Եօթը քայլեր՝ Աստուածաշունչի օգտակար ընթերցանութեան համար

«Աստուածաշունչը ոչ միայն պատմութեան մէջ բարձրագոյն տպաքանակ ունեցող գիրքն է, այլ նաեւ իւրաքանչի՛ւր տարի բարձրագոյն տպաքանակ ունեցող գիրքն է» (ԹԱՅՄ ՊԱՐԲԵՐԱԹԵՐԹ)։

«Աստուածաշունչը երբեմն կը կարդամ, բայց զայն չափազանց ձանձրացուցիչ կը գտնեմ» (ԳԻԹ, ԺՈՂՈՎՐԴԱԿԱՆ ԵՐԱԺԻՇՏ՝ ԱՆԳԼԻՈՅ ՄԷՋ)։

ՀԵԳՆԱԿԱՆ է որ շատեր Աստուածաշունչ ունին, բայց կ’երեւի թէ զայն կարդալով քիչ օգուտ կը քաղեն։ Միւս կողմէ, ուրիշներ մեծապէս կ’արժեւորեն ինչ որ Աստուածաշունչէն կը կարդան։ Օրինակ՝ Նենսի անունով երիտասարդուհի մը կը պատմէ. «Այն օրէն որ սկսայ ամէն առտու Աստուածաշունչը կարդալ եւ անոր վրայ խոկալ, ինքզինքս պատրաստ կը զգամ դիմագրաւելու որեւէ խնդիր, որ օրուան ընթացքին կրնայ ծագիլ։ Այս սովորամոլութիւնը ընկճուածութեան պահերս յաղթահարելու աւելի օգնած է, քան՝ որեւէ բան որ փորձած եմ անցեալ 35 տարիներուն ընթացքին»։

Նոյնիսկ եթէ Աստուածաշունչը բնաւ չես կարդացած, հետաքրքրաշարժ կը գտնե՞ս այն իրողութիւնը, թէ ոմանք անկէ օգնութիւն ստացած են։ Եթէ արդէն իսկ Աստուածաշունչի ընթերցող մըն ես, կը փափաքի՞ս ընթերցանութենէդ աւելին օգտուիլ։ Եթէ այո՛, այս յօդուածին մէջ նկարագրուած եօթը քայլերը փորձէ։

ՔԱՅԼ 1. Շիտակ շարժառիթով կարդա՛

◼ Կրնաս Աստուածաշունչը կարդալ պարզապէս իբրեւ գեղեցիկ գրականութիւն, կամ առ ի պարտականութիւն, կամ այն գաղափարով՝ որ թերեւս ուղղութիւն գտնես այս տագնապալից աշխարհին ի տես։ Սակայն լաւագոյնս պիտի օգտուիս, եթէ նպատակդ ըլլայ Աստուծոյ մասին ճշմարտութիւնը սորվիլ։ Աւելին, ճոխ վարձատրութիւններ պիտի քաղես, եթէ շարժառիթդ է հասկնալ՝ թէ Աստուածաշունչի պատգամը ինչպէ՛ս կրնայ կեանքիդ ազդել։

Աստուածաշունչը հայելիի հետ բաղդատելով, Սուրբ Գրութիւնները շիտակ շարժառիթով կարդալու կարեւորութիւնը ցցուն կ’ընեն. «Եթէ մէկը միայն լսէ խօսքը ու չկատարէ, կը նմանի մարդու մը՝ որ հայելիի մէջ աչքերը տնկած իր բնական երեսը կը դիտէ. վասն զի դիտելով կը տեսնէ ինքզինք ու կ’անցնի կ’երթայ եւ շուտ մը կը մոռնայ թէ ի՛նչպիսի մէկն էր։ Բայց ան որ ազատութեան կատարեալ օրէնքին աչք տնկելով կը նայի եւ անոր մէջ կը կենայ, կը լսէ, չի մոռնար, այլ կը կատարէ, երանելի պիտի ըլլայ իր գործերուն մէջ» (Յակոբոս 1։23-25)։

Այս օրինակին մէջ, մարդը հայելիին մէջ իր երեսը դիտեց, բայց իր դրսերեւոյթը չշտկեց։ Հաւանաբար ան մէկ ակնարկով իր դէմքին նայեցաւ, կամ թերեւս փափաք չունեցաւ որեւէ փոփոխութիւն ընելու։ Նմանապէս, քիչ պիտի օգտուինք եթէ Աստուածաշունչը պատահմամբ կարդանք կամ մեր կարդացածը չկիրարկենք։ Միւս կողմէ, կրնանք իսկական երջանկութիւն ձեռք ձգել, եթէ ‘կատարող մը’ ըլլալու նպատակով Աստուածաշունչը զննենք ու թոյլ տանք որ Աստուծոյ մտածումը մեր խորհուրդներն ու արարքները կաղապարէ։

