Ճամբորդող տեսուչները ինչպէ՛ս կը ծառայեն որպէս հաւատարիմ տնտեսներ

«Ամէն մէկը ինչ շնորհք որ առաւ, զանիկա իրարու մատակարարեցէ՛ք Աստուծոյ զանազան շնորհներէն բարի տնտեսներու պէս»։—Ա. ՊԵՏՐՈՍ 4։10

1, 2. (ա) «Տնտես» բառը ինչպէ՞ս կը սահմանէք։ (բ) Աստուծոյ կողմէ որպէս տնտես գործածուողներուն մէջ որո՞նք կը գտնուին։

ԵՀՈՎԱ բոլոր հաւատարիմ Քրիստոնեաները որպէս տնտեսներ կը գործածէ։ Տնտես մը յաճախ տան մը պատասխանատուութիւնը ստանձնող ծառայ մըն է։ Ան կրնայ նաեւ իր տիրոջ առեւտրական գործերը վարել։ (Ղուկաս 16։1–3. Գաղատացիս 4։1, 2) Յիսուս՝ երկրի վրայ իր հաւատարիմ օծեալներուն մարմինը կոչեց ‘հաւատարիմ տնտեսը’։ Ան այս տնտեսին յանձնած է «իր բոլոր ունեցած»ը, մէջը ըլլալով Թագաւորութեան քարոզչութեան հետ առնչուող գործունէութիւնները։—Ղուկաս 12։42–44. Մատթէոս 24։14, 45

² Պետրոս առաքեալ ըսաւ որ բոլոր Քրիստոնեաները Աստուծոյ զանազան շնորհներուն տնտեսներն են։ Իւրաքանչիւր Քրիստոնեայ մարզ մը ունի, որու մէջ կրնայ հաւատարիմ տնտեսութիւն մը կատարել։ (Ա. Պետրոս 4։10) Նշանակուած Քրիստոնեայ երէցները տնտեսներ են, որոնց մաս կը կազմեն նաեւ ճամբորդող տեսուչները։ (Տիտոս 1։7) Այս ճամբորդող երէցները ի՞նչպէս պէտք է նկատուին։ Անոնք ի՞նչ յատկութիւններ եւ նպատակակէտեր պէտք է ունենան։ Իսկ անոնք ինչպէ՞ս կրնան մեծագոյն բարիքը իրագործել։

Անոնց Ծառայութեան Համար Երախտապարտ

3. Ճամբորդող տեսուչները ինչո՞ւ կրնանք «բարի տնտեսներ» կոչել։

³ Ճամբորդող տեսուչի մը եւ անոր կնկան նամակ մը գրելով, Քրիստոնեայ ամոլ մը ըսաւ. «Կ’ուզենք մեր երախտագիտութիւնը յայտնել մեզի համար ձեր տրամադրած ժամանակին եւ ցուցաբերած սիրոյն համար։ Որպէս ընտանիք, մեծապէս օգտուեցանք ձեր տուած քաջալերութենէն եւ խրատներէն։ Գիտենք թէ պէտք է շարունակենք հոգեւոր գետնի վրայ աճիլ, բայց Եհովայի եւ ձեր նման եղբայրներու ու քոյրերու օգնութեամբ, աճումի ջանքը աւելի կը դիւրանայ»։ Այսպիսի արտայայտութիւններ յաճախ կը լսենք, քանի որ ճամբորդող տեսուչները անձնապէս կը հետաքրքրուին իրենց հաւատակիցներով, ճիշդ ինչպէս որ բարի տնտես մը լաւ կերպով կը հոգայ տան մը պէտքերը։ Ճամբորդող տեսուչներէն ոմանք հոյակապ դասախօսներ են։ Անոնցմէ շատեր քարոզչութեան մէջ գերազանց են, մինչ ուրիշներ ճանչցուած են իրենց ջերմութեան եւ կարեկցութեան համար։ Քանի որ այսպիսի պարգեւներ կը մշակեն եւ զանոնք կը գործածեն ուրիշներու սպասարկութեան համար, կրնանք իրաւացիօրէն զանոնք կոչել՝ «բարի տնտեսներ»։

