Ժամանակը ծախու առ ծառայութեան մէջ

2014–ի ծառայութեան տարուան ընթացքին, Եհովայի վկաները քարոզչութեան 1,945,487,604 ժամ յատկացուցին։ Ասիկա յստակ կերպով ցոյց կու տայ որ վճռած ենք Եհովայի ծառայութեան մէջ բազմազբաղ մնալ (Սաղ. 110։3. Ա. Կոր. 15։58)։ Քանի որ մնացած «ժամանակը կարճցած է», կրնա՞նք մեր թանկագին ժամերը ծառայութեան մէջ գործածել, որպէսզի կարենանք աւելի շատ մարդոց հետ շփման մէջ գալ (Ա. Կոր. 7։29)։

Ծառայութեան մէջ ժամանակը ծախու առնելը մեզմէ կը պահանջէ որ դիւրաթեք ըլլանք։ Օրինակ, եթէ ծառայութեան որոշ մէկ երեսակին կանոնաւորաբար մէկ ժամ կամ աւելի կը մասնակցիս եւ առիթ չես ունենար մէկու մը հետ խօսելու, կրնա՞ս ճշդումներ ընել որպէսզի կարենաս աւելի մարդիկ գտնել եւ անոնց հետ խօսակցիլ։ Պարագաները տեղէ տեղ կը փոխուին։ Սակայն հետեւեալ թելադրութիւնները կրնան քեզի օգնել որ ժամանակդ ծախու առնես, որպէսզի ‘հովը չծեծես’ (Ա. Կոր. 9։26)։

• Տունէ տուն վկայութիւն։ Տասնամեակներէ ի վեր, հրատարակիչները սովորաբար իրենց ծառայութեան օրը կը սկսին տունէ տուն քարոզելով։ Սակայն, քանի որ շատեր օրուան ընթացքին կ’աշխատին, կրնաս փորձել տունէ տուն քարոզել կէսօրէ ետք կամ երեկոյեան, երբ աւելի շատ մարդիկ տունը կ’ըլլան։ Օրուան ընթացքին, փողոցի ծառայութիւնը կամ առեւտրական շրջաններու մէջ ծառայութիւնը կրնայ աւելի լաւ արդիւնքներ յառաջ բերել։

• Հանրային վկայութիւն։ Ցուցասեղանները կամ հրատարակութիւններու սայլակները պէտք է զետեղուին ժողովքին թաղամասին այն վայրերուն մէջ, ուր շատ անցորդներ կ’ըլլան (տե՛ս Մեր Թագաւորութեան ծառայութիւնը թերթիկին յուլիս 2013 թիւը, էջ 5)։ Եթէ հանրային վկայութեան համար նշանակուած շրջանին մէջ խճողումը թեթեւնայ, Ժողովքի ծառայութեան յանձնախումբը կրնայ որոշել որ հրատարակութիւններու սայլակը կամ ցուցասեղանը զետեղուի այնպիսի շրջանի մը մէջ, ուր շատ աւելի անցորդներ կան։

• Վերայցելութիւններ եւ Աստուածաշունչի ուսումնասիրութիւններ։ Կրնա՞ս վերայցելութիւններուդ երթալ կամ Աստուածաշունչի ուսումնասիրութիւններդ վարել այնպիսի ատեններ, երբ ծառայութեան միւս երեսակներուն մասնակցիլը արդիւնաբեր չէ։ Օրինակ, եթէ տունէ տուն ծառայութիւնը շաբաթ առտուները ազդու կ’ըլլայ, կրնա՞ս Աստուածաշունչի ուսումնասիրութիւնդ վարել կէսօրէ ետք կամ իրիկունը։ Երբ վերայցելութիւններ կ’ընես, կարելի՞ է որ հրատարակիչները ինքնաշարժի աւելի պզտիկ խումբերու բաժնուին որպէսզի ծառայութեան մէջ աւելի՛ն իրագործեն։

Ճիշդ է որ կրնանք ժամանակը հաշուել երբ ծառայութեան կը սկսինք, բայց ուրախ կ’ըլլանք երբ մեր ծառայութիւնը արդիւնաբեր կ’ըլլայ։ Եթէ նկատես թէ որոշ ժամու մը ծառայութեան որոշ մէկ երեսակին մասնակցիլը արդիւնաբեր չէ, ուրիշ երեսակ մը փորձէ։ Եհովային՝ «հունձքին Տէրոջը» աղօթէ որ քեզի ուղղէ, որպէսզի ծառայութեան մէջ կարենաս ժամանակդ ծախու առնել (Մատ. 9։38)։