⁹ Պօղոս ցոյց տուաւ որ թէ՛ ամուսնութիւնը եւ թէ ամուրիութիւնը Աստուծմէ պարգեւներ են։ «Կ’ուզէի, որ բոլոր մարդիկ ինծի պէս ըլլային. բայց ամէն մէկը իր պարգեւը ունի Աստուծմէ, մէկը՝ այսպէս ու միւսը՝ այնպէս»։ (Ա. Կորնթացիս 7։7) Անկասկած, ան իր մտքին մէջ ունէր Յիսուսի խօսքերը։ Հաստատելէ ետք որ ամուսնութիւնը Աստուծմէ է, Յիսուս ցոյց տուաւ որ Թագաւորութեան շահերը հետապնդելու համար յօժարակամօրէն ամուրի մնալը՝ մասնայատուկ պարգեւ մըն էր. «Ամենուն չի յարմարիր ատիկա, հապա անոնց՝ [«ամէնքը ընդունակ չեն այդ բանին, այլ անոնք միայն», Արեւմտահայերէն Նոր Թարգմանութիւն], որոնց տրուած է [«այս պարգեւը», ՆԱ]։ Վասն զի կան ներքինիներ՝ որոնք իրենց մօրը որովայնէն այնպէս ծնան եւ կան ներքինիներ՝ որոնք մարդոցմէ ներքինի եղան եւ կան ներքինիներ որոնք ինքզինքնին ներքինի ըրին երկնքի թագաւորութեանը համար։ Ով որ կրնայ տանիլ՝ թող տանի»։—Մատթէոս 19։4–6, 11, 12

Ամուրիութեան Պարգեւին Յարմարիլ

10. Անհատ մը ինչպէ՞ս կրնայ «ընդունակ» ըլլալ ամուրիութեան պարգեւին։

¹⁰ Թէեւ Յիսուս եւ Պօղոս ամուիրութեան մասին խօսեցան որպէս «պարգեւ», բայց անոնք չըսին որ անիկա հրաշալի պարգեւ մըն է, որ միայն կարգ մը անհատներ ունին։ Յիսուս ըսաւ որ «ամէնքը ընդունակ չեն» այդ պարգեւին, ուստի յորդորեց. «Ով որ կրնայ տանիլ՝ թող տանի», ինչ որ Յիսուս եւ Պօղոս կրցան տանիլ։ Ճիշդ է որ Պօղոս գրեց. «աղէկ է ամուսնանալ, քան թէ կրքով բորբոքիլ», բայց ան ‘ժուժկալութիւն չունեցողներու’ մասին կը խօսէր։ (Ա. Կորնթացիս 7։9) Նախորդ գրութիւններու մէջ, Պօղոս ցոյց տուած էր որ Քրիստոնեաները կրնան կրքով բորբոքելէ խուսափիլ։ (Գաղատացիս 5։16, 22–24) Հոգիով քալել կը նշանակէ, թոյլ տալ որ Եհովայի հոգին մեր իւրաքանչիւր քայլը առաջնորդէ։ Երիտասարդ Քրիստոնեաները կրնա՞ն ասիկա ընել։ Այո, եթէ անոնք սերտօրէն հետեւին Եհովայի Խօսքին։ Սաղմոսերգուն գրեց. «Երիտասարդը [կամ երիտասարդուհին] ինչո՞վ մաքրէ իր ճամբան։ Քու խօսքիդ համեմատ անոր զգուշութիւն ընելով»։—Սաղմոս 119։9