4. Հիմա ի՞նչ հարց նկատի պիտի առնուի։

⁴ «Տնտեսէն կը պահանջուի որ հաւատարիմ ըլլայ», գրեց Պօղոս առաքեալ։ (Ա. Կորնթացիս 4։2) Ամէն շաբաթ տարբեր ժողովքի մը մէջ Քրիստոնեայ հաւատակիցներու ծառայելը յատուկ եւ ուրախ առանձնաշնորհում մըն է։ Այսուհանդերձ, անիկա ծանր պատասխանատուութիւն ալ է։ Արդ, ճամբորդող տեսուչները ի՞նչպէս կրնան հաւատարմօրէն եւ յաջող կերպով կատարել իրենց տնտեսութիւնը։

Իրենց Տնտեսութիւնը Յաջող Կերպով Կատարողներ

5, 6. Ճամբորդող տեսուչի մը կեանքին մէջ աղօթքով Եհովայի ապաւինիլը ինչո՞ւ շատ կարեւոր է։

⁵ Որպէսզի ճամբորդող տեսուչները յաջող տնտեսներ ըլլան, անհրաժեշտ է որ աղօթքով Եհովայի ապաւինին։ Իրենց յայտագրին եւ բազմատեսակ պատասխանատուութիւններուն պատճառաւ, անոնք երբեմն ծանրաբեռնուած կրնան զգալ։ (Բաղդատել՝ Բ. Կորնթացիս 5։4։) Ուստի, անոնք սաղմոսերգու Դաւիթի երգին համաձայն պէտք է գործեն, որ ըսաւ. «Քու հոգդ Տէրոջը վրայ ձգէ՛ ու ան քեզ պիտի խնամէ. անիկա արդարը երբեք պիտի չսասանեցնէ»։ (Սաղմոս 55։22) Դաւիթի խօսքերն ալ մխիթարական են. «Օրհնեալ ըլլայ Եհովան, որ ամէն օր մեր տեղը կը կրէ մեր բեռը»։—Սաղմոս 68։19, ՆԱ։

⁶ Պօղոս իր հոգեւոր պատասխանատուութիւններուն հոգ տանելու համար հարկ եղած զօրութիւնը ո՞ւրկէ ստացաւ։ «Ամէն բանի կարող եմ անով՝ որ զիս զօրացուց», գրեց ան։ (Փիլիպպեցիս 4։13) Այո, Եհովա Աստուած էր Պօղոսի ոյժին Աղբիւրը։ Պետրոս առաքեալ ալ հետեւեալ խրատը տուաւ. «Եթէ մէկը մատակարարութիւն ընէ, որպէս թէ Աստուծոյ շնորհներու զօրութենէն թող ընէ, որպէս զի ամէն բանի մէջ Աստուած փառաւորուի Յիսուս Քրիստոսին ձեռքով»։ (Ա. Պետրոս 4։11) Տարիներով որպէս ճամբորդող տեսուչ ծառայած եղբայր մը Եհովայի ապաւինելու կարեւորութիւնը շեշտեց, ըսելով. «Խնդիրները լուծելու համար մի՛շտ Եհովայի ապաւինեցէք եւ իր կազմակերպութեան օգնութեան դիմեցէք»։

