Համարձակութիւն Ունեցէք Վերայցելութիւններ Ընելու

¹ Վերայցելութիւններ ընելէ հաճոյք կ’առնէ՞ք։ Հրատարակիչներէն շատեր այո կը պատասխանեն։ Թերեւս սկիզբը երկչոտ էիք, մանաւանդ երբ կը վերայցելէիք այն տանտէրներուն որոնք առաջին հանդիպումին քիչ հետաքրքրութիւն ցուցաբերեցին։ Սակայն, մինչ ‘Աստուծոյ միջոցաւ բարի լուրը խօսելու համարձակութիւն ձեռք կը ձգէք’, թերեւս զարմանաք, գիտնալով թէ այս գործը որքա՜ն դիւրին ու վարձահատոյց կրնայ ըլլալ։ (Ա. Թես. 2։2) Ի՞նչպէս։

² Իրականութեան մէջ, մեծ տարբերութիւն մը կայ վերայցելութեան եւ առաջին հանդիպումին միջեւ։ Վերայցելութիւնը կ’ընենք ծանօթի մը եւ ոչ՝ օտարի, իսկ ընդհանուր առմամբ աւելի դիւրին է ծանօթի մը հետ խօսիլ քան՝ օտարի։ Իսկ գալով ծառայութեան այս երեսակին մասնակցելէն յառաջ եկած ճոխ վարձատրութիւններուն, վերայցելութիւնները կրնան տան սուրբ գրային արդիւնաբեր ուսումնասիրութիւններու առաջնորդել։

³ Երբ տունէ տուն կը քարոզենք, կրկնակիօրէն կը հանդիպինք մարդոց, որոնք հետաքրքրուած չէին երբ նախապէս իրենց այցելեցինք։ Սակայն, ինչո՞ւ կը շարունակենք անոնց այցելել։ Կը գիտակցինք որ մարդոց պարագաները կը փոխուին եւ անհատ մը որ նախապէս անտարբեր կը թուէր, կամ նոյնիսկ կը հակառակէր, կրնայ հետաքրքրուիլ յաջորդ այցելութեան։ Ասիկա ի մտի ունենալով, լաւ կը պատրաստուինք ու Եհովայի օրհնութիւնը կը խնդրենք, որպէսզի այս անգամ մեր ըսածը անհատին սրտին հասնի ու դրականօրէն ընդառաջէ։

⁴ Եթէ, տունէ–տուն մեր քարոզչութեան մէջ, յօժարակամօրէն կը քարոզենք նախապէս որեւէ հետաքրքրութիւն չցուցաբերած անհատներու, աւելի յօժարակամ պէտք չէ՞ ըլլանք վերայցելելու ոեւէ անհատի որ Թագաւորութեան պատգամին հանդէպ քիչ մը հետաքրքրութիւն ցոյց կու տայ։—Գործք 10։34, 35

⁵ Այսօր, շատերս ճշմարտութեան մէջ ենք, որովհետեւ հրատարակիչ մը համբերութեամբ վերայցելեց մեզի։ Եթէ դուք ասոնցմէ մէկն էք, դուք ձեզի հարց տուէք. ‘Այդ հրատարակիչին վրայ սկիզբը ի՞նչ տպաւորութիւն ձգեցի։ Առաջին անգամ որ Թագաւորութեան պատգամը լսեցի, անմիջապէս ընդունեցի՞։ Արդեօք անտարբեր երեւցա՞յ’։ Ուրախ պէտք է ըլլանք որ վերայցելող հրատարակիչը մեզի վերայցելութիւն մը տալու արժանի սեպեց, ‘Աստուծմով համարձակութիւն ունենալով’ վերայցելեց ու շարունակեց ճշմարտութիւնը սորվեցնել մեզի։ Ի՞նչ ըսենք այն անհատներուն մասին, որոնք սկիզբը քիչ մը հետաքրքրութիւն ցոյց կու տան, բայց հետագային այնպէս կը թուի թէ կը խուսափին մեզմէ։ Այս պարագային դրական մտածելակերպ մը ունենալը կենսական է, ինչպէս ցոյց կու տայ հետեւեալ փորձառութիւնը։