11. Ի՞նչ կը նշանակէ ‘հոգիով քալել’։

¹¹ Ասիկա կը բովանդակէ զգուշանալ հեռատեսիլի յայտագրով, շարժապատկերներով, պարբերաթերթի յօդուածներով, գրքերով եւ երգերու բառերով սփռուած մեղկ գաղափարներէ։ Անոնք մարմնաւոր գաղափարներ են։ Երկու սեռի ալ պատկանող երիտասարդ Քրիստոնեաներ, որոնք կ’ուզեն ամուրիութեան ընդունակ ըլլալ, պէտք չէ «մարմնաւորապէս քալե[ն], հապա՝ հոգեւորապէս։ Քանզի մարմնաւոր եղողները մարմնին բաները կը մտածեն ու հոգեւոր եղողները՝ հոգիին բաները [կը մտածեն]»։ (Հռովմայեցիս 8։4, 5) Հոգիին բաները արդար, մաքուր, սիրալիր եւ առաքինի են։ Քրիստոնեաները՝ երիտասարդ թէ տարեց՝ լաւ է որ շարունակեն ‘անոնց մասին խորհիլ’։—Փիլիպպեցիս 4։8, 9

12. Ամուրիութեան ընդունակ ըլլալու համար ի՞նչ բան անհրաժեշտ է։

¹² Անհատը իր սրտին մէջ վճռած պէտք է ըլլայ եւ անոր համար Եհովայի աղօթէ, որպէսզի ամուրիութեան պարգեւին ընդունակ ըլլայ։ (Փիլիպպեցիս 4։6, 7) Պօղոս գրեց. «Բայց ան որ իր սրտին մէջ հաստատ կը կենայ ու իր վրայ ճնշում չկայ, ինք իր կամքին վրայ իշխանութիւն ունի ու իր սրտին մէջ որոշեր է որ կոյս մնայ, աղէկ կ’ընէ։ Ուստի ան որ իր կոյսը կ’ամուսնացնէ, աղէկ կ’ընէ ու ան որ չամուսնացներ աւելի աղէկ կ’ընէ»։—Ա. Կորնթացիս 7։37, 38

Նպատակադրուած Ամուրիութիւն

13, 14. (ա) Պօղոս առաքեալ ամուրի եւ ամուսնացած Քրիստոնեաներու միջեւ ի՞նչ բաղդատութիւն ըրաւ։ (բ) Ամուրի Քրիստոնեայ մը միմիայն ինչպէ՞ս կրնայ ամուսնացածներէն «աւելի աղէկ» ընել։

¹³ Ամուրիութիւնը ինքնին արժանիք մը չէ։ Ուստի, ի՞նչ առումով անիկա «աւելի աղէկ» կրնայ ըլլալ։ Ատիկա կախեալ է թէ անհատ մը անոր տուած ազատութիւնը ի՛նչպէս կը գործածէ։ Պօղոս գրեց. «Բայց ես կ’ուզեմ որ դուք անհոգ ըլլաք. վասն զի չամուսնացած մարդը Տէրոջը գործով մտահոգ է, թէ ի՞նչպէս Տէրոջը հաճելի ըլլայ։ Իսկ ամուսնացածը աշխարհիս բաներով մտահոգ է, թէ ի՞նչպէս իր կնոջ հաճելի ըլլայ։ Եւ ամուսնացած կինը ու կոյսը կը տարբերին իրարմէ. վասն զի կոյսը Տէրոջը բաներով կը մտահոգուի, որպէս զի ինք սուրբ ըլլայ հոգիով ու մարմնով. իսկ ամուսնացած կինը՝ աշխարհիս բաներով կը մտահոգուի, թէ ի՞նչպէս իր էրկանը հաճելի ըլլայ։ Բայց այս բանը ձեր օգտին համար կ’ըսեմ, ո՛չ թէ ձեր վրայ ճնշում կը բանեցնեմ, հապա պարկեշտութեան համար ու առանց զբաղումի [«բոլորանուէր կերպով», ԱՆԹ] Տէրոջը ծառայելու համար»։—Ա. Կորնթացիս 7։32–35