7. Ճամբորդող տեսուչի մը կեանքին մէջ հաւասարակշռութիւնը ի՞նչ դեր կը խաղայ։

⁷ Յաջող ճամբորդող տեսուչ ըլլալու համար՝ հաւասարակշռութիւն կը պահանջուի։ Միւս Քրիստոնեաներուն նման, ան կը ջանայ ‘աւելի կարեւոր բաները ընտրել’։ (Փիլիպպեցիս 1։10, ՆԱ)a Երբ տեղւոյն երէցները նիւթի մը շուրջ հարցումներ ունենան, լաւ է որ զայն նկատի առնեն զիրենք այցելող շրջանային տեսուչին հետ։ (Առակաց 11։14. 15։22) Հաւանաբար, անոր հաւասարակշռուած դիտողութիւնները եւ սուրբ գրային խրատները իրապէս օգտակար ըլլան, երբ երէցներ այդ հարցով շարունակեն զբաղիլ իր մեկնելէն ետք։ Գրեթէ նոյն եզրով, Պօղոս ըսաւ Տիմոթէոսի. «Այն բաները որոնք ինծմէ լսեցիր շատ վկաներով՝ հաւատարիմ մարդոց յանձնէ, որպէս զի անոնք ալ կարող ըլլան ուրիշներուն սորվեցնել»։—Բ. Տիմոթէոս 2։2

8. Աստուածաշունչի ուսումնասիրութիւնը, փնտռտուք կատարելը եւ խոկալը ինչո՞ւ կենսական են։

⁸ Խոհեմ խրատ տալու համար պայման է Աստուածաշունչը ուսումնասիրել, փնտռտուքներ կատարել եւ խոկալ։ (Առակաց 15։28) Նահանգային տեսուչ մը ըսաւ. «Երէցներու հետ ժողովի ընթացքին, պէտք չէ վախնանք ընդունելու որ որոշ հարցումի մը պատասխանը չենք գիտեր»։ Երբ հարցի մը շուրջ «Քրիստոսին միտքը» գիտնալու համար անհատ մը ջանք թափէ, կարող պիտի ըլլայ Աստուածաշունչի վրայ հիմնուած խրատներ տալու, օգնելով ուրիշներու որ Աստուծոյ կամքին ենթարկուին։ (Ա. Կորնթացիս 2։16) Երբեմն ճամբորդող տեսուչ մը հարկ կը տեսնէ Դիտարանի Ընկերութեան գրել՝ ուղղութեան համար։ Ամէն պարագայի, Եհովայի վրայ հաւատքը եւ ճշմարտութեան համար սէրը շա՛տ աւելի կարեւոր են, քան մեր անհատական պատկերը կամ պերճախօս ըլլալը։ Փոխանակ «խօսքի կամ իմաստութեան գերազանցութիւնով» գալու, Պօղոս Կորնթոսի մէջ իր ծառայութիւնը սկսաւ «տկարութիւնով ու վախով եւ շատ դողով»։ Ասիկա զինք անատա՞կ դարձուց։ Ընդհակառակը, անիկա օգնեց որ Կորնթացիները հաւատան ‘ո՛չ թէ մարդոց իմաստութիւնովը, հապա Աստուծոյ զօրութիւնովը’։—Ա. Կորնթացիս 2։1–5

Ուրիշ Կենսական Որակումներ

9. Ճամբորդող երէցներուն համար ինչո՞ւ կարեւոր է դիմացինը հասկնալ։

⁹ Դիմացինը հասկնալն ալ կ’օգնէ ճամբորդող տեսուչներուն որ լաւ արդիւնքներու հասնին։ Պետրոս բոլոր Քրիստոնեաները յորդորեց որ «կարեկից» ըլլան։ (Ա. Պետրոս 3։8) Շրջանային տեսուչ մը ‘ժողովքի իւրաքանչիւր անդամով հետաքրքրուելու եւ անոնց իրապէս ուշադրութիւն ընծայելու’ կարիքը կը զգայ։ Պօղոս նոյն հոգիով, գրեց. «Խնդացողներուն հետ խնդացէ՛ք եւ լացողներուն հետ լացէ՛ք»։ (Հռովմայեցիս 12։15) Այսպիսի կեցուածք մը ճամբորդող տեսուչները կը մղէ որ իրենց հաւատակիցներուն խնդիրները եւ պարագաները հասկնալու անկեղծ ջանք թափեն։ Այն ատեն կրնան սուրբ գրային կերտիչ խրատներ տալ, որոնք ի՛րապէս օգտակար կ’ըլլան, երբ գործադրուին։ Դիմացինը հասկնալու մէջ գերազանց եղող շրջանային տեսուչ մը, հետեւեալ նամակը ստացաւ, Իտալիոյ Թիւրին քաղաքի շրջանի ժողովքներէն մէկէ մը. «Եթէ կ’ուզես հետաքրքրական ըլլալ՝ հետաքրքրուէ. եթէ կ’ուզես հաճելի ըլլալ՝ հաճելի եղիր. եթէ կ’ուզես սիրուիլ՝ սիրալիր եղիր. եթէ կ’ուզես օգնութիւն ստանալ՝ օգնելու պատրաստ եղիր։ Քեզմէ ա՛սիկա սորվեցանք»։

