Աստուծոյ Սքանչելի Գործերուն Ուշադիր Ըլլանք
1 Երեք հոյակապ օրեր, «Աստուծոյ Խօսքը Կատարողներ» Նահանգային Համաժողովին համար իրարու քով հաւաքուեցանք։ Մեր ուշադրութիւնը առօրեայ մտահոգութիւններէն հեռացնելով, Եհովայի սքանչելի գործերուն վրայ կեդրոնացուցինք։ Այս յայտագրին նպատակն էր Աստուծոյ ու իր Խօսքին հանդէպ մեր հաւատքը աւելցնել, իր հետ մեր յարաբերութիւնը զօրացնել եւ ծառայութեան հանդէպ մեր եռանդը աւելցնել։ Մեր սորվածներէն ի՞նչպէս կ’օգտուինք։—Յովհ. 13։17
2 Աստուծոյ Խօսքին Հնազանդող Ընտանիքներ. «Աստուծոյ Խօսքին Հնազանդեցէք» բնաբանով յօդուածաշարքը, մեզի օգնեց մեր ընտանիքին հոգեւոր վիճակը քննելու։ Երախաներ կը սիրեն սորվիլ։ Հետեւաբար, բարեպաշտ ծնողներու քաջալերութիւն տրուեցաւ որ Աստուածաշունչի ընտանեկան ուսումնասիրութիւնը, հոգեւորապէս զօրաւոր ընտանիք մը կերտելու հիմը դարձնեն։ Շատ մը ընտանիքի գլուխներ, իրենց երախաներուն հետ Աստուծոյ Բարեկամը Կրնա՛ք Ըլլալ խորագրով նոր գրքոյկը նկատի կ’առնեն։ Ասիկա պիտի օգնէ անոնց, որ Եհովայի հետ ուրախ եւ ապահով յարաբերութիւն մը մշակեն։ Ո՛վ ծնողներ, ձեր զաւակներուն սորվեցուցէք թէ ի՛նչպէս Աստուծոյ զգացումներուն հանդէպ նկատառու ըլլան։ Իրեն եւ իր բարերարութիւններուն հանդէպ ձեր սէրը արտայայտեցէք։ (Սաղմ. 103։2) Հոգեւոր նպատակակէտեր որոշելու ու անոնց հասնելու, ինչպէս նաեւ Եհովայի ծառայութեան մէջ լիարժէք մասնակցութիւն բերելու համար, միասնաբար աշխատեցէք։
3 Աստուծոյ Խօսքը Մեր Ճամբան կը Լուսաւորէ. Եսայիի Մարգարէութիւնը—Լոյս՝ Ամբողջ Մարդկութեան Համար, Հատոր Ա. նոր գիրքը ստանալով հրճուեցանք։ Այս առաջին հատորին ընթերցանութեան մէջ ո՞ւր հասաք։ Եսայեայ գիրքը կը նախագուշակէ անաստուած ազգերուն վրայ գալիք ահաւոր դատաստաններ, ինչպէս նաեւ՝ Աստուծոյ ժողովուրդին համար Թագաւորութեան պայծառ օրհնութիւններ։ (Եսայ. 34։2. 35։10) Անիկա նաեւ Եհովայի եւ իր գործելակերպին հանդէպ հաւատք եւ վստահութիւն կը կերտէ։—Եսայ. 12։2-5
4 Եսայիի Մարգարէութիւնը՝ Հատոր Ա.–ը կարդալով, կրնաք անոր սկիզբէն իսկ նկատել, թէ ինչպէս Եսայի Եհովայի հանդէպ իր ուղղամտութիւնը պահեց, մինչ ամբարշտութեամբ շրջապատուած էր։ Երբ Աստուծոյ պատգամաբերը ըլլալու հրաւէրը ստացաւ, ան պատասխանեց. «Ահաւասիկ ես. զի՛ս ղրկէ»։ (Եսայ. 6։8) Անոր պատրաստակամ հոգիին մասին խորհրդածելը, ձեզ պիտի քաջալերէ որ շարունակէք բարի լուրը քարոզել, «բոլոր ազգերուն վկայութիւն» տալու մէջ լման մասնակցութիւն բերելով։—Մատթ. 24։14
5 Եհովայի գործերուն ուշադրութիւն ընծայելը, իր վեհութիւնը պիտի մեծարէ։ Ուստի Աստուծոյ Խօսքը կատարողներ ըլլալու առանձնաշնորհումին վրայ գուրգուրացէք։