Ռահվիրայական Ծառայութիւնը Ձեզի՞ Համար Է

¹ «Չեմ կրնար երեւակայել որ ուրիշ բան մը կ’ընեմ։ Երբեք չեմ խորհիր որ ուրիշ որեւէ բան կրնայ միեւնոյն ուրախութիւնը տալ»։ Ասոնք որո՞ւ խօսքերն են։ Լիաժամ ծառայութիւնը իրենց կեանքի ուրախ ասպարէզը դարձուցած հարիւր հազարաւոր Եհովայի Վկաներէն մէկուն խօսքերն են։ Դուք ալ աղօթքով նկատի առա՞ծ էք թէ ռահվիրայական ծառայութիւնը ձեզի համար է թէ ոչ։ Քանի որ մեր անձերը անվերապահօրէն Եհովայի նուիրած ենք, վստահաբար պէտք է նկատի առնենք թէ արդեօք կրնա՛նք աւելի լման մասնակցութիւն մը բերել Թագաւորութեան բարի լուրը տարածելու մէջ։ Այս նպատակակէտը ի մտի ունենալով, հաճեցէք նկատի առնել ռահվիրայական ծառայութեան մասին շատերուն հարցուցած հարցումներէն ոմանք։

ՀԱՐՑՈՒՄ 1. «Ոմանք կ’ըսեն թէ ռահվիրայութիւնը բոլորին համար չէ։ Ի՞նչպէս կրնամ գիտնալ որ անիկա ինծի համար է»։

² Ասոր պատասխանը կախեալ է ձեր պարագաներէն եւ սուրբ գրային պարտաւորութիւններէն։ Շատեր կան, որոնց առողջութիւնը եւ կեանքի ընթացիկ պարագաները թոյլ չեն տար որ ամէն ամիս ծառայութեան համար 90 ժամ յատկացնեն։ Որպէս օրինակ նկատի առէք այն բազմաթիւ հաւատարիմ Քրիստոնեայ քոյրերը, որոնք տանտիկիններ եւ մայրեր են։ Անոնք ծառայութեան կը մասնակցին այնքան յաճախ որքան իրենց պարագաները կը ներեն։ Եթէ պատեհութիւնը ներկայանայ, անոնք ամէն տարի ամիս մը կամ աւելի օժանդակ ռահվիրայութիւն կ’ընեն, յաւելեալ ծառայութենէն առթած ուրախութիւնը համտեսելով։ (Գաղ. 6։9) Թէեւ կրնայ ըլլալ որ անոնց պարագաները չեն ներեր որ ներկայիս որպէս լիաժամ ռահվիրայ մը ծառայեն, սակայն անոնք ռահվիրայութեան հոգին կը հրահրեն եւ որպէս բարի լուրի եռանդուն հրատարակիչներ՝ ժողովքին օրհնութիւն մը կ’ըլլան։

³ Միւս կողմէ, յարաբերաբար աւելի նուազ պարտաւորութիւններ ունեցող բազմաթիւ քոյրեր ու եղբայրներ, ռահվիրայական ծառայութիւնը որդեգրած են, իրենց նախասիրութիւնները վերաճշդումի ենթարկելով։ Իսկ ի՞նչ կրնաք ըսել ձեր մասին։ Աշխարհային ուսումը ամբողջացուցած պատանի՞ մըն էք։ Տանտիկի՞ն մըն էք, որու ամուսինը կարող է ընտանիքին կարիքները պատշաճօրէն հայթայթել։ Զաւակներու հոգածութիւն չունեցող ծնո՞ղ մըն էք։ Ձեր աշխարհիկ գործէն հանգստեան կոչուած անհա՞տ մըն էք։ Ռահվիրայ ըլլալ կամ չըլլալը իւրաքանչիւր անհատի ձգուած որոշում մըն է։ Հարցումը հետեւեալն է. Կրնա՞ք ձեր կեանքին մէջ ռահվիրայութեան տեղ տալ։

