Ի՞նչ ըսել է քրիստոնեայ ըլլալ. Աստուածաշունչը ի՞նչ կ’ըսէ

Աշխարհի չորս կողմը շատեր հպարտօրէն կ’ըսեն, թէ քրիստոնեայ են, բայց եւ այնպէս ուրիշներու հետ գէշ կերպով կը վարուին։ Ոմանք անձնասէր են, անպարկեշտ են կամ անազնիւ են։ Ուրիշներ իրենց կողակիցին հանդէպ հաւատարիմ չեն գտնուիր։ Անոնց վարքին պատճառով, կարգ մը մարդիկ հարց կու տան. ‘Արդեօք ճիշդ ի՞նչ ըսել է քրիստոնեայ ըլլալ’։

Ճիշդ ի՞նչ ըսել է քրիստոնեայ ըլլալ

Շատ դիւրին է որ մէկը ըսէ թէ քրիստոնեայ է։ Բայց ասիկա բաւարար չէ։ Ըստ Աստուածաշունչին, քրիստոնեան Յիսուս Քրիստոսին աշակերտն է (Գործք 11։26)։ Յիսուս ինք ըսաւ. «Եթէ դուք իմ խօսքիս մէջ կենաք, ճշմարտապէս իմ աշակերտներս կ’ըլլաք» (Յովհաննէս 8։31)։ Անշուշտ, չկայ մէկը որ կրնայ Յիսուսին խօսքերուն կատարելապէս հնազանդիլ։ Բայց քրիստոնեան ջանք կ’ընէ, որ Յիսուսին սորվեցուցածներուն հետեւի, եւ ասիկա ցոյց կու տայ ամէն օր իր ըրածներով։ Նկատի առնենք կարգ մը օրինակներ։

Քրիստոնեան անձնազոհ սէր ցոյց կու տայ

Յիսուս ի՞նչ ըսաւ. «‘Նոր պատուիրան մը կու տամ ձեզի, որ մէկզմէկ սիրէք, ինչպէս ես ձեզ սիրեցի, որ դուք ալ մէկզմէկ սիրէք’։ Ասով ամէնքը պիտի գիտնան թէ իմ աշակերտներս էք, եթէ իրարու վրայ սէր ունենաք» (Յովհաննէս 13։34, 35)։

Յիսուս ի՞նչ ըրաւ. Յիսուս բոլորին հանդէպ անձնազոհ սէր ցոյց տուաւ, չնայած անոնց նիւթական վիճակին, դիրքին կամ ուրկէ ըլլալնուն։ Ան հիւանդները բժշկեց, անօթիները կերակրեց եւ նոյնիսկ իր կեանքը տուաւ ուրիշներուն համար (Մատթէոս 14։14-21. 20։28)։

Քրիստոնեայ մը ինչպէ՞ս կը վարուի. Քրիստոնեան անձնազոհ սէր ցոյց տուած կ’ըլլայ, երբ ուրիշներուն հետ առատաձեռն է, ներող է եւ զատողութիւն չի դներ։ Ան պէտք ունեցողներուն կ’օգնէ եւ պատրաստ է անոնց համար զոհողութիւններ ընելու (Ա. Յովհաննէս 3։16)։

Քրիստոնեան պարկեշտ է

Յիսուս ի՞նչ ըսաւ. «Ես եմ... ճշմարտութիւնը» (Յովհաննէս 14։6)։

Յիսուս ի՞նչ ըրաւ. Յիսուս միշտ ճշմարտախօս էր եւ պարկեշտ կերպով կը վարուէր։ Ան բնաւ չփորձեց ուրիշները խաբել որ ի՛ր ուզածը ընեն, կամ՝ սխալ բաներու հաւատան։ Ան ճանչցուած էր որպէս պարկեշտ մէկը, նոյնիսկ երբ ատոր պատճառով հակառակութիւն դիմագրաւեց (Մատթէոս 22։16. 26։63-67)։

Քրիստոնեայ մը ինչպէ՞ս կը վարուի. Քրիստոնեան սուտ չի խօսիր։ Ան տուրքերը կը վճարէ, չի գողնար եւ իր գործին մէջ աշխատասէր է (Հռովմայեցիս 13։5-7. Եփեսացիս 4։28)։ Դիմացինը չի խաբեր իր օգտին համար, քննութիւններու մէջ խարդախութիւն չ’ըներ, ոչ ալ իր մասին սխալ տեղեկութիւններ կը ներկայացնէ՝ երբ գործի մը կը դիմէ (Եբրայեցիս 13։18)։

Քրիստոնեան ազնիւ կերպով կը վարուի

Յիսուս ի՞նչ ըսաւ. «Եկէ՛ք ինծի, բոլոր յոգնած ու բեռնաւորուածներ եւ ես ձեզ պիտի հանգչեցնեմ։ Իմ լուծս ձեր վրայ առէք եւ ինձմէ սորվեցէք՝ որ հեզ եմ ու սրտով խոնարհ եւ ձեր անձերուն հանգստութիւն պիտի գտնէք. վասն զի իմ լուծս քաղցր է եւ իմ բեռս թեթեւ» (Մատթէոս 11։28-30)։

Յիսուս ի՞նչ ըրաւ. Յիսուս ազնիւ անձ մըն էր, եւ իր շուրջը մարդիկ հանգիստ կը զգային։ Ան պզտիկներուն հետ քնքուշ կերպով կը վարուէր, ընկճուածները կը մխիթարէր եւ մարդոց հետ յարգանքով կը վարուէր (Մարկոս 10։13-15. Ղուկաս 9։11)։

Քրիստոնեայ մը ինչպէ՞ս կը վարուի. Քրիստոնեան ուրիշներուն հետ ազնիւ ոճով կը խօսի։ Ան կոշտ ու կոպիտ կամ անկիրթ մէկը չէ (Եփեսացիս 4։29, 31, 32)։ Ան ուրիշներով հետաքրքրուած է եւ առիթներ կը փնտռէ՝ անոնց օգտակար դառնալու (Գաղատացիս 6։10)։

Քրիստոնեան իր կողակիցին հաւատարիմ կը մնայ

Յիսուս ի՞նչ ըսաւ. «Զայն որ Աստուած միաւորեց, մարդ թող չզատէ» (Մարկոս 10։9)։

Յիսուս ի՞նչ ըրաւ. Հակառակ որ Յիսուս բնաւ չամուսնացաւ, բայց ան ամուսնացած զոյգերը քաջալերեց, որ իրարու հաւատարիմ ըլլան (Մատթէոս 19։9)։ Ան զգուշացուց այն բաներէն, որոնք կրնան ամուսնութիւն մը քանդել (Մատթէոս 5։28)։

Քրիստոնեայ մը ինչպէ՞ս կը վարուի. Քրիստոնեան չ’ըներ բան մը որ իր կողակիցը կ’անպատուէ (Եբրայեցիս. 13։4)։ Ամուսնացած զոյգերը իրարու հետ սիրով եւ յարգանքով կը վարուին (Եփեսացիս 5։28, 33)։