¹⁴ Ամուրի Քրիստոնեայ մը որ իր չամուսնացած վիճակը անձնասէր նպատակակէտեր հետապնդելու համար կը գործածէ, ամուսնացած Քրիստոնեաներէն «աղէկ» ըրած չըլլար։ Ան ամուրի կը մնայ ո՛չ թէ «երկնքի թագաւորութեանը համար», այլ՝ անձնական պատճառներով։ (Մատթէոս 19։12) Չամուսնացած մարդը կամ կինը «Տէրոջը գործով մտահոգ» պէտք է ըլլայ. անոր մտահոգութիւնը պէտք է ըլլայ ‘ի՞նչպէս Տէրոջը հաճելի ըլլալ’ եւ բոլորանուէր կերպով Տէրոջը ծառայել։ Ասիկա կը նշանակէ Եհովայի ու Յիսուս Քրիստոսի ծառայութեան անշեղ ուշադրութիւն ընծայել։ Միմիայն այսպէս ընելով է որ չամուսնացած Քրիստոնեայ այրեր ու կիներ կրնան ամուսնացած Քրիստոնեաներէն «աւելի աղէկ» ընել։

Բոլորանուէր Գործունէութիւն մը

15. Ա. Կորնթացիս 7–րդ գլուխին մէջ Պօղոսի պատճառաբանութեան միտք բանին ի՞նչ է։

¹⁵ Այս գլուխին մէջ Պօղոսի հետապնդած պատճառաբանութիւնը հետեւեալն է. Թէեւ ամուսնութիւնը օրինաւոր է եւ կարգ մը պարագաներու ներքեւ՝ ոմանց յանձնարարելի, սակայն նուազագոյն զբաղումով Եհովայի ծառայել փափաքող Քրիստոնեայ տղամարդու կամ կնկայ մը համար, աներկբայելիօրէն ամուրիութիւնը աւելի նպաստաւոր է։ Մինչ ամուսնացած անհատը ‘բաժնուած’ է, չամուսնացած Քրիստոնեան ազատ է՝ որպէսզի իր ուշադրութիւնը «Տէրոջը բաներ»ուն վրայ կեդրոնացնէ։

16, 17. Ամուրի Քրիստոնեայ մը ինչպէ՞ս կրնայ իր ուշադրութիւնը աւելի կեդրոնացնել «Տէրոջը բաներ»ուն վրայ։

¹⁶ Ի՞նչ են Տէրոջը բաները, որոնց չամուսնացած Քրիստոնեայ մը կրնայ աւելի ազատօրէն ուշադրութիւն ընծայել, քան՝ ամուսնացածները։ Բոլորովին տարբեր նիւթով մը Յիսուս խօսեցաւ ‘Աստուծոյ բաներ’ուն մասին, զորս Քրիստոնեայ մը չի կրնար Կայսրին տալ։ (Մատթէոս 22։21) Անոնք գլխաւորաբար Քրիստոնեային կեանքին, պաշտամունքին եւ ծառայութեան հետ կապ ունին։—Մատթէոս 4։10. Հռովմայեցիս 14։8. Բ. Կորնթացիս 2։17. 3։5, 6. 4։1

¹⁷ Ընդհանրապէս, ամուրի անհատներ աւելի ազատ են Եհովայի ծառայութեան ժամանակ տրամադրելու, ինչ որ իրենց հոգեւորականութեան եւ ծառայութեան ընդլայնման կը նպաստէ։ Անոնք կրնան աւելի ժամանակ տրամադրել անձնական ուսումնասիրութեան եւ խորհրդածութեան։ Ամուրի Քրիստոնեաներ աւելի յարմարութիւն կ’ունենան Աստուածաշունչի ընթերցանութիւնը իրենց յայտագրին մէջ տեղաւորելու, քան՝ ամուսնացածները։ Անոնք կրնան աւելի լաւ կերպով պատրաստուիլ ժողովներու եւ դաշտի ծառայութեան համար։ Այս բոլորը իրենց «օգտին» կը ծառայեն։—Ա. Կորնթացիս 7։35

18. Ամուրի եղբայրներէն շատեր ինչպէ՞ս կրնան ցոյց տալ թէ կ’ուզեն «բոլորանուէր կերպով» ծառայել Եհովայի։

