Մեր Տիպարին Հետեւինք Որպէս Լոյս Կրողներ
1 Յիսուս իր մասին ըսաւ. «Ես եմ աշխարհի լոյսը»։ Անոր օրինակին հետեւելով, Յիսուսի աշակերտներն ալ «աշխարհի լոյս»ն էին։ (Մատթ. 5։14) Որպէս «աշխարհի լոյսը», Յիսուս կրնար ըսել թէ բոլոր իրեն հետեւողները «կենաց լոյսը» պիտի ունենային։ (Յովհ. 8։12) Ատիկա մեզ հոգեւոր լոյս կրողներ կը դարձնէ, որոնք երբեք պէտք չէ թոյլ տան որ որեւէ բան այդ լոյսը ծածկէ կամ մթագնէ։
2 Եհովայի կազմակերպութիւնը մարզում կը հայթայթէ որպէսզի մեզի ցոյց տայ թէ ինչպէ՛ս կրնանք ազդեցիկ լոյս կրողներ ըլլալ։ Եթէ սերտօրէն հետեւինք տրուած խրատին եւ ուղղութեան, պիտի կարենանք ամէն տեսակ մարդիկ լուսաւորել Թագաւորութեան ճշմարտութեան նկատմամբ։ (Ա. Տիմ. 4։6) Որպէս լոյս կրողներ ծառայելը կը պարփակէ ո՛չ միայն ճշմարտութեան մասին խօսիլ ամէն առիթով, այլ նաեւ՝ բարի վարք պահպանել որպէս Քրիստոնեաներ։ Մեր Տիպարին վարքը անմեղադրելի էր։ Որպէս անոր հետեւորդները, պէտք է ցոյց տանք թէ Քրիստոնէութիւնը մեր ամէնօրեայ ապրելակերպն է։ (Եփ. 5։9. Տիտ. 2։7, 8, 10) Մենք պէտք է բարի գործեր յառաջ բերենք զորս ուրիշներ կրնան տեսնել, զիրենք մղելով որ Աստուած փառաբանեն։—Մատթ. 5։16
3 Վկայ մը անսովոր խնդրանքի մը դիմաց դրուեցաւ մինչ տունէ տուն կը ծառայէր։ Տանուտէրը եւ իր կինը շատ հիւանդ էին, բայց կարիքը ունէին որոշ դրամ պառկեցնելու դրամատան մէջ։ Անոնք Վկային հարցուցին թէ կը փափաքի՛ ատիկա ընել։ Ան յօժարեցաւ եւ իրեն 2000 տոլար յանձնուեցաւ որպէսզի դրամատուն տանի։ Ան երբ վերադարձաւ, հարցուց. «Ինչպէ՞ս կրցաք ինծի վստահիլ առանց զիս ճանչնալու»։ Պատասխանը. «Մենք գիտենք, եւ ուրիշներն ալ գիտեն, որ Եհովայի Վկաները միակն են որոնց կրնանք վստահիլ»։ Որքա՜ն շնորհակալ ենք որ Աստուածաշունչի բարոյական սկզբունքներուն մեր սերտօրէն կառչիլը յառաջ կը բերէ Աստուած պատուող այսպիսի համբաւ մը։
4 Առաջին դասարանի ուսուցչուհի մը իր աշակերտներուն բացատրեց թէ ինչո՛ւ վեց տարեկան Վկայ աշակերտուհի մը բաժին չէր բերեր Ամենայն Սրբոց Տօնին առնչութեամբ պատկերներ գունաւորելու մէջ։ Ուսուցչուհին ըսաւ որ ինք շատ հպարտ էր անով, քանի որ քաջութիւնը ունէր տարբեր ըլլալու իր հաւատացածին պատճառաւ։ Եթէ հաստատօրէն բանի մը կը հաւատանք, ուսուցչուհին մեկնաբանեց, պէտք է քաջութիւնը ունենանք զանիկա պաշտպանելու։ Այդ գիշեր ուսուցչուհին իր անձնական համոզումները վերլուծեց եւ ստիպուեցաւ ընդունիլ թէ ինք նոյն քաջութիւնը չէր ցուցաբերած իր համոզումները պաշտպանելու։ Յաջորդ օրը ան յայտարարեց թէ այլեւս իր դասարանը միջամուխ պիտի չընէ ապագայ որեւէ տօնակատարութեան, որոնց մէկ մասին ի՛նք հաւատք չէր ընծայեր։
5 Եհովայի ժողովուրդը կը ջանայ թոյլ տալ որ իր լոյսը փայլի, ուր որ ալ ըլլայ։ Դպրոցին մէջ երախաներու օրինակելի վարքը նպաստաւոր կերպով տպաւորած է դասընկերներն ու ուսուցիչները։ Չափահաս Վկաներ որոնք լաւ վարք կը ցուցաբերեն իրենց շրջակայքին մէջ, պատճառ կ’ըլլան որ ուրիշներ նպաստաւոր կերպով խօսին Թագաւորութեան պատգամին մասին։ Բազմաթիւ պարագաներու մէջ անպաշտօն վկայելը կը քաշէ անկեղծ անհատներ որոնք կ’ուզեն աւելի սորվիլ։ Նոյնիսկ մեր ժրաջանութիւնը եւ պարկեշտութիւնը աշխարհային գործին մէջ վկայութիւն մը կու տան։ Այո, ուր որ ալ ըլլանք կամ ինչ որ ալ ընենք, կրնանք ճշմարտութեան հանդէպ հետաքրքրութիւն արթնցնել։
6 Մեր աչքերը սեւեռած պահելով մեր մեծ Տիպարին անթերի կենցաղին վրայ, կրնանք շարունակել մեր հմտութիւնները կատարելագործել որպէս իր աշակերտները։ Զինք ընդօրինակելը կարելի պիտի դարձնէ որ մեր լոյսը ‘բոլորին վրայ շողայ’։—Մատթ. 5։15. Ա. Պետ. 2։21