⁶ Օր մը, առաւօտ կանուխ, երկու հրատարակիչներ փողոցի մը մէջ կը ծառայէին, երբ հանդիպեցան դեռատի կնոջ մը, որ մանկակառքով կը քալէր։ Կինը պարբերաթերթ մը ընդունեց ու երկու քոյրերը հրաւիրեց որ հետեւեալ Կիրակի իր տունը գան։ Անոնք ըստ ժամադրութեան գացին, սակայն կինը ըսաւ թէ իրենց հետ խօսակցելու ժամանակ չունէր։ Բայց եւ այնպէս խոստացաւ որ յաջորդ շաբաթ կրնար զիրենք ընդունիլ։ Քոյրերը կասկածեցան որ ան ժամադրութիւնը պիտի յարգէր, սակայն երբ վերադարձան կինը իրենց կը սպասէր։ Ուսումնասիրութիւն մը սկսուեցաւ եւ կնկան յառաջդիմութիւնը հիանալի էր։ Կարճ ժամանակամիջոցի մը մէջ, սկսաւ կանոնաւորապէս ժողովներու յաճախել ու դաշտի ծառայութեան մասնակցիլ։ Ներկայիս ան մկրտուած է։

⁷ Առաջին Այցելութեան Հիմ մը Դրէք. Յաջող վերայցելութեան մը հիմը յաճախ առաջին հանդիպումին կը դրուի։ Ուշադրութեամբ մտիկ ըրէք տանտէրին ըսածներուն։ Անոր խօսքերը ի՞նչ կը յայտնեն։ Ան կրօնասէ՞ր անհատ մըն է։ Ընկերայի՞ն հարցերով մտահոգ է։ Հետաքըրքրուա՞ծ է գիտութեամբ, պատմութեամբ կամ մթնոլորտի ապականութեամբ։ Վերայցելութեան աւարտին, կրնաք միտք գրգռող հարցում մը յարուցել ու խոստանալ որ երբ վերադառնաք՝ Աստուածաշունչէն անոր պատասխանը պիտի տաք։

⁸ Օրինակի համար, եթէ տանտէրը դրախտ երկրի մը մասին Աստուածաշունչի խոստումին ընդառաջէ, յարմար կ’ըլլայ այդ բնաբանին մասին յաւելեալ տեղեկութիւն տալ։ Մեկնելէ առաջ կրնաք անոր հարցնել. «Ի՞նչպէս կրնանք գիտնալ թէ Աստուած այս խոստումը պիտի կատարէ»։ Ետքը աւելցուցէք. «Թերեւս կրնամ հանդիպիլ երբ ընտանիքին մնացեալ անդամները տունը գտնուին եւ ձեզի ցոյց տալ թէ Աստուածաշունչը ինչպէ՛ս կը պատասխանէ այս հարցումին»։

⁹ Եթէ տանտէրը որեւէ նիւթով հետաքրքրուած չըլլայ, կրնաք՝ Մեր Թագաւորութեան Ծառայութիւնը թերթիկին վերջին էջի մօտեցումներուն մէջ ներկայացուած հարցումներէն մէկը յարուցել ու զայն որպէս հիմ գործածել ձեր յաջորդ խօսակցութեան համար։

¹⁰ Ճշգրիտ Արձանագրութիւններ Պահեցէք. Տունէ–տուն ձեր արձանագրութիւնները ճշգրիտ ու լման պէտք է ըլլան։ Հազիւ թէ տունէն դուրս ելլէք, տանտէրին անունն ու մականունը գրեցէք։ Տան թիւը կամ փողոցին անունը ենթադրաբար մի՛ գրէք. տեղեկութիւններէն վստահ ըլլալու համար ստուգեցէք անոնց ճշգրտութիւնը։ Անհատը նկարագրեցէք։ Նոթագրեցէք ձեր խօսակցութեան բնաբանը, կարդացած համարները, որեւէ գրականութիւն որ իր քով ձգեցիք եւ այն հարցումը որու պիտի պատասխանէք երբ վերադառնաք։ Պարփակեցէք առաջին հանդիպումին օրը եւ ժամը, ինչպէս նաեւ թէ երբ խոստացաք վերայցելել։ Հիմա որ ձեր արձանագրութիւնը լման է, զայն մի՛ կորսնցնէք։ Ապահով տեղ մը դրէք որպէսզի հետագային անոր դիմէք։ Շարունակեցէք մտածել անհատին մասին եւ թէ յաջորդիւ վերայցելութիւնը ի՛նչ կերպով պիտի ընէք։

