Ուրիշներու օգնեցէք որ Թագաւորութեան պատգամը ընդունին

«Ագրիպպաս ըսաւ Պօղոսին. ‘Քիչ մնաց որ զիս համոզես Քրիստոնեայ ըլլալու’»։—ԳՈՐԾՔ 26։28

1, 2. Ինչո՞ւ Պօղոս առաքեալ ներկայացաւ Փեստոս Կուսակալին ու Հերովդէս Ագրիպպաս Բ. Թագաւորին առջեւ։

ԿԵՍԱՐԻԱՅԻ մէջ Հ.Դ. 58–ին, Հերովդէս Ագրիպպաս Բ. Թագաւորը եւ իր քոյրը Բերինիկէ այցելեցին Հռովմէացի Կուսակալ Պորկիոս Փեստոսի։ Անոր հրաւէրին ընդառաջելով, անոնք «մեծ հանդէսով եկան ու ատեանը մտան հազարապետներով եւ քաղաքին պատուաւոր մարդոց հետ»։ Փեստոս հրամայեց որ Քրիստոնեայ Պօղոս առաքեալ ատեան բերուի։ Ի՞նչ իրադարձութիւններ առաջնորդեցին որ Յիսուս Քրիստոսի այս հետեւորդը Փեստոս Կուսակալի ատեանին առջեւ ներկայանայ։—Գործք 25։13-23

² Իր հիւրերուն ուղղուած Փեստոսի խօսքերը, այդ հարցումին կը պատասխանեն։ Ան ըսաւ. «Ագրիպպա՛ս արքայ եւ դուք որ մեզի հետ էք, ասիկա կը տեսնէք. ասոր վրայով Հրեաներուն բոլոր բազմութիւնը ինծի ներկայացան Երուսաղէմի մէջ եւ հոս ալ ու կ’աղաղակէին թէ՝ ‘Պէտք չէ որ ա՛լ ատիկա ողջ մնայ’։ Բայց ես քննեցի եւ հասկցայ թէ անիկա մեռնելու արժանի բան մը ըրած չէ, ինքն ալ Վեհափառ Կայսրին բողոքեց, որոշեցի որ ղրկեմ զանիկա։ Անոր համար հաստատ բան մը չունիմ գրելու իմ տիրոջս. ուստի ատիկա ձեր առջեւ բերի եւ մանաւանդ քու առջեւդ, ո՛վ Ագրիպպաս արքայ, որպէս զի քննութիւն ընելէ յետոյ գրելիք մը ունենամ. վասն զի ինծի անվայել կ’երեւնայ որ բանտարկեալ մը ղրկեմ եւ անոր վրայ դրուած յանցանքները չիմացնեմ»։—Գործք 25։24-27

3. Կրօնական առաջնորդները ինչո՞ւ Պօղոսի դէմ ամբաստանութիւն ըրին։

³ Փեստոսի խօսքերը ցոյց կու տան թէ Պօղոս խռովութիւն պատճառելու սուտ ամբաստանութիւնը կը դիմագրաւէր. ոճիր մը՝ որուն պատիժը մահ էր։ (Գործք 25։11) Սակայն Պօղոս անմեղ էր։ Երուսաղէմի կրօնական առաջնորդները իրենց նախանձին պատճառով այդ ամբաստանութիւնը ըրած էին։ Անոնք կը հակառակէին Պօղոսի գործին իբր Թագաւորութիւնը ծանուցանող մը եւ մեծապէս դժգոհ էին որ ան ուրիշներու կ’օգնէր Յիսուս Քրիստոսի հետեւորդ ըլլալու։ Զինուորական խիստ հսկողութեամբ Պօղոս Երուսաղէմէն Կեսարիա բերուեցաւ, ուր Կայսրին բողոքեց։ Այժմ ան Հռովմ պիտի տարուէր։

