Պատանիներուն Օգտակար Եղող Ժողովներ

¹ Պատանուհի մը ըսաւ. «Երբեմն կը խորհիմ որ պատանիները կեանքի ամենէն դժուար պայմաններու մէջ կ’ապրին։ Մեր շուրջը կը գտնուին անհատներ, որոնք պոռնկութիւն կը գործեն, թմրեցուցիչ եւ խմիչք կը գործածեն»։ Դուք ալ նոյնպէս կը զգա՞ք։ Եթէ այո, ըստ ձեզի ի՞նչ բան կրնայ օգնել որ այս վատ ազդեցութիւններուն դէմ պայքարիք։ Հաւա՛տքի կարիքը ունիք. Եհովայի ճամբաներուն շիտակ ըլլալուն նկատմամբ զօրաւո՛ր հաւատք, քանի որ առանց ատոր «անհնար է Աստուծոյ հաճելի ըլլալ»։ (Եբր. 11։6) Ժողովքային հանդիպումներուն ներկայ գտնուիլը պիտի օգնէ, որ ձեր քրիստոնէական համոզումները եւ չարէն խուսափելու ձեր վճռակամութիւնը զօրացնէք։

² Ժողովները Ձեզի Շատ Բան Ունին Մատուցանելիք. Ի՞նչ բան մտերիմ բարեկամներուն հետ ճաշելը հաճելի կը դարձնէ։ Անիկա սննդարար ճաշը եւ հանդարտ միջավայրի մը մէջ հաճելի ընկերակցութիւնը չէ՞։ Մեր ժողովները միեւնոյն հաճելի փորձառութիւնը կը հրամցնեն, սակայն հոգեւոր առումով։

³ Ժողովներուն քննարկուած նիւթերը կերտիչ են ու կը պարփակեն կեանքի առօրեայ խնդիրներուն հետ ի՛նչպէս գլուխ ելլելու նիւթէն, մինչեւ Աստուածաշունչի սքանչելի մարգարէութիւններուն ուսումնասիրութիւնը։ Գործնական հրահանգներ կը ներկայացուին, որոնք ձեզի կ’օգնեն լաւագոյն ապրելակերպը ունենալու եւ մարտահրաւէրները յաղթահարելու։ Լաւագոյն ընկերակիցները ժողովներուն մէջ կը գտնենք, իսկ հոգեւոր միջավայրը հաճելի եւ ապահով է։ (Սաղմ. 133։1) Զարմանալի չէ որ պատանի մը ըսաւ. «Օրս ամբողջ դպրոցը կ’անցընեմ եւ ասիկա զիս կը մաշեցնէ։ Սակայն ժողովները անապատի մէջ գտնուող ովասիսի մը նման են, որ զիս կը թարմացնեն, որպէսզի յաջորդ օրը կարենամ դարձեալ դպրոց երթալ»։ Ուրիշ մը ըսաւ. «Նկատած եմ թէ Եհովան սիրողներուն հետ սերտ յարաբերութիւնը կ’օգնէ որ Իրեն մօտիկ մնամ»։

⁴ Աստուածպետական Ծառայութեան Դպրոցին մէջ ելոյթներ ունենալով, կը սորվիք սուրբ գրային տեղեկութիւններ հաւաքել, զանոնք դասախօսութեան մը վերածել, ապա զայն խօսակցական ոճով ներկայացնել Թագաւորութեան Սրահին մէջ գտնուող հանդիսականներուն։ Աստուծոյ Խօսքին կենարար ճշմարտութիւնները հմտօրէն սորվեցնելու մարզումէն քաղուած օգուտը երեւակայեցէ՛ք։ Պատանիները ուրիշ ո՞ւր կրնան այսպիսի արժէքաւոր մարզում ստանալ։

⁵ Ի՞նչպէս Կրնանք Ժողովներէն Լաւագոյնս Օգտուիլ. Ժողովներէն լաւագոյնս օգտուելու համար, երեք կենսական բաներ պարփակուած են՝ պատրաստութիւն, մասնակցութիւն, եւ գործադրութիւն։

