Աստուածաշունչի Յաւելեալ Ուսումնասիրութիւններ կ’Ուզուին

¹ Եհովա Աստուած իր երկրային կազմակերպութիւնը կ’օրհնէ, զայն յարատեւաբար աճեցնելով։ Համայն աշխարհի մէջ, անցեալ ծառայութեան տարուան ընթացքին, 375,923 անհատներ մկրտուեցան՝ միջին հաշուով օրական 1,000 նոր աշակերտներ, կամ ժամական շուրջ 43 հոգի։ Աշխարհի զանազան մասերուն մէջ, հակառակ տասնեակ տարիներ մեր եղբայրներուն դիմագրաւած դժուարութիւններուն, Թագաւորութեան գործը կ’ուռճանայ եւ յատկանշական յաւելումներ տեղի կ’ունենան։ Որքա՜ն ուրախութիւն կը պատճառէ կարդալ՝ բարի լուրը տարածելու նկատմամբ եղած յառաջդիմութիւններուն մասին։

² Միացեալ Նահանգներու մասնաճիւղի անցեալ ծառայութեան տարուան ընթացքին, մենք ալ յաւելումներ ունեցանք հրատարակիչներու, օժանդակ ռահվիրաներու, քարոզչութեան ժամերու, գրքոյկներու եւ պարբերաթերթերու տեղաւորումներու ընդհանուր միջինին մէջ։ Մկրտուողներուն եւ Յիշատակատօնի ներկաներուն թիւն ալ յաւելում կրեց։ Վերայցելութիւնները եւ սուրբ գրային ուսումնասիրութիւնները ի՞նչ. . .։ Վերայցելութիւններու ընդհանուր թիւը նուազեցաւ, իսկ Աստուածաշունչի ուսումնասիրութիւնները 14 առ հարիւր նուազում կրեցին։ Այսուհանդերձ, ծառայութեան այս երեսակներն են որ աշակերտելու համար կենսական են։ Իւրաքանչիւրս ի՞նչ կրնանք ընել վերայցելութիւններու եւ Աստուածաշունչի ուսումնասիրութիւններու նուազման այս երեւոյթը բարելաւելու համար։

³ Ուսումնասիրութիւն մը Վարելու Փափաքը Զօրացուցէք. Անձամբ հոգեւորապէս զօրաւոր եւ գործունեայ ըլլալու վրայ պիտի կեդրոնացնենք մեր ուշադրութիւնը։ Քրիստոսի ճշմարիտ հետեւորդները «բարի գործերու նախանձախնդիր» են։ (Տիտ. 2։14) Երբ մեր ծառայութիւնը վերաքաղ ընենք, կրնա՞նք ըսել թէ դաշտին մէջ գրականութիւններ ստացողներուն վերայցելելու մեծ փափաք մը ունինք։ Բոլոր հետաքրքրութիւն ցուցաբերողներուն, տան սուրբ գրային ուսումնասիրութիւն առաջարկելու նկատմամբ խանդավա՞ռ ենք։ (Հռովմ. 12։11) Թէ ոչ վերայցելութիւններ ընելու եւ տան սուրբ գրային ուսումնասիրութիւններ սկսելու աւելի մեծ փափաք մը զարգացնելու կարիքը ունինք։

⁴ Աստուածաշունչի անձնական ընթերցանութիւնը, ժողովներու կանոնաւորաբար յաճախելը եւ գրականութիւններ ուսումնասիրելը, մեզ հոգեւորապէս կայտառ եւ Աստուծոյ հոգիով զօրացած պիտի պահեն։ (Եփ. 3։16-19) Ասիկա Եհովայի հանդէպ մեր հաւատքն ու վստահութիւնը, իսկ մեր ընկերին հանդէպ մեր սէրը պիտի զօրացնէ։ Ճշմարտութիւնը ուրիշի մը սորվեցնելու մղումը պիտի ունենանք, այսպիսով մեր ծառայութիւնը հետաքրքրական, յաջող եւ ոգեւորիչ դարձնելով։ Այո՛, պէտք է փափաքինք Աստուածաշունչի յաւելեալ ուսումնասիրութիւններ ունենալ։

