Փոխադարձ քաջալերութիւն մը բոլորին համար
1. Ճամբորդող տեսուչներուն այցելութիւնները մասնայատուկ ի՞նչ պատեհութիւններ կը հայթայթեն։
1 Պօղոս առաքեալ Հռովմի ժողովքին գրեց. «Կը փափաքիմ ձեզ տեսնել, որ ձեզի հոգեւոր շնորհք մը հաղորդեմ, որպէս զի հաստատուիք. այսինքն ձեզի հետ ես ալ մխիթարուիմ իմ ու ձեր փոխադարձ հաւատքին միջոցով»։ (Հռովմ. 1։11, 12) Այսօր, ճամբորդող տեսուչներուն այցելութիւնները փոխադարձ քաջալերութեան նոյնանման պատեհութիւններ կը հայթայթեն։
2. Շրջանային տեսուչին այցելութիւնը ինչո՞ւ նախապէս կը ծանուցանուի։
2 Ժողովքը. Ընդհանրապէս շրջանային տեսուչին այցելութիւնը շուրջ երեք ամիս առաջ կը ծանուցանուի ժողովքին։ Ասիկա ժամանակ կու տայ որ մեր յայտագիրը յարմարցնենք, որպէսզի անկէ լման օգուտ քաղենք։ (Եփ. 5։15, 16) Եթէ աշխարհիկ գործ մը կ’աշխատիս, թերեւս կարենաս արձակուրդ առնել, այդ շաբթուան ընթացքին դաշտի ծառայութեան թիկունք կանգնելու համար։ Ոմանք այցելութեան ամսուան ընթացքին օժանդակ ռահվիրայութեան կը ձեռնարկեն։ Եթէ ծրագրած էիր ճամբորդել, կրնա՞ս յայտագիրդ փոխել որպէսզի այդ շաբաթը ներկայ գտնուիս։
3. Անձնապէս ի՞նչ կրնանք ընել այցելութեան ընթացքին քաջալերութիւն ստանալու համար։
3 Շրջանային տեսուչին այցելութեան գլխաւոր նպատակն է դաշտի ծառայութեան մէջ անհատական քաջալերութիւն ու մարզում հայթայթել։ Կրնա՞ս իրմէ կամ իր կնոջմէն, եթէ ամուսնացած է, խնդրել որ քեզի հետ դաշտին մէջ աշխատի։ Շրջանային տեսուչը այլազան հրատարակիչներու հետ քարոզելէն հաճոյք կ’առնէ, ի ներառեալ անոնց հետ որոնք նուազ փորձառութիւն ունին կամ ծառայութեան մէջ որոշ հմտութիւններ չունին։ Բոլորն ալ կրնան իր ներկայացումներէն օգտուիլ եւ գործադրել ազնուօրէն տրուած որեւէ թելադրութիւն։ (Ա. Կորն. 4։16, 17) Զինք ճաշի հրաւիրելը քաջալերական ընկերակցութեան յաւելեալ պատեհութիւն մը պիտի հայթայթէ։ (Եբր. 13։2) Որովհետեւ իր դասախօսութիւնները ժողովքին կարիքներուն յարմարցուած են, ուշի–ուշով մտիկ ըրէ։
4. Ի՞նչպէս կրնանք մեր շրջանային տեսուչը քաջալերել։
4 Շրջանային տեսուչը. Պօղոս առաքեալ իր ծառայած եղբայրներէն տարբեր չէր, այն առումով որ ինքն ալ դժուարութիւններ ու մտահոգութիւններ դիմագրաւեց, եւ քաջալերութիւնը գնահատեց։ (Բ. Կորն. 11։26-28) Երբ Հռովմի ժողովքը իմացաւ թէ Պօղոս որպէս բանտարկեալ իրենց քով կու գար, ոմանք զինք դիմաւորելու համար մինչեւ Ապփիոսի վաճառանոցը ճամբորդեցին,– Հռովմէն 74 քիլոմեթր հեռու։ «Պօղոս զանոնք տեսնելով՝ գոհութիւն տուաւ Աստուծոյ եւ սիրտ առաւ»։ (Գործք 28։15) Դուն ալ նոյն կերպով կրնաս շրջանային տեսուչդ քաջալերել։ Իրեն հանդէպ «կրկին պատիւ» ցուցաբերէ, խանդավառութեամբ իր այցելութեան թիկունք կանգնելով։ (Ա. Տիմ. 5։17) Քեզի համար իր թափած ջանքերը անկեղծօրէն գնահատէ։ Ինքն ու իր կինը պիտի ուրախանան երբ տեսնեն հաւատքդ, սէրդ ու համբերութիւնդ։—Բ. Թես. 1։3, 4
5. Ներկայիս ինչո՞ւ բոլորս ալ քաջալերութեան կարիքը ունինք։
5 Այս «չար ժամանակներ»ուն մէջ, մեզմէ ո՞վ քաջալերութեան կարիքը չունի։ (Բ. Տիմ. 3։1) Հիմա իսկ որոշէ շրջանային տեսուչին մասնայատուկ շաբթուան ընթացքին տեղի ունենալիք գործունէութեան լիովին մասնակցիլ։ Բոլորս ալ, ըլլանք ճամբորդող տեսուչ թէ հրատարակիչ, կրնանք ուրախալի փոխադարձ քաջալերութեան մէջ մեր բաժինը բերել։ Այս կերպով նաեւ ‘մէկզմէկ պիտի մխիթարենք եւ իրարու պիտի օգնենք’։—Ա. Թես. 5։11