10. Շրջանային եւ նահանգային տեսուչներ ի՞նչ ըսած են խոնարհ ըլլալու մասին, իսկ Յիսուս այս ուղղութեամբ ի՞նչ օրինակ հանդիսացաւ։

¹⁰ Ճամբորդող տեսուչները խոնարհ եւ դիւրամատչելի ըլլալով շատ օգտակար կրնան ըլլալ։ Շրջանային տեսուչ մը դիտել տուաւ. «Շատ կարեւոր է խոնարհ մնալ»։ Ան նոր շրջանային տեսուչները կը զգուշացնէ, ըսելով. «Աւելի հարուստ եղբայրներուն թերեւս ձեզի համար ըրած բաներէն անտեղիօրէն ազդուելու առիթ մի՛ տաք, ոչ ալ միայն անոնց հետ ընկերակցեցէք, այլ, միշտ ջանացէք անաչառօրէն վարուիլ բոլորին հետ»։ (Բ. Մնացորդաց 19։6, 7) Իսկ իրապէս խոնարհ ճամբորդող տեսուչ մը, որպէս Ընկերութեան ներկայացուցիչը, իր անձը չափազանց կարեւոր պէտք չէ նկատէ։ Նահանգային տեսուչ մը տեղին ըլլալով ըսաւ. «Խոնարհ եղէք եւ եղբայրներուն մտիկ ըրէք։ Միշտ դիւրամատչելի եղէք»։ Ցարդ ապրած մեծագոյն մարդը՝ Յիսուս Քրիստոս՝ իր ներկայութեամբ կրնար մարդիկը անհանգիստ վիճակի մէջ ձգել, բայց ան ա՛յնքան խոնարհ եւ դիւրամատչելի էր որ նոյնիսկ երախաները հանգիստ կը զգային իր ներկայութեան։ (Մատթէոս 18։5. Մարկոս 10։13–16) Ճամբորդող տեսուչները կը փափաքին որ երախաներ, պատանիներ, տարեցներ՝ այո, ժողովքի բոլո՛ր անդամները, իրենց մօտենալու ազատ զգան։

11. Երբ հարկ ըլլայ, ներողութիւն խնդրելուն ազդեցութիւնը ի՞նչ կրնայ ըլլալ։

¹¹ Անշուշտ, «ամէնքս ալ շատ յանցանքներ կ’ընենք» եւ ճամբորդող տեսուչներէն ո՛չ մէկը անկէ զերծ է։ (Յակոբու 3։2) Երբ անոնք սխալներ գործեն, անկեղծօրէն ներողութիւն խնդրելով՝ միւս երէցներուն խոնարհութեան օրինակ կը հանդիսանան։ Առակաց 22։4–ի համաձայն, «խոնարհութիւնը եւ Տէրոջը երկիւղին վախճանը հարստութիւն, փառք ու կեանք են»։ Իսկ, Աստուծոյ բոլոր ծառաներն ալ պէտք չէ՞ ‘իրենց Աստուծոյն հետ խոնարհութեամբ քալեն’։ (Միքիայ 6։8) Երբ շրջանային տեսուչի մը հարցուեցաւ թէ ի՛նչ խրատ կրնար տալ ճամբորդող նոր տեսուչի մը, ան ըսաւ. «Բոլոր եղբայրները յարգէ եւ անոնց վրայ բարձր համարում ունեցիր եւ զանոնք քու անձէդ լաւ սեպէ։ Եղբայրներէն շա՜տ բան պիտի սորվիս։ Խոնարհ մնացիր։ Բնական եղիր. հովեր մի՛ առներ»։—Փիլիպպեցիս 2։3