4. Ագրիպպաս Թագաւորը ի՞նչ անակնկալ խօսք մը ըսաւ։

⁴ Երեւակայեցէք Պօղոսը կուսակալին պալատին մէջ, խումբի մը առջեւ կայնած, ուր ներկայ է նաեւ Հռովմէական Կայսրութեան կարեւոր մէկ շրջանին կառավարիչը։ Ագրիպպաս Թագաւորը Պօղոսի դառնալով կ’ըսէ. «Հրաման է քեզի որ դուն քեզի համար խօսիս»։ Մինչ ան կը ճառէ, արտակարգ բան մը տեղի կ’ունենայ։ Պօղոսի ըսածը կը սկսի թագաւորին ազդել։ Արդարեւ Ագրիպպաս Թագաւորը կ’ըսէ. «Քիչ մնաց որ զիս համոզես Քրիստոնեայ ըլլալու»։—Գործք 26։1-28

5. Ագրիպպասի ուղղուած Պօղոսի խօսքերը ինչո՞ւ շատ ազդու էին։

⁵ Պահ մը երեւակայեցէք. Պօղոսի ճարտար պաշտպանողականին շնորհիւ, կառավարիչ մը Աստուծոյ Խօսքին ներթափանցող զօրութենէն ազդուեցաւ։ (Եբրայեցիս 4։12) Ի՞նչ բան Պօղոսի պաշտպանողականը ազդու դարձուց։ Իսկ Պօղոսէն ի՞նչ կրնանք սորվիլ, որ կրնայ մեզի օգնել մեր աշակերտելու գործին մէջ։ Եթէ իր պաշտպանողականը վերլուծենք, երկու գլխաւոր կէտեր ցցուն կը դառնան. (1) Պօղոս իր ներկայացումին մէջ համոզիչ էր։ (2) Ան Աստուծոյ Խօսքին մասին իր գիտութիւնը հմտօրէն գործածեց, ինչպէս արհեստաւոր մը ազդուօրէն գործիք մը կը գործածէ։

Համոզելու Արուեստը Գործածեցէք

6, 7. (ա) Աստուածաշունչի մէջ «համոզել» բառը ի՞նչ կը նշանակէ։ (բ) Համոզումը ի՞նչ դեր կը խաղայ ուրիշներու օգնելու մէջ որ Աստուածաշունչի ուսուցում մը ընդունին։

⁶ Գործք Առաքելոց գիրքին մէջ, համոզում թարգմանուած Յունարէն բառերը կրկին անգամ գործածուած են Պօղոսի առնչութեամբ։ Համոզում գործածելը ի՞նչ կապ ունի աշակերտելու մեր գործին հետ։

⁷ Քրիստոնէական Յունարէն Գրութիւններուն բնագրի լեզուին մէջ, «համոզել» կը նշանակէ՝ «հաւանութեան բերել» կամ «բանականութեան կամ բարոյական նկատառութիւններու ազդեցութեան ներքեւ միտքի փոփոխութիւն» յառաջացնել, կ’ըսէ Վայնի Expository Dictionary of New Testament Words (Նոր Կտակարանի Բառերուն Բացատրական Բառարան)։ Այս բառին հիմնական իմաստը քննելը յաւելեալ լուսաբանութիւն կը հայթայթէ։ Անիկա վստահութեան գաղափարը կը հաղորդէ։ Հետեւաբար, եթէ անհատ մը համոզէք որ Աստուածաշունչի ուսուցում մը ընդունի, իր վստահութիւնը շահած կ’ըլլաք, այնպէս որ ան կը սկսի այս ուսուցումին ճշմարիտ ըլլալուն հաւատք ընծայել։ Բացորոշ է թէ չի բաւեր անհատի մը ըսել թէ Աստուածաշունչը ի՛նչ կ’ըսէ, որպէսզի անոր հաւատայ ու անոր համաձայն վարուի։ Ձեր ունկնդիրը ո՛վ որ ալ ըլլայ՝ զաւակ, դրացի, գործակից, դասընկեր կամ ազգական, պէտք է համոզուի թէ ձեր ըսածը ճիշդ է։—Բ. Տիմոթէոս 3։14, 15

