Հոգեւոր Գետնի Վրայ Այսքան Բարգաւաճում Բնաւ Չէինք Ունեցած

¹ Մարդոց մեծամասնութիւնը կ’անձկայ այն օրուան, երբ կրնայ ըսել. «Այսքան բարգաւաճում բնաւ չէինք ունեցած»։ Իրենց մտքով, այդ օրը պիտի գայ, երբ շատ ստացուածքներ ձեռք ձգեն, իրենց թոյլ տալով որ ‘հանգչին, ուտեն, խմեն եւ ուրախ ըլլան’։ (Ղուկ. 12։19) Ասոր հակառակը, մենք հիմա իսկ կրնանք հոգեւոր առումով մը ատիկա ըսել. մեզի բարութիւն մը պակաս չէ։ (Սաղմ. 34։10) Ասիկա ի՞նչպէս կարելի է։

² Առակաց 10։22 կը նշէ. «Տէրոջ օրհնութիւնն է, որ հարստութիւն կու տայ»։ Մենք, որ այսպիսի աստուածային հաճութիւն կը վայելենք, իրապէս կրնանք ըսել որ Աստուած «ամէն բան մեզի առատօրէն կու տայ վայելելու»։ (Ա. Տիմ. 6։17) Ասիկա մեզ երկրի վրայ ամենահարուստ ժողովուրդը կը դարձնէ։

³ Մեր Վայելած Օրհնութիւններուն Գիտակցինք. Մեզմէ քիչեր շատ ստացուածքներ ունին։ Բայց եւ այնպէս, մենք օրհնուած ենք, քանի որ մեր առօրեայ անհրաժեշտ բաներուն նկատմամբ չափազանց մտահոգ չենք։ Եհովա գիտէ ինչ բաներու կարիքը ունինք եւ կը խոստանայ զանոնք հայթայթել։ (Մատթ. 6։31–33) Եհովայի երաշխիքը մեզի մտքի խաղաղութիւն կու տայ, որ իրապէս անգին է։

⁴ Մեր հոգեւոր օրհնութիւնները, սակայն, աւելի հոյակապ են։ Մեր կեանքերը Եհովայէ մատակարարուած հոգեւոր սնունդէն կախեալ են։ (Մատթ. 4։4) Անոնք որոնք հոգեւոր սնունդի համար աշխարհային աղբիւրներուն կը դիմեն, անօթի կը մնան, մինչ մենք գոհացուցիչ կերպով կ’ուտենք ու կը խմենք։ (Եսայ. 65։13) ‘Հաւատարիմ ծառան’ յաւիտենական կեանքի առաջնորդող գիտութեան անհատնում պաշար մը մատչելի կը դարձնէ մեզի։—Մատթ. 24։45. Յովհ. 17։3

⁵ Մեր անգին համաշխարհային եղբայրակցութիւնը երկրի բոլոր մասերուն մէջ ապրող սիրալիր եղբայրներու ու քոյրերու ջերմ ընկերակցութիւնը կը հայթայթէ մեզի։ (Յովհ. 13։35) Տեղական ժողովքը խաղաղութեան պատսպարան մըն է, ուր կրնանք հանգստութիւն ու կազդուրում գտնել։ Երէցները մեր անձերուն համար կը հսկեն, մեզի օգնելով որ այլազան խնդիրներու հետ գլուխ ելլենք։ (Եբր. 13։17) Մեր եղբայրներուն սերտօրէն մօտենալը փոխադարձ քաջալերութիւն կը պատճառէ, մեզ զօրացնելով որ յարատեւենք։—Հռովմ. 1։11, 12

⁶ Նոյնիսկ մեր գործունէութիւնը օրհնութիւն մըն է։ Աշխարհային շատ մը գործեր ձանձրանալի ու անգոհացուցիչ են։ Բարի լուրը բաժնելը ուրիշներուն ուրախութիւն կը բերէ, իսկ մեզի՝ երջանկութիւն։ (Գործք 20։35) Մենք իրապէս կարող ենք մեր ծանր աշխատանքէն բարիքներ վայելել։—Ժող. 2։24

⁷ Աւելի կարեւորը, մենք ապագային համար սքանչելի յոյս մը ունինք։ (Հռովմ. 12։12) Մենք անձկագին կը սպասենք արդարութեան կատարեալ նոր աշխարհ մը, ուր մեր սիրելիներուն հետ ուրախութեամբ ու խաղաղութեամբ յաւիտեան պիտի ապրինք։ Այս յոյսը աշխարհի ներկայացուցած բոլոր բաներէն աւելի արժէքաւոր գանձ մըն է։—Ա. Տիմ. 6։19

⁸ Մեր Գնահատութիւնը Ի՞նչպէս Կրնանք Ցոյց Տալ. Բնաւ չենք կրնար Եհովայի հատուցանել մեզի ի նպաստ ըրած բաներուն համար։ Մենք միայն կրնանք մեր գնահատութիւնը արտայայտել (1) ամէն օր իրեն շնորհակալութիւն յայտնելով իր անարժան ողորմութեան համար (Եփ. 5։20), (2) մեր սէրը ցոյց տալով՝ հնազանդ ըլլալով (Ա. Յովհ. 5։3), (3) իր անունը սրբացնելով՝ բարի լուրը քարոզելով (Սաղմ. 83։18), եւ (4) Քրիստոնէական ժողովքին թիկունք կանգնելով՝ մեր սրտանց համագործակցութեամբ։—Ա. Տիմ. 3։15

⁹ Մենք ամէն պատճառ ունինք որ երկրի վրայ ամենէն ուրախ ժողովուրդը ըլլանք։ (Սաղմ. 144։15բ) Թող մեր մտավիճակը, վարմունքը եւ ծառայութիւնը ցոլացնեն մեր վայելած ուրախութիւնը մեր հոգեւոր դրախտին մէջ։ Մենք այսքան բարգաւաճում բնաւ չէինք ունեցած։