Ձեր Ստեղծիչը—սորվեցէք թէ ան ի՛նչպիսի մէկն է

«Իմ բոլոր բարութիւնս քու առջեւէդ պիտի անցընեմ ու Տէրոջը անունը քու առջեւդ պիտի կանչեմ»։—ԵԼԻՑ 33։19

1. Ինչո՞ւ Ստեղծիչը պատուուելու արժանի է։

ՅՈՎՀԱՆՆԷՍ առաքեալ, Աստուածաշունչի վերջին գիրքը գրողը, հետեւեալ խորունկ ծանուցումը արձանագրեց Ստեղծիչին մասին. «Արժանի ես, Տէ՛ր, փառք ու պատիւ եւ զօրութիւն առնելու, վասն զի ամէն բան դուն ստեղծեցիր եւ քու կամքովդ եղան ու ստեղծուեցան»։ (Յայտնութիւն 4։10բ) Ինչպէս հաստատուեցաւ նախորդ յօդուածին մէջ, գիտական արդի յայտնագործութիւնները յաճախ բոլոր բաներու Ստեղծիչին հաւատալու յաւելեալ պատճառներ կը հայթայթեն։

2, 3. (ա) Մարդիկ ինչո՞ւ Ստեղծիչին մասին սորվելու կարիքը ունին։ (բ) Ստեղծիչը անձամբ տեսնելը ինչո՞ւ տրամաբանական չէ։

² Որքան որ կարեւոր է Ստեղծիչի մը գոյութիւնը ընդունիլ, նոյնքան կարեւոր է գիտնալ թէ Ան ի՛նչպիսի մէկն է. թէ՝ Ան իրական անձնաւորութիւն մըն է, անձնաւորութեան այնպիսի գծեր եւ ճամբաներ ունենալով, որ անհատ մը կը հրապուրուի իրմով։ Ասիկա ի՛նչ տարողութեամբ որ ալ ըրած էք, չէ՞ք խորհիր որ զինք աւելի լաւ ճանչնալը օգտակար պիտի ըլլայ։ Ասոր համար զինք անձամբ տեսնել չի պահանջուիր, ինչպէս պիտի ընէինք, ուրիշ մարդոց հետ ծանօթանալու համար։

³ Եհովա նոյնիսկ աստղերուն Սկզբնապատճառն է. մեր արեւն ալ պարզապէս միջին չափի աստղ մըն է։ Ձեր մտքէն կ’անցնի՞ ֆիզիքապէս արեւուն աւելի մօտէն հանդիպում մը ունենալ։ Վստահաբար ո՛չ։ Շատեր նոյնիսկ կը զգուշանան անոր ակնարկ մը նետելէ, կամ, իրենց մարմինը երկար ժամանակ անոր զօրաւոր ճառագայթներուն ենթարկելու։ Անոր կորիզի ջերմաստիճանը 15,000,000°C է (27,000,000°F)։ Իւրաքանչիւր երկվայրկեան, այս ջերմակորիզային հնոցը, մօտաւորապէս չորս միլիոն թոն խտութիւն՝ ոյժի կը վերածէ։ Անոր միայն չնչին մէկ մասը երկիր կը հասնի որպէս ջերմութիւն եւ լոյս, բայց այդքանը արդէն, երկրի վրայ ամէն տեսակ կեանք կանգուն կը պահէ։ Ստեղծիչին ահաւոր զօրութեան այս հիմնական իրողութիւնները պէտք է տպաւորեն մեզ։ Տեղին ըլլալով Եսային գրեց Ստեղծիչին ‘մեծ իշխանութեան ու սաստիկ զօրութեան’ մասին։—Եսայեայ 40։26