12. Քրիստոնէական ծառայութեան հանդէպ նախանձախնդրութիւնը ինչո՞ւ մեծ կարեւորութիւն ունի։

¹² Քրիստոնէական ծառայութեան հանդէպ նախանձախնդրութիւնը կշիռ կու տայ ճամբորդող տեսուչին խօսքերուն։ Արդարեւ, երբ ինք ու իր կինը աւետարանչական գործին մէջ նախանձախնդիր ըլլան, երէցները, անոնց կիներն ու ժողովքի մնացեալ անդամներն ալ պիտի քաջալերուին ծառայութեան մէջ նախանձախնդիր ըլլալու։ Շրջանային տեսուչ մը յորդորեց. «Ծառայութեան մէջ եռանդուն եղէք»։ Ան աւելցուց. «Նկատած եմ որ ընդհանրապէս, ժողովք մը ո՛րքան եռանդուն ըլլայ ծառայութեան մէջ, ա՛յդքան նուազ կ’ըլլան անոր մէջի խնդիրները»։ Ուրիշ շրջանային տեսուչ մը նկատել տուաւ. «Կը հաւատամ որ եթէ երէցները դաշտի մէջ աշխատին եղբայրներու եւ քոյրերու հետ եւ անոնց օգնեն որ ծառայութենէն հաճոյք առնեն, ասիկա մտքի խաղաղութիւն եւ Եհովայի ծառայութեան մէջ մեծագոյն գոհունակութիւնը պիտի տայ»։ Պօղոս առաքեալ ‘Թեսաղոնիկեցիներուն համարձակութեամբ պատմեց Աստուծոյ աւետարանը՝ մեծ հակառակութեամբ’։ Զարմանալի չէր որ անոնք կարօտով կը յիշէին իր այցելութիւնը եւ քարոզչութիւնը եւ կը փափաքէին դարձեալ տեսնել զինք։—Ա. Թեսաղոնիկեցիս 2։1, 2. 3։6

13. Ճամբորդող տեսուչ մը ի՞նչ բան նկատի կ’ունենայ, երբ դաշտի ծառայութեան մէջ Քրիստոնեայ հաւատակիցներու հետ կ’աշխատի։

¹³ Երբ դաշտի ծառայութեան մէջ Քրիստոնեայ հաւատակիցներու հետ կ’աշխատի, ճամբորդող տեսուչ մը նկատի կ’ունենայ անոնց պարագաները եւ սահմանափակումները։ Թէեւ իր թելադրութիւնները կրնան օգտակար ըլլալ, բայց ան գիտէ թէ անհատ մը ջղագրգիռ կ’ըլլայ, երբ փորձառու երէցի մը հետ քարոզէ։ Ուստի, կարգ մը պարագաներուն, աւելի օգտակար է քաջալերել՝ քան թէ խրատել։ Երբ ան հրատարակիչներու կամ ռահվիրաներու հետ սուրբ գրային ուսումնասիրութեան մը երթայ, անոնք թերեւս նախընտրեն որ ինք վարէ զայն։ Շատ հաւանաբար, ասիկա առիթ պիտի տայ անոնց որ սորվեցնելու իրենց կերպերը բարելաւեն։

14. Ինչո՞ւ կրնանք ըսել որ եռանդուն ճամբորդող տեսուչները ուրիշներուն մէջ նախանձախնդրութիւն կը հրահրեն։