8. Սուրբ գրային ճշմարտութեան մը նկատմամբ անհատ մը համոզելը ի՞նչ կը պարփակէ։

⁸ Ի՞նչպէս կրնաք անհատ մը համոզել թէ Աստուծոյ Խօսքէն ձեր ծանուցանածը ճշմարտութիւն է։ Պօղոս ջանաց իր խօսած անհատներուն միտքին մէջ փոփոխութիւն յառաջացնել տրամաբանական պատճառաբանութեամբ, վաւերական ապացոյցներով ու անկեղծ աղերսանքով։a Հետեւաբար, փոխանակ պարզապէս ըսելու թէ բան մը շիտակ է, ձեր խօսքին թիկունք կանգնող գոհացուցիչ ապացոյցներ պէտք է հայթայթէք։ Ասիկա ի՞նչպէս կրնաք ընել։ Վստահ եղէք որ ձեր ըսածը ամբողջովին հիմնուած է Աստուծոյ Խօսքին եւ ո՛չ թէ ձեր անձնական կարծիքին վրայ։ Նաեւ գործածեցէք յաւելեալ ապացոյցներ, Աստուածաշունչին վրայ հիմնուած ձեր անկեղծ խօսքերուն թիկունք կանգնելու համար։ (Առակաց 16։23) Օրինակ, եթէ ցոյց կու տաք թէ հնազանդ մարդկութիւնը դրախտային երկրի մը մէջ պիտի ապրի, այս խօսքը հաստատեցէք համար մը տալով, ինչպէս՝ Ղուկաս 23։43 կամ Եսայեայ 65։21-25։ Ի՞նչպէս կրնաք ձեր սուրբ գրային կէտին համար յաւելեալ ապացոյցներ հայթայթել։ Կրնաք ձեր ունկնդրին փորձառութենէն առնուած օրինակներ գործածել։ Կրնաք անոր յիշեցնել գեղեցիկ արեւնամուտի մը, ծաղիկի մը անոյշ բոյրին, պտուղի մը համեղ համին կամ իր ձագերը կերակրող թռչուն մը դիտելուն պատճառած պարզ ու ձրի հաճոյքները։ Անոր օգնեցէք տեսնելու թէ այս հաճոյքները ապացոյց են, թէ Ստեղծիչը կ’ուզէ որ երկրի վրայ կեանքը վայելենք։—Ժողովողի 3։11, 12

9. Մեր քարոզչութեան մէջ ի՞նչպէս կրնանք բանաւոր ըլլալ։

⁹ Երբ կը փորձէք անհատ մը համոզել որ Աստուածաշունչի որոշ ուսուցում մը ընդունի, զգոյշ եղէք որ ձեր խանդավառութիւնը պատճառ չըլլայ որ անտրամաբանական թուիք, եւ հետեւաբար ունկնդիրը իր միտքն ու սիրտը գոցէ։ Ծառայութեան Դպրոց գիրքը սա զգուշացումը կու տայ. «Սովորաբար լաւ ընդունելութիւն չի գտներ, երբ ուրիշի մը շատ սիրած մէկ հաւատալիքը որպէս սուտ քօղազերծուի անփափկանկատ կերպով, նոյնիսկ երբ ճշմարտութեան նեցուկ կանգնող սուրբ գրային համարներու ցանկ մը յիշուի։ Օրինակ, եթէ ժողովրդային տօնակատարութիւններ պարզապէս դատապարտուին որպէս հեթանոսական ծագում ունեցող բաներ, հաւանաբար անոնց հանդէպ դիմացինին զգացումը չփոխուի։ Տրամաբանական մերձեցում մը սովորաբար աւելի յաջողութիւն կը գտնէ»։ Ինչո՞ւ տրամաբանական ըլլալու լուրջ ջանք պէտք է թափենք։ Դասագիրքը կ’ըսէ. «Տրամաբանելու կերպը հարցին առարկայօրէն մօտենալու կը նպաստէ, մարդոց բան մը կու տայ որուն մասին հետագային կրնան մտածել, եւ հետագայ զրոյցներու համար ճամբան բաց կը պահէ։ Անիկա կրնայ շատ համոզիչ ըլլալ»։—Կողոսացիս 4։6