⁵ Նա՛խ Ձեր Ընտանիքին Հետ Ուսումնասիրեցէք. Տան մէջ զաւակներ ունեցող Քրիստոնեայ ծնողներ հետաքրքրուած պէտք է ըլլան Աստուածաշունչի ընտանեկան կանոնաւոր ուսումնասիրութեան իրենց յայտագրով։ (Բ. Օր. 31։12. Սաղմ. 148։12, 13. Առ. 22։6) Շատ օգտակար կ’ըլլայ եթէ ծնողներ իրենց զաւակներուն հետ ուսումնասիրեն նախ՝ Ի՛նչ կը Պահանջէ գրքոյկը, ապա՝ Գիտութիւն գիրքը, զանոնք որպէս չմկրտուած հրատարակիչ որակելի դարձնելու, նաեւ նուիրումի եւ մկրտութեան պատրաստելու համար։ Անշուշտ, յաւելեալ նիւթեր կարելի է նկատի առնել, զաւկին կարիքին եւ տարիքին համաձայն։ Չմկրտուած զաւակի մը հետ ուսումնասիրող ծնողք մը, կրնայ տեղեկագրել՝ ուսումնասիրութիւնը, ժամանակը եւ վերայցելութիւնները, ինչպէս որ յիշուած է Ապրիլ 1987–ի Մեր Թագաւորութեան Ծառայութիւնը թերթիկին Հարցումի Տուփին մէջ։

⁶ Անձնապէս Աւելի Լաւ Կազմակերպուած Եղէք. Նկատի առնելով բաշխուած պարբերաթերթերուն, գրքոյկներուն եւ գրքերուն քանակը, անկասկած ասդին–անդին շատ մեծ թիւով սերմեր ցանուած են։ Ճշմարտութեան այս ցանուած սերմերը, նոր աշակերտներ արտադրելու շատ մեծ հաւանականութիւն կը ներկայացնեն։ Սակայն, հողագործ մը կամ պարտիզպան մը իրապէս գոհացում կը զգա՞յ եթէ շարունակաբար ցանէ եւ թափած ջանքէն յետոյ ժամանակ չտրամադրէ զանոնք հնձելու։ Վստահաբար ո՛չ։ Նոյնպէս, հետաքրքրութիւնը հետապնդելու ծառայութիւնը՝ անհրաժեշտ է։

⁷ Վերայցելութիւններ ընելու համար կանոնաւորաբար ժամանակ կը յայտագրէ՞ք։ Երբ որեւէ հետաքրքրութիւն ցուցաբերուի, շուտով վերադարձէք։ Վերայցելութիւններ ըրէք՝ Աստուածաշունչի ուսումնասիրութիւն մը սկսելու նպատակաւ։ Ձեր վերայցելութիւններուն մասին կոկիկ, այժմէական եւ լաւ կազմակերպուած արձանագրութիւն մը կը պահէ՞ք։ Վստահ եղէք որ տանտիրոջ անունին եւ հասցէին կողքին, արձանագրէք առաջին հանդիպումին թուականը, տեղաւորուած գրականութեան խորագիրը, ձեր խօսած նիւթին մասին հակիրճ տեղեկութիւն մը եւ յաջորդ այցելութեան նկատի առնուելիք կէտ մը։ Ձեր արձանագրութեան մէջ տեղ ձգեցէք, որպէսզի իւրաքանչիւր վերայցելութենէն ետք անոր վրայ յաւելեալ տեղեկութիւններ աւելցնէք։