⁴ Սատանան իր իրերու աշխարհային դրութիւնը կը գործածէ մեր կեանքը զբաղումներով լեցնելու եւ մեզ անձնասէր ապրելակերպի մէջ թաղելու համար։ Եթէ վճռած ենք աշխարհի մէկը մասը չըլլալ, Եհովա պիտի օգնէ մեզի որ Թագաւորութեան շահերը առաջին տեղը պահենք եւ մեզի մատչելի եղած աստուածպետական ծառայութեան բոլոր առանձնաշնորհումները ընդունինք։ Եթէ կրնաք ձեր պարագաները յարմարցնել եւ որպէս ռահվիրայ մը ծառայել, ինչո՞ւ չընէք։

ՀԱՐՑՈՒՄ 2. «Ի՞նչպէս կրնամ վստահ ըլլալ որ լիաժամ ծառայութեան մէջ պիտի կարենամ նիւթական պէտքերս հոգալ»։

⁵ Շիտակ է որ վերջին քանի մը տարիներուն, կարգ մը երկիրներու մէջ կեանքի համար անհրաժեշտ նկատուած բաները ձեռք ձգելու համար, աշխարհիկ գործին աւելի ժամանակ պէտք է յատկացուի։ Այսուհանդերձ, շատեր տասնեակ տարիներէ ի վեր ռահվիրայութիւն կ’ընեն եւ Եհովա կը շարունակէ անոնց թիկունք կանգնիլ։ Որպէս ռահվիրայ յաջողութիւն գտնելու համար, հաւատքի եւ անձնազոհ հոգիի կարիքը կայ։ (Մատթ. 17։20) Սաղմոս 34։10–ն մեզի երաշխիք կու տայ թէ «Տէրը փնտռողներուն բարութիւն մը պակաս պիտի չըլլայ»։ Ռահվիրայութեան ծառայութեան ձեռնարկող մը լման վստահութիւն պէտք է ունենայ որ Եհովա իրեն պէտք եղածը պիտի հայթայթէ։ Ան այս բանը կ’ընէ հաւատարիմ ռահվիրաներուն ամէնուրեք։ (Սաղմ. 37։25) Անշուշտ, Բ. Թեսաղոնիկեցիս 3։8, 10–ի եւ Ա. Տիմոթէոս 5։8–ի սկզբունքներուն համաձայն, ռահվիրաները չեն ակնկալեր որ ուրիշներ իրենց նիւթապէս թիկունք կանգնին։

⁶ Ռահվիրայական ծառայութեան մասին մտածող ոեւէ անհատ պէտք է Յիսուսի ըսածը ընէ. ‘Առաջ նստի ու հաշիւ ընէ ծախքը’։ (Ղուկ. 14։28) Ասիկա ընելը գործնական իմաստութիւն ցոյց կու տայ։ Խօսեցէք քանի մը տարիներ յաջողութեամբ ռահվիրայութիւն ընողներուն հետ։ Հարցուցէք անոնց թէ Եհովա ի՛նչպէս իրենց թիկունք կանգնած է։ Ձեր շրջանային տեսուչը փորձառու ռահվիրայ մը ըլլալով, ուրախ պիտի ըլլայ լիաժամ ծառայութեան մէջ ի՛նչպէս յաջողելու մասին ձեզի թելադրութիւններ տալով։

⁷ Անհատ մը չի կրնար Մատթէոս 6։33–ի մէջ Յիսուսի խոստումին ճշմարիտ ըլլալուն փորձառութիւնը լիովին ունենալ, մինչեւ ինքզինք Եհովայի ձեռքերուն մէջ չդնէ։ Հաւատարիմ վկայ մը կը պատմէ. «Երբ ես ու ծառայակիցս որպէս ռահվիրաներ մեր նոր նշանակումի վայրը հասանք, մեր հետ դրամ չունէինք, այլ՝ միայն քանի մը բանջարեղէն եւ տուփ մը մարկարին։ Մեր ունեցածը ընթրեցինք եւ ըսինք. ‘Վաղուան համար բան մը չունինք’։ Ասոր համար աղօթեցինք եւ պառկեցանք։ Յաջորդ առտու կանուխէն տեղւոյն Վկաներէն մէկը եկաւ եւ ինքզինք ներկայացուց ըսելով. ‘Եհովայի աղօթեցի որ մեզի ռահվիրաներ ղրկէ։ Հիմա կրնամ օրուան մեծ մասը ձեզի ընկերակցիլ. բայց քանի որ գիւղական շրջանի մը մէջ կ’ապրիմ, ստիպուած եմ ճաշս ձեր հետ ուտել, անոր համար այս ուտելիքները հետս բերի որպէսզի բոլորս միասին ուտենք’։ Ան իր հետ մեծ քանակութեամբ միս եւ բանջարեղէն բերած էր»։ Զարմանալի չէ որ Յիսուս հաւաստիացուց մեզ որ ‘հոգ չընենք մեր կեանքին համար’։ Ապա աւելցուց. «Ձեզմէ ո՞վ կրնայ իր հոգ ընելովը իր հասակին վրայ կանգուն մը աւելցնել»։—Մատթ. 6։25, 27

