Իսկական խաղաղութիւն փնտռեցէք եւ անոր ետեւէն գացէք
«Ան որ կ’ուզէ կեանքը սիրել ու բարի օրեր տեսնել, . . . թող չարութենէ ետ քաշուի ու բարութիւն ընէ, թող խաղաղութիւն փնտռէ եւ անոր ետեւէն երթայ»։—Ա. ՊԵՏՐՈՍ 3։10, 11
1. Եսայիի ո՞ր հռչակաւոր խօսքերը վստահաբար պիտի յաջողին։
«ԱՆՈՆՔ իրենց սուրերէն խոփեր եւ իրենց նիզակներէն յօտոցներ պիտի շինեն։ Ազգ ազգի վրայ սուր պիտի չվերցնէ եւ ա՛լ պատերազմ պիտի չսորվին»։ (Եսայեայ 2։4) Թէեւ այս հռչակաւոր համարը կը ցուցադրուի Նիւ Եորք Սիթիի մէջ գտնուող Միացեալ Ազգերու համաշխարհային կեդրոնատեղիին մօտ, բայց այս աշխարհածաւալ կազմակերպութիւնը բնա՛ւ չկարողացաւ կատարել այդ խօսքերը։ Սակայն, քանի որ այս յայտարարութիւնը Եհովա Աստուծոյ ստոյգ խօսքին մաս կը կազմէ, անիկա ի դերեւ պիտի չելլէ։—Եսայեայ 55։10, 12
2. Եսայեայ 2։2, 3–ի համաձայն, «վերջին օրերը» ի՞նչ պիտի պատահի։
2 Եսայեայ 2։4–ի խօսքերը իրապէս հոյակապ մարգարէութեան մը մաս կը կազմեն. իսկական խաղաղութեան մասին մարգարէութիւն մը, որ հի՛մա՝ մեր օրերուն, կատարում մը կ’ունենայ։ Այլեւս պատերազմներ ու զինամթերք չըլլալու խայտալի հեռանկարին մասին ծանուցանելէ առաջ, մարգարէութիւնը կ’ըսէ. «Վերջին օրերը Տէրոջը տանը լեռը լեռներուն գլխուն վրայ պիտի հաստատուի, բլուրներէն վեր պիտի բարձրանայ, բոլոր հեթանոսները հեղեղի պէս պիտի դիմեն անոր։ Շատ ժողովուրդներ պիտի երթան ու ըսեն. ‘Եկէ՛ք, Եհովային լեռը, Յակոբին Աստուծոյն տունը ելլենք, որպէս զի մեզի իր ճամբաները սորվեցնէ ու անոր շաւիղներուն մէջ քալենք’։ Վասն զի օրէնքը՝ Սիօնէն ու Տէրոջը խօսքը Երուսաղէմէն պիտի ելլէ»։—Եսայեայ 2։2, 3
Մարդիկ Կրնա՛ն Խաղաղասէր Դառնալ
3. Կռուազան անհատ մը ի՞նչպէս խաղաղասէր կրնայ դառնալ։
3 Նկատի առէք թէ մարդիկ խաղաղասէր ընթացքի մը ետեւէ երթալէ առաջ, պէտք է Եհովայի ճամբաներուն մասին սորվին։ Եհովայի ուսուցումին հնազանդութեամբ ընդառաջելը կրնայ անհատի մը մտածելակերպը ու գործելակերպը փոխել, այնպէս որ կռուազան մէկը կրնայ խաղաղասէր դառնալ։ Այս բարեփոխութիւնը ի՞նչպէս կ’իրագործուի։ Հռովմայեցիս 12։2–ը կ’ըսէ. «Մի՛ կերպարանիք այս աշխարհին կերպարանքովը, հապա ձեր մտքին նորոգութիւնովը նորոգուեցէ՛ք, որպէս զի քննէք թէ ի՞նչ է Աստուծոյ կամքը, որ բարի ու հաճելի եւ կատարեալ է»։ Մեր միտքը կը նորոգենք կամ անոր ուրիշ ուղղութիւն կու տանք, երբ Աստուծոյ Խօսքէն առնուած սկզբունքներով եւ պատուիրանքներով կը լեցնենք զայն։ Աստուածաշունչը կանոնաւորաբար ուսումնասիրելը մեզի կ’օգնէ որ այս փոփոխութիւնը ընենք եւ կարենանք գիտնալ թէ ի՛նչ է Աստուծոյ կամքը մեզի համար, որպէսզի յստակօրէն տեսնենք թէ ո՛ր ճամբէն պէտք է քալենք։—Սաղմոս 119։105