¹¹ Գիտցէք թէ Ի՛նչ Են Ձեր Նպատակակէտերը. Նախ, ջերմ ու ընկերային ըլլալով, ձեր լաւագոյնը ըրէք, որպէսզի տանտէրը հանգիստ զգայ։ Ցոյց տուէք թէ որպէս անհատ իրմով հետաքրքրուած էք, առանց չափազանց ընտելանալու։ Ետքը, իրենց յիշեցուցէք այն հարցումը զոր նախկին հանդիպումին յարուցած էիք։ Ուշադրութեամբ մտիկ ըրէք իր կարծիքը ու անկեղծօրէն գնահատեցէք զինք իր խօսքերուն համար։ Ապա ցոյց տուէք թէ Աստուածաշունչի տեսակէտը ինչո՛ւ գործնական է։ Եթէ կարելի է, զինք ուղղեցէք՝ Գիտութիւնը որ Յաւիտենական Կեանքի կ’Առաջնորդէ գրքին մէջ, այդ կէտին հետ կապ ունեցող գաղափարի մը։ Մի՛ մոռնաք որ վերայցելութիւններ ընելու ատեն ձեր գլխաւոր նպատակակէտն է Աստուածաշունչի ուսումնասիրութիւն մը սկսիլ։

¹² Գիտութիւն գրքին մէջ գործածուած ուղղակի մեթոտը մեզմէ շատերուն ներշնչած է ‘համարձակութիւն ունենալու’ որ Աստուածաշունչի աշակերտները քաջալերենք որ ժողովներու յաճախեն ու Եհովայի կազմակերպութեան հետ ընկերակցին։ Անցեալին, հակումը ունէինք սպասելու մինչեւ որ աշակերտները որոշ ժամանակ մը ուսումնասիրէին, ետքը զանոնք կը հրաւիրէինք որ մեզի հետ ընկերակցին։ Ներկայիս, աշակերտներէն շատեր ժողովներու կը յաճախեն հազիւ թէ սկսին ուսումնասիրել եւ ասոր պատճառով աւելի արագօրէն կը յառաջդիմեն։

¹³ Ամուսնացած զոյգ մը անպաշտօն կերպով գործակիցի մը վկայեց։ Երբ ան ճշմարտութեամբ հետաքրքրուեցաւ, առաջարկեցին անոր որ Գիտութիւն գրքով Աստուածաշունչը ուսումնասիրէ։ Միեւնոյն ատեն, անոր ըսին որ լաւ կ’ըլլար եթէ ժողովներու յաճախէր, ուր՝ իր հարցումներէն շատերուն պատասխանը կրնար ստանալ։ Մարդը ոչ միայն ուսումնասիրելու անոնց հրաւէրը յօժարակամօրէն ընդունեց, այլ նաեւ շաբաթը երկու անգամ ուսումնասիրեց ու սկսաւ Թագաւորութեան Սրահին մէջ կանոնաւորաբար ժողովներու յաճախել։

¹⁴ Աստուած Ի՛նչ կը Պահանջէ Մեզմէ Գրքոյկը Գործածեցէք. «Աստուածային Խաղաղութեան Պատգամաբերներ» Նահանգային Համաժողովին ստացանք Աստուած Ի՛նչ կը Պահանջէ Մեզմէ գրքոյկը։ Այս գրքոյկը օգտակար է աստուածավախ մարդոց հետ Աստուածաշունչի ուսումնասիրութիւններ սկսելու համար, առանց նկատի առնելու անոնց ուսման մակարդակը։ Անիկա կը բովանդակէ ուսումնասիրութեան լայն դասընթացք մը, ծածկելով Աստուածաշունչի հիմնական ուսուցումները։ Այս գրականութիւնը Աստուծոյ գիտութիւնը փոխանցելու շատ ազդու գործիք մը պիտի ըլլայ։ Անիկա ճշմարտութիւնը այնքան յստակօրէն ու պարզ կերպով կը բացատրէ, որ գրեթէ մեզմէ ամէն մէկը պիտի կարենայ զայն գործածել Աստուծոյ պահանջները ուրիշներուն սորվեցնելու համար։ Հաւանաբար, հրատարակիչներէն շատեր այս գրքոյկով Աստուածաշունչի ուսումնասիրութիւն մը վարելու առանձնաշնորհումը պիտի ունենան։