⁸ Վերլուծեցէք թէ Ի՛նչպէս Վերայցելութիւն մը Պիտի Ընէք. Ի՞նչ են կէտերէն ոմանք, զորս ի մտի պէտք է ունենաք երբ հետաքրքրուած անհատի մը կը վերայցելէք։ (1) Ջերմ, բարեկամական, խանդավառ եւ անպաշտօն եղէք։ (2) Անհատին համար հետաքրքրական եղող նիւթեր կամ հարցումներ նկատի առէք։ (3) Խօսակցութիւնը պարզ եւ սուրբ գրային պահեցէք։ (4) Իւրաքանչիւր այցելութեան, ջանացէք անհատապէս տանտիրոջ համար արժէքաւոր թուող կէտ մը սորվեցնել։ (5) Յաջորդ այցելութեան նկատի առնուելիք նիւթին հանդէպ ակնկալութիւն կերտեցէք։ (6) Երկար մի՛ նստիք։ (7) Տանտիրոջ շփոթութեան կամ նեղի մատնող հարցումներ մի՛ հարցնէք։ (8) Ներատեսութիւն գործածեցէք, որպէսզի տանտիրոջ հոգեւոր գնահատութիւնը չմշակուած՝ անոր սխալ տեսակէտները կամ գէշ սովորութիւնները չդատապարտէք։—Վերայցելութիւններ ընելու եւ Աստուածաշունչի ուսումնասիրութիւններ սկսելու մէջ յաջողութիւն գտնելու համար, տես՝ Մարտ 1997–ի Մեր Թագաւորութեան Ծառայութիւնը թերթիկին յաւելուածականը։

⁹ Ամէն Կարելիութիւն Հետախուզեցէք. Ժողովքի մը մէջ, կարելի եղաւ չափազանց ապահովուած շէնքի մը բոլոր վարձակալներուն անունները եւ անոնց բնակած յարկաբաժիններուն թիւերը ձեռք ձգել։ Իւրաքանչիւր բնակիչին նամակ մը գրուեցաւ եւ երկու թերթիկ ներփակուեցաւ։ Նամակի վերջաւորութեան, տան սուրբ գրային ուսումնասիրութիւն մը առաջարկուեցաւ եւ հեռաձայնի թիւ մը դրուեցաւ, որպէսզի նամակը ստացողը կարենայ պատասխանել։ Քանի մը օր չանցած, երիտասարդ մը հեռաձայնեց եւ ուսումնասիրութիւն մը խնդրեց։ Յաջորդ օրը, վերայցելութիւն մը եղաւ եւ Գիտութիւն գրքով ուսումնասիրութիւն մը հաստատուեցաւ։ Նոյն գիշերը, ան Ժողովքի Գրքի Ուսումնասիրութեան ներկայ եղաւ եւ անկէ ետք շարունակեց բոլոր ժողովներուն յաճախել։ Գրեթէ անմիջապէս, ան սկսաւ ամէն օր Աստուածաշունչը կարդալ ու հաստատ քայլերով դէպի մկրտութիւն յառաջդիմեց։

¹⁰ Խումբ մը հրատարակիչներ ինքնաշարժով որոշեցին միասնաբար կարգ մը վերայցելութիւններ ընել։ Երբ քոյր մը իր վերայցելութիւններէն մէկը կ’ընէր, իր փնտռած անհատը տունը չգտաւ, բայց ուրիշ երիտասարդուհի մը դուռը բանալով ըսաւ. «Ձեզի կը սպասէի»։ Տանտիրուհին նախապէս ծանօթէ մը Գիտութիւն գիրքը ստացած էր, հետեւաբար, երբ քոյրերը իր դուռը զարկին, ան արդէն իսկ գիրքը երկու անգամ կարդացած էր, եւ մեծապէս տպաւորուած էր անոր բովանդակութենէն։ Ան ըսաւ թէ անակնկալի չէր եկած որ Վկաները ա՛յդ օրը իր դուռը զարկած էին, քանի որ ան աղօթած էր որ անոնք գային եւ իր հետ Աստուածաշունչը ուսումնասիրէին։ Անոր հետ ուսումնասիրութիւն մը սկսուեցաւ. ան սկսաւ ժողովքային հանդիպումներուն ներկայ գտնուիլ եւ արագօրէն յառաջդիմեց։

¹¹ Վերջերս, շուրջ 25 տարիէ մկրտուած քոյր մը, իր մօրը Գիտութիւն գիրքը տուաւ։ Մայրը, որ եկեղեցիի անդամ մըն էր, սկսաւ գիրքը կարդալ։ Երկու գլուխ կարդալէն ետք, իր աղջկան հեռաձայնեց եւ զայն անակնկալի բերաւ, ըսելով. «Կ’ուզեմ Եհովայի Վկաներէն մէկը ըլլալ»։ Մայրը սկսաւ ուսումնասիրել եւ ներկայիս ան մկրտուած է։