ՔԱՅԼ 2. Վստահելի թարգմանութիւն մը ընտրէ

◼ Հայերէն լեզուով Աստուածաշունչի քանի մը թարգմանութիւններ կան։ Մինչ Աստուծոյ Խօսքի որեւէ թարգմանութիւն կրնայ քեզի օգտակար ըլլալ, ոմանք գրաբար կամ ակադեմական լեզու կը գործածեն, զոր ըմբռնելը կրնայ դժուար ըլլալ (Գործք 4։13)։ Կարգ մը թարգմանութիւններ նոյնիսկ կը փոխեն Աստուածաշունչի մաքուր պատգամը, հիմնուելով աւանդութիւններու վրայ։ Օրինակ՝ ինչպէս որ այս պարբերաթերթի բացման յօդուածներուն մէջ նշեցինք, ոմանք Աստուծոյ Եհովա անունը փոխարինած են տիտղոսներով, ինչպէս՝ «Աստուած» կամ «Տէր»։ Ուստի ընտրելու ժամանակ, փնտռէ թարգմանութիւն մը, որ Աստուածաշունչը ճշգրտօրէն կը թարգմանէ եւ դիւրահասկնալի լեզու կը գործածէ, ընթերցանութիւնը քաջալերելով։

Համայն աշխարհի մէջ միլիոնաւորներ նկատած են, թէ Նոր աշխարհի թարգմանութիւն–ը ճիշդ այդպիսի Աստուածաշունչ մըն է։a Նկատի առ ծերունիի մը պարագան Պուլկարիոյ մէջ։ Ան Եհովայի վկաներու ժողովի մը ներկայ եղաւ եւ Նոր աշխարհի թարգմանութիւն–ը տրուեցաւ իրեն։ Յետագային, ան ըսաւ. «Աստուածաշունչը երկար տարիներ կարդացած եմ, բայց բնաւ չեմ հանդիպած թարգմանութեան մը, որ աւելի դիւրահասկնալի է եւ ուղղակի սրտին կը դպչի»։

ՔԱՅԼ 3. Աղօթէ՛

◼ Կրնաս Աստուածաշունչի հասկացողութիւնդ խորացնել՝ Հեղինակին օգնութիւնը խնդրելով, սաղմոսերգուին պէս, որ ըսաւ. «Բա՛ց իմ աչքերս, որպէսզի քու Օրէնքէդ սքանչելիքներ տեսնեմ» (Սաղմոս 119։18, ԱԾ)։ Ամէն անգամ որ Սուրբ Գրութիւնները կարդաս, Աստուծոյ աղօթէ, որ քեզի օգնէ իր Խօսքը հասկնալու։ Կրնաս նաեւ շնորհակալութիւն յայտնել Աստուածաշունչին համար, քանի որ առանց անոր՝ պիտի չճանչնայինք Աստուած (Սաղմոս 119։62)։

Աստուած օգնութիւն հայցող աղօթքները մտիկ կ’ընէ՞։ Նկատի առ թէ Ուրուկուէյի մէջ ի՛նչ պատահեցաւ երկու պատանուհի քոյրերու։ Անոնք Դանիէլ 2։44–ի նշանակութեան նկատմամբ շփոթած ըլլալով՝ աղօթեցին որ Աստուած մէկը ղրկէր զայն բացատրելու։ Մինչ անոնց Աստուածաշունչը տակաւին բաց էր, երկու Եհովայի վկաներ դուռը զարկին, ա՛յդ համարը կարդացին ու բացատրեցին, թէ անիկա կը նշէ որ Աստուծոյ Թագաւորութիւնը պիտի փոխարինէ մարդակերտ կառավարութիւնները։b Պատանուհի քոյրերուն համոզումն էր, որ Աստուած իրենց աղօթքին պատասխանած էր։

ՔԱՅԼ 4. Ամէն օր կարդա՛

◼ Գիրքեր հրատարակող մը նշեց, թէ Միացեալ Նահանգներուն մէջ, 11 սեպտեմբեր 2001–ի ահաբեկչական յարձակումներէն ետք, «Աստուածաշունչի վաճառքը յանկարծ վերելք արձանագրեց»։ Շատեր միայն նեղութեան ժամանակներուն կը դիմեն Աստուծոյ Խօսքին։ Սակայն Աստուածաշունչը մեզ կը քաջալերէ, որ իւրաքանչիւր օր կարդանք՝ ըսելով. «Այս օրէնքներու գիրքը քու բերնէդ թող չզատուի, հապա գիշեր ցորեկ անոր վրայ մտածէ, որպէս զի բոլոր անոր մէջ գրուածները պահես ու կատարես. քանզի այն ատեն քու գործերդ յառաջ պիտի տանիս եւ այն ատեն յաջողութիւն պիտի գտնես» (Յեսու 1։8)։

Աստուածաշունչի կանոնաւոր ընթերցանութեան արժէքը կարելի է լուսաբանել մարդու մը օրինակով, որ սրտի տագնապ ունեցած է եւ կ’որոշէ աւելի սննդարար կերակուրներ ուտել։ Այս սննդականոնը իրեն պիտի օգնէ՞, եթէ անոր հետեւի միայն երբ կրծքավանդակին մէջ սուր ցաւ զգայ։ Ո՛չ։ Ան յարատեւաբար առողջարար կերակրականոնի մը կառչած պէտք է մնայ, որպէսզի լաւագոյնս օգտուի։ Նմանապէս, Աստուածաշունչի օրական ընթերցանութիւնը քեզի պիտի օգնէ ‘յաջողութիւն գտնելու’։