¹⁵ Կարգ մը անհատներ որոնք կը զգան թէ ժամանակը չունին Գիտութիւն գիրքը ուսումնասիրելու, թերեւս յօժարին Աստուած Ի՛նչ կը Պահանջէ Մեզմէ գրքոյկը սերտել՝ հակիրճ նիստեր ունենալով։ Անոնք իրենց սորված բաներով պիտի հրճուին։ Հազիւ թէ երկու կամ երեք էջ սերտեն, դարերով մարդոց հարց տուած հարցումներուն պատասխանները պիտի գտնեն. Ո՞վ է Աստուած։ Ո՞վ է Բանսարկուն։ Ի՞նչ է Աստուծոյ նպատակը երկրի նկատմամբ։ Ի՞նչ է Աստուծոյ Թագաւորութիւնը։ Ի՞նչպէս կրնաք ճշմարիտ կրօնքը գտնել։ Թէեւ այս գրքոյկը ճշմարտութիւնը պարզօրէն կը ներկայացնէ, սակայն անոր պատգամը շատ զօրաւոր է։ Անիկա կարեւոր կէտեր կը ծածկէ, զորս երէցները վերաքաղ պիտի ընեն մկրտութեան թեկնածուներու հետ, ինչպէս նաեւ կրնայ որպէս սկզբնական գործիք մը ծառայել, Գիտութիւն գրքով աւելի ամբողջական ուսումնասիրութեան մը համար։

¹⁶ Վերայցելութեան ատեն ուսումնասիրութիւն մը առաջարկելու համար, կրնաք պարզապէս ըսել. «Գիտէի՞ք որ միայն քանի մը վայրկեան տրամադրելով, կրնաք Աստուածաշունչէն կարեւոր հարցումի մը պատասխանը առնել»։ Ետքը, հարցում մը հարցուցէք որ գրքոյկին դասերէն մէկուն սկիզբը յիշուած է։ Օրինակի համար, եթէ տարեց անհատի մը կ’այցելէք, կրնաք ըսել. «Գիտենք որ Յիսուս անցեալին մարդիկը բժշկեց։ Սակայն, ապագային ի՞նչ պիտի ընէ հիւանդներուն, տարեցներուն, մեռածներուն համար»։ Պատասխանները կը գտնուին 5–րդ դասին մէջ։ Կրօնասէր անհատի մը ուշադրութիւնը կրնայ գրաւել հետեւեալ հարցումը. «Աստուած ամէն աղօթք կը լսէ՞»։ Ասոր պատասխանը 7–րդ դասին մէջ է։ Ընտանիքի անդամները պիտի փափաքին գիտնալ թէ «Աստուած ի՞նչ կը պահանջէ ծնողներէն եւ զաւակներէն»։ Ասոր պատասխանը պիտի գտնեն երբ սերտեն 8–րդ դասը։ Կարգ մը ուրիշ հարցումներ ալ կան. «Մեռածները կրնա՞ն վնաս հասցնել ողջերուն», բացատրուած՝ 11–րդ դասին մէջ. «Ինչո՞ւ Քրիստոնէութիւն դաւանող այսքան շատ կրօնքներ կան», նկատի առնուած՝ 13–րդ դասին մէջ. եւ «Աստուծոյ մէկ բարեկամը ըլլալու համար ի՞նչ քայլեր պէտք է առնէք», ծածկուած՝ 16–րդ դասին մէջ։

¹⁷ Տարբեր Լեզու Խօսող Անհատներուն Օգնենք. Ի՞նչ ըսենք տարբեր լեզու խօսող տանտէրներու մասին։ Եթէ կարելի է, անոնց սորվեցնենք այն լեզուով որ շատ լաւ գիտեն։ (Ա. Կորն. 14։9) Քաղաքի տեսուչը (կամ՝ շրջանային տեսուչը, գիւղային շրջանի մէջ) շրջանին մէջ գտնուող օտարախօս ժողովքներուն ու խումբերուն մասին տեղեկութիւններ կրնայ հայթայթել։ Քարտուղարը ժողովքի անդամներէն իր ստացած Օտարախօս Վերայցելութեան Թղթիկը (S-70a) կրնայ ուղարկել այդ լեզուով ժողովքին կամ խումբին։ Եթէ մօտակայ ժողովքներ կամ խումբեր չկան, ոչ ալ տեղական ժողովքին մէջ տանտէրին լեզուն խօսող հրատարակիչներ կան, այն ատեն հրատարակիչը ի՛նք կրնայ փորձել տանտէրին հետ ուսումնասիրութիւն մը վարել, գործածելով Աստուած Ի՛նչ կը Պահանջէ Մեզմէ գրքոյկը երկու լեզուներով։