¹⁴ Եռանդուն ճամբորդող տեսուչներ, ուրիշներու մէջ նախանձախնդրութիւն կը հրահրեն։ Ուկանտայի մէջ, շրջանային տեսուչ մը խիտ անտառի մէջէն գրեթէ ժամ մը քալեց, ընկերակցելու համար եղբօր մը, որ շատ դանդաղ յառաջդիմող Աստուածաշունչի ուսումնասիրութիւն մը պիտի վարէր։ Մինչ կը քալէին, տեղատարափի մը բռնուելով ջրաթաթախ վիճակի մէջ տեղ հասան։ Երբ վեց անդամէ բաղկացած այս ընտանիքը գիտցաւ որ այցելուն ճամբորդող տեսուչ մըն է՝ ապշեցան։ Անոնք գիտէին որ իրենց եկեղեցիին քարոզիչները բնաւ այսպիսի հետաքրքրութիւն ցոյց չեն տար իրենց ծուխին հանդէպ։ Յաջորդ Կիրակի, առաջին անգամ ըլլալով ժողովի եկան եւ Եհովայի Վկաներ ըլլալու փափաք յայտնեցին։

15. Մեքսիկայի մէջ, եռանդուն շրջանային տեսուչ մը ի՞նչ գեղեցիկ փորձառութիւն մը ունեցաւ։

¹⁵ Մեքսիկական Ուէհաքա նահանգին մէջ, շրջանային տեսուչ մը իրմէ բնաւ չակնկալուած բան մը ըրաւ։ Ան կարգադրութիւն ըրաւ որ չորս գիշեր բանտի խցիկի մը մէջ անցընէ, Թագաւորութեան հրատարակիչներ եղած եօթը բանտարկեալներէ կազմուած խումբ մը այցելելու համար։ Քանի մը օր ան այս բանտարկեալներուն ընկերակցեցաւ անոնց հետ խցիկէ խցիկ վկայութիւն տալու եւ Աստուածաշունչի ուսումնասիրութիւններ վարելու համար։ Քանի որ հետաքրքրութիւնը մեծ էր, այդ ուսումնասիրութիւններէն ոմանք մինչեւ ուշ գիշեր շարունակուեցան։ «Այցելութեան աւարտին, բանտարկեալները եւ ես շատ ուրախ էինք, փոխադարձ քաջալերութեան պատճառաւ», կը գրէ այս եռանդուն շրջանային տեսուչը։

16. Ինչո՞ւ շատ օգտակար է երբ ճամբորդող տեսուչներ եւ իրենց կիները քաջալերութեան աղբիւր մը ըլլան։

¹⁶ Ճամբորդող տեսուչները կը ջանան քաջալերական ըլլալ։ Երբ Պօղոս Մակեդոնիոյ ժողովքները կ’այցելէր, ան ‘շատ խօսքերով զանոնք յորդորեց’։ (Գործք 20։1, 2) Քաջալերական խօսքերը կրնան իրապէս օգնել որ երիտասարդներ ու տարեցներ հոգեւոր նպատակակէտեր դնեն։ Դիտարանի Ընկերութեան մեծ մասնաճիւղերէն մէկուն մէջ կատարուած տեղեկատուական փորձագիտանք մը յայտնեց որ լիաժամ ծառայութեան ձեռնարկողներու շուրջ 20 տոկոսը, շրջանային տեսուչներու կողմէ քաջալերութիւն ստացած էր։ Որպէս լիաժամ Թագաւորութեան հրատարակիչ, ճամբորդող տեսուչին կինն ալ շատ մեծ քաջալերութեան աղբիւր մը կրնայ ըլլալ, իր լաւ օրինակով։

17. Ուրիշներու օգնութիւն մատուցանելու իր առանձնաշնորհումին մասին տարեց շրջանային տեսուչի մը զգացումը ի՞նչ էր։

