Կրնա՞ք Ծառայել Հո՛ն Ուր Աւելի Մեծ Կարիք Կայ

¹ Բնաւ խորհա՞ծ էք փոխադրուիլ հո՛ն՝ ուր Թագաւորութիւնը ծանուցանողներու աւելի մեծ կարիքը կայ։ Եթէ ձեզի հոն ‘անցնելու եւ օգնելու’ հրաւէր տրուէր, Պօղոս առաքեալի նման պիտի ընդառաջէի՞ք։ (Գործք 16։9, 10) Շատ մը ժողովքներու մէջ հոգեւորապէս հասուն ընտանիքներու, թաղամասեր ծածկող ռահվիրաներու, կամ առաջնորդութիւնը առնող որակելի երէցներու եւ օգնական ծառաներու կարիքը կայ։ Թաղամասը թերեւս կազմուած ըլլայ փոքր ու մեկուսացած գիւղաքաղաքներէ, որոնք ցրուած են գիւղական ընդարձակ շրջաններու մէջ։ Ամենամօտ Թագաւորութեան Սրահը կրնայ քիլոմեթրներ հեռու ըլլալ։ Աշխարհային գործ մը գտնելը կրնայ դժուար ըլլալ։ Օդը միշտ ալ նպաստաւոր կրնայ չըլլալ։ Այսպիսի մարտահրաւէր մը ստանձնելու յօժա՞ր էք։ Ի՞նչպէս կրնաք այսպիսի ծրագիր մը յաջողցնել։

² Հաւատքի ու Վստահութեան Կարիքը Կայ. Աստուծմէ ուղղութիւն ստանալով, Աբրամ իր ծննդավայրը՝ Ուրը՝ ձգեց եւ 1,000 քիլոմեթր ճամբորդելով Խարան գնաց, իր կնոջ, զարմիկին ու տարեց հօր՝ Թարայի հետ։ (Ծննդ. 11։31, 32. Նէեմ. 9։7) Թարայի մահէն ետք, երբ Աբրամ 75 տարեկան էր, Եհովա անոր պատուիրեց որ Խառանէն ու իր ազգականներուն քովէն ելլէր ու երթար երկիր մը զոր Աստուած իրեն ցոյց պիտի տար։ Աբրամ, Սարա եւ Ղովտ «ելան»։ (Ծննդ. 12։1, 4, 5) Անշուշտ, Աբրամ չփոխադրուեցաւ ծառայելու համար հոն ուր քարոզիչներու աւելի մեծ կարիքը կար։ Սակայն, իր փոխադրութիւնը բան մը պահանջեց։ Ի՞նչ էր անիկա։

³ Այսպիսի քայլ մը առնելը Աբրամի կողմէ հաւատք եւ վստահութիւն պահանջեց։ Իր մտածելակերպն ու ապրելակերպը պէտք էր փոխէր։ Ան իր ազգականներուն մօտ ըլլալու ապահով վիճակէն պէտք էր հրաժարէր։ Սակայն ան Եհովայի վստահեցաւ որ իրեն եւ իր ընտանիքին հոգ տանէր։ Ներկայիս շատեր նոյն կերպով Եհովայի հանդէպ իրենց վստահութիւնը ցուցաբերած են։

⁴ Կարճատեւ Նշանակումներ. Չնշանակուած թաղամասեր աշխատելէն յառաջ եկած ճոխ օրհնութիւնները բնաւ վայելա՞ծ էք։ Անցեալ տարի, 48 նահանգներու մէջ, 5,699 հրատարակիչներ 174 չնշանակուած թաղամասերէն 163–ը ծածկեցին։ 5,676 այլ հրատարակիչներ, 380 ժողովքներու օգնեցին հազուադէպօրէն աշխատցուած թաղամասերը ծածկելու։ Ոմանց համար, ասիկա հեռու տեղեր ճամբորդել նշանակեց։ Այս թափուած ջանքերը արժէք մը ներկայացուցի՞ն։