Սիրտին Կոչ Ընող Համոզում

10. Պօղոս Ագրիպպասի առջեւ իր պաշտպանողականը ի՞նչ կերպով ներկայացուց։

¹⁰ Այժմ աւելի քննենք Գործք Առաքելոց 26–րդ գլուխին մէջ Պօղոսի ներկայացուցած պաշտպանողականը։ Նկատի առէք թէ ան իր ճառը ի՛նչպէս սկսաւ։ Բացման խօսքին մէջ, Պօղոս Ագրիպպասը գովելու վաւերական պատճառ մը տուաւ, թէեւ թագաւորը իր քրոջ Բերինիկէի հետ խայտառակ յարաբերութիւն ունէր։ Պօղոս ըսաւ. «Հրեաներուն իմ վրաս ըրած բոլոր ամբաստանութիւններուն համար, ո՛վ Ագրիպպաս արքայ, ես զիս երանելի կը սեպեմ, որ այսօր քու առջեւդ պատասխան պիտի տամ. մանաւանդ որ դուն Հրեաներուն բոլոր սովորութիւնները եւ խնդիրները աղէկ գիտես, անոր համար կ’աղաչեմ որ երկայնամտութեամբ ինծի մտիկ ընես»։—Գործք 26։2, 3

11. Ագրիպպասի ուղղուած Պօղոսի խօսքերը ի՞նչպէս յարգանք ցոյց տուին, եւ ի՞նչ օգուտ յառաջ եկաւ։

¹¹ Նկատեցի՞ք թէ Պօղոս Ագրիպպասի բարձր հեղինակութիւնը ընդունեց, անոր տիտղոսը գործածելով։ Ասիկա յարգանք ցոյց տուաւ, իսկ բառերու իր իմաստուն ընտրութեամբ, Պօղոս Ագրիպպասը պատուեց։ (Ա. Պետրոս 2։17) Առաքեալը ընդունեց որ Ագրիպպաս իր Հրեայ հպատակներուն բարդ սովորութիւններուն եւ օրէնքներուն քաջատեղեակ էր, եւ ըսաւ թէ ինք ուրախ էր որ իր պաշտպանողականը կ’ընէր այսպիսի իրազեկ կառավարիչի մը առջեւ։ Քրիստոնեայ մը ըլլալով, Պօղոս չվարուեցաւ որպէս թէ Ագրիպպասէն գերադաս էր, որ Քրիստոնեայ մը չէր։ (Փիլիպպեցիս 2։3) Այլ, ան աղաչեց թագաւորին որ իրեն երկայնամտութեամբ մտիկ ընէր։ Այս կերպով Պօղոս մթնոլորտ մը ստեղծեց, որուն մէջ թէ՛ Ագրիպպաս եւ թէ միւս ունկնդիրները աւելի հակամէտ պիտի ըլլային ընդունելու իր յաջորդ ըսելիքները։ Ան հասարակաց գետին մը կը պատրաստէր, որուն վրայ իր պատճառաբանութիւնները պիտի հիմնէր։

12. Թագաւորութիւնը ծանուցանելու գործին մէջ, ի՞նչպէս կրնանք մեր ունկնդիրներուն սիրտին կոչ ընել։

