Գաղթականներու հարցը. Միլիոնաւորներ կը փախչին Ուքրանիայէն

24 փետրուար 2022–ին, Ռուսիան յարձակեցաւ Ուքրանիայի վրայ, ինչ որ շատ լուրջ պարագայ մը ստեղծեց. միլիոնաւորներ իրենք զիրենք վտանգաւոր վիճակի մը մէջ գտան եւ սկսան փորձել Ուքրանիայէն փախչիլa։

«Ռումբերու եւ պայթումներու ձայներ կը լսէինք։ Շա՜տ վախնալիք էր. չեմ կրնար բառերով բացատրել։ Երբ որ գիտցանք թէ շոգեկառքեր կազմակերպուած են, որ մարդիկ կարենան քաղաքէն հեռանալ, մենք ալ որոշեցինք ամէն ինչ ձգել–քալել։ Ամէն մէկս հազիւ կրցաւ հետը միայն մէկ պզտիկ պայուսակ առնել։ Ատոր մէջ դրինք կարեւոր թուղթեր, դեղեր, ջուր եւ թեթեւ ուտելիքներ։ Ամէն բան մեր ետին ձգելով՝ կայարան գացինք, մինչ մեր չորս կողմը ռումբեր կը պայթէին» (Նաթալիա, Խարքով՝ Ուքրանիա)։

«Մինչեւ վերջին վայրկեան կը կարծէինք, որ պատերազմ պիտի չըլլայ։ Երբ որ սկսայ հոս–հոն պայթումի ձայներ լսել եւ պատուհանները սկսան շարժիլ, որոշեցի ձգել–քալել՝ հետս առնելով միայն կարեւոր բաներ։ Առտուան ժամը 8։00–ին տունէն ելայ եւ Լվով տանող շոգեկառք մը առի եւ հոնկէ պասով Լեհաստան անցայ» (Նատիա, Խարքով՝ Ուքրանիա)։

Այս յօդուածը կը պատասխանէ այս հարցումներուն

• Ճիշդ ի՞նչ բաներ պատճառ դարձան որ մարդիկ Ուքրանիայէն գաղթեն

• Գաղթականները ո՞ւր կրնան յոյս գտնել

• Սուրբ Գիրքը կրնա՞յ այսօր գաղթականներուն օգնել

Ճիշդ ի՞նչ բաներ պատճառ դարձան որ մարդիկ Ուքրանիայէն գաղթեն

Մարդիկ սկսան Ուքրանիայէն գաղթել, քանի որ Ռուսիան յարձակեցաւ Ուքրանիայի վրայ։ Բայց Սուրբ Գիրքը աւելի խոր պատճառներ կու տայ, թէ ինչո՛ւ աս տեսակ գաղթեր կ’ըլլան.

• Մարդկային կառավարութիւնները ժողովուրդը յուսախաբ ըրած են եւ անոնց պէտքերը չեն հոգացած։ Անոնք շատ անգամ իրենց դիրքն ու պաշտօնը օգտագործելով՝ ժողովուրդին հետ անիրաւութեամբ կը վարուին (Ժողովող 4։1. 8։9)։

• Սատանան՝ «այս աշխարհին իշխանը»՝ ա՛յնքան չար ազդեցութիւն ունի մարդոց վրայ, որ Սուրբ Գիրքը կ’ըսէ. «Ամբողջ աշխարհը Չարին իշխանութեան տակ է» (Յովհաննէս 14։30. Ա. Յովհաննէս 5։19, Նոր աշխարհի թարգմանութիւն)։

• Հարիւրաւոր տարիներէ ի վեր մարդոց գլխուն եկած խնդիրներէն զատ, այսօր մենք կ’ապրինք ժամանակի մը մէջ, որուն մասին Սուրբ Գիրքը կ’ըսէ. «Վերջին օրերը չար ժամանակներ պիտի գան» (Բ. Տիմոթէոս 3։1)։ Ասկէ զատ, վերջին օրերուն ընթացքին պիտի ըլլան պատերազմներ, բնական աղէտներ, սովեր եւ հիւանդութիւններ, որոնք պատճառ պիտի դառնան, որ մարդիկ իրենց տունը տեղը ձգեն–քալեն (Ղուկաս 21։10, 11)։