¹⁸ Արդէն որպէս օգնական ծառայ ծառայող ամուրի եղբայրներէն շատեր ազատ են ու Եհովայի կրնան ըսել՝ «Ահաւասիկ ես. զի՛ս ղրկէ»։ (Եսայեայ 6։8) Անոնք կրնան Ծառաներու Մարզումի Դպրոցը յաճախելու դիմում ներկայացնել, որ վերապահուած է ամուրի օգնական ծառաներու եւ երէցներու, որոնք ազատ են ծառայելու հոն՝ ուր աւելի մեծ կարիք կայ։ Նոյնիսկ այն եղբայրները որոնք իրենց ժողովքը ձգելու ազատ չեն, կրնան իրենք զիրենք ձեռնտու ընել, իրենց եղբայրներուն ծառայելով որպէս օգնական ծառաներ կամ երէցներ։—Փիլիպպեցիս 2։20–23

19. Ամուրի քոյրերէն շատեր ի՞նչ կերպով օրհնուած են եւ անոնք ժողովքներուն մէջ ի՞նչ կերպով օրհնութիւն մը կրնան ըլլալ։

¹⁹ Ամուրի քոյրեր, որոնք իրենց վրայ ամուսին մը չունին որու հետ կրնան խորհրդակցիլ, կամ որու կրնան կռթնիլ, կրնան աւելի դիւրութեամբ ‘իրենց հոգը Եհովայի վրայ ձգել’։ (Սաղմոս 55։22. Ա. Կորնթացիս 11։3) Ասիկա մասնաւորաբար կարեւոր է այն քոյրերուն պարագային, որոնք Եհովայի սիրոյն համար ամուրի մնացած են։ Եթէ օր մը ամուսնանան, անիկա «միայն թէ Տէրոջմով» պիտի ըլլայ, ուրիշ խօսքով, միայն Եհովայի նուիրուած անհատի մը հետ։ (Ա. Կորնթացիս 7։39) Երէցները շնորհապարտ են որ իրենց ժողովքներուն մէջ չամուսնացած քոյրեր կան. անոնք յաճախ կրնան հիւանդներուն եւ տարեցներուն այցելել ու անոնց օգնել։ Ասիկա խնդրոյ առարկայ բոլոր անհատներուն ուրախութիւն կը պատճառէ։—Գործք 20։35

20. Բազմաթիւ Քրիստոնեաներ ինչպէ՞ս ցոյց կու տան որ իրենք ‘բոլորանուէր կերպով կը ծառայեն Տէրոջը’։

²⁰ Երիտասարդ Քրիստոնեաներէն շատեր իրենց գործերը կարգի դրած են, որպէսզի ‘բոլորանուէր կերպով Տէրոջը ծառայեն’։ (Ա. Կորնթացիս 7։35) Անոնք Եհովայի կը ծառայեն որպէս լիաժամ ռահվիրայ քարոզիչներ, միսիոնարներ, կամ՝ Դիտարանի Ընկերութեան մասնաճիւղերէն մէկուն մէջ։ Ի՜նչ ուրախ խումբ մը կը կազմեն անոնք։ Անոնց ներկայութիւնը որքա՜ն թարմացուցիչ է։ Այո, Եհովայի ու Յիսուսի աչքին, անոնք ‘արշալոյսի ցօղի’ պէս են։—Սաղմոս 110։3

Անվերջ Ամուրիութեան Ուխտ մը Չկայ

21. (ա) Ինչո՞ւ պարզ է որ Պօղոս ամուրիութեան ուխտ ընել չքաջալերեց։ (բ) Ան ի՞նչ ըսել ուզեց երբ խօսեցաւ ‘ամուսնութեան տարիքը անցուցած’ ըլլալու մասին։

