Մեր Մեծ Ստեղծիչը Հոգածու Է Մեզի Հանդէպ
1 Երբ կը ջանար անհնազանդ Իսրայէլի հետ պատճառաբանել, Եհովա հարցուց. «Միթէ չգիտցա՞ր կամ չլսեցի՞ր թէ յաւիտենական Աստուածը՝ Եհովան, երկրի ծայրերուն ստեղծիչ»ն է։ (Եսայ. 40։28) Մենք կը ճանչնանք մեր հզօր Ստեղծիչը եւ կը զգանք իր սիրալիր հոգածութիւնը մեզի հանդէպ։ Թէպէտեւ միլիոնաւոր անհատներ կը կասկածին իր գոյութեան վրայ, կամ այնպիսի գաղափար մը ունին, որ երբեք չի յարմարիր Աստուածաշունչի մէջ իր մասին ըսուածներուն հետ։ Ինչպէ՞ս կրնանք օգնել անոնց։
2 Մեզի Հոգ Տանող Ստեղծիչ մը Կա՞յ նոր գիրքը, այսպիսի անհատներու օգնելու համար ծրագրուած է։ Ան կը հրաւիրէ խորհող անհատներ, որ իրողութիւնները քննելով տրամաբանեն։ Հետաքրքրական նիւթը եւ համոզիչ պատճառաբանութիւնները պիտի գրաւեն այս գիրքը կարդացող անհատները։
3 Լաւ Ընտելացէք Ստեղծիչ Գրքին Հետ. Անոր բովանդակութեան հիմնական ուրուագիծը ձեր միտքը թող ըլլայ։ 2-5–րդ գլուխները նկատի կ’առնեն թէ տիեզերքը, կեանքը եւ մարդը ի՛նչպէս գոյացան եւ ինչ բան պատճառեց զանոնք։ 6-9–րդ գլուխները կը հետազօտեն Աստուածաշունչը եւ անոր հեղինակը, յատկապէս՝ թէ արդեօք Ծննդոցի ստեղծագործութեան արձանագրութիւնը վստահելի՞ է թէ ոչ։ 10–րդ գլուխը գոհացուցիչ պատասխան մը կու տայ, մարդոց հարցուցած ամենախրթին հարցումին, որ է. «Եթէ Ստեղծիչը հոգածու է մեզի հանդէպ, ինչո՞ւ այսքան տառապանք կայ»։
4 Կասկած Ունեցող Անհատներու Հետ Փորձեցէք Պատճառաբանել. Ստեղծիչ գրքին 78-79–րդ էջերուն վրայ, շարք մը պատճառաբանութիւններ ներկայացուած են, զորս կրնաք գործածել ուրիշներուն օգնելու, որպէսզի Աստուծոյ առնչութեամբ շիտակ եզրակացութեան մը յանգին։ Հարցուցէք անոնց. «Արդեօք տիեզերքը սկիզբ մը ունեցա՞ծ է»։ Շատեր ասոր համաձայն պիտի գտնուին։ Եթէ այդպէս է, հարցուցէք. «Արդեօք այդ սկիզբը առանց որեւէ պատճառի է՞ր, թէ ոչ պատճառուած էր»։ Շատեր նշմարած են որ ան պատճառուած էր։ Ասիկա մեզ կ’առաջնորդէ եզրակացութեան յանգեցնող հարցումին. «Արդեօք տիեզերքի սկիզբը յաւիտենական եղող բանի՞ մը, թէ անձի մը միջոցաւ պատճառուեցաւ»։ Այս մօտեցումը կրնայ շատերուն առաջնորդել եզրակացնելու, թէ Ստեղծիչ մը գոյութիւն ունենալու է։
5 Մարդոցմէ շատեր ճիշդ այս Ստեղծիչ գրքին պէտք ունին։ Զայն բաժնեցէք ձեր ազգականներուն, գործընկերներուն, դասընկերներուն եւ ուրիշ ծանօթներուն հետ։ Զայն ձեզի հետ ծառայութեան տարէք, որպէսզի կարենաք ներկայացնել անոնց՝ որոնք կը կասկածին Աստուծոյ գոյութեան։ Որքան ծանօթանանք այս գրքին, այնքան աւելի պիտի զօրանայ մեր սէրը մեր Ստեղծիչին հանդէպ, մեզ մղելով որ շարունակենք իր բարձր չափանիշներուն համաձայն քալել։—Եփ. 5։1. Յայտ. 4։10