¹⁷ Մանաւանդ տարեցներն ու ընկճուածները քաջալերութեան կարիքը ունին։ Տարեց շրջանային տեսուչ մը գրեց. «Ինծի անպատում ներքին ուրախութիւն տուող իմ գործիս երեսակներէն մէկն է, Աստուծոյ հօտին մէջ գտնուող անգործունեաներուն եւ մարմնաւորապէս տկար տարեցներուն օգնել։ Հռովմայեցիս 1։11, 12–ի խօսքերը մասնաւոր իմաստ մը կը կրեն ինծի համար, մինչ մեծ քաջալերութիւն եւ զօրութիւն կը ստանամ ‘անոնց հոգեւոր շնորհք մը հաղորդելով, որպէս զի հաստատուին’»։

Անոնց Ուրախ Գործին Վարձքը

18. Ճամբորդող տեսուչները սուրբ գրային ի՞նչ նպատակակէտեր ունին։

¹⁸ Ճամբորդող տեսուչները իրենց հաւատակիցներուն լաւագոյն շահերը կը փնտռեն։ Անոնք կը փափաքին ժողովքը զօրացնել եւ զայն հոգեւորապէս կերտել։ (Գործք 15։41) Ճամբորդող տեսուչ մը ծանր կ’աշխատի, որպէսզի «քաջալերէ, թարմացնէ, լիաժամ ծառայութիւն կատարելու եւ շարունակաբար ճշմարտութիւնը ապրելու փափաքը խրախուսէ»։ (Գ. Յովհաննու 3) Ուրիշ մը կը ջանայ հաւատակիցները հաւատքի մէջ հաստատել։ (Կողոսացիս 2։6, 7) Յիշեցէք որ ճամբորդող տեսուչ մը «հարազատ լծակից» մըն է եւ ո՛չ թէ ուրիշներու հաւատքին տիրապետող մը։ (Փիլիպպեցիս 4։3. Բ. Կորնթացիս 1։23) Անոր այցելութիւնը քաջալերութեան եւ յաւելեալ գործունէութեան, ինչպէս նաեւ երէցներու մարմինին համար, յառաջդիմութիւնը աչքէ անցընելու եւ ապագայի նոր նպատակակէտեր դնելու առիթ մըն է։ Ժողովքին հրատարակիչները, ռահվիրաները, օգնական ծառաները եւ երէցները կրնան ակնկալել անոր խօսքերով եւ օրինակով կերտուիլ եւ իրենց դիմաց եղած գործին համար խթանուիլ։ (Բաղդատել՝ Ա. Թեսաղոնիկեցիս 5։11։) Ուստի, բոլոր սրտով թիկունք կանգնեցէք շրջանային տեսուչի այցելութիւններուն, եւ նահանգային տեսուչին մատուցած ծառայութենէն լիովին օգտուեցէք։

19, 20. Ճամբորդող տեսուչները եւ անոնց կիները ինչպէ՞ս վարձատրուած են իրենց հաւատարիմ ծառայութեան համար։

¹⁹ Ճամբորդող տեսուչներն ու անոնց կիները մեծապէս կը վարձատրուին իրենց մատուցած հաւատարիմ ծառայութեան համար, եւ անոնք վստահ կրնան ըլլալ որ Եհովա զիրենք պիտի օրհնէ իրենց կատարած բարի գործին համար։ (Առակաց 19։17. Եփեսացիս 6։8) Կէորկը եւ Մակտալէնան տարեց զոյգ մըն են, որոնք երկար տարիներ ուղեւորութեան գործին մէջ աշխատած են։ Լիւքսէմպուրկի համաժողովներէն մէկուն ընթացքին, անհատ մը մօտեցաւ Մակտալէնային, որու ան վկայած էր աւելի քան 20 տարիներ առաջ։ Ճշմարտութեան հանդէպ այս Հրեայ կնոջ հետաքրքրութիւնը արթնցած էր Մակտալէնայի իրեն թողած Աստուածաշունչի գրականութեամբ եւ ժամանակի ընթացքին ան մկրտուած էր։ Կէորկին մօտեցաւ հոգեւոր քոյր մը, որ յիշեց թէ 40 տարի առաջ իր տունը եկած էր։ Բարի լուրը եռանդունօրէն ներկայացնելու անոր կերպը պատճառ եղած էր որ ինք եւ իր ամուսինը ճշմարտութիւնը ընդունին։ Հարկ չկայ ըսելու որ Կէորկին եւ Մակտալէնային ուրախութիւնը սահման չունէր։