ՔԱՅԼ 5. Մօտեցումդ փոփոխէ

◼ Աստուածաշունչը Ծննդոցէն Յայտնութիւն կարդալը կրնայ լաւ ըլլալ, բայց թերեւս ուրիշ մօտեցումներ ալ հաճելի գտնես։ Ահաւասիկ կարգ մը առաջարկներ։

Անձնաւորութիւն մը նկատի առ։ Կարդա՛ բոլոր այն գլուխները կամ գիրքերը, որոնք Աստուծոյ մասնայատուկ երկրպագուի մը մասին կը խօսին, ինչպէս՝

• Յովսէփ (Ծննդոց 37-50)։

• Հռութ (Հռութ 1-3)։

• Յիսուս (Մատթէոս 1-28. Մարկոս 1-16. Ղուկաս 1-24. Յովհաննէս 1-21)։c

Նիւթի մը վրայ կեդրոնացիր։ Անոր առնչուած համարները կարդա՛։ Օրինակի համար, աղօթքի նիւթին շուրջ պրպտում ըրէ, ապա անոր վերաբերեալ աստուածաշնչական խրատները եւ գրի առնուած կարգ մը աղօթքները կարդա՛։d

Բարձրաձայն կարդա՛։ Աստուածաշունչը բարձրաձայն կարդալով կրնաս մեծապէս օգտուիլ (Յայտնութիւն 1։3)։ Նոյնիսկ ընտանիքը կրնայ բարձրաձայն կարդալ,– փոխնիփոխ պարբերութիւնները կարդալ կամ իւրաքանչիւր անդամի դեր մը նշանակել։ Ոմանք Աստուածաշունչի ձայնագրութիւնները լսելէն հաճոյք կ’առնեն։ Կին մը ըսաւ. «Կարդալու սկսիլը դժուար կը գտնէի, ուստի սկսայ՝ Աստուածաշունչի ընթերցանութեան ձայնագրութիւնները լսելով։ Այժմ Աստուածաշունչը աւելի հետաքրքրական կը գտնեմ, քան՝ որեւէ լաւ վիպակ»։

ՔԱՅԼ 6. Խորհրդածէ՛

◼ Ներկայ կեանքի արագութիւնն ու զբաղումները խորհրդածութեան չեն նպաստեր։ Սակայն ինչպէս որ ուտելիքէն օգտուելու համար պէտք է մարսենք, նոյնպէս Աստուածաշունչէն օգտուելու համար մեր կարդացածին վրայ պէտք է խոկանք։ Ասիկա կ’ընենք՝ մտովին վերաքաղ ընելով եւ մենք մեզի հարց տալով. ‘Եհովա Աստուծոյ մասին ի՞նչ սորվեցայ։ Ասիկա ինչպէ՞ս կը կիրարկուի ինծի։ Ինչպէ՞ս կրնամ զայն օգտագործել ուրիշներուն օգնելու’։

Այսպիսի մտածմունք թոյլ կու տայ, որ Աստուածաշունչի պատգամը մեր սրտին դպչի, եւ Աստուծոյ Խօսքը կարդալուն մէջ մեր ուրախութիւնը կ’աւելցնէ։ Սաղմոս 119։97–ն կ’ըսէ. «Ո՜րչափ կը սիրեմ քու օրէնքդ։ Ա՛յն է ամէն օր իմ մտածութիւնս»։ Խորհրդածութեան միջոցով, սաղմոսերգուն ամէն օր Սուրբ Գրութիւնները իր մտածութիւնը դարձուց։ Այսպէս ան իր սորվածին հանդէպ խորունկ սէր մշակեց։

ՔԱՅԼ 7. Հասկնալու համար օգնութեան դիմէ

◼ Աստուած մեզմէ չ’ակնկալեր որ առանձին իր Խօսքը լիովին ըմբռնենք։ Նոյնիսկ Աստուածաշունչը ինքնին կը հաստատէ, թէ իր մէջ «կարգ մը դժուար հասկնալի խօսքեր կան» (Բ. Պետրոս 3։16, Անթիլիաս)։ Գործք գիրքը կը նկարագրէ եթովպիացի պալատական մը, որ Աստուածաշունչի որոշ մէկ հատուածին նկատմամբ շփոթած էր։ Աստուած Իր ծառաներէն մէկուն միջոցաւ անոր օգնեց, ուստի եթովպիացին «իր ճամբան գնաց ուրախութեամբ» (Գործք 8։26-39)։

Դո՛ւն ալ կրնաս Աստուածաշունչի ընթերցանութենէն աւելի օգտուիլ, կարդացածդ հասկնալու համար օգնութեան դիմելով։ Աստուածաշունչի անվճար տնային ուսումնասիրութեան մը համար, շրջանիդ մէջ եղող Եհովայի վկաներուն հետ շփման մէջ եկուր, կամ այս պարբերաթերթի 4–րդ էջին վրայ գտնուող հասցէին գրէ։

[Ստորանիշներ]