Ծառայութեան մէջ հմտութիւնդ բարելաւէ. Օտարախօս անհատի մը վկայել
Ինչո՛ւ կարեւոր է։ Եհովան «ոեւէ ազգէ» եղող մարդոց հոգեւոր բարօրութեամբ հետաքրքրուած է (Գործք 10։34, 35)։ Անոր համար, Յիսուս ըսաւ որ բարի լուրը պիտի քարոզուէր «բովանդակ աշխարհի մէջ» եւ «բոլոր ազգերուն» (Մատ. 24։14)։ Զաքարիան մարգարէացաւ, թէ «ազգերուն բոլոր լեզուներէն» եղող մարդիկ բարի լուրին պիտի ընդառաջէին (Զաք. 8։23)։ Ըստ Յովհաննէս առաքեալի տեսիլքին, մեծ նեղութենէն վերապրողներուն մէջ պիտի ըլլան «բոլոր ազգերէն ու ցեղերէն եւ ժողովուրդներէն ու լեզուներէն» մարդիկ (Յայտ. 7։9, 13, 14)։ Հետեւաբար, երբ մեր թաղամասին մէջ օտարախօսի մը հանդիպինք, պէտք է ջանանք իրեն վկայել։
Ինչպէ՛ս վկայել։
• Պատրաստուէ՛։ Ծառայութեան պայուսակիդ մէջ ունեցիր Բարի լուր՝ բոլոր ազգերուն գրքոյկը։ Ընտելացիր այն ուղղութիւններուն, որոնք նշուած են գրքոյկին սկիզբը՝ «Օտարախօսներուն ինչպէ՛ս օգնել» նիւթին տակ։ Կանխաւ մտածէ թէ ծառայութեանդ մէջ ո՛ր լեզուներուն կարիքը կրնաս ունենալ, եւ բջիջային սարքովդ jw.org կայքէն բեռնէ այդ լեզուներով տեսաերիզ մը կամ հրատարակութիւն մը։ Կրնաս JW Language app–ը գործածել քանի մը արտայայտութիւններ սորվելու համար։ Եթէ տարբեր լեզուներ խօսող ժողովքներ նոյն թաղամասին մէջ կը քարոզեն, միւս ժողովքներուն լեզուներով հրատարակութիւններ քեզի հետ մի՛ առներ երբ տունէ տուն ծառայութեան կը մասնակցիս։ Սակայն, երբ հանրային վկայութեան կը մասնակցիս բազմալեզու շրջաններու մէջ, քեզի հետ ունեցիր հրատարակութիւններ այն մարդոց լեզուներով՝ որոնց թերեւս հանդիպիս։
• Եթէ հանդիպիս անհատի մը որ քու լեզուդ չի խօսիր, լաւագոյնդ ըրէ որ իր լեզուով իրեն «Աստուծոյ մեծամեծ բաներ»ուն մասին խօսիս (Գործք 2։11)։ Զինք ուղղէ jw.org կայքին, որպէսզի իր լեզուով յաւելեալ տեղեկութիւններ ստանայ։ Եթէ հետաքրքրութիւն ցոյց տայ, անմիջապէս լեցուր Հաճեցէք այցելել (S-43) պատճէնը, եւ զայն քարտուղարին տուր։ Շարունակէ հետաքրքրուած անհատին վերայցելել, մինչեւ որ իր լեզուն խօսող անհատներ իրեն հետ կապ պահեն։
Այս ամսուան ընթացքին, հետեւեալը փորձէ.
• Յաջորդ Ընտանեկան պաշտամունքի երեկոյեան փորձի նիստ մը ունեցիր, որ ցոյց կու տայ թէ ինչպէ՛ս կրնաս օտարախօս անհատի մը վկայել։