4. Անհատ մը ի՞նչպէս խաղաղասէր նոր անձնաւորութիւնը կը հագնի։
4 Աստուածաշունչի ճշմարտութիւնը ոչ միայն մեր մտածելակերպը կը փոխէ, այլ նաեւ՝ մեր արարքներն ու անձնաւորութիւնը։ Անիկա մեզի կ’օգնէ ընելու ի՛նչ որ Պօղոս առաքեալ յորդորեց. «Ձեր վրայէն հանէք այն ձեր առաջուան վարմունքը ունեցող հին մարդը, որ խաբեբայ ցանկութիւններով ապականուած էր եւ ձեր մտքով ու հոգիով նորոգուիք եւ նոր մարդը ձեր վրայ հագնիք, որ Աստուծոյ պատկերին պէս արդարութիւնով ու ճշմարիտ սրբութիւնով ստեղծուած է»։ (Եփեսացիս 4։22-24) Միտքը նորոգող ոյժը ներքին ոյժ մըն է։ Անիկա կը բարեփոխուի ու կը զօրանայ մինչ Եհովայի ու իր օրէնքներուն հանդէպ մեր սէրը կ’աճի, նաեւ մեզ հոգեւոր ու խաղաղասէր անհատներ կը դարձնէ։
5. Իր աշակերտներուն Յիսուսի տուած «նոր պատուիրան»ը ի՞նչպէս կը նպաստէ իրենց մէջ եղած միութեան։
5 Այս բարեփոխութեան կարիքը կը տեսնուի, աշակերտներուն հետ իր անցուցած վերջին ժամերուն ընթացքին Յիսուսի տուած պատուիրանքէն. «Նոր պատուիրան մը կու տամ ձեզի, որ մէկզմէկ սիրէք, ինչպէս ես ձեզ սիրեցի, որ դուք ալ մէկզմէկ սիրէք։ Ասով ամէնքը պիտի գիտնան թէ իմ աշակերտներս էք, եթէ իրարու վրայ սէր ունենաք»։ (Յովհաննու 13։34, 35) Այս Քրիստոսանման, անձնուրաց սէրը, աշակերտները իրարու կը կապէ կատարեալ միութեամբ։ (Կողոսացիս 3։14) Միմիայն անոնք որոնք կը յօժարին ընդունիլ ու ապրիլ այս «նոր պատուիրան»ով, Աստուծոյ խոստացած խաղաղութիւնը պիտի վայելեն։ Ներկայիս կա՞ն մարդիկ որոնք ասիկա կ’ընեն։
6. Աշխարհի մարդոց հակառակը, Եհովայի Վկաները ինչո՞ւ խաղաղութիւն կը վայելեն։
6 Եհովայի Վկաները կը ջանան սէր ցոյց տալ իրենց համաշխարհային եղբայրակցութեան մէջ։ Հակառակ անոր որ անոնք աշխարհի ամէն ազգերէն հաւաքուած են, աշխարհի պայքարներուն միջամուխ չեն ըլլար, նոյնիսկ երբ քաղաքական ու կրօնական խիստ ճնշումներու կ’ենթարկուին։ Որպէս միացած ժողովուրդ մը, անոնք Եհովայէ կը սորվին ու խաղաղութիւն կը վայելեն։ (Եսայեայ 54։13) Անոնք քաղաքական պայքարներու մէջ չէզոք կը մնան եւ պատերազմներու չեն մասնակցիր։ Նախապէս վայրագ եղողներէն ոմանք, իրենց նախկին ապրելակերպէն հրաժարած են։ Անոնք խաղաղասէր Քրիստոնեաներ եղած են, Յիսուս Քրիստոսը ընդօրինակելով եւ բոլորանուէր կերպով Պետրոսի խրատին կը հետեւին. «Ան որ կ’ուզէ կեանքը սիրել ու բարի օրեր տեսնել, իր լեզուն թող դադրեցնէ չարութենէ ու իր շրթունքները՝ նենգութիւն խօսելէ։ Թող չարութենէ ետ քաշուի ու բարութիւն ընէ, թող խաղաղութիւն փնտռէ եւ անոր ետեւէն երթայ»։—Ա. Պետրոս 3։10, 11. Եփեսացիս 4։3