Գաղթականները ո՞ւր կրնան յոյս գտնել

Սուրբ Գիրքը ցոյց կու տայ, որ մեր Ստեղծիչը՝ Եհովանb՝ Աստուած մըն է որ կը սիրէ՛ գաղթականները եւ օտարականները եւ անոնց հետ կը զգայ (Բ. Օրինաց 10։18)։ Ան կը խոստանայ որ գաղթականներուն խնդիրները պիտի լուծէ իր երկնային կառավարութեան միջոցաւ, որ կը կոչուի՝ Աստուծոյ Թագաւորութիւնը։ Աս կառավարութիւնը բոլոր մարդկային կառավարութիւններուն տեղը պիտի առնէ (Դանիէլ 2։44. Մատթէոս 6։10)։ Եհովա Աստուած այս Թագաւորութեան միջոցաւ Սատանան մէջտեղէն պիտի վերցնէ (Հռովմայեցիս 16։20)։ Այս Թագաւորութիւնը ամբողջ աշխարհին վրայ պիտի իշխէ եւ երկիրներուն միջեւ գտնուող սահմաններուն պատճառած բաժանումներուն վերջ պիտի դնէ։ Բոլոր մարդիկը պիտի ըլլան մէկ միացած ընտանիք։ Այլեւս մէ՛կը պիտի չստիպուի իր տունէն փախչիլ, քանի որ Սուրբ Գիրքը կը խոստանայ. «Ամէն մարդ իր որթատունկին տակ ու իր թզենիին տակ պիտի նստի, վախցնող պիտի չըլլայ. վասն զի զօրքերուն Տէրոջը բերանը խօսեցաւ» (Միքիա 4։4)։

Միա՛յն Աստուծոյ Թագաւորութիւնը կրնայ վերջնական կերպով լուծել գաղթականներու հարցը։ Եհովա Աստուած իր Թագաւորութեան միջոցաւ պիտի լուծէ բոլոր այն խնդիրները, որոնք պատճառ կը դառնան որ մարդիկ գաղթեն։ Տեսնենք կարգ մը օրինակներ.

• Պատերազմ։ «[Եհովա Աստուած] պատերազմները կը դադարեցնէ» (Սաղմոս 46։9)։ Տեսնելու համար թէ Աստուած ինչպէ՛ս պատերազմներուն վերջ պիտի դնէ, կարդա՛ «Երկրի վրայ ինչպէ՞ս խաղաղութիւն պիտի գայ» յօդուածը (արաբ)։

• Զէնքի ուժով նեղութիւն տալ եւ վայրագութեամբ վարուիլ։ «[Եհովան] հարստահարութենէ ու բռնութենէ պիտի փրկէ անոնց անձը» (Սաղմոս 72։14)։ Տեսնելու համար որ մարդիկ ինչպէ՛ս կրնան իրենց մէջ արմատացած գէշ բնաւորութիւնները փոխել, կարդա՛ «Ինչպէ՞ս կրնանք ատելութեան շղթան կոտրել» յօդուածաշարքը։

• Աղքատութիւն։ «[Եհովա Աստուած] աղքատը պիտի փրկէ աղաղակելու ատենը» (Սաղմոս 72։12)։ Տեսնելու համար որ Աստուած ինչպէ՛ս պիտի լուծէ աղքատութեան բուն խնդիրները, կարդա՛ «Օր մը օրանց արդար տնտեսական պայմաններ պիտի ըլլա՞ն» յօդուածը։

• Սովեր։ «Ցորենի առատութիւն պիտի ըլլայ երկրի մէջ» (Սաղմոս 72։16)։ Տեսնելու համար որ Աստուած ինչպէս պիտի չձգէ որ մէ՛կը անօթի մնայ, կարդա՛ «Աշխարհ մը՝ ուր անօթութիւն պիտի չըլլայ» յօդուածը (արաբ)։

Սուրբ Գիրքը կրնա՞յ այսօր գաղթականներուն օգնել

Այո՛։ Սուրբ Գիրքը գաղթականներուն ո՛չ միայն ապագային նկատմամբ վստահելի յոյս կու տայ, հապա հիմա ալ կրնայ անոնց օգնել։

Սուրբ Գիրքի սկզբունք։ «Բանի մը համար հոգ մի՛ ընէք, հապա ամէն բանի մէջ աղօթքով ու աղաչանքով, գոհութիւնով մէկտեղ, ձեր խնդրանքը Աստուծոյ յայտնի ըլլայ։ Աստուծոյ խաղաղութիւնը, որ ամէն մտքէ վեր է, ձեր սրտերը ու մտքերը Յիսուս Քրիստոսով պիտի պահպանէ» (Փիլիպպեցիս 4։6, 7)։

Իմաստ։ Աստուծմէ խնդրէ որ քեզի մտքի եւ սրտի խաղաղութիւն տայ, ի՛նչ պարագայի մէջ ալ գտնուիս։ Տե՛ս «Փիլիպպեցիս 4։6, 7. ‘Բանի մը համար հոգ մի՛ ընէք’» յօդուածը։