Մենք Արթուն Կը Կենա՞նք—Զբաղումներէ Խուսափելով
1 Յիսուս ազդարարութիւն մը տուաւ. «Արթուն կեցէք . . . որ [գալիք] բոլոր նեղութիւններէն ազատիք»։ (Ղուկ. 21։36) Մենք մարդկային պատմութեան ամենավտանգաւոր ժամանակին մէջ կ’ապրինք։ Աղէտի պիտի հանդիպին անոնք որոնք հոգեւոր քնոտութեան կը յանձնուին։ Ասիկա իւրաքանչիւրիս վտանգ կը ներկայացնէ։ Յիսուս յիշեց ուտելը, խմելը եւ ամէնօրեայ կեանքի մտահոգութիւնները։ Ինչո՞ւ։ Որովհետեւ նոյնիսկ այս բաները կրնան մեզ զբաղկոտ դարձնել, զբաղումներ դառնալ եւ վտանգաւոր հոգեւոր քնոտութեան առաջնորդել։
2 Հասարակ Զբաղումներ. Ոմանք զբաղած եղած են չափազանց կամ կասկածելի զբօսանքով, նոյնիսկ հեռատեսիլի մոլիներ ըլլալով։ Անշուշտ, Թագաւորութիւնը առաջ փնտռելը չի նշանակեր որ պէտք է խուսափինք զբօսանքի բոլոր տեսակներէն։ Երբ բանաւորութիւն եւ չափաւորութիւն կը գործածենք, զբօսանքը կրնայ օգտակար ըլլալ։ (Բաղդատել Ա. Տիմոթէոս 4։8։) Բայց անիկա զբաղում մըն է երբ շատ կարեւոր բան մը կը դառնայ մեր կեանքին մէջ, մեծապէս խլելով մեր ժամանակը, մեր նիւթական միջոցները կամ մեր մասնակցութիւնը Թագաւորութիւնը քարոզելու գործին։
3 Անհրաժեշտ չեղող նիւթական բաներ ցանկալը ուրիշ հասարակ զբաղում մըն է որ հոգեւոր քնոտութիւն կը պատճառէ։ Ասիկա կը պահանջէ որ անհատը աւելի ժամանակ տրամադրէ աշխարհային գործին եւ կը պատճառէ որ հոգեւոր հետապնդումները լքուին։ Ոմանք հոգեւոր նպատակակէտերը մոռցած են տարուած ըլլալով նիւթական ստացուածքներ ձեռք ձգելով, որպէսզի աւելի հանգստաւէտ ապրելակերպ մը վայելեն։ Մինչ կարիքը ունինք ‘կերակուրի ու հանդերձի’, պէտք է զգուշանանք դրամասիրութիւն զարգացնելէ, որ կրնայ մեզ հաւատքէն մոլորեցնել։ (Ա. Տիմ. 6։8–10) Թերանալով մեր աչքերը սեւեռած պահել Թագաւորութեան շահերուն վրայ, կրնանք թոյլ գտնուիլ մեր ընտանիքին հոգեւոր կարիքներուն հոգ տանելու մէջ եւ մեր ծառայութիւնը չիրագործել։—Ա. Տիմ. 5։8. Բ. Տիմ. 4։5
4 Իսկ ուրիշներ թոյլ կու տան որ իրենց ‘սրտերը կեանքի մտահոգութիւններով ծանրանան’ այն աստիճան որ հոգեւորապէս կը քնանան։ (Ղուկ. 21։34, ՆԱ) Երբեմն անհատներ կը մտահոգուին առողջապահական խնդիրներու կամ ընտանեկան նեղիչ պարագաներու պատճառաւ։ Բայց այսպիսի անձնական մտահոգութիւններու պէտք չէ թոյլ տրուի որ մեր արթնութիւնը նուազեցնեն այս իրերու դրութեան վերահաս վախճանին նկատմամբ։—Մար. 13։33
5 Բանսարկուն մեծապէս պիտի ուրախանայ եթէ յաջողի մեզ դնել երազանման վիճակի մը մէջ, աշխարհային որոշ պատրանք մը հետապնդելով։ Մենք պէտք է պայքարինք հոգեւորապէս արթուն մնալու համար։ Մենք գիտենք որ ‘Եհովայի օրը գողի պէս պիտի հասնի’, եւ կենսական է որ «արթուն ու զգաստ ըլլանք»։ (Ա. Թես. 5։2, 6) Եթէ մեր մէջ քնոտութեան նշաններ գտնենք, ստիպողական է որ «մէկդի ընենք խաւարին գործերը»։—Հռովմ. 13։11–13
6 Օժանդակներ՝ Մեզի Օգնելու որ Արթուն Կենանք. Այս օժանդակները ի՞նչ են։ Աղօթքը անհրաժեշտ է։ Պէտք է անդադար աղօթենք։ (Ա. Թես. 5։17) Քրիստոնէական ժողովքին մօտիկ ըլլալը մեզ պիտի մղէ «սիրոյ եւ բարեգործութեան»։ (Եբր. 10։24) Կանոնաւոր, անկեղծ անձնաքննութիւն մը կրնայ մեզի օգնել որ գերուշադիր ըլլանք տկարութիւններ յաղթահարելու մեր կարիքին։ (Բ. Կորն. 13։5) Անձնական ուսումնասիրութեան լաւ սովորութիւնները պիտի ձգեն որ ‘հաւատքին խօսքերով սնուցանուած’ մնանք։ (Ա. Տիմ. 4։6) Եթէ ժրաջան ենք, կրնանք վստահ ըլլալ թէ պիտի կարենանք զբաղումներէ խուսափիլ, ‘արթուն կենալ եւ հաւատքի մէջ հաստատ մնալ’։—Ա. Կորն. 16։13