Հեզերուն սորվեցուր Աստուծոյ ճամբային մէջ քալել
1. Աշակերտելը ի՞նչ կը պարփակէ։
1 Քրիստոսի առաջին դարու աշակերտներուն կ’ակնարկուէր որպէս «այն ճամբուն» հետեւողներ։ (Գործք 9։2) Ճշմարիտ Քրիստոնէութիւնը անհատին ամբողջ կենցաղը կը պարփակէ։ (Առ. 3։5, 6) Հետեւաբար, երբ Աստուածաշունչի ուսումնասիրութիւններ կը վարենք, Աստուածաշունչի ուսուցումներուն ճշգրիտ գիտութիւնը հաղորդելէ աւելին պէտք է ընենք։ Աստուածաշունչի աշակերտներուն նաեւ պէտք է օգնենք որ Եհովայի ճամբային մէջ քալեն։—Սաղմ. 25։8, 9
2. Ի՞նչ բան կրնայ Աստուածաշունչի աշակերտը մղել որ Աստուծոյ պատուիրանները պահէ։
2 Եհովայի ու Յիսուսի հանդէպ սէր. Անկատար մարդոց որքա՜ն դժուար է իրենց մտածելակերպը, կեցուածքը, խօսելակերպը ու վարքը ներդաշնակել Աստուծոյ կամքին հետ։ (Հռովմ. 7։21-23. Եփ. 4։22-24) Սակայն Աստուծոյ ու իր Որդիին հանդէպ սէրը կը մղէ հեզերը որ այս մարտահրաւէրը ընդունին։ (Յովհ. 14։15. Ա. Յովհ. 5։3) Ի՞նչպէս կրնանք Աստուածաշունչի աշակերտներուն օգնել այս սէրը մշակելու։
3. Ի՞նչպէս կրնանք աշակերտին օգնել որ Եհովայի ու Յիսուսի հանդէպ սէր մշակէ։
3 Աշակերտիդ օգնէ որ Եհովայի անձնաւորութեան ծանօթանայ։ Եղբայր մը բացատրեց. «Մարդիկ չեն կրնար անծանօթ մէկը սիրել, ուստի ուսումնասիրութեան սկիզբէն իսկ, Աստուածաշունչէն կը սորվեցնեմ Աստուծոյ անունը, եւ Եհովայի յատկութիւնները ընդգծելու համար պատեհութիւններ կը փնտռեմ»։ Յիսուսի օրինակը աչքառու դարձնելը, ասիկա ընելու ընտիր կերպ մըն է։ (Յովհ. 1։14. 14։9) Ասկէ զատ, Աստուածաշունչը կը սորվեցնէ գիրքին իւրաքանչիւր գլուխին վերջաւորութեան գտնուող վերաքաղի շրջանակը գործածէ, աշակերտին օգնելու որ Աստուծոյ ու իր Որդիին սքանչելի յատկութիւններուն մասին խոկայ։
4. (ա) Բազմաթիւ աշակերտներ ինչո՞ւ քարոզչութիւնը մարտահրաւէր կը նկատեն։ (բ) Ի՞նչպէս կրնանք մեր աշակերտներուն օգնել որ քրիստոնէական ծառայութեան մէջ իրենց առաջին քայլերը նետեն։
4 Օրինակով սորվեցուր. Որպէս ուսուցիչ եւ առաջնորդ, մեր արարքներով ուրիշներուն ցոյց կու տանք թէ ի՛նչ կը նշանակէ Աստուծոյ ճամբային մէջ քալել։ (Ա. Կորն. 11։1) Օրինակ, Աստուածաշունչի աշակերտներէն շատեր չեն վարժուած օտարներու խօսիլ իրենց հաւատալիքներուն մասին։ Ուստի համբերութեամբ ու հմտութեամբ անոնց օգնենք որ քարոզչութեան եւ աշակերտելու գործին մասնակցելու հարկ եղած սէրը, հաւատքն ու քաջութիւնը մշակեն։ (Բ. Կորն. 4։13. Ա. Թես. 2։2) Մեր աշակերտները առաջնորդելու փափաքը մեզ պիտի մղէ որ անոնց կողքին ըլլանք, երբ քրիստոնէական ծառայութեան մէջ իրենց առաջին քայլերը կը նետեն։
5. Լաւ օրինակը ի՞նչպէս աշակերտներուն կ’օգնէ տեսնելու թէ Աստուծոյ պատուիրաններուն հետեւիլը ի՛նչ կը պարփակէ։
5 Օրինակդ կրնայ քրիստոնէական կենցաղի այլ կարեւոր մարզերու վերաբերեալ ուղղութիւն տալ աշակերտներուն։ Երբ հիւանդներու կ’այցելես կամ ժողովին մէջ ուրիշները ջերմօրէն կ’ողջունես, անոնք գործի դրուած սէր կը տեսնեն։ (Յովհ. 15։12) Թագաւորութեան Սրահի մաքրութեան մասնակցելով կամ ուրիշներու համար օգտակար բաներ ընելով, անոնց կը սորվեցնես ի՛նչպէս ծառայել։ (Յովհ. 13։12-15) Երբ անոնք նկատեն որ պարզ կենսաոճ մը կը պահես, կ’ըմբռնեն թէ ի՛նչ կը նշանակէ ‘առաջ խնդրել Աստուծոյ թագաւորութիւնը’։—Մատթ. 6։33
6. Ի՞նչ արդիւնք կը վայելենք, հեզերուն օգնելով որ Եհովայի ծառայեն։
6 Աստուծոյ Խօսքէն սորվեցնելն ու աշակերտելը շատ ջանք կը պահանջէ։ Բայց ի՜նչ ուրախութիւն է տեսնել թէ հեզերը «ճշմարտութեան մէջ կը քալեն»։—Գ. Յովհ. 4