¹² Պօղոսին նման, թող որ սիրտին կոչ ընենք երբ Թագաւորութեան պատգամը կը ներկայացնենք՝ բացման խօսքերէն մինչեւ եզրակացութիւն։ Ասիկա կրնանք ընել մեր քարոզած անհատին հանդէպ անկեղծ յարգանք ցուցաբերելով եւ իր յատուկ ենթահողին ու մտածելակերպին հանդէպ իսկական հետաքրքրութիւն ցոյց տալով։—Ա. Կորնթացիս 9։20-23

Աստուծոյ Խօսքը Հմտօրէն Գործածեցէք

13. Պօղոսի նման, ի՞նչպէս կրնաք ձեր ունկնդիրները խթանել։

¹³ Պօղոս փափաքեցաւ իր ունկնդիրները խթանել որ բարի լուրին ընդառաջեն։ (Ա. Թեսաղոնիկեցիս 1։5-7) Այդ նպատակով ան կոչ ըրաւ անոնց այլաբանական սիրտին՝ շարժառիթներու կեդրոնին։ Վերադառնալով Ագրիպպասի առջեւ Պօղոսի ներկայացուցած պաշտպանողականին, նկատեցէք թէ Պօղոս ի՛նչպէս ‘Աստուծոյ խօսքը շիտակ բացատրեց’, Մովսէսի ու մարգարէներուն կողմէ ըսուած խօսքերուն ակնարկութիւն ընելով։—Բ. Տիմոթէոս 2։15

14. Բացատրեցէք թէ ի՛նչպէս Ագրիպպասի առջեւ Պօղոս համոզում գործածեց։

¹⁴ Պօղոս գիտէր թէ Ագրիպպաս անուանապէս Հրեայ մըն էր։ Հրէականութեան մասին Ագրիպպասի ունեցած գիտութեան ակնարկելով, Պօղոս պատճառաբանեց թէ իր քարոզչութեան մէջ ‘բան մը չէր պատմած այն բաներէն դուրս, որոնք մարգարէները եւ Մովսէս ըսին թէ պիտի ըլլան’, Մեսիայի մահուան ու յարութեան առնչութեամբ։ (Գործք 26։22, 23) Իր խօսքը ուղղակի Ագրիպպասի ուղղելով, Պօղոս հարցուց. «Մարգարէներուն կը հաւատա՞ս»։ Ագրիպպաս անել կացութեան մը մատնուեցաւ։ Եթէ ըսէր թէ մարգարէներուն չէր հաւատար, իբր Հրեայ հաւատացեալ իր համբաւը պիտի վնասուէր։ Իսկ եթէ Պօղոսի պատճառաբանութեան հետ համաձայն գտնուէր, հանրապէս դիրք բռնած պիտի ըլլար առաքեալին կողքին եւ թերեւս Քրիստոնեայ մը սեպուէր։ Պօղոս իմաստութեամբ ի՛նք իր հարցումին պատասխանեց, ըսելով. «Գիտե՛մ թէ կը հաւատաս»։ Ագրիպպասի սիրտը մղեց զինք ի՞նչ ըսելու։ Ան պատասխանեց. «Քիչ մնաց որ զիս համոզես Քրիստոնեայ ըլլալու»։ (Գործք 26։27, 28) Թէեւ Ագրիպպաս Քրիստոնեայ մը չեղաւ, սակայն ըստ երեւոյթին Պօղոսի պատգամը որոշ չափով անոր սիրտին դպաւ։—Եբրայեցիս 4։12

