Վերայցելութիւնները Աստուածաշունչի Ուսումնասիրութիւններու կ’Առաջնորդեն

1. Վերայցելութիւններ ընելը ինչո՞ւ շատ կարեւոր է։

¹ Յիսուս իր հետեւորդներուն յանձնարարեց ո՛չ միայն քարոզել, այլ նաեւ՝ ‘աշակերտել եւ սորվեցնել’։ (Մատթ. 28։19, 20) Քարոզիչ մը կը ծանուցանէ, բայց ուսուցիչ մը ասկէ աւելին կ’ընէ։ Ան կը սորվեցնէ, կը բացատրէ եւ փաստեր կը ներկայացնէ։ Ուրիշներուն սորվեցնելու կերպերէն մէկն է՝ հետաքրքրուած անհատներու վերայցելել, անոնց հետ Աստուածաշունչի ուսումնասիրութիւններ սկսելու միտումով։

2. Որո՞նց պէտք է վերայցելենք։

² Որո՞նց պէտք է վերայցելէք։ Վստահ եղէք վերայցելելու բոլոր անոնց, որոնք գրականութիւն կ’ընդունին կամ բարի լուրին հանդէպ նոյնիսկ քիչ մը հետաքրքրութիւն կը ցուցաբերեն։ Եթէ հանրային վայրի մը մէջ վկայելու ատեն հետաքրքրութիւն գտնէք, փորձեցէք անհատին հասցէն կամ հեռաձայնի թիւը ձեռք ձգել, որպէսզի կարենաք հետաքրքրութիւնը մշակել։ Աստուածաշունչի ուսումնասիրութիւններ սկսելու նկատմամբ լաւատես եղէք։ Շարունակեցէք փնտռել զանոնք, որոնք Աստուածաշունչը ուսումնասիրելու առաջարկը պիտի ընդունին, եւ շատ հաւանաբար պիտի գտնէք զանոնք։—Մատթ. 10։11

3, 4. Ազդու վերայցելութիւններ ընելը ի՞նչ կը պարփակէ։

³ Անձնական Հետաքրքրութիւն Ցուցաբերեցէք. Ազդու վերայցելութեան մը համար պատրաստութիւնը կը սկսի առաջին հանդիպումին։ Յաջողակ աւետարանիչներ տանտէրը հետաքրքրած նիւթը կը նոթագրեն, եւ զայն կը գործածեն որպէս հիմ յաւելեալ խօսակցութիւններու համար։ Ոմանք այցելութեան վերջաւորութեան հարցում մը հարցնելը օգտակար գտած են, յաջորդ այցելութեան հանդէպ տանտիրոջ հետաքրքրութիւնը սրելու համար։ Մարդոց հանդէպ մեր անկեղծ հետաքրքրութեան պատճառաւ անոնց մասին կը մտածենք նոյնիսկ իրենց դրան առջեւէն հեռանալէ ետք, եւ կ’ուզենք անյապաղ իրենց վերայցելել։ Եթէ կարելի է, ջանացէք վերայցելել մինչ հետաքրքրութիւնը տակաւին վառ է, թերեւս մէկ կամ երկու օր ետք։

⁴ Երբ կը վերայցելէք, ջանացէք նախկին խօսակցութեան հիման վրայ նիւթը զարգացնել։ Նպատակակէտ դրէք՝ ամէն անգամ առնուազն սուրբ գրային շինիչ մէ՛կ կէտ բաժնել, եւ պատրաստ եղէք մտիկ ընելու։ Տանտիրոջ աւելի մօտէն ծանօթացէք։ Ապա, հետագայ այցելութիւններու ընթացքին, անոր հետ բաժնեցէք Աստուծոյ Խօսքէն այն ճշմարտութիւնները, որոնք ուղղակիօրէն առնչուած են իր մտահոգութիւններուն հետ։

5. Աստուածաշունչի ուսումնասիրութիւններ սկսելու համար, ո՞ր պարզ մօտեցումը կրնայ գործածուիլ։

⁵ Աստուածաշունչի Ուսումնասիրութիւններ Սկսելու Պատեհութիւններուն Նկատմամբ Արթուն Եղէք. Վերայցելութիւններ ըրէք Աստուածաշունչի ուսումնասիրութիւն մը սկսելու նպատակով։ Ասիկա ի՞նչպէս կրնաք ընել։ Ըսէք թէ կը փափաքիք հետաքրքրական կէտ մը բաժնել, ապա բացէք Գիտութիւն գրքէն կամ Ի՛նչ կը Պահանջէ գրքոյկէն պարբերութիւն մը, որ կը խորհիք անհատին սրտին պիտի խօսի։ Պարբերութիւնը կարդացէք, հարցումը նկատի առէք, եւ մէկ կամ երկու նշուած համարներու մասին խօսեցէք։ Ասիկա կրնաք ընել ուղղակի դրան սեմին, գործածելով 5-10 վայրկեան։ Եզրափակեցէք յաջորդ հարցումը հարցնելով եւ խօսակցութիւնը ուրիշ անգամ շարունակելու համար կարգադրութիւններ ընելով։

6. Ի՞նչպէս կրնանք ցոյց տալ թէ կը գիտակցինք որ վերայցելութիւններ ընելը կարեւոր է։

⁶ Մեր ծառայութեան կենսական մէկ երեսակն է՝ մշակել ամէն հետաքրքրութիւն որ կը գտնենք։ Հետեւաբար, ձեր շաբաթական յայտագրին մէջ ժամանակ յատկացուցէք վերայցելութիւններ ընելու համար։ Ասիկա ձեր ծառայութեան ազդուութիւնը պիտի աւելցնէ եւ իսկական ուրախութիւն պիտի բերէ։