Ժողովներու Կանոնաւորաբար Ներկայ Գտնուիլը Առաջնահերթութիւն մըն Է
1 Քրիստոնեայ ընտանիքներ ժողովներու կանոնաւորաբար ներկայ գտնուելուն նախապատուութիւն կու տան։ Սակայն ներկայ կեանքի պահանջները կրնան մարտահրաւէր մը ներկայացնել։ Արդեօք առտնին պարտականութիւնները, աշխարհային գործը կամ դպրոցական պարտականութիւնները սկսա՞ծ են խլել Եհովայի պաշտամունքին յատկացուած ժամանակը։ Հարցերը Եհովայի տեսանկիւնէն դիտելը մեզի պիտի օգնէ որ մեր առաջնահերթութիւնները պահպանենք։—Ա. Թագ. 24։7. 26։11
2 Շաբաթ օրը փայտ հաւաքելով, Իսրայելացի մարդ մը դիտումնաւոր կերպով Եհովայի տեսակէտը նկատի չառաւ։ Թերեւս ան պատճառաբանեց թէ իր ըրածը ընտանիքին համար էր կամ թէ աննշան բան մըն էր։ Սակայն Եհովա իր դատավճիռով ցոյց տուաւ թէ պաշտամունքի յատկացուած ժամանակներու ընթացքին աշխարհիկ գործունէութիւններ հետապնդելը լուրջ հարց մըն էր։—Թուոց 15։32-36
3 Մարտահրաւէրը Դիմագրաւել. Շատերու համար պայքար է թոյլ չտալ որ աշխարհիկ գործը խանգարէ իրենց ներկայ գտնուիլը ժողովներուն։ Ոմանք այս հարցը լուծած են՝ իրենց գործատիրոջ հետ խօսելով, գործակիցներու հետ գործի ժամերու փոփոխութիւն ընելով, աւելի յարմար գործ մը փնտռելով, կամ պարզապէս իրենց ապրելակերպը պարզեցնելով։ Անտարակոյս Աստուծոյ շատ հաճելի են այսպիսի զոհողութիւններ ճշմարիտ պաշտամունքին ի նպաստ։—Եբր. 13։16
4 Դպրոցական պարտականութիւններն ալ կրնան մարտահրաւէր մը ըլլալ։ Պատանուհի մը ըսաւ. «Պարտականութիւններէս ոմանք ժողովներէն առաջ կ’ընեմ, իսկ մնացեալը՝ տուն վերադառնալէ ետք»։ Եթէ ժողովի գիշերը դպրոցական բոլոր պարտականութիւնները կարելի չէ ամբողջացնել, կարգ մը ծնողներ ուսուցիչներուն բացատրած են թէ քրիստոնէական ժողովներուն ներկայ գտնուիլը իրենց ընտանիքին համար առաջնահերթութիւն մըն է։
5 Համագործակցիլը եւ լաւ ծրագրելը անհրաժեշտ են առտնին պարտականութիւնները ամբողջացնելու համար, որպէսզի ընտանիքը պատրաստ ըլլայ ճիշդ ժամանակին ժողովներուն ներկայ գտնուելու։ (Առ. 20։18) Նոյնիսկ երախաներուն կարելի է սորվեցնել որ ժողովի երթալու ժամանակէն առաջ իրենց հագուստը հագնին ու պատրաստ ըլլան։ Ծնողներ կրնան իրենց օրինակով ժողովներուն կարեւորութիւնը դրոշմել իրենց զաւակներուն միտքին մէջ։—Առ. 20։7
6 Մինչ իրերու ներկայ դրութեան ճնշումները կ’աւելնան, կենսական է որ ժողովներուն կանոնաւորաբար ներկայ գտնուինք։ Շարունակենք հարցերը Եհովայի տեսանկիւնէն դիտել եւ ժողովներու կանոնաւորաբար ներկայ գտնուիլը առաջնահերթութիւն մը նկատել։—Եբր. 10։24, 25