¹⁸ Անգլիախօս հրատարակիչ մը Վիեթնամերէն խօսող մարդու մը ու Թայերէն խօսող իր կնկան հետ ուսումնասիրութիւն մը սկսաւ։ Ուսումնասիրութեան ընթացքին գործածուեցան Անգլերէն, Վիեթնամերէն եւ Թայերէն Աստուածաշունչեր։ Թէեւ լեզուական արգելքը դժուարութիւն մըն էր սկիզբը, սակայն հրատարակիչը կը գրէ. «Զոյգին հոգեւոր աճումը անմիջական էր։ Անոնք իրենց երկու զաւակներուն հետ միասին ժողովներուն յաճախելու կարիքը տեսան եւ ամէն գիշեր ընտանեօք Աստուածաշունչ կը կարդան։ Իսկ անոնց վեց տարեկան աղջնակը Աստուածաշունչի ուսումնասիրութիւն մը կը վարէ»։

¹⁹ Երբ ուրիշ լեզու խօսող անհատի մը հետ կ’ուսումնասիրէք, դանդաղօրէն խօսեցէք, յստակօրէն արտասանեցէք, պարզ բառեր եւ նախադասութիւններ գործածեցէք։ Սակայն, ի մտի ունեցէք որ ուրիշ լեզու խօսող անհատներուն հետ արժանապատուութեամբ պէտք է վարուինք։ Անոնց հետ որպէս մանուկներ պէտք չէ վարուինք։

²⁰ Աստուած Ի՛նչ կը Պահանջէ Մեզմէ գրքոյկին բովանդակած գեղեցիկ պատկերները լաւ կերպով գործածեցէք։ Եթէ «պատկեր մը հազար բառ կ’արժէ», գրքոյկին բազմաթիւ պատկերները շատ տեղեկատու պիտի ըլլան տանտէրին։ Հրաւիրեցէք զինք որ համարները իր անձնական Աստուածաշունչէն կարդայ։ Եթէ ուսումնասիրութիւնը կրնայ վարուիլ այնպիսի ժամու մը որ ընտանիքի անդամ մը ներկայ է թարգմանելու համար, անկասկած ասիկա օգտակար պիտի ըլլայ։—Տես՝ Մեր Թագաւորութեան Ծառայութիւնը թերթիկը, Հոկտեմբեր 1990, էջ 7–8. Մարտ 1984, էջ 8։

²¹ Անյապաղ Վերայցելութիւններ Ըրէք. Որքա՞ն ժամանակ պէտք է սպասենք վերայցելութիւն մը ընելու համար։ Կարգ մը հրատարակիչներ առաջին հանդիպումէն մէկ կամ երկու օր վերջ կը վերադառնան։ Ուրիշներ նոյն օրը քանի մը ժամ ետք կը վերադառնան։ Ասիկա շա՞տ շուտ է։ Ընդհանուր առմամբ, կը թուի որ տանտէրները չեն առարկեր։ Յաճախ, վերայցելութիւն ընող հրատարակի՛չն է որ կարիքը ունի քիչ մը համարձակութեան հետ մէկտեղ աւելի դրական մտածելակերպ մը մշակելու։ Նկատի առէք հետեւեալ փորձառութիւնները։

²² 13 տարեկան հրատարակիչ մը, օր մը տունէ տուն քարոզած ատեն տեսաւ երկու կիներ, որոնք միասին կը քալէին։ Ամէնուրեք մարդոց քարոզելու մասին տրուած քաջալերութիւնը մտաբերելով, ան այդ կիներուն մօտեցաւ։ Անոնք Թագաւորութեան պատգամին հանդէպ հետաքրքրութիւն ցոյց տուին եւ իւրաքանչիւրը Գիտութիւն գիրքը ընդունեց։ Պատանի եղբայրը անոնց հասցէն առաւ, երկու օր ետք վերադարձաւ ու իւրաքանչիւրին հետ Աստուածաշունչի ուսումնասիրութիւն մը սկսաւ։