4. Մովսէս ի՞նչ խնդրեց, իսկ Եհովա ի՞նչպէս ընդառաջեց։

⁴ Սակայն, գիտէի՞ք թէ Հ.Դ.Ա. 1513–ին Իսրայելացիները Եգիպտոսէն ելլելէն քանի մը ամիսներ ետք, Մովսէս Ստեղծիչին հետեւեալ խնդրանքը ներկայացուց. «Կ’աղաչեմ, քու փառքդ ցուցուր ինծի»։ (Ելից 33։18) Յիշելով թէ Աստուած նոյնիսկ արեւուն Սկզբնապատճառն է, կրնաք հասկնալ թէ ինչո՛ւ Մովսէսին ըսաւ. «Դուն իմ երեսս չես կրնար տեսնել. վասն զի մարդ չի կրնար զիս տեսնել ու ապրիլ»։ Ստեղծիչը արտօնեց որ Մովսէս Սինա Լերան վրայ տեղ մը պահուըտի, մինչ Ինք ‘կ’անցնի’։ Մովսէս Աստուծոյ որպէս թէ ‘ետեւէն’, կամ Ստեղծիչի փառքին կամ ներկայութեան վերջալոյսը, տեսաւ։—Ելից 33։20-23. Յովհաննու 1։18

5. Ստեղծիչը ի՞նչ կերպով Մովսէսի խնդրանքին գոհացում տուաւ, եւ ասով ի՞նչ փաստելով։

⁵ Ստեղծիչը աւելի լաւ ճանչնալու Մովսէսի ցանկութեան որոշ չափով գոհացում տրուեցաւ։ Բացայայտօրէն հրեշտակի մը միջոցաւ խօսելով, Աստուած Մովսէսի քովէն անցաւ ու հանդիսաւոր կերպով ըսաւ. «Տէ՛ր Աստուածը, ողորմած ու բարերար, երկայնամիտ եւ առատ՝ ողորմութիւնով ու ճշմարտութիւնով, հազարներուն ողորմութիւն ընող, անօրէնութիւնը, յանցանքը ու մեղքը ներող, բայց յանցաւորը ամենեւին անպարտ չի թողուր»։ (Ելից 34։6, 7) Ասիկա ցոյց կու տայ որ մեր Ստեղծիչը աւելի լաւ ճանչնալու համար պէտք է լիարժէք կերպով ըմբռնենք զինք՝ իր անձնաւորութիւնը եւ յատկանիշները եւ ոչ թէ ֆիզիքական երեւոյթ մը տեսնենք։

6. Մեր ախտազերծական դրութիւնը ինչո՞ւ հոյակապ բան մըն է։

⁶ Ասիկա ընելու կերպերէն մէկն է Աստուծոյ յատկութիւնները ըմբռնել, իր ստեղծած բաներէն։ Նկատի առէք ձեր ախտազերծական դրութիւնը։ Սայէնթիֆիք Ամէրիքըն–ի մէջ, ախտազերծութեան մասին յօդուած մը կ’ըսէր. «Ծնունդէն առաջ իսկ եւ մինչեւ մահ, ախտազերծական դրութիւնը յարատեւաբար արթուն վիճակի մէջ է։ Մասնիկներու եւ բջիջներու այլազան շարքաւորում մը . . . մեզ կը պաշտպանէ մակաբոյծներէ եւ ախտաբերներէ։ Առանց այս պաշտպաններուն, մարդիկ չէին կրնար ապրիլ»։ Ուրկէ՞ ծագում առած է այս դրութիւնը։ Այդ պարբերաթերթի յօդուածներէն մէկը կ’ըսէր. «Մարմինը մանրէական եւ ժահրային ներխուժողներու դէմ պաշտպանելու համար, ճարտարօրէն փոխազդող բջիջներու հոյակապ շարքաւորում մը մէջտեղ կու գայ նախընթաց քանի մը բջիջներէ, որոնք յղացումէն շուրջ ինը շաբաթներ ետք երեւան կու գան»։ Յղի կին մը որոշ ախտազերծութիւն մը կը փոխանցէ իր մէջ զարգացող սաղմին։ Հետագային, իր կուրծքի կաթով ալ, ան իր մանուկին ախտազերծ բջիջներ եւ օգտաշատ քիմիական տարրեր կը հայթայթէ։

7. Մեր ախտազերծական դրութեան մասին ի՞նչ բան նկատի պէտք է առնենք, եւ ո՞ր եզրակացութեան յանգելով։

