‘Տեղ Տուէք Անոր’
1 Անգամ մը, երբ իր աշակերտներուն հետ ամուսնութեան մասին կը խօսէր, Յիսուս ամուրիութեան ակնարկեց որպէս «պարգեւ», ապա ըսաւ. «Ո՛վ որ կրնայ տեղ տալ անոր, թող տեղ տայ»։ (Մատթ. 19։10-12, ՆԱ) Քանի մը տարի ետք, Պօղոս առաքեալ ամուրիութեան առաւելութիւններուն մասին գրեց եւ ուրիշները քաջալերեց որ ամուրի մնալու իր օրինակին հետեւին։ (Ա. Կորն. 7։7, 38) Ներկայիս շատեր ամուրիութեան ‘տեղ տուած են’ եւ անոր առաւելութիւնները կը վայելեն։ Առաւելութիւններէն ոմանք ի՞նչ են։
2 «Անզբաղ Միտքով» Ծառայել. Պօղոս ըմբռնեց թէ ամուրիութիւնը իրեն պատեհութիւն տուաւ որ «անզբաղ միտքով» Եհովայի ծառայէ։ Նմանապէս այսօր, ամուրի եղբայր մը կրնայ Ծառաներու Մարզումի Դպրոցը յաճախելու ձգտիլ, եւ ամուրի մը ընդհանրապէս աւելի ազատ կ’ըլլայ ռահվիրայութեան ձեռնարկելու, ուրիշ լեզու մը սորվելու, փոխադրուելու հո՛ն ուր կարիքը աւելի մեծ է, Պէթէլի մէջ ծառայելու, կամ ինքզինք մատչելի ընելու ծառայութեան այլ մասնայատուկ առանձնաշնորհումներու համար։ Ան կրնայ աւելի ժամանակ ու պատեհութիւններ ունենալ անձնական խոր ուսումնասիրութեան ձեռնարկելու եւ խոկալու, նաեւ սրտագին աղօթքի միջոցաւ Եհովայի հետ սերտօրէն խօսելու համար։ Սովորաբար ամուրին աւելի ժամանակ ունի որ իր անձը տրամադրէ ուրիշներու օգնելու համար։ Այս բոլոր գործունէութիւնները անհատին «օգտին համար» են։—Ա. Կորն. 7։32-35, Անթիլիաս. Գործք 20։35
3 Աստուծոյ մատուցուած այս բոլորանուէր ծառայութիւնը ճոխ վարձատրութիւններ կը բերէ։ Քենիոյ մէջ 27 տարի անցընելէ ետք, ամուրի քոյր մը գրեց. «Շա՜տ բարեկամներ եւ չափազանց շատ գործ կար։ Ամէն բան միասնաբար կ’ընէինք [եւ] իրարու կ’այցելէինք։ . . . Կրցայ ամուրիութեան ներկայացուցած յաւելեալ ազատութիւնն ու ճկունութիւնը գործածել՝ ծառայութեան մէջ զբաղած մնալու համար, եւ ասիկա մեծապէս ուրախացուց զիս»։ Ան աւելցուց. «Տարիներու ընթացքին, Եհովայի հետ յարաբերութիւնս աւելի սերտ դարձաւ»։
4 Տեղ Տալ Անոր. Յիսուս ըսաւ թէ ամուրիութեան պարգեւը մշակելու շարժառիթը պէտք է ըլլայ՝ «երկնքի թագաւորութեանը համար»։ (Մատթ. 19։12) Ուրիշ որեւէ պարգեւի նման, ամուրիութիւնը պատշաճօրէն պէտք է գործածուի ուրախութիւն եւ օգուտներ բերելու համար։ Ամուրիութեան ընծայած պատեհութիւնները օգտագործելով եւ իմաստութեան ու զօրութեան համար Եհովայի ապաւինելով, ամուրիներէն շատեր ըմբռնած են այս պարգեւը ընդունելուն արժէքը։