Առաջնորդութիւնը Առնող Տեսուչներ—Քարտուղարը

¹ Ժողովքի քարտուղարը կենսական դեր մը կը խաղայ վստահ ըլլալու համար թէ «ամէն բան վայելչութեամբ եւ կարգաւ» կ’ըլլայ։ (Ա. Կորն. 14։40) Ժողովքի Ծառայութեան Յանձնախումբին մէկ անդամը ըլլալով, ան հոգ կը տանի ժողովքի թղթակցութեան եւ կարեւոր թղթածրարներուն։ Թէեւ իր պարտականութիւնները միւս երէցներուն պարտականութիւններուն չափ բոլորին տեսանելի չեն, սակայն անոր ծառայութիւնը մեծապէս անհրաժեշտ ու գնահատուած է։

² Երբ ժողովքը Ընկերութենէն կամ ուրիշներէ նամակներ կը ստանայ, քարտուղարը անոնց հոգ կը տանի եւ վստահ կ’ըլլայ որ անոնք կը պատասխանուին։ Ան վստահ կ’ըլլայ որ երէցները աչքէ անցընեն ստացուած նամակները, ապա զանոնք թղթածրարի մէջ կը պահէ։ Ան պարբերաթերթերու ու գրականութիւններու ապսպրանքները վերաքաղ կ’ընէ, ապա Ընկերութեան կը ղրկէ։ Ան ուղղակիօրէն կը վերահսկէ հաշիւներու ու բաժանորդագրութիւններու հոգ տանողները, ինչպէս նաեւ համաժողովի հետ առնչուած բոլոր բաները։

³ Քանի որ քարտուղարը ժողովքի դաշտի ծառայութեան ամսական տեղեկագիրը Ընկերութեան պէտք է ղրկէ ամսուն վեցէն առաջ, անհրաժեշտ է որ իւրաքանչիւր ամսուան վերջաւորութեան բոլորս ալ դաշտի ծառայութեան մեր գործունէութիւնը շուտով տեղեկագրենք։ Ան ծառայութեան տեղեկագիրները կ’ընդօրինակէ Ժողովքի Հրատարակիչի Արձանագրութեան քարտերուն վրայ։ Ոեւէ հրատարակիչ կրնայ խնդրել որ տեսնէ իր անհատական գործունէութեան արձանագրութիւնը։

⁴ Երբ հրատարակիչ մը ժողովք մը փոխէ, քարտուղարը միւս ժողովքի երէցներուն կը ղրկէ կամ անոնցմէ կը խնդրէ ծանօթացնելու նամակ մը եւ անհատին Ժողովքի Հրատարակիչի Արձանագրութեան քարտը։—Մեր Ծառայութիւնը, էջ 104-105։

⁵ Քարտուղարը ռահվիրաներու գործունէութիւնը վերաքաղ կ’ընէ, երէցներուն՝ եւ յատկապէս ծառայութեան տեսուչին՝ տեղեկացնելով որեւէ խնդիր զոր ռահվիրաները կը դիմագրաւեն։ Ան Ժողովքի Գրքի Ուսումնասիրութեան վարիչներուն ուշադրութեան կը յանձնէ այն հրատարակիչները, որոնք դաշտի ծառայութեան մէջ անկանոն կը դառնան։ Քարտուղարը եւ ծառայութեան տեսուչը միասնաբար առաջնորդութիւնը կ’առնեն կարգադրութիւններ ընելու, որպէսզի անգործունեայ հրատարակիչներուն հոգ տարուի։—Նոյեմբեր 1987–ի Մեր Թագաւորութեան Ծառայութիւնը, էջ 1։

⁶ Քարտուղարին պարտականութիւններուն հանդէպ աւելի գնահատանք ունենալով, մեր կարելին ընենք որպէսզի կարենայ իր տնտեսութիւնը աւելի դիւրաւ կատարել։—Ա. Կորն. 4։2