Խաղաղութեան Ետեւէն Գացողները
7, 8. Օրինակներ տուէք անհատներու մասին, որոնք պատերազմէն հրաժարելով իսկական խաղաղութիւն փնտռողներ դարձան։ (Յիշեցէք ուրիշ նմանօրինակ ծանօթ պարագաներ)։
7 Առնենք Ռամի Օվէտի օրինակը, որ հակա–ահաբեկչական մասնագիտացած ջոկատի մը նախկին պաշտօնեաներէն մէկն էր։ Ան իր թշնամիները մեռցնելու համար մարզում ստացած էր։ Ան բոլոր սրտով կը հաւատար իր Իսրայելեան ազգայնականութեան, մինչեւ ա՛յն օրը, որ ռաբբիները չուզեցին որ ան իր սիրած աղջկան հետ ամուսնանար, պարզապէս անոր համար որ անիկա Ասիացի մը՝ ուրիշ խօսքով, Հեթանոս մըն էր։ Ան սկսաւ Աստուածաշունչէն ճշմարտութիւնը փնտռել։ Ապա Եհովայի Վկաներուն հետ շփման մէջ մտաւ։ Վկաներուն հետ Աստուածաշունչը ուսումնասիրելով, համոզուեցաւ որ ինք այլեւս չէր կրնար մոլեռանդ ազգայնական մը ըլլալ։ Քրիստոնէական սէրը կը նշանակէր պատերազմը եւ զէնքերը մէկդի ընել եւ սորվիլ ուրիշ ցեղի պատկանող անհատները սիրել։ Ան որքա՜ն զարմացաւ, երբ ազնիւ նամակ մը ստացաւ որ կը սկսէր՝ «Եղբայրս Ռամի» բառերով։ Այդ նամակը ինչո՞ւ այդքան տարօրինակ կը հնչէր։ Քանի որ նամակին հեղինակը Պաղեստինցի Վկայ մըն էր։ Ռամին կ’ըսէ. «Կը խորհէի որ ասիկա անհաւատալի էր, քանի որ Պաղեստինցիները իմ թշնամիներս էին եւ ահաւասիկ անոնցմէ մէկը զիս՝ ‘Եղբայրս’ կը կոչէր»։ Ներկայիս Ռամին ու իր կինը իսկական խաղաղութեան ետեւէն կ’երթան Աստուծոյ ուզած կերպով։
8 Ուրիշ օրինակ մըն է Կէորկ Ռոյթըրը, որ Բ. Աշխարհամարտին, Ռուսիա ներխուժող Գերմանական բանակին մէջ ծառայած էր։ Ան վերջապէս յուսախաբ եղաւ աշխարհի տիրապետութեան Հիթլէրի հսկայ ծրագիրէն։ Պատերազմէն վերադարձին, ան սկսաւ Եհովայի Վկաներու հետ Աստուածաշունչը ուսումնասիրել։ Ան գրեց. «Վե՜րջապէս ամէն բան սկսաւ աւելի յստակ ըլլալ ինծի համար։ Հասկցայ որ այս թափուած ամբողջ արեան համար Աստուած այպանելի չէր։ . . . Սորվեցայ որ իր նպատակն է համերկրային դրախտ մը հաստատել եւ հնազանդ մարդկութեան վրայ յաւիտենական օրհնութիւններ տեղացնել։ . . . Հիթլէր իր ‘Հազարամեայ Իշխանութեամբ’ հպարտացաւ, բայց միայն 12 տարի իշխեց եւ ի՜նչ սարսափելի արդիւնքով։ Ո՛չ թէ Հիթլէր, այլ Քրիստո՛ս է . . . որ կրնայ եւ պիտի հաստատէ երկրի վրայ հազարամեայ իշխանութիւն մը»։ Կէորկ 50 տարիէ ի վեր լման ժամանակով ծառայութեան մէջ, իսկական խաղաղութեան որպէս ջատագով մը կը ծառայէ։
9. Նացիական Գերմանիոյ մէջ Եհովայի Վկաներու փորձառութիւնը ի՞նչպէս փաստեց որ անոնք քաջ են ու միեւնոյն ատեն՝ խաղաղասէր։