²¹ Պօղոսի խրատին գլխաւոր կէտը հետեւեալն է. Քրիստոնեաները իրենց կեանքին մէջ ամուրիութեան տեղ տալով՝ «աղէկ» կ’ընեն։ (Ա. Կորնթացիս 7։1, 8, 26, 37) Սակայն, անիկա որեւէ կերպով ամուրիութեան ուխտ կատարելու հրաւէր չի տար։ Ընդհակառակը, ան գրեց. «Իսկ եթէ մէկը ամօթ կը սեպէ որ իր կոյսը ամուսնութեան տարիքը անցուցեր է ու պէտք է ամուսնանայ (այս է բնականը), թող ամուսնացնէ, մեղք չի գործեր»։ (Ա. Կորնթացիս 7։36) Յունարէն՝ իի·բէրա·գմոս՝ բառը, որ թարգմանուած է ‘ամուսնութեան տարիքը անցուցած’, բառացիօրէն կը նշանակէ «բարձրագոյն կէտէն անդին անցած» եւ կ’ակնարկէ սեռային գետնի վրայ տենչերու ամենէն ուժեղ եղած ժամանակը բոլորած ըլլալուն։ Ուստի, անոնք որոնք տարիներ ամուրի մնացած են եւ վերջապէս ամուսնանալու կարիքը կը զգան, ամբողջովին ազատ են հաւատակիցի մը հետ ամուսնանալու։—Բ. Կորնթացիս 6։14

22. Ինչո՞ւ ամէն կերպով առաւելութիւն մըն է որ Քրիստոնեայ մը շատ երիտասարդ չամուսնանայ։

²² Իմաստուն ներդրում մըն է, երբ երիտասարդ Քրիստոնեայ մը մի քանի տարի բոլորանուէր կերպով Եհովայի ծառայէ։ Այդ միջոցին գործնական իմաստութիւն, փորձառութիւն եւ ներատեսութիւն ձեռք ձգելու առիթ կ’ունենայ։ (Առակաց 1։3, 4) Թագաւորութեան սիրոյն ամուրի մնացած անհատ մը, երբ ի վերջոյ որոշէ ամուսնանալ, ի վիճակի կ’ըլլայ ամուսնացածի մը, կամ թերեւս ծնողական, պատասխանատուութիւնները աւելի լաւ կերպով կատարելու։

23. Ամուսնութեան մասին մտածողներէն ոմանք ի՞նչ բան ի մտի կ’ունենան, բայց յաջորդ յօդուածով ի՞նչ նիւթ նկատի պիտի առնենք։

²³ Ամուրիութեան շրջանին տարիներով լիաժամ ծառայութեան մէջ եղած կարգ մը Քրիստոնեաներ, ուշադիր կերպով կ’ընտրեն իրենց ապագայ կողակիցը, որպէսզի կարենան լիաժամ ծառայութեան որե՛ւէ մարզի մէջ շարունակել։ Ասիկա շա՛տ գովելի է։ Ոմանք թերեւս ամուսնութեան մասին կը մտածեն, այն միտքով որ ամուսնութիւնը որեւէ կերպով իրենց ծառայութեան արգելք պիտի չըլլայ։ Բայց, ամուսնացած Քրիստոնեայ մը Եհովայի ծառայութեան վրայ իր ուշադրութիւնը նոյն չափո՞վ պէտք է պահէ, ինչպէս երբ ամուրի էր։ Յաջորդ յօդուածով նկատի պիտի առնենք այս հարցումը։

Վերաքաղի Հարցումներ

◻ Պօղոս առաքեալ ինչո՞ւ Կորնթոսի ժողովքին գրելու հարկը տեսաւ։

◻ Ինչո՞ւ գիտենք որ Պօղոս ճգնաւորական կեանք մը չէր յանձնարարեր։

◻ Անհատ մը ինչպէ՞ս կրնայ ամուրիութեան «ընդունակ» ըլլալ։

◻ Ամուրի քոյրեր իրենց ամուրի վիճակը ինչպէ՞ս կրնան օգտագործել։

◻ Ամուրի եղբայրներ Եհովայի «բոլորանուէր կերպով» ծառայելու համար իրենց ունեցած ազատութենէն ի՞նչ կերպով կրնան օգտուիլ։