Այցելութիւն մը Որ Կրնայ Օրհնութիւն մը Ըլլալ
1 Զաքէոս ուրախութեամբ Յիսուսը հիւրընկալեց իր տան մէջ։ Իսկ այդ այցելութիւնը ի՜նչ մեծ օրհնութիւն մը եղաւ։—Ղուկ. 19։2-9
2 Ներկայիս, Յիսուս Քրիստոս՝ որպէս ժողովքին Գլուխը՝ երէցները կ’առաջնորդէ որպէսզի ‘Աստուծոյ հօտը արածեն’։ (Ա. Պետ. 5։2, 3. Յովհ. 21։15-17) Ժողովներուն մէջ սորվեցնելու եւ դաշտի ծառայութեան մէջ առաջնորդութիւնը ստանձնելու կողքին, ժողովքի տեսուչները սիրալիր, անհատական օգնութիւն կը հայթայթեն ժողովքի իւրաքանչիւր անդամին։ Ժամանակ առ ժամանակ, կրնաք ակնկալել որ երէցները անհատապէս հետաքրքրուին ձեզմով, ըլլայ ատիկա ձեր տան, կամ Թագաւորութեան Սրահին մէջ, մինչ միասին դաշտի ծառայութեան ելած էք, կամ ուրիշ առիթներով։ Երէցներու այցելութիւնները ձեզ պէ՞տք է վախցնեն։ Բնա՛ւ երբեք։ Անոնց այցելութիւնը չի նշանակեր թէ դուք կերպով մը թերացած էք։ Հետեւաբար, ի՞նչ է հովուական այցելութեան մը նպատակը։
3 Պօղոս ըսաւ թէ կ’ուզէր եղբայրները այցելել ‘տեսնելու համար թէ անոնք ի՞նչպէս են’։ (Գործք 15։36) Այո, որպէս սիրալիր հովիւներ, երէցները շատ հետաքրքրուած են ձեր որպիսութեամբ։ Անոնք կը փափաքին ձեզի օգտակար եւ կերտիչ եղող հոգեւոր օգնութիւն ներկայացնել։ Մեր սիրալիր Հովիւը՝ Եհովա՝ կը փափաքի որ մեզմէ իւրաքանչիւրը այսպիսի անհատական հոգատարութիւն ստանայ։—Եզեկ. 34։11, ՆԱ։
4 Երէցներու Այցելութիւնները Ողջունեցէք. Իր եղբայրները այցելելու Պօղոսի նպատակն էր ‘անոնց հոգեւոր շնորհք մը հաղորդել, որպէս զի հաստատուին, եւ փոխադարձ քաջալերութիւն ըլլայ’։ (Հռովմ. 1։11, 12, ՆԱ) Այս դժուար վերջին օրերուն մէջ, բոլորս ալ հոգեւոր քաջալերութեան եւ հաւատքի մէջ հաստատ մնալու համար օգնութեան կարիքը ունինք։ Հովուական այցելութեան մը դրականօրէն ընդառաջելով, անկասկած փոխադարձ հոյակապ քաջալերութիւն պիտի ստանաք։
5 Գնահատենք երէցներու հովուական գործէն առթած բազմաթիւ օգուտները։ Եթէ ձեզի հետաքրքրող հարց մը կամ հարցում մը ունիք, յիշեցէք որ ժողովքի երէցները ձեզի օգնելու պատրաստ են։ Մի՛ երկմտիք անոնց հետ խօսակցելու ձեր հոգեւոր բարօրութեան հետ կապ ունեցող որեւէ հարցի մասին։ Գնահատեցէք Եհովայի այս սիրալիր կարգադրութիւնը եւ այսպիսի այցելութեան մը բերած օրհնութիւններով ուրախացէք։