⁸ Մեր շուրջը եղող աշխարհը հետզհետէ աւելի նիւթապաշտ կը դառնայ։ Նաեւ մեզ համակերպեցնել տալու ճնշումը կ’աւելնայ։ Սակայն, լիաժամ ծառայութեան հանդէպ համեստ գնահատութիւնը կ’օգնէ որ նիւթական գետնի վրայ քիչով գոհանանք։ (Ա. Տիմ. 6։8) Իրենց կեանքը պարզ եւ կարգապահ պահող ռահվիրաներ, ծառայութեան համար աւելի ժամանակ կ’ունենան եւ ճշմարտութիւնը ուրիշներուն սորվեցնելէն աւելի շատ ուրախութիւն եւ հոգեւոր զօրութիւն կը ստանան։ Թէեւ ճգնաւորական կեանք մը չեն փորձեր ապրիլ, սակայն իրենց տնտեսական կացութեան հանդէպ անոնց հաւասարակշռուած մօտեցումը կարող դարձուցած է որ ռահվիրայութեան օրհնութիւնները վայելեն։

⁹ Եթէ իրապէս կը զգաք թէ վերջին օրերուն մէջ կ’ապրինք եւ թէ այս չար աշխարհի օրերը համրուած են, հոգեւորապէս պիտի մղուիք պէտք եղած զոհողութիւնները ընելու ամէն առիթով բարի լուրը քարոզելու համար։ Ձեր տնտեսական կացութիւնը տարբեր աչքով դիտելով եւ հարցը Եհովայի ձեռքերուն մէջ դնելով, թերեւս անդրադառնաք որ կրնաք լիաժամ կերպով իրեն ծառայել։ Ռահվիրայ ըլլալու համար եթէ նոյնիսկ նիւթական որոշ բաներէ պէտք է հրաժարիք, Եհովա առատօրէն ձեզ պիտի օրհնէ։—Սաղմ. 145։16

ՀԱՐՑՈՒՄ 3. «Որպէս պատանի, ռահվիրայական ծառայութիւնը ինչո՞ւ պէտք է նկատեմ որպէս ընտրելիք ասպարէզ մը»։

¹⁰ Երբ դպրոցական վերջին տարիներուն կը հասնիք, բնական է որ ապագայի մասին սկսիք խորհիլ։ Կ’ուզէք որ ձեր ապագան ապահով, ուրախ եւ գոհացուցիչ ըլլայ։ Դպրոցական խրատատուները թերեւս փորձեն ձեզ ուղղել որ տարիներու ուսում պահանջող ասպարէզի մը մէջ նետուիք։ Ձեր լաւ մարզուած քրիստոնէական խղճմտանքը ձեզի կ’ըսէ թէ պէտք է պատրաստուիք կարելի եղածին չափ լիովին Եհովայի ծառայել։ (Ժող. 12։1) Նաեւ, ամուսնանալու եւ ընտանիք կազմելու մասին կրնաք խորհիլ։ Ի՞նչ պիտի ընէք։