9 Նացի վարչաձեւին ներքեւ Գերմանիոյ մէջ Եհովայի Վկաներուն ուղղամտութիւնը եւ չէզոքութիւնը, աւելի քան 50 տարի ետք կը շարունակեն որպէս վկայութիւն ծառայել Աստուծոյ ու խաղաղութեան համար իրենց սիրոյն։ Ուաշինկթըն Տի.Սի.–ի, Միացեալ Նահանգներու Ողջակիզութեան Թանգարանին կողմէ հրատարակուած գրքոյկ մը կը նշէ. «Եհովայի Վկաները Նացի վարչաձեւին ներքեւ սաստիկ հալածանք կրեցին։ . . . Կեդրոնացման ճամբարներու մէջ տանջանքի, վատ վերաբերմունքի եւ երբեմն նոյնիսկ մահուան դատապարտութեան դիմաց [իրենց կրօնքը ուրանալը] մերժելու համար մեծամասնութեան ցուցաբերած քաջութիւնը, իրենց ժամանակակիցներուն մէջ խոր յարգանք շահելու նպաստեց»։ Գրքոյկը կ’աւելցնէ. «Ճամբարներէն ազատ արձակուելու ընթացքին, Եհովայի Վկաները շարունակեցին իրենց գործը, վերապրողներուն մէջ խառնուելով եւ զանոնք նորահաւատներ դարձնելով»։
Աւելի Մեծ Փոփոխութիւն մը
10. (ա) Իսկական խաղաղութիւն ըլլալու համար, ի՞նչ մեծ փոփոխութեան մը կարիքը կայ։ (բ) Ասիկա ի՞նչպէս նկարագրուած է Դանիէլի գրքին մէջ։
10 Ասիկա կը նշանակէ՞ որ Եհովայի Վկաները կը հաւատան որ մեծ զանգուածներ դարձի բերելով եւ չէզոքութեան հաւատացնել տալով կրնան խաղաղութիւն բերել։ Բնա՛ւ։ Երկրի վրայ խաղաղութիւնը վերահաստատուելու համար անկէ աւելի մեծ փոփոխութեան կարիքը կայ։ Ի՞նչ է այդ։ Բաժանում, կեղեքում եւ բռնութիւն պատճառող մարդկային իշխանութիւնը մէջտեղէն պէտք է վերցուի Աստուծոյ Թագաւորութեան կողմէ, որու մասին Յիսուս իր աշակերտներուն սորվեցուց աղօթել։ (Մատթէոս 6։9, 10) Սակայն ասիկա ի՞նչպէս պիտի կատարուի։ Աստուծոյ կողմէ ներշնչուած երազի մը մէջ, Դանիէլ մարգարէն տեղեկացաւ որ վերջին օրերուն, Աստուծոյ Թագաւորութիւնը, ‘մարդու ձեռքով չկտրուած’ հսկայ քարի մը նման, պիտի փշրէ երկրի վրայ մարդկային քաղաքական իշխանութիւնները ներկայացնող հսկայ արձանը։ Յետոյ ան ծանուցանեց. «Այն թագաւորներուն օրերը երկնքի Աստուածը ուրիշ թագաւորութիւն մը պիտի հանէ, որ յաւիտեան պիտի չաւերուի։ Այս թագաւորութիւնը ուրիշ ժողովուրդի պիտի չթողուի։ Անիկա այս բոլոր թագաւորութիւնները պիտի փշրէ ու պիտի հատցնէ ու ինք յաւիտեան պիտի մնայ»։—Դանիէլ 2։31-44
11. Եհովա ի՞նչ միջոց պիտի գործածէ խաղաղութեան համար պէտք եղած փոփոխութիւնը բերելու։
11 Աշխարհի կացութիւնը ինչո՞ւ այս արմատական փոփոխութեան պիտի ենթարկուի։ Քանի որ Եհովան խոստացած է որ երկիրը պիտի մաքրէ զայն ապականողներէն եւ աւերողներէն։ (Յայտնութիւն 11։18) Այս փոփոխութիւնը տեղի պիտի ունենայ, Սատանայի եւ իր ամբարիշտ աշխարհին դէմ Եհովայի մղած արդար պատերազմին ընթացքին։ Յայտնութիւն 16։14, 16–ին մէջ կը կարդանք. «Անոնք [ներշնչուած պիղծ արտայայտութիւնները] դեւերու ոգիներ էին՝ որ նշաններ կ’ընէին ու բոլոր աշխարհի թագաւորներուն [քաղաքական կառավարիչներուն] քով կ’երթային, որպէս զի զանոնք Ամենակալ Աստուծոյ այն մեծ օրուանը պատերազմին համար հաւաքեն. եւ զանոնք տեղ մը հաւաքեցին, որ Եբրայեցերէն Արմագեդոն կը կոչուի»։