²⁰ Եփեսոսի մէջ Պօղոսի կատարած արդիւնաբեր ծառայութիւնը իրեն ուրախութիւն պատճառեց եւ թերեւս անոր համար ան մէջբերեց Յիսուսի խօսքերը՝ «Աւելի երանելի է տա՛լը, քան թէ առնելը»։ (Գործք 20։35) Քանի որ ուղեւորութեան գործին մէջ անդադար տալ կայ, անոր մասնակից եղողները ուրախութիւն կ’ունենան, մանաւանդ երբ իրենց աշխատանքին լաւ արդիւնքէն տեղեակ կ’ըլլան։ Յուսալքուած երէցի մը օգնած շրջանային տեսուչ մը նամակ մը ստացաւ, որու մէջ ըսուած էր. «Իմ հոգեւոր կեանքիս մէջ զիս ‘մխիթարելու’ մեծապէս նպաստեցիր, քու կարծածէդ աւելի։ . . . Բնաւ չես կրնար գիտնալ թէ որքա՜ն մեծ օգնութիւն եղար արդի Ասափի մը, որու ‘ոտքերը գրեթէ սայթաքած էին’»։—Կողոսացիս 4։11. Սաղմոս 73։2

21. Ինչո՞ւ կրնաք ըսել որ Ա. Կորնթացիս 15։58–ն կը կիրարկուի ճամբորդող տեսուչներու գործունէութեան։

²¹ Տարիներ շրջանային գործին մէջ անցուցած տարեց Քրիստոնեայ մը կը սիրէ մտածել Ա. Կորնթացիս 15։58–ի մասին, ուր Պօղոս կը յորդորէ. «Հաստատո՛ւն եւ անշա՛րժ կեցէք եւ ամէն ատեն աւելցէ՛ք Տէրոջը գործին մէջ, գիտնալով թէ ձեր աշխատութիւնը պարապ չէ Տէրոջմով»։ Անկասկած, ճամբորդող տեսուչները Տէրոջը գործին մէջ շատ ընելիք ունին։ Իսկ որքա՜ն երախտապարտ ենք որ անոնք այսքան ուրախութեամբ կը ծառայեն, որպէս Եհովայի շնորհքին հաւատարիմ տնտեսներ։

[Ստորանիշ]

Ի՞նչպէս Պիտի Պատասխանէիք

◻ Ինչո՞ւ ճամբորդող տեսուչները կրնանք նկատել որպէս «բարի տնտեսներ»։

◻ Ի՞նչ ազդակներ կ’օգնեն որ շրջանային եւ նահանգային տեսուչներ մեծապէս օգտակար ըլլան։

◻ Ուղեւորութեան գործին մասնակցողներուն համար, խոնարհութիւնը եւ նախանձախընդրութիւնը ինչո՞ւ շատ կարեւոր են։

◻ Ճամբորդող տեսուչները ի՞նչ լաւ նպատակակէտեր ունին։

[Նկար՝ էջ 26]

Ճամբորդող տեսուչները կը ջանան քաջալերել իրենց հաւատակիցները

[Նկար՝ էջ 27]

Թէ՛ երիտասարդներ եւ թէ տարեցներ կրնան օգտուիլ ճամբորդող տեսուչներուն եւ իրենց կիներուն ընկերակցութենէն

[Նկար՝ էջ 28]

Ճամբորդող տեսուչներու եռանդուն ծառայութիւնը՝ ուրիշներու մէջ նախանձախնդրութիւն կը հրահրէ