¹¹ Այս ժամանակին ձեր տուած որոշումները կրնան ձեր ամբողջ ապագային ազդել։ Եթէ արդէն իսկ նուիրուած եւ մկրտուած Եհովայի Վկայ մըն էք, դուք ձեզ բոլորանուէր կերպով Եհովայի մատուցանած էք։ (Եբր. 10։7) Առաջին առիթը որ ներկայանայ, փորձեցէք մէկ կամ աւելի ամիսներ օժանդակ ռահվիրայութիւն ընել։ Ասիկա ձեզի համտեսել պիտի տայ կանոնաւոր ռահվիրայութեան բերած ուրախութիւնները եւ պատասխանատուութիւնները, եւ ձեր կեանքը ի՛նչ կերպով գործածելու մասին կասկած պիտի չմնայ։ Ապա, փոխանակ դպրոցը աւարտելէն ետք ձեր ունեցած ազատ ժամանակը լիաժամ աշխատանքով լեցնելու, ինչո՞ւ կանոնաւոր ռահվիրայութեան չսկսիք։ Ռահվիրայական ծառայութեան աւելի ուշ ձեռնարկողներէն ոմանք զղջացած են որ աւելի կանուխ չէին սկսած։

¹² Որպէս երիտասարդ, ամուրիութիւն հետապնդելու պատեհութենէն օգտուեցէք եւ քարոզչութեան լիաժամ գործին մէջ անոր մատուցած օգուտները վայելեցէք։ Եթէ օրին մէկը փափաքիք ամուսնանալ, սկիզբը որպէս կանոնաւոր ռահվիրայ ծառայելը ամուսնութեան համար լաւագոյն հիմը կրնայ դնել։ Մինչ աւելի կը հասուննաք եւ հոգեւորապէս կը յառաջդիմէք, թերեւս փափաքիք ռահվիրայութիւնը ձեր ասպարէզը դարձնել, ձեր կողքին ունենալով նոյն մտածելակերպը ունեցող կողակից մը։ Միասնաբար ռահվիրայութիւն ընող զոյգերէն ոմանք, շրջանային գործին կամ միսիոնարական դաշտին մէջ նետուած են. իրապէս գոհացուցիչ ապրելակերպ մը։

¹³ Ձեր ռահվիրայութիւնը որքան ալ շարունակէք, ձեր ուսումը կատարելագործած եւ թանկարժէք մարզում ստացած պիտի ըլլաք, զոր ուրիշ ոչ մէկ զբաղում կրնայ իրագործել։ Ռահվիրայութիւնը կը սորվեցնէ ինքնակրթութիւն, կազմակերպուած ըլլալ, մարդոց հետ վարուիլ գիտնալ, Եհովայի վստահիլ, եւ ինչպէս համբերութիւն ու ազնուութիւն մշակել. յատկութիւններ՝ որոնք ձեզ պիտի զինեն աւելի մեծ պատասխանատուութիւններ կրելու։

¹⁴ Մարդկութեան համար կեանքը ա՛յսքան անորոշ չէ եղած։ Եհովայի խոստումներէն զատ, շատ քիչ բաներ իրապէս մնայուն են։ Քանի որ ապագան իր դռները լայն կերպով բացած է ձեր առջեւ, հիմա լաւագոյն ժամանակը չէ՞ լրջօրէն մտածելու թէ եկող տարիներուն ձեր կեանքը ինչ կերպով պիտի գործածէք։ Ռահվիրայութեան առանձնաշնորհումը ուշադիր կերպով կշռադատեցէք։ Երբեք պիտի չզղջաք որ ռահվիրայական ծառայութիւնը ձեր կեանքին ասպարէզը դարձուցիք։

ՀԱՐՑՈՒՄ 4. «Ժամերու պահանջին գոհացում տալը յարատեւ ճնշում չի՞ բանեցներ։ Ի՞նչ պիտի պատահի եթէ ժամերուս չհասնիմ»։

¹⁵ Երբ կանոնաւոր ռահվիրայութեան դիմումնագիրը լեցնէք, հետեւեալ հարցումին պէտք է պատասխանէք. «Ձեր անհատական պարագաները այնպէս մը կազմակերպա՞ծ էք որ տրամաբանականօրէն կարենաք տարեկան 1,000 ժամուան պահանջին գոհացում տալ»։ Անոր հասնելու համար, օրական միջին հաշուով շուրջ երեք ժամ պէտք է ծառայէք։ Բացայայտօրէն, ասիկա լաւ յայտագիր եւ ինքնակրթութիւն կը պահանջէ։ Ռահվիրաներու մեծամասնութիւնը քանի մը ամսուան մէջ գործնական յայտագիր մը կը կազմեն։

