Ընթացիկ Իրադարձութիւններ Գործածեցէք՝ Հետաքրքրութիւն Արթնցնելու Համար

¹ Կը փափաքի՞ք շարունակ լաւ գաղափարներ ունենալ, ձեր ծառայութիւնը թարմ պահելու եւ Աստուածաշունչի պատգամին հանդէպ մարդոց հետաքրքրութիւնը արթնցնելու համար։ Եթէ այս է պարագան, աշխարհի թատերաբեմին վրայ եւ ձեր համայնքին մէջ պատահած իրադարձութիւնները գործածեցէք, խօսակցութիւններ սկսելու համար։ Կրնաք տեղական եւ ազգային ընթացիկ դէպքեր, կամ միջազգային լուրեր գործածել։ Անոնք յարատեւ փոփոխութեան մէջ են։ (Ա. Կորն. 7։31) Նկատի առէք հետեւեալ օրինակները։

² Տնտեսական խնդիրները եւ ապրուստ ճարելը ժողովուրդին իսկական մտահոգութիւններն են։ Հետեւաբար, կրնաք ըսել.

◼ «Լուրերէն լսեցի՞ք թէ [յիշեցէք լուրը] գիները դարձեալ կը բարձրանան»։ Կամ, կրնաք անգործութեան մասին խօսիլ, եթէ հսկայ հաստատութիւն մը իր գործաւորներէն շատերը գործէն արձակած է։ Կախեալ է թէ ձեր խօսակցութիւնը ի՛նչպէս կ’ուզէք շարունակել, անոր համեմատ կրնաք հարցնել՝ «Երբեք հարց տուա՞ծ էք թէ ապրուստ ճարելը ինչո՛ւ դժուար եղած է», կամ՝ «Կը խորհի՞ք որ մի՛շտ դժուար պիտի ըլլայ ծայրը ծայրին հասցնել»։

³ Բռնարարքի տեղեկագրութիւններ, ինչպէս՝ ընտանիքներու մէջ կամ դպրոցականներու մէջ պատահած ողբերգութիւններ, այլ խօսակցութիւններու հիմը կը հայթայթեն։ Կրնաք հարցնել.

◼ «Օրաթերթին մէջ այդ [յիշեցէք համայնքին մէջ պատահած ողբերգութիւնը] մասին կարդացի՞ք»։ Ապա հարցուցէք՝ «Ըստ ձեզի, աշխարհի մէջ ա՛յսքան շատ բռնութեան պատճառը ի՞նչ է», կամ՝ «Կը խորհի՞ք թէ պիտի գայ օր մը երբ պիտի կարենանք ապահով զգալ»։

⁴ Աշխարհի զանազան շրջաններու մէջ կործանարար ջրհեղեղներու, երկրաշարժներու, կամ քաղաքացիական խռովութիւններու լուրերն ալ հետաքրքրութիւն արթնցնող նիւթեր կը ներկայացնեն։ Զոր օրինակ, կրնաք հարցնել.

◼ «Արդեօք Աստուա՞ծ է պատասխանատուն [յիշեցէք բնական աղէտ մը]»։ Կամ՝ կրնաք վերջերս բռնկած քաղաքացիական խռովութեան ակնարկել եւ ըսել. «Եթէ ամէն անհատ խաղաղութիւն կ’ուզէ, ինչո՞ւ զայն իրագործելը ա՛յսքան դժուար է»։

⁵ Արթուն եղէք այն ընթացիկ իրադարձութիւններուն նկատմամբ, որոնք ձեր բացումներուն մէջ կրնաք գործածել։ Օգտակար թելադրութիւններ կը գտնուին՝ Պատճառաբանել գրքին էջ 10-11–ի մէջ, «Ընթացիկ Իրադարձութիւններ» ենթագլուխին ներքեւ։ Սակայն, քաղաքական կամ ընկերային հարցերու մէջ դիրքորոշումէ խուսափեցէք։ Փոխարէն, ուշադրութիւնը ուղղեցէք Սուրբ Գրութիւններուն եւ Աստուծոյ Թագաւորութեան, որպէս մարդկութեան խնդիրներուն միակ մնայուն լուծումը։