Աստուածաշունչի Աշակերտները Ծառայութեան Պատրաստենք
1 Աստուածաշունչի ուսումնասիրութիւններ վարելուն վերջին նպատակակէտն է նոր աշակերտներ ընել, որոնք մեզի պիտի միանան ուրիշներու սորվեցնելու համար։ (Մատթ. 28։19, 20) Ուստի ուսումնասիրութեան նպատակը պարզապէս գիտութիւն հաղորդել չէ. ան պէտք է մշակէ սրտագին հաւատք մեր աշակերտներուն մէջ եւ զիրենք պատրաստէ իրենց յոյսը բաժնելու ուրիշներու հետ։ (Բ. Կորն. 4։13) Գործնական ի՞նչ կերպերով կրնանք անոնց օգնել որ որակելի ըլլան ուրիշներու սորվեցնելու։—Բ. Տիմ. 2։2
2 Ծառայութիւնը Որպէս Նպատակակէտ մը Դնենք. Սկիզբէն իսկ, յստակ ըրէք որ ճշմարիտ պաշտամունքը կը պարփակէ ‘հանրային յայտարարութիւն ընել փրկուելու համար’։ (Հռովմ. 10։10) Մեր անունը՝ Եհովայի Վկաներ՝ կ’ակնարկէ որ պէտք է ուրիշներու խօսինք։ Անոնց օգնեցէք որ տեսնեն թէ իրենց սորված ըլլալը միայն իրենց փրկութեան համար չէ։ Երբ անոնք ուսուցանողներ կ’ըլլան, անոնք որոնք իրենց մտիկ կ’ընեն նաեւ պատեհութիւն կ’ունենան փրկուելու։—Ա. Տիմ. 4։16
3 Վերաքաղ Ընենք Իրենց Սորվածը. Անոնց սորվածը պարբերաբար վերաքաղ ընելը ուսուցանելու արժէքաւոր օժանդակութիւն մըն է։ Ան աշակերտին կ’օգնէ որ հոգեւորապէս աճի մինչ նոր սորված ճշմարտութիւնները իր մտքին ու սրտին մէջ կը տեղաւորուին։ Մենք ասոր փորձառութիւնը ունեցած ենք պատասխանելով վերաքաղի հարցումներուն որոնք պարփակուած են Դիտարանի Ուսումնասիրութեան մէջ։ Պատրաստեցէք պարզ, ուղղակի հարցումներ ձեր աշակերտին համար որպէսզի իր յատուկ բառերով պատասխանէ։
4 Ձեր վերաքաղը կրնայ դաշտի ծառայութեան երեւոյթը առնել։ Հարցում մը յարուցանեցէք կամ պարագայ մը նկարագրեցէք որ յաճախ կը դիմագրաւէք երբ ուրիշներու կը վկայէք։ Որպէս տանտէր վարուելով, թոյլ տուէք որ ձեր աշակերտը ցոյց տայ թէ ինչ պիտի ըսէ։ Զինք գովեցէք իր ըրած լաւ բաներուն համար եւ գործնական առաջարկներ մատուցանեցէք որոնք իրեն պիտի օգնեն որ աւելի ազդեցիկ ըլլայ յաջորդ անգամ։ Այս մարզումը իրեն պիտի սորվեցնէ ինչպէ՛ս իր սորվածը գործածել եւ պիտի զարգացնէ իր հմտութիւնը Աստուածաշունչը գործածելու մէջ։
5 Պատճառաբանել Գիրքը. Վստահ եղէք որ ձեր աշակերտը ունի Պատճառաբանել գիրքէն օրինակ մը եւ զինք մարզեցէք զայն գործածելու համար։ Ցոյց տուէք թէ ինչպէս ան թելադրութիւններ կը հայթայթէ խօսակցութիւններ սկսելու, սուրբ գրային հարցումներու պատասխանելու կամ առարկութիւններ ձեռք առնելու առնչութեամբ։ Գիրքը գործածեցէք ուսումնասիրութեան ատեն ցոյց տալու համար կերպեր ուրիշներու հետ համոզիչ կերպով խօսելու։ Այս գիրքը կրնայ անոր ինքնավստահութիւնը կերտել, աւելցնելով անոր նախաձեռնութիւնը Թագաւորութեան պատգամը յայտարարելու։
6 Ժողովներուն Կարեւորութիւնը Շեշտենք. Ժողովները, մանաւանդ Ծառայութեան Ժողովը եւ Աստուածպետական Ծառայութեան Դպրոցը, ծրագրուած են մեզ պատրաստելու դաշտի ծառայութեան։ Փորձառու ու ատակ անհատներ վերաքաղ կ’ընեն ու կը ցուցադրեն ազդեցիկ վկայութեան բոլոր գլխաւոր ազդակները։ Ժողովներուն կարեւորութիւնը շեշտեցէք եւ ձեր կարողութեան համաձայն անոր օգնեցէք որ ներկայ գտնուի։ Կանոնաւորաբար ներկայ գտնուիլը կրնայ ձեր աշակերտը մղել որ Յիսուսի ճշմարիտ աշակերտ մը ըլլայ։
7 Պէտք չէ անտեսէք ձեր անձնական օրինակը։ Ձեր կամեցողութիւնը եւ կանոնաւորութիւնը քարոզչական գործին մէջ կը ցուցաբերեն ձեր խոր երախտապարտութիւնը ճշմարտութեան համար։ Այսպիսի ընթացք մը ձեր աշակերտը կը քաջալերէ որ աւելի ընէ իր հաւատքը յայտնաբերելու։ (Ղուկ. 6։40) Այս բոլորը կրնան նորեկի մը օգնել որ ծառայութեան դիտէ որպէս առանձնաշնորհում մը եւ շնորհապարտ ըլլայ որ անոր մէջ բաժին մը ունի։—Ա. Տիմ. 1։12