⁵ Քալիֆորնիայէն եղբայր մը՝ որ Եութահ գացած էր՝ գրեց. «Երբ առաջին անգամ ինծմէ խնդրուեցաւ որ խումբ մը հազուադէպօրէն աշխատցուած թաղամաս մը առաջնորդեմ, քիչ մը վարանեցայ։ Սակայն, որոշեցի նշանակումը ընդունիլ։ Ո՛չ միայն չզղջացի, այլ անիկա իմ կեանքս փոխեց։ Ամէն օր Եհովայի կ’աղօթեմ այդ ճամբորդութեան մասնակցած ըլլալու առանձնաշնորհումին համար»։ Ֆլորիտայէն եղբայր մը, որ Թէնըսի գնաց, ըսաւ թէ անիկա ճշմարտութեան մէջ 20 տարուան իր փորձառութեան ամենէն յիշատակելին էր։ Գընէթիքաթէն պատանի մը որ Ուէսթ Վըրճինիա գնաց, ըսաւ. «Ասիկա կեանքիս լաւագոյն փորձառութիւնը եղաւ»։ Հրատարակիչներէն շատեր կը համաձայնին թէ նոյնիսկ կարճ ժամանակուան մը համար աւելի մեծ կարիք ունեցող շրջանի մը մէջ ծառայելը, ծառայութեան հանդէպ իրենց գնահատութիւնը խորացուցած է։ Այս քայլը առած անհատներուն հետ խօսեցէք։ Պիտի տեսնէք թէ անոնք հոգեւորապէս ոգեւորուած են եւ կը փափաքին զայն կրկնել, եթէ առիթը տրուի իրենց։

⁶ Աւելի մեծ կարիք ունեցող շրջանի մը մէջ ծառայելու համար ժամանակաւոր նշանակում մը ընդունիլը, ուրիշ նպատակի ալ կը ծառայէ։ Այսպէս ընողները կրնան օգտակար տեղեկութիւններ ձեռք ձգել, որոնք կ’օգնեն երկրին ուրիշ մէկ շրջանը փոխադրուելուն ‘ծախքը հաշիւ ընելու’։—Ղուկ. 14։28

⁷ Եհովա վճռած է որ բարի լուրը ‘բովանդակ աշխարհի մէջ քարոզուի’, վերջը չեկած։ (Մատթ. 24։14) Ասոր գիտակցելով, եթէ կարող էք, յօժա՞ր էք փոխադրուիլ հոն ուր աւելի մեծ կարիք կայ։ Բազմաթիւ շրջաններու մէջ այս կարիքը առկայ է։

⁸ Փոխադրուիլ Հոն Ուր Աւելի Մեծ Կարիք Կայ. Թոշակառո՞ւ մըն էք։ Հաստատ եկամուտ մը ունի՞ք։ Եթէ ոչ, կրնա՞ք անձնական գործ մը ընել։ Կրնա՞ք որեւէ տեղ ապրելով՝ հեռաձայնը կամ համակարգիչը գործածելով ձեր եկամուտը ապահովել։ Եթէ չէք կրնար փոխադրուիլ, կրնա՞ք ձեր ընտանիքի մէկ անդամին օգնել որ ուրիշ շրջանի մը մէջ ծառայէ։

⁹ Աղօթքով նկատի առնելէ ետք, եթէ տեսնէք որ կրնաք աւելի մեծ կարիք ունեցող շրջան մը փոխադրուելու մարտահրաւէրը ընդունիլ, հարցը քննեցէք ձեր ընտանիքին եւ ժողովքի երէցներուն հետ։ Ապա, նամակ մը պատրաստեցէք եւ զայն երէցներուն տուէք, որպէսզի իրենք ալ իրենց դիտարկութիւնները եւ յանձնարարութիւնները պարփակեն, զայն մասնաճիւղի գրասենեակ ուղարկելէ առաջ։

¹⁰ Նամակին մէջ ի՞նչ պէտք է ներառէք։ Ձեր տարիքը, մկրտութեան թուականը, ժողովքին մէջ ձեր պատասխանատուութիւնները, ամուրի կամ ամուսնացած ըլլալը եւ եթէ անչափահաս զաւակներ ունիք։ Յիշեցէք այն նահանգները ուր կը նախընտրէք ծառայել, ձեր անհատական կարիքներուն համաձայն։ Օրինակ, տաք եւ խոնա՞ւ շրջաններու մէջ կրնա՞ք ապրիլ։ Կրնա՞ք ցուրտ ձմրան տոկալ։ Կրնա՞ք լեռնային շրջաններու մէջ ապրիլ։ Օտար լեզու մը կը խօսի՞ք։

¹¹ Եռանդ եւ նախաձեռնութիւն ունի՞ք։ Ձեր պարագաները կը ներե՞ն որ ծառայէք հոն ուր աւելի մեծ կարիք կայ։ Եթէ այո, այն ատեն տեսէք թէ Եհովա ի՛նչպէս շարունակաբար ճոխ օրհնութիւններ կը տեղացնէ անոնց վրայ, որոնք իրեն կ’ապաւինին՝ անձնազոհ հոգի ցուցաբերելով։—Սաղմ. 34։8. Մաղ. 3։10