12. Արմագեդոնը ի՞նչպէս պիտի ըլլայ։
12 Սակայն Արմագեդոնը ի՞նչպէս պիտի ըլլայ։ Անիկա կորիզային աբոքալիբս մը կամ մարդոց կողմէ պատճառուած ուրիշ աղէտ մը պիտի չըլլայ։ Ո՛չ, անիկա մարդկային բոլոր պատերազմներուն վերջ դնող ու այսպիսի պատերազմներ հրահրողները բնաջնջող Աստուծոյ պատերազմն է։ Անիկա Աստուծոյ պատերազմն է որ իրական խաղաղութիւն պիտի բերէ բոլոր խաղաղութիւն սիրողներուն։ Այո, Արմագեդոնը պիտի գայ, ինչպէս Եհովա նպատակադրած է։ Անիկա պիտի չուշանայ։ Իր Ամբակում մարգարէն ներշնչման ներքեւ գրեց. «Քանզի տեսիլքը որոշուած ժամանակի համար է, բայց դէպի վախճանը կ’արտորայ եւ սուտ պիտի չելլէ. եթէ ուշանայ՝ անոր սպասէ, քանզի անշուշտ պիտի գայ, ետ պիտի չմնայ»։ (Ամբակումայ 2։3) Մեր մարդկային զգացումներուն պատճառաւ, անիկա մեր աչքին ուշացած կրնայ թուիլ, բայց Եհովան իր յայտագրին տէրն է։ Եհովայի նախասահմանած ժամանակին, Արմագեդոնը պիտի հարուածէ։
13. Աստուած ի՞նչպէս պիտի վարուի իրական յանցապարտին՝ Բանսարկու Սատանային հետ։
13 Այս վճռական քայլը իսկական խաղաղութեան ճամբան պիտի հարթէ։ Սակայն որպէսզի իսկական խաղաղութիւնը զօրաւոր կերպով հաստատուի ուրիշ բան մըն ալ պէտք է ըլլայ. բաժանում, ատելութիւն ու պայքար հրահրողին մէջտեղէն վերցուիլը։ Իսկ Աստուածաշունչը ճիշդ ասիկա կը մարգարէանայ. Սատանան՝ պատերազմ հրահրողը եւ ստութեան հայրը անդունդը պիտի ձգուի։ Յովհաննէս առաքեալ ասիկա տեսիլքով մը տեսաւ, ինչպէս արձանագրուած է Յայտնութիւն 20։1-3–ի մէջ. «Հրեշտակ մը տեսայ, որ երկնքէն կ’իջնէր ու անդունդին բանալին ու մեծ շղթայ մը ունէր իր ձեռքը։ Ան բռնեց վիշապը, այսինքն առաջին օձը որ Բանսարկուն ու Սատանան է եւ կապեց զանիկա հազար տարի ու անդունդը ձգեց զանիկա եւ գոցեց ու վրայէն կնքեց, որ ա՛լ չմոլորեցնէ ազգերը՝ մինչեւ հազար տարին լմննայ»։
14. Սատանայի դէմ Եհովայի յաղթական արարքը ի՞նչպէս կարելի է նկարագրել։
14 Ասիկա երազ մը չէ. այլ Աստուծոյ խոստումն է ու Աստուածաշունչը կ’ըսէ. «Անկարելի է, որ Աստուած սուտ խօսի»։ (Եբրայեցիս 6։18) Ուստի, Եհովա իր մարգարէին՝ Երեմիայի միջոցաւ կրցաւ ըսել. «Ե՛ս եմ Տէրը, որ երկրի վրայ ողորմութիւն, իրաւունք ու արդարութիւն կ’ընեմ. քանզի ես ասոնց կը հաճիմ»։ (Երեմեայ 9։24) Եհովա արդարութեամբ ու իրաւունքով կը վարուի եւ երկրի վրայ բերելիք խաղաղութիւնը զինք կը հրճուեցնէ։