²³ Քոյր մը կարգադրութիւններ կ’ընէ որ յաջորդ շաբաթ վերայցելէ։ Սակայն սկզբնական այցելութենէն մէկ կամ երկու օր ետք, ան տանտիրոջ կը հանդիպի որպէսզի պարբերաթերթ մը ներկայացնէ, նախապէս իրենց խօսակցած նիւթին մասին։ Տանտէրին կ’ըսէ. «Այս յօդուածը տեսայ ու խորհեցայ որ թերեւս փափաքիք զայն կարդալ։ Հիմա չեմ կրնար աւելի խօսիլ, բայց ըստ մեր ժամադրութեան Չորեքշաբթի յետմիջօրէին պիտի վերադառնամ։ Այդ ժամանակը տակաւին յարմա՞ր է ձեզի»։

²⁴ Երբ անհատ մը ճշմարտութեամբ հետաքրքրուի, կրնանք վստահ ըլլալ որ ան ձեւով մը հակառակութեան պիտի հանդիպի։ Եթէ սկզբնական հանդիպումէն ետք շուտով վերայցելենք, ասիկա պիտի զօրացնէ զինք որ կարենայ տոկալ որեւէ ճնշումի որ պիտի դիմագրաւէ իր ազգականներէն, սերտ բարեկամներէն եւ ուրիշներէն։

²⁵ Հանրային Վայրերուն մէջ Եղողներուն Հետաքրքրութիւնը Մշակեցէք. Մեզմէ շատեր հաճոյք կ’առնեն քարոզելով փողոցներու, կառատուներու, հանրային փոխադրամիջոցներու, շուկաներու, եւ հանրային պարտէզներու մէջ։ Գրականութիւններ տեղաւորելու կողքին, պէտք է հետաքրքրութիւն մշակենք։ Այս նպատակով ալ, ջանք պէտք է թափենք որ բոլոր հետաքրքրուած անհատներուն անունը, հասցէն եւ եթէ կարելի է հեռաձայնի թիւը ձեռք ձգենք։ Այս տեղեկութիւնները ձեռք ձգելը ձեր կարծածին չափ դժուար չէ։ Մինչ ձեր խօսակցութիւնը իր աւարտին կը հասնի, ձեր նոթատետրը դուրս հանելով հարցուցէք. «Կը խորհի՞ք որ կերպ մը կայ այս խօսակցութիւնը ուրիշ անգամ շարունակելու»։ Կամ ըսէք. «Կը փափաքիմ որ յօդուած մը կարդաք որ վստահ եմ պիտի հետաքրքրէ ձեզ։ Կրնա՞մ զայն ձեր տունը կամ գրասենեակը բերել»։ Եղբայր մը պարզապէս կը հարցնէ. «Ո՞ր թիւին հեռաձայնելով ձեզի հետ կրնամ կապ պահել»։ Ան կը տեղեկագրէ որ երեք ամսուան մէջ, բացի երեք անհատներէ, բոլորն ալ հաճոյքով իրենց հեռաձայնի թիւերը տուին։

²⁶ Հեռաձայնը Գործածեցէք Հետաքրքրութիւն Գտնելու ու Մշակելու Համար. Ռահվիրայ քոյր մը հեռաձայնը կը գործածէ չափազանց ապահովուած շէնքերու մէջ բնակողներուն հետ հաղորդակցելու համար։ Ան միեւնոյն կերպով վերայցելութիւններ կ’ընէ։ Առաջին այցելութեան, ան կ’ըսէ. «Գիտեմ որ զիս չէք ճանչնար։ Մասնաւոր ջանք կը թափեմ որ ձեր շրջանի մէջ ապրող մարդոց հետ հաղորդակցութեան մէջ մտնեմ, որպէսզի անոնց հետ Աստուածաշունչէն գաղափար մը բաժնեկցիմ։ Եթէ կրնաք վայրկեան մը տրամադրել, կը փափաքիմ . . . մէջ յիշուած խոստումը կարդալ»։ Համարը կարդալէ ետք, ան կ’ըսէ. «Հոյակապ պիտի չըլլա՞յ եթէ կարենանք այդ ժամանակը տեսնել։ Ուրախացայ այս համարը ձեզի կարդալով։ Եթէ դուք ալ հաճոյք զգացիք, կը փափաքիմ դարձեալ հեռաձայնել եւ ուրիշ համար մը նկատի առնել»։