¹⁶ Սակայն, Ժողովողի 9։11–ը իրաւացիօրէն կ’ըսէ թէ «ժամանակ ու դիպուած կը պատահին ամենուն»։ Լուրջ հիւանդութիւն մը կամ ուրիշ անակնկալ պարագաներ կրնան պատճառ ըլլալ որ ռահվիրան իր ժամերուն չհասնի։ Եթէ հարցը երկարատեւ չէ եւ ծառայութեան տարուան սկիզբը պատահի, հետագային, աւելի խտացուած յայտագիր մը կ’օգնէ որ ձեր ժամերուն հասնիք։ Սակայն, ի՞նչ կը պատահի եթէ ծառայութեան տարուան վերջին ամիսներուն լուրջ խնդիր մը ծագի եւ ռահվիրան չկարենայ իր ժամերուն հասնիլ։

¹⁷ Եթէ քանի մը ամիս ժամանակաւոր հիւանդութիւն մը ունենաք, կամ կամքէ անկախ ստիպողական ուրիշ պատճառով մը չկրնաք ժամերու պահանջին գոհացում տալ, կրնաք Ժողովքի Ծառայութեան Յանձնախումբի անդամներէն մէկուն մօտենալ եւ պարագան իրեն բացատրել։ Եթէ այս երէցները խորհին թէ յարմար պիտի ըլլայ թոյլ տալ ձեզի որ շարունակէք ձեր ռահվիրայութիւնը, ձեր չհասած ժամերը լեցնելու մասին հոգ չընելով, իրենց կ’իյնայ ասիկա որոշել։ Քարտուղարը ձեր Ժողովքի Հրատարակիչի Արձանագրութեան Քարտին վրայ պիտի նշէ թէ ձեր չհասած ժամերը լեցնելու կարիք չունիք։ Ասիկա արձակուրդի արտօնութիւն մը չէ, այլ՝ ձեր պարագաներուն հանդէպ մասնայատուկ նկատառութիւն մը։—Տես՝ Օգոստոս 1986 Մեր Թագաւորութեան Ծառայութիւնը թերթիկին յաւելուածականը, պարբերութիւն 18։

¹⁸ Փորձառու ռահվիրաները ծառայութեան տարուան սկիզբէն իսկ յաւելեալ ժամեր կ’ապահովեն։ Անոնք նախապատուութիւն կու տան իրենց ռահվիրայական ծառայութեան, ուստի կը զգան թէ երբեմն կարեւոր է անհրաժեշտ չեղող գործունէութիւնները զանց ընել։ Եթէ ռահվիրայ մը, լաւ յայտագրի մը չգոյութեան կամ անոր կառչելու մէջ ինքնակրթութիւն չունենալուն համար իր ժամերուն մէջ ետ մնայ, պէտք է զգայ թէ իր պատասխանատուութիւնն է չհասած ժամերուն տեղը լեցնել, եւ չակնկալէ որ իրեն հանդէպ մասնայատուկ նկատառութիւն ցոյց տրուի։

¹⁹ Երբեմն ռահվիրայի մը պարագաները անխուսափելի փոփոխութեան կ’ենթարկուին։ Ան կրնայ նկատել որ երկար ատենէ ի վեր չի կրնար իր ժամերուն հասնիլ, շարունակուող հիւանդութեան, հետզհետէ աւելցող ընտանեկան պատասխանատուութեանց, եւ կամ ուրիշ պատճառներով։ Այս պարագային, իմաստութիւն է հրատարակիչներու շարքին վերադառնալ եւ պարագաներուն ներած չափով, օժանդակ ռահվիրայութիւն ընել։ Եթէ անհատ մը պարագաներու բերմամբ, իրմէ սպասուած ժամերը այլեւս չի կրնար տալ, կարգադրութիւն մը չկայ որպէսզի ռահվիրայ մնայ։

²⁰ Կը յուսանք որ որակելի եղողներուն մասնայատուկ նկատառութիւն ցուցաբերելու կարգադրութիւնը շատերը քաջալերէ որ ռահվիրայական ծառայութեան ձեռնարկեն, առանց անտեղիօրէն մտահոգուելու։ Ասիկա նաեւ պէտք է քաջալերէ լիաժամ ծառայութեան մէջ եղողները որ շարունակեն ռահվիրաներ մնալ։ Մեր փափաքն է, որ ռահվիրաները յաջողութիւն գտնեն իրենց լիաժամ ծառայութեան մէջ։