Խաղաղութեան Իշխանին Կողմէ Իշխանութիւն
15, 16. (ա) Ո՞վ է Եհովայի ընտրած Թագաւորը։ (բ) Այդ իշխանութիւնը ի՞նչպէս նկարագրուած է եւ ո՛վ անոր պիտի մասնակցի։
15 Իր թագաւորական կարգադրութեան ներքեւ ապրողներուն իսկական խաղաղութիւն երաշխաւորելու համար, Եհովա իշխանութիւնը տուած է Յիսուս Քրիստոսի՝ իսկական Խաղաղութեան Իշխանին, ինչպէս գուշակուած էր Եսայեայ 9։6, 7–ի մէջ. «Մեզի մանուկ մը ծնաւ, մեզի որդի մը տրուեցաւ եւ իշխանութիւնը անոր ուսին վրայ պիտի ըլլայ։ Անոր անունը պիտի կոչուի Սքանչելի, Խորհըրդակից, Հզօր Աստուած, Յաւիտենականութեան Հայր, Խաղաղութեան Իշխան։ . . . Անոր իշխանութեանը մեծնալուն ու խաղաղութեանը սահման չկայ, . . . զօրքերու Տէրոջը նախանձը պիտի ընէ ասիկա»։ Սաղմոսերգուն ալ մարգարէաբար գրեց Մեսիայի խաղաղ իշխանութեան մասին. «Անոր օրերուն մէջ արդարը պիտի ծաղկի ու շատ խաղաղութիւն պիտի ըլլայ, մինչեւ որ այլեւս լուսին չըլլայ»։—Սաղմոս 72։7
16 Ասկէ զատ, Քրիստոսի՝ հոգիէն օծուած 144,000 եղբայրներն ալ իր հետ երկնքի մէջ պիտի թագաւորեն։ Ասոնք Քրիստոսի ժառանգակիցներն են, որոնց մասին Պօղոս գրեց. «Խաղաղութեան Աստուածը շուտով խորտակէ Սատանան ձեր ոտքերուն տակ։ Մեր Տէր Յիսուս Քրիստոսին շնորհքը ձեզի հետ ըլլայ»։ (Հռովմայեցիս 16։20) Այո, ռազմամոլ Բանսարկու Սատանային վրայ տարուած Քրիստոսի յաղթանակին, անոնք ալ երկինքէն մասնակից պիտի ըլլան։
17. Իսկական խաղաղութիւն ժառանգելու համար ի՞նչ պէտք է ընենք։
17 Արդ, հետեւեալ հարցը կը ծագի. Ի՞նչ պէտք է ընէք իսկական խաղաղութիւնը ժառանգելու համար։ Իսկական խաղաղութիւնը կրնայ գալ մի՛միայն Աստուծոյ ուզած կերպով. իսկ այդ խաղաղութիւնը ձեռք ձգելու համար դրական քայլեր պէտք է առնէք։ Պէտք է ընդունիք Խաղաղութեան Իշխանը եւ իրեն դիմէք։ Ասիկա կը նշանակէ որ պէտք է ընդունիք Քրիստոսի դերը որպէս մեղաւոր մարդկութեան Փրկիչը ու Փրկանքին Հայթայթիչը։ Յիսուս ի՛նք ըսաւ այս համբաւաւոր խօսքերը. «Աստուած այնպէս սիրեց աշխարհը, մինչեւ իր միածին Որդին տուաւ, որպէս զի ամէն ո՛վ որ անոր հաւատայ՝ չկորսուի, հապա յաւիտենական կեանք ունենայ»։ (Յովհաննու 3։16) Յօժա՞ր էք Քրիստոս Յիսուսի հաւատք ընծայել որպէս Աստուծոյ Գործակալը, իսկական խաղաղութիւն ու փրկութիւն բերելու համար։ Երկնքի տակ ուրիշ անուն չկայ որ կրնայ խաղաղութիւն հաստատել ու զայն երաշխաւորել։ (Փիլիպպեցիս 2։8-11) Ինչո՞ւ։ Քանի որ Յիսուս Աստուծոյ Ընտրեալն է։ Ան երկրի վրայ ցարդ ապրած խաղաղութեան մեծագոյն պատգամաբերն է։ Յիսուսի մտիկ ընելով՝ իր օրինակին պիտի հետեւի՞ք։