⁷ Լաւ պատճառ ունիք եզրակացնելու թէ ձեր ախտազերծական դրութիւնը արդի բժշկութեան հայթայթած որեւէ բանէն գերարժէք է։ Ուստի, դուք ձեզի հարց տուէք. ‘Ասիկա ի՞նչ կը թելադրէ այս դրութեան Ծագում Տուողին կամ զայն Հայթայթողին մասին’։ Այս դրութիւնը, որ ‘յղութենէն շուրջ ինը շաբաթներ ետք առաջին անգամ ի յայտ կու գայ’, եւ որ նորածինը պաշտպանելու պատրաստ է, վստահաբար իմաստութիւն եւ կանխամտածում կը ցոլացնէ։ Բայց անիկա մեզի տակաւին ուրիշ բան մըն ալ կը յայտնէ Ստեղծիչին մասին։ Շատերս ի՞նչ կ’եզրակացնենք Ալպըրթ Շվայձըրի եւ ուրիշներու մասին, որոնք իրենց կեանքը նուիրեցին, աննպաստ պայմաններու մէջ եղողներուն բժշկական խնամք հայթայթելու համար։ Սովորաբար, այսպիսի կարեկից մարդասէրներու լաւ յատկութիւններ կը վերագրենք։ Նմանապէս, ի՞նչ եզրակացութեան կրնանք յանգիլ մեր Ստեղծիչին մասին, որ ախտազերծական դրութիւնը հաւասարապէս կու տայ թէ՛ հարուստներուն եւ թէ աղքատներուն։ Որոշ է որ Ան սիրալիր, անկողմնակալ եւ արդար է։ Ասիկա Ստեղծիչին մասին Մովսէսի լսած նկարագրութեան չի՞ համապատասխաներ։

Ան Իր Ինչպիսի Մէկը Ըլլալը կը Յայտնէ

8. Եհովա ի՞նչ մասնայատուկ կերպով ինքզինք կը յայտնէ մեզի։

⁸ Մեր Ստեղծիչը աւելի լաւ ճանչնալու ուրիշ կերպ մըն է՝ Աստուածաշունչը։ Ասիկա մասնաւորաբար կարեւոր է, քանի որ իր մասին բաներ կան, զորս գիտութիւնը եւ տիեզերքը բնաւ չեն կրնար յայտնել, իսկ ուրիշ բաներ, որոնք աւելի յստակ են Աստուածաշունչին մէջ։ Օրինակ, գիտութիւնը չի կրնար յայտնել Ստեղծիչին անձնական անունը։ Միմիայն Աստուածաշունչը կը յայտնէ Ստեղծիչին անունը եւ անոր կարեւորութիւնը։ Աստուածաշունչի Եբրայերէն ձեռագիրներուն մէջ, իր անունը շուրջ 7,000 անգամ կը տեսնուի չորս բաղաձայներով, որոնք կարելի է տառադարձել ԵՀՎՀ, որ սովորաբար Եհովա կը կարդացուի Հայերէնով։—Ելից 3։15. 6։3

9. Ստեղծիչին անձնական անուան իմաստը ի՞նչ է, եւ ասկէ ի՞նչ կ’եզրակացնենք։

⁹ Ստեղծիչը աւելի լաւ ճանչնալու համար, պէտք է գնահատենք որ ան պարզապէս վերացական «Առաջին Պատճառը», կամ տարտամ «Ես Եմ»ը չէ։ Անոր անձնական անունը ասիկա ցոյց կու տայ։ Այդ անունը Եբրայերէն բայի խոնարհում մըն է որ կը նշանակէ «ըլլալ», կամ «կը փաստէ ըլլալ»։a (Համեմատել՝ Ծննդոց 27։29. Ժողովողի 11։3) Աստուծոյ անունը կը նշանակէ՝ «Ան կը Պատճառէ Ըլլալ» եւ կը շեշտէ որ ան թէ՛ կը նպատակադրէ եւ թէ կը գործէ։ Իր անունը գիտնալով եւ զայն գործածելով, կրնանք աւելի լաւ կերպով գնահատել թէ ան իր խոստումները կը կատարէ եւ իր նպատակները վառ կերպով կ’իրականացնէ։