ՀԱՐՑՈՒՄ 5. «Կը փափաքիմ բան մը իրագործել եւ զայն ընելով ուրախ ըլլալ։ Ռահվիրայական ծառայութիւնը գոհունակութիւն պիտի տա՞յ ինծի»։

²¹ Իսկական ուրախութիւնը մեծապէս կախեալ է Եհովայի հետ սերտ, անձնական յարաբերութիւն մը ունենալէն եւ այն համոզումէն թէ հաւատարմօրէն իրեն կը ծառայենք։ Յիսուս «իր առջեւ կեցած ուրախութեանը համար» կրցաւ տանջանքի ցիցի մը տոկալ։ (Եբր. 12։2) Ան ուրախ էր, քանի որ Աստուծոյ կամքը կ’ընէր։ (Սաղմ. 40։8) Ներկայ իրերու դրութեան մէջ, կրնանք իսկական ուրախութիւն վայելել, եթէ մեր կեանքի գործունէութիւններուն մեծամասնութիւնը Եհովայի պաշտամունքին հետ առնչութիւն ունենայ։ Հոգեւոր հետապնդումները նպատակ մը ունենալու զգացումը կու տան, քանի որ ներքնապէս գիտենք թէ շիտակը կ’ընենք։ Ուրախութիւնը՝ տալէն յառաջ կու գայ եւ գիտենք թէ տալու լաւագոյն կերպն է ուրիշներուն սորվեցնել թէ ի՛նչպէս կրնան յաւիտենական կեանք ստանալ Աստուծոյ նոր աշխարհին մէջ։—Գործք 20։35

²² Առաջին պարբերութեան մէջ մէջբերուած ռահվիրան ասիկա բացատրեց հետեւեալ կերպով. «Աւելի մեծ ուրախութիւն չկայ, քան տեսնել թէ անհատ մը, որու հետ ուսումնասիրեցիք, Եհովայի գործունեայ փառաբանող կը դառնայ։ Կ’ոգեւորէ եւ հաւատք կը զօրացնէ տեսնել թէ Աստուծոյ Խօսքը ի՛նչպէս ազդու կերպով մարդոց կը մղէ որ իրենց կեանքին մէջ փոփոխութիւններ մտցնեն՝ Եհովան հաճեցնելու համար»։ (Տես՝ Դիտարան 1 Մարտ 1998, էջ 23-28։) Հետեւաբար, ի՞նչ բան ձեզի ուրախութիւն կու տայ։ Եթէ, աշխարհի մատուցանած ժամանակաւոր հաճոյքին փոխարէն, մնայուն, արժէքաւոր գործունէութիւնները գնահատէք, ռահվիրայութիւնը ձեզի պիտի տայ յաջողակ ըլլալու հոյակապ զգացում, եւ իրական ուրախութիւն։

ՀԱՐՑՈՒՄ 6. «Եթէ ռահվիրայութիւնը յաւիտենական կեանք ունենալու համար պահանջուած չէ, զայն ընելը կամ չընելը իմ գիտնալիքս չէ՞»։

²³ Շիտակ է. ռահվիրայ ըլլալու որոշումը ձեզի կ’իյնայ։ Միայն Եհովան կրնայ ձեր կեանքի անձնական պարագաները դատել։ (Հռովմ. 14։4) Ան իրաւացիօրէն կ’ակնկալէ որ դուք բոլոր սրտով, հոգիով, մտքով եւ զօրութիւնով զինք պաշտէք։ (Մար. 12։30. Գաղ. 6։4, 5) Ան կը սիրէ սիրայօժար տուողը, մէկը որ ուրախութեամբ իրեն կը ծառայէ եւ ո՛չ չէ տրտմութեամբ կամ ստիպմամբ։ (Բ. Կորն. 9։7. Կող. 3։23) Լիաժամ ծառայելու ձեր պատճառը՝ Եհովայի եւ թաղամասի մարդոց հանդէպ սէրը պէտք է ըլլայ։ (Մատթ. 9։36-38. Մար. 12։30, 31) Եթէ այսպէս կը զգաք, այն ատեն լրջօրէն նկատի առէք ռահվիրայական ծառայութիւնը։