²⁷ Երբ դարձեալ հեռաձայնէ, ան տանտիրոջ կը վերյիշեցնէ իրենց նախկին խօսակցութիւնը ու կ’ըսէ թէ կը փափաքի Աստուածաշունչէն կարդալ որ ի՛նչ վիճակներ պիտի տիրեն երբ ամբարշտութիւնը չքանայ։ Յետոյ տանտիրոջ հետ սուրբ գրային հակիրճ խօսակցութիւն մը կ’ունենայ։ Բազմաթիւ հեռաձայնային խօսակցութիւններու շնորհիւ 35 անհատներ զինք իրենց տունը հրաւիրած են ու տան սուրբ գրային եօթը ուսումնասիրութիւններ սկսուած են։ Երբեմն դժուար կ’ըլլա՞յ որ ձմրան ցուրտ ամիսներուն հետաքրքրուած անհատներու վերայցելէք անանցանելի, սառած ճամբաներու, կամ հիւանդութեան պատճառով։ Եթէ այդ է պարագան, ինչո՞ւ անոնց հետ հեռաձայնով կապ չպահէք։

²⁸ Առեւտրական Վայրերու մէջ Գտնուած Հետաքրքրութիւնը Մշակեցէք. Վաճառատունէ վաճառատուն քարոզելը, պարզապէս պարբերաթերթեր ներկայացնելէն աւելին կը պարփակէ։ Խանութպաններէն շատեր անկեղծօրէն հետաքրքրուած են ճշմարտութեամբ եւ այդ հետաքրքրութիւնը պէտք է մշակուի։ Կարգ մը պարագաներու, կարելի կ’ըլլայ որ սուրբ գրային խօսակցութիւն մը կամ նոյնիսկ ուսումնասիրութիւն մը ունենալ իրենց աշխատավայրին մէջ։ Իսկ ուրիշ պարագաներու, հետաքրքրուած անհատին հետ հանդիպում մը կրնաք ունենալ կէսօրուան դադարին կամ ուրիշ որեւէ յարմար ժամանակ։

²⁹ Ճամբորդող տեսուչ մը պզտիկ նպարախանութի մը տիրոջ այցելեց ու առաջարկեց Աստուածաշունչի ուսումնասիրութիւն մը ցուցադրել։ Երբ ան հարցուց թէ ցուցադրութիւնը ո՛րքան պիտի տեւէր, ճամբորդող տեսուչը ըսաւ որ միմիայն 15 վայրկեան։ Ասոր վրայ, խանութպանը դուռին վրայ ցուցանշան մը դրաւ որ կ’ըսէր. «20 Վայրկեանէն կը Վերադառնամ», ապա քանի մը աթոռներ շարեց ու երկուքը միասին նկատի առին Գիտութիւն գրքին առաջին հինգ պարբերութիւնները։ Այս անկեղծ մարդը այնքան տպաւորուեցաւ իր սորված բաներէն, որ այդ Կիրակի Հանրային Ժողովին ու Դիտարանի Ուսումնասիրութեան ներկայ եղաւ ու համաձայնեցաւ յաջորդ շաբաթ ուսումնասիրութիւնը շարունակել։

³⁰ Առեւտրական վայրի մը մէջ ուսումնասիրութիւն մը առաջարկելու համար կրնաք ըսել. «Աստուածաշունչի ուսումնասիրութեան մեր յայտագիրը ցուցադրելը միմիայն 15 վայրկեան կը տեւէ։ Եթէ յարմար է, կը փափաքիմ ձեզի ցոյց տալ թէ անիկա ինչպէ՛ս կ’ըլլայ»։ Ապա ձեր խոստացած ժամանակին կառչեցէք։ Եթէ կարելի չէ աշխատավայրի մը մէջ երկար խօսակցութիւն մը ունենալ, թերեւս աւելի յարմար կ’ըլլայ խանութպանին այցելել իր տան մէջ։

³¹ Վերայցելեցէք Նոյնիսկ Երբ Գրականութիւն Տեղաւորած Չէք. Հետաքրքրութեան որեւէ նշոյլ վերայցելութեան արժանի է, գրականութիւն մը տեղաւորած ըլլանք կամ ոչ։ Անշուշտ, եթէ յստակ դառնայ որ տանտէրը իրապէս հետաքրքրուած չէ Թագաւորութեան պատգամով, աւելի նախընտրելի է որ ձեր ջանքերը ուղղէք այլուր։

