Ի՛նչ Բան Կրնայ Օգնել որ Հաւատքի Մէջ Հաստատ Մնանք
1 Եհովայի կազմակերպութեան հետ ընկերակցելէն ի վեր, մեր հոգեւոր յառաջդիմութիւնը մեզի համար ուրախութեան աղբիւր մը եղած է։ Սակայն, ‘արմատ կապելու, շինուելու ու հաւատքին մէջ հաստատուելու’ համար հոգեւոր յարատեւ աճումը անհրաժեշտ է։ (Կող. 2։6, 7) Մինչ մեծամասնութիւնը հոգեւորապէս բարգաւաճած են, ոմանք հոսանքէ քշուած են ‘հաւատքի մէջ հաստատ չկենալնուն’ պատճառաւ։ (Ա. Կորն. 16։13) Ասիկա մեզի չպատահելու համար, կրնանք անոր առաջքը առնել։ Ի՞նչպէս։
2 Հոգեւոր Յարատեւ Գործունէութիւն. Եհովայի կազմակերպութեան մէջ հոգեւոր լաւ սովորութիւն մը հաստատեցէք։ Հո՛ն է որ մեր հոգեւոր կարիքները առատօրէն կը հոգացուին։ Ժողովքային հանդիպումներն ու համաժողովները մեզ կը խթանեն որ հոգեւորապէս աւելի աճինք եւ հաստատուինք, պայմանաւ որ միշտ ներկայ ըլլանք, անոնցմէ օգտուելու համար։ (Եբր. 10։24, 25) Աստուածաշունչը, Դիտարան ու Զարթի՛ր պարբերաթերթերը եւ Աստուծոյ Խօսքին հաստատուն կերակուրը քննարկող գրքերը կարդալու կանոնաւոր սովորութիւնը, պատճառ պիտի ըլլայ որ մեր հոգեւոր արմատները խորանան եւ զօրանան։ (Եբր. 5։14) Անձնական հոգեւոր նպատակակէտեր դնելը ու ժրաջանօրէն անոնց վրայ աշխատիլն ալ մնայուն օգուտներ պիտի բերէ։—Փիլ. 3։16
3 Օգնութիւն՝ Հասուն Անհատներէ. Ջանացէք ժողովքին մէջի հասուն անհատներու հետ ձեր ընկերակցութիւնը ընդլայնել։ Երէցները մօտէն ճանչցէք, քանի որ գլխաւորաբար անո՛նք են որ կրնան մեզ զօրացնել։ (Ա. Թես. 2։11, 12) Անոնց մատուցած որեւէ խրատը կամ թելադրութիւնը ընդունեցէք։ (Եփ. 4։11-16) Օգնական ծառաներն ալ հետաքրքրուած են ուրիշներուն օգնելով որ հաւատքին մէջ հաստատուին, ուստի քաջալերութեան համար այս եղբայրներուն ալ դիմեցէք։
4 Ծառայութեան մէջ օգնութեան կարի՞քը ունիք։ Երէցներուն խօսեցէք եւ օգնութիւն խնդրեցէք։ Թերեւս դուք ալ պարփակուիք Ռահվիրաները Ուրիշներուն կ’Օգնեն յայտագրին մէջ։ Նո՞ր մկրտուած անհատ մըն էք։ Մեր Ծառայութիւնը գիրքը ուսումնասիրելը եւ անոր պարունակութիւնը կիրարկելը դէպի հոգեւոր հասունութիւն ձեր յառաջդիմութեան պիտի նպաստէ։ Ծնո՞ղ մըն էք։ Շարունակաբար զօրացուցէք ձեր զաւակներուն հոգեւորականութիւնը։—Եփ. 6։4
5 Հաւատքին մէջ արմատանալով եւ հաստատուելով, Եհովայի հետ սերտ յարաբերութիւն մը եւ մեր եղբայրներուն հետ ջերմ ընկերակցութիւն կրնանք վայելել։ Ասիկա Սատանայի յարձակումներուն դէմ դնելու կարող կը դարձնէ մեզ, եւ յաւիտենական ապագայի մը համար մեր յոյսը կը զօրացնէ։—Ա. Պետ. 5։9, 10