Եհովայի Օրհնութիւնը Մեզ կը Հարստացնէ

¹ Անհատի մը յաջողութիւնը յաճախ իր ստացած թոշակին մեծութեամբ կը չափուի։ Այս պատճառաւ է որ շատեր դրամ ունեցողները ամենէն ուրախ եւ ամենէն գոհունակ անհատները կը նկատեն։ Սակայն, անոնք որոնք կը խորհին թէ դրամը ուրախութիւն կը գնէ, մեծապէս կը սխալին։ (Ժող. 5։12) Նիւթական գետնի վրայ ‘հարստանալ ուզողները’ մնայուն ուրախութիւն չունին։ (Ա. Տիմ. 6։9) Ասոր հակառակը, Եհովայի ծառաները իրապէս ուրախ եւ աշխարհի ամենէն հարուստ անհատներն են։ (Առ. 10։22. Յայտ. 2։9) Ի՞նչպէս կրնայ ըլլալ։

² Մեր Հարստութեան Ապացոյցը. Մենք հոգեւոր խորաթափանցութիւն եւ Աստուծոյ Խօսքին՝ Աստուածաշունչին, հասկացողութիւնը ունինք։ Իր երկրային կազմակերպութեան միջոցաւ, մեր մնայուն օգտին համար, Եհովա շարունակ մեզի կը սորվեցնէ իր եւ իր Որդւոյն մասին։ Ճշգրիտ հասկացողութիւնը կարելի կը դարձնէ որ Եհովայի մօտենանք եւ իր հետ մտերիմ յարաբերութիւն մը վայելենք։ (Յակ. 4։8) Բարին չարէն զանազանելը եւ Աստուծոյ օրէնքին հետեւիլը, մեզ կը պաշտպանեն որոշ հիւանդութիւններէ եւ վտանգներէ։ Վստահութիւն ունինք որ Եհովա մեր կարիքները պիտի ապահովէ եւ ասիկա աստուածատուր գոհունակութիւն եւ մտքի խաղաղութիւն կու տայ։—Մատթ. 6։33

³ Մեր հոգեւոր եղբայրակցութեան մէջ խաղաղութիւն եւ միութիւն կը վայելենք, քանի որ Աստուծոյ հոգիին պտուղները կը մշակենք։ Քանի որ սիրոյ ամուր կապով մը միացած ենք, երբ փորձանքի հանդիպինք, բնաւ Աստուծոյ կամ մեր եղբայրներուն կողմէ լքուած չենք զգար։—Գաղ. 6։10

⁴ Մեր կեանքը իսկական իմաստ եւ նպատակ ունի։ Բարի լուրի երկրածաւալ քարոզչութեան մէջ բաժին բերելը սքանչելի առանձնաշնորհում մը կը նկատենք։ Ասիկա մնայուն ուրախութիւն կը բերէ, մինչ ուրիշներու կ’օգնենք որ Աստուծոյ հետ լաւ յարաբերութիւն մը մշակեն եւ մաքուր պաշտամունքին մէջ մեր կողքին ծառայեն։ Մեր թանկարժէք գանձը՝ ծառայութիւնը՝ Եհովայի պատիւ կը բերէ եւ իր անուան սրբացման մէջ մեր բերած բաժինը մեզի գոհունակութիւն կու տայ։ Դրական մտավիճակ մը կը պահպանենք, գիտնալով որ ապագայի նկատմամբ մեր յոյսը շուտով պիտի իրականանայ։

⁵ Մեր Գնահատութիւնը Ցոյց Տանք. Թող որ մի՛շտ Եհովայի օրհնութիւնները գնահատենք, որոնք մեզ ի՛րապէս երկրի ամենէն հարուստ մարդիկը կը դարձնեն։ (Առ. 22։4) Ամէն օր մեր ունեցած բաներուն մասին խոկալու համար ժամանակ յատկացնելը, մեզ կը մղէ որ Եհովայի երախտապարտ ըլլանք իր առատ սիրոյն համար եւ՝ շարունակենք իրեն բացարձակ պաշտամունք մատուցանել։