³² Դռնէ–դուռ քարոզչութեան մէջ, քոյր մը հանդիպեցաւ կնոջ մը որ շատ ընկերային էր, սակայն հաստատ կերպով մերժեց պարբերաթերթերը ընդունիլ։ Հրատարակիչը կը գրէ. «Օրերով անոր մասին մտածեցի ու որոշեցի դարձեալ իր հետ խօսիլ»։ Վերջապէս, քոյրը աղօթեց, քաջութիւն հաւաքեց ու կնոջ դուռը զարկաւ։ Ան մեծապէս հրճուեցաւ երբ կինը զինք ներս հրաւիրեց։ Աստուածաշունչի ուսումնասիրութիւն մը սկսուեցաւ ու յաջորդ օրը դարձեալ վարուեցաւ։ Հետագային, կինը ճշմարտութեան եկաւ։

³³ Նախապէս Ծրագրեցէք որ Շատ Բան Իրագործէք. Կը յանձնարարենք որ ամէն շաբաթ որոշ ժամանակ մը յատկացնէք վերայցելութիւններ ընելու։ Շատ բան կրնանք իրագործել երբ լաւ կերպով ծրագրենք։ Կարգադրեցէք ձեր վերայցելութիւնները ընել այն շրջանին մէջ ուր տունէ տուն պիտի քարոզէք։ Երբ ինքնաշարժով էք, խումբը պէտք է պզտիկ պահուի որպէսզի ամէն անհատ լման պատեհութիւնը ունենայ վերայցելութիւններ ընելու։ Վարիչը նախապէս պէտք է գիտնայ թէ վերայցելութիւնները ո՛ւր են, որպէսզի խուսափի աւելորդ շրջագայութենէ։

³⁴ Անոնք որոնք վերայցելութիւններ ընելու եւ տան սուրբ գրային ուսումնասիրութիւններ սկսելու մէջ յաջողութիւն կը գտնեն, կ’ըսեն թէ կենսական է մարդոց հանդէպ անձնական անկեղծ հետաքրքրութիւն ցոյց տալ ու անոնց մասին մտածել նոյնիսկ իրենց քովէն մեկնելէ ետք։ Նաեւ անհրաժեշտ է սուրբ գրային հետաքրքրական նիւթ մը պատրաստել անոնց հետ նկատի առնելու համար եւ վերայցելութեան հիմ մը դնել առաջին այցելութիւնը վերջ գտնելէ առաջ։ Ասկէ զատ, կարեւոր է շուտով վերադառնալ հետաքրքրութիւնը մշակելու համար։ Աստուածաշունչի ուսումնասիրութիւն մը սկսելու նպատակակէտը մեր մտքին մէջ միշտ վառ պէտք է մնայ։

³⁵ Համարձակութիւնը կենսական յատկութիւն մըն է վերայցելութիւններ ընելու մէջ յաջողելու համար։ Անիկա ի՞նչպէս կրնանք ձեռք ձգել։ Պօղոս առաքեալ կը պատասխանէ ըսելով թէ՝ ‘Աստուծմո՛վ համարձակութիւն կ’ունենանք’ ուրիշներուն բարի լուրը յայտարարելու։ Եթէ այս մարզին մէջ աճելու կարիքը ունիք, Եհովայի աղօթեցէք օգնութեան համար։ Ապա, ձեր աղօթքներուն հետ ներդաշնակ գործելով, ցուցաբերուած ամէն հետաքրքրութիւն մշակեցէք։ Եհովա ձեր ջանքերը վստահաբար պիտի օրհնէ։

[Նկար՝ էջ 3]

Ի՛նչպէս Յաջողութիւն Գտնել Վերայցելութիւններ Ընելու մէջ

◼ Մարդոց հանդէպ անձնական անկեղծ հետաքրքրութիւն ցոյց տուէք։

◼ Սուրբ գրային հետաքրքրական նիւթ մը ընտրեցէք խօսակցութեան համար։

◼ Իւրաքանչիւր յաջորդ այցելութեան համար հիմ մը դրէք։

◼ Շարունակեցէք անհատին մասին մտածել իր քովէն մեկնելէ ետք։

◼ Մէկ կամ երկու օր ետք վերադարձէք, հետաքրքրութիւնը մշակելու համար։

◼ Ձեր մտքին մէջ վառ պահեցէք Աստուածաշունչի ուսումնասիրութիւն մը սկսելու նպատակակէտը։

◼ Օգնութեան համար աղօթեցէք ծառայութեան այս երեսակին մէջ համարձակութիւն ունենալու։