⁶ Անոնց Համար Պատրաստուեցէք. Կանոնաւորաբար ժամանակ յատկացուցէք ժողովներու պատրաստութեան համար։ Թոյլ մի՛ տաք որ դպրոցական պարտականութիւնները, մասնակի ժամանակով գործը կամ զբօսանքը, ձեզմէ խլեն այն ժամանակը որու կարիքը ունիք, իւրաքանչիւր ժողովին նկատի առնուելիք նիւթը նախապէս վերաքաղ ընելու համար։ Լաւ սովորութիւն մը ունենալը օգտակար է։ Աստուածպետական Ծառայութեան Դպրոցին մէջի Աստուածաշունչի շաբաթական ընթերցանութեան յայտագրին հետ քայլ պահելը առաջնակարգ եւ ամենէն կարեւոր բանը պէտք է ըլլայ։ Նշանակուած գլուխները ամէն օր կարդալը եւ անոնց մասին խոկալը, միայն քանի մը վայրկեան կ’առնէ։ Ժամանակ յատկացուցէք Ժողովքի Գրքի Ուսումնասիրութիւնը եւ Դիտարան–ի Ուսումնասիրութիւնը պատրաստելու համար։ Ոմանք ասիկա կ’ընեն այս ժողովներէն առնուազն մէկ կամ երկու օր առաջ։ Կարելի եղածին չափ, նոյն բանը ըրէք այդ շաբթուան Ծառայութեան Ժողովին մէջ յայտագրուած բաժիններուն նկատմամբ։

⁷ Անոնց Մասնակցեցէք. Աստուածաշունչը կ’ըսէ թէ Յիսուս 12 տարեկանին տաճարին մէջ գտան, ուր մտիկ կ’ընէր, հարցումներ կը հարցնէր եւ պատասխաններ կու տար։ (Ղուկ. 2։46, 47) Ուրիշ խօսքով, ան ամբողջովին անոնցմով կլանուած էր։ Ժողովներէն աւելի պիտի օգտուիք եթէ անոնց մասնակցելու ջանք թափէք։—Առ. 15։23

⁸ Պէտք է ձեր միտքը կեդրոնացած պահէք ժողովներուն ուսուցուած բաներուն վրայ։ Երբեմն դասախօսութեան մտիկ ընելը զայն ներկայացնելէն աւելի դժուար է։ Ինչո՞ւ։ Քանի որ մեր միտքը կրնայ թափառիլ երբ ուրիշ մը կը խօսի։ Ի՞նչպէս կրնաք ասոր դէմ պայքարիլ։ Նո՛թեր առնելով։ Հակիրճ նոթեր առէք կարեւոր կէտերու մասին, որոնք հետագային կը փափաքիք գործածել։ Նոթեր առնելը պիտի օգնէ ձեզի որ ձեր միտքը յայտագրին վրայ կեդրոնացնէք։ Նաեւ, համարները բացէք, եւ դասախօսին հետեւեցէք, մինչ զանոնք կը կարդայ։

⁹ Ասկէ զատ, նպատակակէտ դրէք ժողովներուն հարց պատասխանով նկատի առնուած նիւթերուն մասնակցիլ։ Իսկ եթէ ձեր պատասխաններուն մասին մտածէք, աւելի պիտի օգտուիք։ Առակաց 15։28–ը կ’ըսէ. «Արդարին սիրտը տրուելիք պատասխանին վրայ կը մտածէ»։

¹⁰ Ձեր Սորվածը Գործադրեցէք. Իսկ վերջին քայլը՝ վստահ եղէք որ ձեր սորվածը «կը ներգործէ ձեր մէջ»։ (Ա. Թես. 2։13) Երբ իւրաքանչիւր ժողովին ձեր սորված լաւ կէտերը կը գործադրէք, Եհովա Աստուծոյ աւելի պիտի մօտենաք։ Ան ձեզի համար իրական պիտի ըլլայ եւ մեծապէս պիտի ուրախանաք ու գոհունակութիւն պիտի վայելէք, մինչ ‘ճշմարտութեան մէջ կը քալէք’՝ զայն իւրացնելով։—Գ. Յովհ. 4

¹¹ Ո՛վ պատանի եղբայրներ ու քոյրեր, երբ կանոնաւորաբար ժողովները պատրաստէք, անոնց մասնակցիք, եւ ձեր սորվածը գործադրէք, ժողովներէն ի՛րապէս հաճոյք պիտի առնէք։ Միեւնոյն ատեն, անոնցմէ լիովին պիտի օգտուիք։ Ձեր հաւատքը, ինչպէս նաեւ ձեր երկնաւոր Հօր՝ Եհովայի՝ հաւատարիմ մնալու ձեր վճռակամութիւնը, պիտի զօրանան։—Սաղմ. 145։18