15. Պօղոս ի՞նչպէս կրցաւ Թեսաղոնիկէի մէջ ժողովք մը հաստատել։

¹⁵ Նկատեցի՞ք թէ Պօղոսի բարի լուրի ներկայացումը թէ՛ ծանուցում եւ թէ համոզում կը պարփակէր։ Որովհետեւ Պօղոս այս մօտեցումը գործածեց մինչ ‘Աստուծոյ խօսքը շիտակ կը բացատրէր’, իր ունկնդիրներէն ոմանք սկսան հաւատալ։ Այս էր պարագան Թեսաղոնիկէի մէջ, ուր Պօղոս ժողովարանին մէջ Հրեաներ ու հեթանոսութենէ դարձած աստուածավախ անհատներ փնտռեց։ Գործք Առաքելոց 17։2-4–ը կը նշէ. «Պօղոս ալ իր սովորութեանը պէս անոնց մէջ մտաւ եւ երեք շաբաթ օր խօսեցաւ անոնց հետ գրքերէն, մեկնելով եւ անոնց առջեւ դնելով թէ՝ պէտք էր որ Քրիստոս չարչարուէր ու մեռելներէն յարութիւն առնէր . . . ։ Անոնցմէ ոմանք հաւատացին»։ Պօղոս համոզիչ կերպով խօսեցաւ։ Ան պատճառաբանեց, բացատրեց եւ Սուրբ Գրութիւններուն միջոցաւ ապացուցանեց թէ Յիսուս երկար ժամանակէ խոստացուած Մեսիան էր։ Արդի՞ւնքը։ Հաւատացեալներէ բաղկացած ժողովք մը հաստատուեցաւ։

16. Ի՞նչպէս կրնաք աւելի մեծ հաճոյքով Թագաւորութիւնը ծանուցանել։

¹⁶ Երբ Աստուծոյ Խօսքը կը բացատրէք, կրնա՞ք համոզելու արուեստը գործածելու մէջ աւելի հմուտ ըլլալ։ Եթէ այո՛, Աստուծոյ Թագաւորութեան մասին մարդոց քարոզելու եւ աշակերտելու մէջ աւելի գոհունակութիւն եւ հաճոյք պիտի գտնէք։ Ասոր փորձառութիւնը ունեցած են բարի լուրի այն հրատարակիչները, որոնք քարոզչութեան մէջ Աստուածաշունչը աւելի գործածելու թելադրութիւնը գործադրած են։

17. Մեր ծառայութեան մէջ Աստուածաշունչը գործածելուն օգուտը ցոյց տալու համար, անձնական փորձառութիւն մը պատմեցէք կամ պարբերութեան յիշածը ամփոփեցէք։

¹⁷ Օրինակ, Եհովայի Վկաներու ճամբորդող տեսուչ մը գրեց. «Այժմ բազմաթիւ եղբայրներ ու քոյրեր իրենց ձեռքը Աստուածաշունչ կը կրեն, երբ դռնէ դուռ կը վկայեն։ Ասիկա հրատարակիչներուն օգնած է որ համար մը կարդան իրենց հանդիպած անհատներէն շատերուն։ Ասիկա թէ՛ տանտիրոջ եւ թէ հրատարակիչին օգնած է որ մեր ծառայութեան առնչեն Աստուածաշունչը, եւ ո՛չ թէ միայն պարբերաթերթերն ու գիրքերը»։ Անշուշտ քարոզչութեան մէջ Աստուածաշունչը մեր ձեռքը կրելը զանազան ազդակներէ կախեալ է, մէջը ըլլալով տեղական սովորութիւնները։ Այսուհանդերձ, պէտք է ուզենք Աստուծոյ Խօսքը հմտօրէն գործածելու համբաւը ունենալ, ուրիշները համոզելու որ Թագաւորութեան պատգամը ընդունին։

Ծառայութեան Հանդէպ Աստուծոյ Տեսակէտը Ունեցէք

18, 19. (ա) Աստուած մեր ծառայութիւնը ի՞նչպէս կը նկատէ, եւ ինչո՞ւ իր տեսակէտը պէտք է մշակենք։ (բ) Ի՞նչ բան մեզի պիտի օգնէ յաջող վերայցելութիւններ ընելու։ (Տես՝ «Ի՛նչպէս յաջող վերայցելութիւններ ընել» խորագրով շրջագիծը, էջ 14։)