²⁴ Կը յուսանք որ հոս նկատի առնուած տեղեկութիւնը պիտի օգնէ ձեզի ռահվիրայ մը ըլլալու ձեր հեռանկարը կշռադատելու։ Կանոնաւոր ռահվիրայ մը ըլլալու համար ձեր պարագաները կրնա՞ք բարեփոխութեան ենթարկել։ Հետեւեալը օրացոյց մըն է՝ «Ռահվիրայական Ծառայութեան Շաբաթական Յայտագիրս» խորագրով։ Նայեցէք թէ կրնա՞ք ձեզի համար գործնական յայտագիր մը պատրաստել, ամէն շաբաթ ծառայութեան համար շուրջ 23 ժամ յատկացնելու համար։ Ապա ձեր լման հաւատքը եւ վստահութիւնը Եհովայի վրայ դրէք։ Իր օգնութեամբ կրնա՛ք յաջողիլ։ Ան խոստացած է. ‘Ձեզի օրհնութիւն պիտի թափեմ, այնքան շատ որ բաւական տեղ չըլլայ’։—Մաղ. 3։10

²⁵ Հետեւաբար կը հարցնենք, «Ռահվիրայական ծառայութիւնը ձեզի՞ համար է»։ Եթէ ձեր պատասխանը այո՛ է, կանոնաւոր ռահվիրայութիւնը շուտով սկսելու համար թուական մը որոշեցէք եւ վստահ եղէք որ Եհովա ձեզ ուրախ կեանքով մը պիտի օրհնէ։

[Ցուցակ՝ էջ 6]

Ռահվիրայական Ծառայութեան Շաբաթական Յայտագիրս

ԵՐԿՈՒՇԱԲԹԻ Առաւօտեան դաշտի ծառայութիւն

ԵՐԵՔՇԱԲԹԻ Առաւօտեան դաշտի ծառայութիւն

ՉՈՐԵՔՇԱԲԹԻ Առաւօտեան դաշտի ծառայութիւն

ՀԻՆԳՇԱԲԹԻ Առաւօտեան դաշտի ծառայութիւն

ՈՒՐԲԱԹ Առաւօտեան դաշտի ծառայութիւն

ՇԱԲԱԹ Առաւօտեան դաշտի ծառայութիւն

ԿԻՐԱԿԻ Առաւօտեան դաշտի ծառայութիւն

ԵՐԿՈՒՇԱԲԹԻ Յետմիջօրէի դաշտի ծառայութիւն

ԵՐԵՔՇԱԲԹԻ Յետմիջօրէի դաշտի ծառայութիւն

ՉՈՐԵՔՇԱԲԹԻ Յետմիջօրէի դաշտի ծառայութիւն

ՀԻՆԳՇԱԲԹԻ Յետմիջօրէի դաշտի ծառայութիւն

ՈՒՐԲԱԹ Յետմիջօրէի դաշտի ծառայութիւն

ՇԱԲԱԹ Յետմիջօրէի դաշտի ծառայութիւն

ԿԻՐԱԿԻ Յետմիջօրէի դաշտի ծառայութիւն

ԵՐԿՈՒՇԱԲԹԻ Երեկոյեան դաշտի ծառայութիւն

ԵՐԵՔՇԱԲԹԻ Երեկոյեան դաշտի ծառայութիւն

ՉՈՐԵՔՇԱԲԹԻ Երեկոյեան դաշտի ծառայութիւն

ՀԻՆԳՇԱԲԹԻ Երեկոյեան դաշտի ծառայութիւն

ՈՒՐԲԱԹ Երեկոյեան դաշտի ծառայութիւն

ՇԱԲԱԹ Երեկոյեան դաշտի ծառայութիւն

ԿԻՐԱԿԻ Երեկոյեան դաշտի ծառայութիւն

Մատիտ մը գործածելով արձանագրեցէք շաբթուան իւրաքանչիւր օրուան ձեր յայտագիրը։

Յայտագրեցէք իւրաքանչիւր շաբաթ դաշտի ծառայութեան համար շուրջ 23 ժամ տրամադրել։

Շաբաթական յայտագրի ժամերու գումար ____________________