Ճշգրիտ Տեղեկագրութեան մը կը Նպաստէ՞ք
1 Աստուածաշունչի բազմաթիւ դրուագներ որոշ թիւեր կը պարփակեն, որոնք տեղի ունեցածին մասին վառ պատկեր մը հաղորդելու կ’օգնեն։ Օրինակ, Գեդէօն Մադիամի բանակը նուաճեց միայն 300 մարդոցմով։ (Դատ. 7։7) Եհովայի հրեշտակը 185,000 Ասորի զինուոր սպաննեց։ (Դ. Թագ. 19։35) Հ.Դ. 33–ի Պէնտէկոստէին, շուրջ 3,000 հոգի մկրտուեցաւ, եւ անկէ քիչ ետք հաւատացեալներուն թիւը շուրջ 5,000 եղաւ։ (Գործք 2։41. 4։4) Այս դէպքերէն բացայայտ է թէ Աստուծոյ վաղեմի ծառաները շատ ջանք թափեցին որ լման ու ճշգրիտ արձանագրութիւն մը ապահովեն։
2 Ներկայիս Եհովայի կազմակերպութիւնը մեզի կը թելադրէ որ մեր դաշտի ծառայութեան գործունէութիւնը ամէն ամիս տեղեկագրենք։ Այս կարգադրութեան հետ հաւատարմօրէն համագործակցիլը, քարոզչութեան գործին վրայ ազդուօրէն վերահսկելու կը նպաստէ։ Տեղեկագրութիւններ կրնան երեւան հանել թէ ծառայութեան երեսակ մը ուշադրութեան կը կարօտի, կամ՝ թէ դաշտին կարգ մը մասերուն մէջ յաւելեալ մշակներու կարիքը կայ։ Ժողովքին մէջ, դաշտի ծառայութեան տեղեկագիրները երէցներուն կ’օգնեն որ իրենց ծառայութիւնը ընդարձակելու հնարաւորութիւն, ինչպէս նաեւ՝ օգնութեան կարիքը ունեցողները բնորոշեն։ Իսկ Թագաւորութեան քարոզչութեան յառաջդիմութեան մասին տեղեկագրութիւնը, ամբողջ քրիստոնէական եղբայրութեան քաջալերութիւն կը հայթայթէ։ Ճշգրիտ տեղեկագրութեան մը նպաստելու համար ձեր լաւագոյնը կ’ընէ՞ք։
3 Ձեր Անձնական Պատասխանատուութիւնը. Ամսուան վերջաւորութեան, դժուարութիւն կ’ունենա՞ք ծառայութեան մէջ ձեր իրագործած բաները յիշելու։ Եթէ այո, ինչո՞ւ զայն չարձանագրէք ամէն անգամ որ դաշտի ծառայութեան կը մասնակցիք։ Ոմանք օրացոյց կամ օրագիր կը գործածեն։ Ուրիշներ իրենց հետ դաշտի ծառայութեան պարապ տեղեկագիր մը կը կրեն։ Ամսուան վերջաւորութեան, ձեր տեղեկագիրը շուտով ձեր գրքի ուսումնասիրութեան տեսուչին տուէք։ Կամ, եթէ կը նախընտրէք, կրնաք ձեր տեղեկագիրը Թագաւորութեան Սրահին մէջ գտնուող տեղեկագիրներու տուփին մէջ դնել։ Եթէ ձեր տեղեկագիրը յանձնելու մոռնաք, շուտով շփման մէջ եկէք ձեր գրքի ուսումնասիրութեան տեսուչին հետ, փոխանակ սպասելու որ ան ձեզի մօտենայ։ Ձեր գործունէութիւնը խղճմտօրէն տեղեկագրելը Եհովայի կարգադրութեան հանդէպ յարգանք եւ տեղեկագիրները հաւաքելու ու գումարելու նշանակուած եղբայրներուն հանդէպ սիրալիր նկատառութիւն ցոյց կու տայ։—Ղուկ. 16։10
4 Գրքի Ուսումնասիրութեան Տեսուչին Դերը. Որպէս արդուն եւ ուշադիր հովիւ, գրքի ուսումնասիրութեան տեսուչը խումբին գործունէութեամբ կը հետաքրքրուի ամբողջ ամսուան ընթացքին։ (Առ. 27։23) Ան գիտէ թէ իւրաքանչիւր հրատարակիչ կանոնաւոր, իմաստալից եւ ուրախ մասնակցութիւն կը բերէ կամ ոչ, եւ արագօրէն օգնութիւն կը ներկայացնէ ոեւէ անհատի որ լման ամիս մը ծառայութեան չէ մասնակցած։ Յաճախ պէտք եղածը միայն քաջալերական խօսք մը, գործնական թելադրութիւն մը, կամ դաշտի ծառայութեան մէջ իրեն ընկերակցելու հրաւէր մըն է։
5 Ամսուան վերջաւորութեան, գրքի ուսումնասիրութեան տեսուչը վստահ կ’ըլլայ որ իր խումբին բոլոր անդամները իրենց գործունէութիւնը տեղեկագրելու պատասխանատուութիւնը կատարած են, որպէսզի քարտուղարը կարենայ ժողովքին ճշգրիտ տեղեկագրութիւնը մասնաճիւղի գրասենեակին ղրկել, յաջորդ ամսուան 6–րդ օրէն առաջ։ Մինչ ամսուան վերջաւորութիւնը կը մօտենայ, լաւ կ’ըլլայ եթէ ան խումբին յիշեցնէ եւ տեղեկագիրները մատչելի ընէ գրքի ուսումնասիրութեան վայրին մէջ։ Եթէ ոմանք իրենց գործունէութիւնը տեղեկագրելու նկատմամբ մոռացկոտ են, ան կրնայ պատշաճ վերյիշեցումներ ու քաջալերութիւն տալ։
6 Մեր դաշտի ծառայութեան տեղեկագիրները շուտով ներկայացնելը կը նպաստէ տեղեկագրութեան մը, որ ճշգրտօրէն կ’արտացոլացնէ դաշտին մէջ իրագործուած բաները։ Ձեզի ինկած բաժինը պիտի ընէ՞ք, ամէն ամիս ձեր գործունէութիւնը շուտով տեղեկագրելով։