¹⁸ Մեր ունկնդիրներուն սիրտին հասնելու այլ կերպ մըն է՝ ծառայութիւնը Աստուծոյ տեսանկիւնէն դիտել եւ համբերատար ըլլալ։ Աստուծոյ կամքն է որ բոլոր մարդիկ «ճշմարտութիւնը ճանչնան»։ (Ա. Տիմոթէոս 2։3, 4) Ասիկա մեր փափաքն ալ չէ՞։ Եհովա նաեւ համբերատար է եւ իր համբերութիւնը պատեհութիւն կու տայ շատերուն որ զղջան։ (Բ. Պետրոս 3։9) Ուստի, երբ Թագաւորութեան պատգամին ականջ տուող անհատ մը գտնենք, թերեւս հարկ ըլլայ կրկին անգամ իրեն այցելել, իր հետաքրքրութիւնը մշակելու համար։ Ճշմարտութեան սերմերուն աճումին ականատես ըլլալը ժամանակ ու համբերութիւն կը պահանջէ։ (Ա. Կորնթացիս 3։6) «Ի՛նչպէս Յաջող Վերայցելութիւններ Ընել» խորագրով շրջագիծը, այսպիսի հետաքրքրութիւն մը մշակելու համար թելադրութիւններ կը ներկայացնէ։ Մի՛ մոռնաք որ մարդոց կեանքը,– իրենց խնդիրներն ու պարագաները,– յարափոփոխ է։ Զանոնք տունը գտնելու համար թերեւս մի քանի անգամ պէտք է փորձենք, բայց կ’արժէ ջանք թափել։ Կ’ուզենք անոնց առիթ տալ որ Աստուծոյ փրկութեան պատգամը լսեն։ Հետեւաբար, Եհովա Աստուծոյ աղօթեցէք որ համոզելու ձեր հմտութիւնները մշակելու համար ձեզի իմաստութիւն տայ, որպէսզի ուրիշներուն օգնէք Թագաւորութեան պատգամը ընդունելու։

¹⁹ Երբ անհատ մը գտնենք որ կ’ուզէ Թագաւորութեան պատգամին մասին ա՛լ աւելի լսել, ուրիշ ի՞նչ կրնանք ընել։ Յաջորդ յօդուածը օգնութիւն կը մատուցանէ։

[Ստորանիշ]

Կը յիշէ՞ք

• Ի՞նչ բան ազդու դարձուց Պօղոսի պաշտպանողականը Ագրիպպաս Թագաւորին առջեւ։

• Մեր պատգամը ի՞նչպէս կրնայ սիրտին կոչ ընել։

• Ի՞նչ բան մեզի պիտի օգնէ որ Աստուծոյ Խօսքը ազդուօրէն գործածենք սիրտին հասնելու համար։

• Ի՞նչպէս կրնանք ծառայութիւնը Աստուծոյ տեսանկիւնէն դիտել։

[Շրջանակ/Նկարներ՝ էջ 14]

Ի՛նչպէս յաջող վերայցելութիւններ ընել

• Մարդոց հանդէպ անձնական հետաքրքրութիւն ցուցաբերեցէք։

• Խօսակցութեան համար սուրբ գրային գրաւիչ նիւթ մը ընտրեցէք։

• Յաջորդ այցելութեան համար ճամբան հարթեցէք։

• Մեկնելէ ետք, շարունակեցէք անհատին մասին մտածել։

• Շուտով վերադարձէք, թերեւս մէկ կամ երկու օր ետք, հետաքրքրութիւնը մշակելու համար։

• Ձեր միտքը ունեցէք որ ձեր նպատակն է տան սուրբ գրային ուսումնասիրութիւն մը սկսիլ։

• Աղօթեցէք որ Եհովա հետաքրքրութիւնը աճեցնէ։

[Նկար՝ էջ 13]

Պօղոս համոզում գործածեց, երբ Փեստոս Կուսակալին ու Ագրիպպաս Թագաւորին առջեւ էր