¹² Հետեւեալ Թելադրութիւնները Փորձեցէք. Ուսումնասիրութիւններ սկսելու համար ուղղակի մօտեցումը գործածա՞ծ էք։ Կրնաք պարզապէս ըսել. «Եթէ կը փափաքիք տան սուրբ գրային ձրի ուսումնասիրութիւն մը ունենալ, կրնամ միայն քանի մը վայրկեանով ձեզի ցոյց տալ թէ անիկա ի՛նչպէս կ’ըլլայ։ Եթէ հաւնեցաք զայն, կրնաք շարունակել»։ Շատեր առաջարկը ընդունելու եւ Աստուածաշունչի ուսումնասիրութեան ցուցադրութիւն մը տեսնելու չեն վարանիր։

¹³ Ուսումնասիրութեան սկսելէն քիչ ետք, աշակերտին ցոյց տուէք նախապէս պատրաստուելու կերպը՝ կարդալ յիշուած համարները եւ տպուած հարցումներուն պատասխանելու համար բանալի բառերը ընդգծել։ Կեդրոնացէք միայն գլխաւոր կէտերուն վրայ։ Թէեւ առաջին քանի մը նիստերուն դիւրաթեք ըլլալու կարիքը ունիք, բայց կարեւոր է որ Աստուածաշունչի ուսումնասիրութիւն մը կանոնաւոր ըլլայ։ Ի մտի ունեցէք թէ ի՛նչպէս աղօթքը պիտի պարփակէք, որպէս ուսումնասիրութեան կենսական մէկ մասը, եւ ի՛նչպէս սուրբ գրային կերպով աշակերտը պիտի պատրաստէք հալածանքի համար։ Ամէն գնով, ուսումնասիրութիւնը հետաքրքրական դարձուցէք։

¹⁴ Անշուշտ, Աստուածաշունչի բոլոր աշակերտները միեւնոյն արագութեամբ չեն յառաջդիմեր։ Ոմանք հոգեւոր հակումներ չունին ինչպէս ուրիշներ, իսկ ոմանք ալ շուտով չեն ըմբռներ իրենց սորված բաները։ Ոմանք շատ զբաղած ըլլալով թերեւս չկարենան պէտք եղած ժամանակը տրամադրել ամէն շաբաթ լման գլուխ մը ուսումնասիրելու համար։ Հետեւաբար, կարգ մը պարագաներուն, կրնանք անհրաժեշտ նկատել գլուխներէն ոմանք ուսումնասիրելու համար մէկէ աւելի նիստեր ունենալ եւ քանի մը ամիս աւելի առնել գիրքը ամբողջացնելու համար։ Կարգ մը պարագաներուն, կրնանք նախ Ի՛նչ կը Պահանջէ գրքոյկը ուսումնասիրել եւ ապա անցնիլ Գիտութիւն գրքին։ Եթէ ասոր ընկերակցի ժողովքային հանդիպումներուն ներկայ գտնուիլը, ասիկա պիտի նպաստէ որ իւրաքանչիւր աշակերտ ճշմարտութեան մէջ հաստատ հիմ մը ունենայ։

¹⁵ Ամէն բանէ աւելի, Աստուածաշունչի ուսումնասիրութեան մը համար աղօթեցէ՛ք։ (Ա. Յովհ. 3։22) Քրիստոնեայի մը ամենէն վարձատրելի փորձառութիւններէն մէկն է՝ Եհովայի կողմէ գործածուիլ, որպէսզի ուրիշի մը օգնէ Յիսուս Քրիստոսի աշակերտ մը ըլլալու։ (Գործք 20։35. Ա. Կորն. 3։6-9. Ա. Թես. 2։8) Հի՛մա է ժամանակը Աստուածաշունչի ուսումնասիրութեան գործին մէջ մեծ եռանդ ցուցաբերելու, լիովին վստահ ըլլալով թէ Եհովա առատապէս պիտի օրհնէ Աստուածաշունչի յաւելեալ ուսումնասիրութիւններ սկսելու մեր ջանքերը։

[Նկար՝ էջ 1]

Աստուածաշունչի նոր ուսումնասիրութիւն մը սկսելու համար կ’աղօթէ՞ք