Ետ մի՛ քաշուիր. յաղթահարէ՛ անատակութեան զգացումներդ
1. Ոմանք ինչո՞ւ կը քաշուին Աստուածաշունչի ուսումնասիրութիւն մը առաջարկելու։
1 Աստուածաշունչի ուսումնասիրութիւն մը առաջարկելու կը քաշուի՞ս՝ կարծելով թէ պիտի չկարենաս զայն ազդուօրէն վարել։ Վաղեմի հաւատարիմ ծառաներէն ոմանք, ինչպէս՝ Մովսէս ու Երեմիա, երբեմն զգացին թէ որակեալ չէին իրենց նշանակումները կատարելու (Ել. 3։10, 11. 4։10. Եր. 1։4-6)։ Ուստի այս տեսակի զգացումները բնական են։ Ինչպէ՞ս կրնանք զանոնք յաղթահարել։
2. Ինչո՞ւ մեր ծառայութիւնը պէտք չէ սահմանափակենք միմիայն դռնէ դուռ քարոզելով, իսկ Աստուածաշունչի ուսումնասիրութիւն վարելը ուրիշներուն ձգելով։
2 Պէտք է մտաբերենք, որ Եհովան բնա՛ւ մեր կարողութենէն աւելին չի պահանջեր (Սաղ. 103։14)։ Ուստի, մենք կրնա՛նք իրագործել ‘աշակերտելու եւ սորվեցնելու’ մեր յանձնարարութիւնը (Մատ. 28։19, 20)։ Ասիկա այնպիսի առանձնաշնորհում մը չէ, զոր Եհովան տուած է միմիայն ամենափորձառու կամ ամենահմուտ հրատարակիչներուն (Ա. Կոր. 1։26, 27)։ Ուստի մեր ծառայութիւնը պէտք չէ սահմանափակենք միմիայն դռնէ դուռ քարոզելով, իսկ Աստուածաշունչի ուսումնասիրութիւն վարելը ուրիշներուն ձգելով։
3. Եհովան մեզ ինչպէ՞ս որակեալ դարձուցած է, Աստուածաշունչի ուսումնասիրութիւններ վարելու համար։
3 Եհովան մեզ որակեալ կը դարձնէ։ Եհովա՛ն է որ մեզ որակեալ կը դարձնէ աշակերտելու համար (Բ. Կոր. 3։5)։ Իր կազմակերպութեան միջոցով, ան մեզի սորվեցուցած է աստուածաշնչական ճշմարտութիւններ, որոնցմէ աշխարհի ամէնէն ուսեալ մարդիկն անգամ տեղեակ չեն (Ա. Կոր. 2։7, 8)։ Ան Մեծ Ուսուցիչին՝ Յիսուսին, սորվեցնելու մեթոտին առնչութեամբ արձանագրութիւն մը պահած է, որուն կրնանք հետեւիլ։ Ան նաեւ յարատեւաբար մեզ կը մարզէ ժողովքին միջոցով։ Ասկէ զատ, Եհովան մեզի հարկ եղած գործիքները տուած է Աստուածաշունչը սորվեցնելու համար, ինչպէս՝ Աստուածաշունչը կը սորվեցնէ գիրքը, որոնք ճշմարտութիւնը տրամաբանական եւ դիւրահասկնալի կերպով կը բացատրեն։ Արդ, Աստուածաշունչի ուսումնասիրութիւն մը վարելը թերեւս այնքան ալ մեծ մարտահրաւէր մը չէ, որքան որ մենք կը կարծենք։
4. Ինչո՞ւ կրնանք վստահ ըլլալ, որ Եհովան մեզի պիտի օգնէ։
4 Մովսէսն ու Երեմիան Եհովայի օգնութեա՛մբ կրցան իրենց նշանակումները կատարել (Ել. 4։11, 12. Եր. 1։7, 8)։ Մենք ալ կրնանք Եհովայէն խնդրել որ մեզի օգնէ։ Ի վերջոյ, երբ Աստուածաշունչի ուսումնասիրութիւն մը կը վարենք, Եհովային մասին ճշմարտութիւնը կը սորվեցնենք, եւ այս բանը հաճելի է իր աչքին (Ա. Յովհ. 3։22)։ Ուստի նպատակ դիր Աստուածաշունչի ուսումնասիրութիւն վարելու գործին մասնակցելու, որը ծառայութեան ամէնէն հաճելի եւ վարձահատոյց երեսակներէն մէկն է։