Աղօթքով խոկալը նախանձախնդիր քարոզիչներուն համար անհրաժեշտ է
1. Ի՞նչ բան Յիսուսի օգնեց, որ իր գլխաւոր գործէն չշեղի։
1 Յիսուս երեկոն անցուցած էր մարդիկ բժշկելով ու դեւեր հանելով։ Յաջորդ օրը երբ իր աշակերտները զինք գտան, ըսին. «Ամէնքը քեզ կը փնտռեն», զինք քաջալերելով որ շարունակէ իր հրաշալի գործերը։ Սակայն Յիսուս բարի լուրը քարոզելու իր գլխաւոր գործէն պիտի չշեղէր։ Ան պատասխանեց. «Եկէք երթանք մերձակայ գիւղաքաղաքները, որպէս զի հոն ալ քարոզեմ, վասն զի այս բանին համար եկեր եմ»։ Ի՞նչ բան Յիսուսի օգնեց կեդրոնացած մնալու։ Ան առտուն կանուխ արթնցած էր, որպէսզի աղօթէր եւ խոկար (Մար. 1։32-39)։ Աղօթքով խոկալը ինչպէ՞ս կրնայ մեզի ալ օգնել, որ նախանձախնդիր քարոզիչներ ըլլանք։
2. Ի՞նչ բաներու վրայ կրնանք խոկալ, որպէսզի ծառայութեան համար մեր նախանձախնդրութիւնը պահպանենք։
2 Ի՞նչ բանի վրայ խոկալ։ Յիսուս նկատեց թէ մարդիկ «յոգնած ու ցիրուցան եղած էին հովիւ չունեցող ոչխարներու պէս» (Մատ. 9։36)։ Նմանապէս, կրնանք խոկալ թէ ո՜րքան մարդիկ բարի լուրին կարիքը ունին։ Ժամանակներուն հրատապութեան մասին կրնանք խորհրդածել (Ա. Կոր. 7։29)։ Կրնանք խոկալ Եհովայի գործերուն ու յատկութիւններուն վրայ, Եհովայի վկաներ ըլլալու մեր առանձնաշնորհումին վրայ, եւ Աստուծոյ Խօսքէն մեր սորված թանկարժէք հոգեւոր գանձերուն վրայ, որոնց մասին մեր թաղամասի մարդիկը անտեղեակ են (Սաղ. 77։11-13. Եսա. 43։10-12. Մատ. 13։52)։
3. Ե՞րբ կրնանք խոկալ։
3 Ե՞րբ խոկալ։ Յիսուսի նման, ոմանք առտուն կանուխ կ’արթննան, երբ լռութիւն կը տիրէ։ Ուրիշներ խոկալու լաւագոյն ժամանակը իրիկունը կը նկատեն, քնանալէ առաջ (Ծն. 24։63)։ Նոյնիսկ եթէ խճողուած յայտագիր ունինք, կրնանք խոկալու համար ժամանակ գտնել։ Ոմանք ասիկա կ’ընեն հանրային փոխադրամիջոց գործածելու ընթացքին։ Ուրիշներ իրենց ճաշի դադարին մէկ մասը կը գործածեն հանդարտօրէն խոկալու։ Շատեր կը նկատեն, թէ ծառայութեան մասնակցելէ առաջ խոկալը,– նոյնիսկ քանի մը վայրկեան,– իրենց կ’օգնէ աւելի նախանձախնդրօրէն ու համարձակօրէն քարոզելու։
4. Ինչո՞ւ պէտք է խոկանք։
4 Աղօթքով խոկալը՝ Եհովայի ծառայելու մեր փափաքը պիտի խորացնէ, մեր հոգեւոր կեդրոնացումը պիտի սրէ եւ քարոզչութեան մէջ յարատեւելու մեր վճռականութիւնը պիտի ամրապնդէ։ Աստուծոյ Գլխաւոր Քարոզիչը՝ Յիսուս, խոկալէն օգտուեցաւ, եւ մենք ալ պիտի օգտուինք։