18. Յովհաննու 17։3–ի մէջ արձանագրուած Յիսուսի խօսքերուն ընդառաջելով ի՞նչ պէտք է ընենք։
18 Յիսուս ըսաւ. «Այս է յաւիտենական կեանքը, որ ճանչնան քեզ միմիայն ճշմարիտ Աստուածդ ու Յիսուս Քրիստոսը, որ դուն ղրկեցիր»։ (Յովհաննու 17։3) Հիմա է ժամանակը ճշգրիտ գիտութիւն ստանալու, Թագաւորութեան Սրահին մէջ Եհովայի Վկաներու ժողովներուն կանոնաւորաբար յաճախելով։ Այս դաստիարակչական ժողովները ձեզ պիտի մղեն որ ձեր ունեցած գիտութիւնը եւ յոյսը ուրիշներուն հետ բաժնէք։ Դո՛ւք ալ կրնաք Աստուծոյ խաղաղութեան մէկ պատուիրակը ըլլալ։ Եհովա Աստուծոյ վստահելով, հիմա իսկ կրնաք խաղաղութիւն վայելել, ինչպէս նշուած է Եսայեայ 26։3–ին մէջ. «Հաստատ միտքը կատարեալ խաղաղութեան մէջ կը պահես, վասն զի քեզի կը յուսայ»։ Իսկ որո՞ւ պէտք է յուսաք։ «Յաւիտեան Տէրոջը յուսացէք, քանզի Տէր Եհովան յաւիտենական վէմ է»։—Եսայեայ 26։4
19, 20. Ներկայիս խաղաղութիւն փնտռողներուն ու անոր ետեւէն գացողներուն ի՞նչ կը սպասէ։
19 Աստուծոյ խաղաղ նոր աշխարհին մէջ յաւիտենական կեանքը ընտրեցէ՛ք։ Յայտնութիւն 21։3, 4–ի մէջ Աստուծոյ Խօսքը հետեւեալ երաշխիքը կու տայ մեզի. «Ահա՛ Աստուծոյ խորանը մարդոց մէջ։ Անիկա հոն պիտի բնակի եւ անոնք անոր ժողովուրդը պիտի ըլլան եւ Աստուած ինք անոնց հետ պիտի ըլլայ իբրեւ անոնց Աստուածը։ Եւ ինք անոնց աչքերէն բոլոր արցունքները պիտի սրբէ եւ ա՛լ մահ պիտի չըլլայ։ Ո՛չ սուգ եւ ո՛չ աղաղակ եւ ո՛չ ցաւ պիտի ըլլայ ասկէ յետոյ, վասն զի առաջուան բաները անցան»։ Այսպիսի խաղաղ ապագայի մը կարօտը չէ՞ք քաշեր։
20 Ուստի, մի՛ մոռնաք ինչ որ Աստուած խոստացած է. «Հեզերը պիտի ժառանգեն երկիրը ու խաղաղութեան առատութիւնովը պիտի ուրախանան։ Արդարը տե՛ս եւ ուղիղին նայէ՛. վասն զի խաղաղարար մարդը բարի վախճան պիտի ունենայ»։ (Սաղմոս 37։11, 37) Երբ այդ ուրախ օրը գայ, մենք ալ երախտագիտութեամբ ըսենք. «Վե՜րջապէս իսկական խաղաղութիւն։ Շնորհակալ ենք Եհովայի, խաղաղութեան իսկական աղբիւրին»։
Կրնա՞ք Բացատրել
◻ Ի՞նչ բան կրնայ օգնել որ անհատ մը իր մտածելակերպին ու գործելակերպին մէջ փոփոխութիւններ մտցնէ։
◻ Եհովայի Վկաները, անհատապէս եւ ամբողջութեամբ, իսկական խաղաղութեան հանդէպ իրենց սէրը ի՞նչպէս ցոյց տուած են։
◻ Եհովա ի՞նչպէս պիտի վարուի բոլոր անոնց հետ, որոնք ատելութիւն եւ պատերազմ կը հրահրեն։
◻ Խաղաղութեան Իշխանին իշխանութիւնը մարդկութեան համար ի՞նչ պիտի ընէ։
[Նկարներ՝ էջ 24]
Եսայիի խօսքերը կը կատարուին ո՛չ թէ ՄԱԿ–ի, այլ՝ Եհովայի ուսուցումին ընդառաջողներուն կողմէ
[Նկարներ՝ էջ 25]
Այս երկու անհատները փոփոխութիւններ ըրին խաղաղութեան ետեւէն երթալու համար
Ռամի Օվէտ
Կէորկ Ռոյթըր