10. Ծննդոցի արձանագրութենէն ի՞նչ կարեւոր հասկացողութիւն կրնանք ձեռք ձգել։

¹⁰ Աստուածաշունչը՝ Աստուծոյ նպատակներուն ու անձնաւորութեան մասին գիտութեան աղբիւրն է։ Ծննդոցի արձանագրութիւնը կը յայտնէ թէ կար ժամանակ մը, երբ մարդը Աստուծոյ հետ խաղաղութեան մէջ էր եւ երկար, իմաստալից կեանքի մը ակնկալութիւնը ունէր։ (Ծննդոց 1։28. 2։7-9) Իր անուան նշանակութեան հետ ներդաշնակ ըլլալով, կրնանք վստահ ըլլալ որ Եհովա երկար ժամանակէ ի վեր մարդկութեան կրած տառապանքին եւ յուսախաբութեան վերջ պիտի դնէ։ Իր նպատակին կատարման մասին կը կարդանք. «Ունայնութեան հնազանդեցան ստեղծուածները, (ոչ թէ իրենց կամքովը՝ հապա անոր համար որ Աստուած հնազանդեցուց,) այն յոյսով, որ . . . Աստուծոյ որդիներուն փառաւոր ազատութեանը պիտի հասնին»։—Հռովմայեցիս 8։20, 21

11. Աստուածաշունչի պատմութիւնները ինչո՞ւ նկատի պէտք է առնենք, եւ անոնցմէ մէկուն մանրամասնութիւնները ի՞նչ են։

¹¹ Աստուածաշունչը դարձեալ կրնայ օգնել մեզի, որպէսզի մեր Ստեղծիչը աւելի լաւ ճանչնանք, քանի որ հոն կը յայտնէ վաղեմի Իսրայէլի հետ գործառնութիւն ունեցած ժամանակ իր արարքներուն եւ հակազդեցութիւններուն մասին։ Նկատի առէք Եղիսէի եւ թշնամի Սուրիացիներու հրամանատարին՝ Նէեմանի օրինակը։ Երբ այս պատմութիւնը կարդաք Դ. Թագաւորաց 5–րդ գլուխին մէջ, պիտի տեսնէք թէ գերեվարուած Իսրայելացի աղջնակ մը պնդեց որ Նէեմանի բորոտութիւնը կրնար բուժուիլ, Իսրայէլի մէջ գտնուող Եղիսէի օգնութեամբ։ Նէեման հոն գնաց, ակնկալելով որ Եղիսէ իր ձեռքերը տարածելով խորհրդաւոր բուժիչ արարողութիւն մը ընէ։ Հակառակը, Եղիսէ ըսաւ Սուրիացիին որ Յորդանան Գետին մէջ լոգնայ։ Թէեւ Նէեմանի պաշտօնեաները ստիպուեցան զինք համոզել որ ենթարկուի, բայց երբ հնազանդեցաւ՝ բժշկուեցաւ։ Նէեման թանկարժէք նուէրներ ուզեց մատուցանել, բայց Եղիսէ մերժեց զանոնք։ Որմէ ետք, Եղիսէի ընկերակիցը գաղտագողի գնաց եւ սուտ մը խօսելով Նէեմանէն կարգ մը արժէքաւոր բաներ առաւ։ Իր անպարկեշտութեան պատճառով ան բորոտութեամբ զարնուեցաւ։ Ասիկա հետաքրքրական մարդկային պատմութիւն մըն է, որմէ կրնանք դաս առնել։

12. Եղիսէի եւ Նէեմանի դրուագէն ի՞նչ եզրակացութիւններու կը յանգինք։

¹² Այս դրուագը գրաւիչ կերպով ցոյց կու տայ թէ տիեզերքի Մեծ Ստեղծիչը շատ բարձրամիտ չէ որ պզտիկ աղջնակի մը հաճութեամբ չնայի. ինչ որ ներկայ շատ մը մշակոյթներուն համար խորթ է։ Անիկա նաեւ կ’ապացուցանէ որ Ստեղծիչը իր հաճութիւնը միայն մէկ ցեղի կամ ազգի չի տար։ (Գործք 10։34, 35) Հետաքրքրական է նաեւ, թէ փոխանակ անցեալին եւ ներկայիս շատ մը «բուժողներուն» յատուկ եղող խաբէական կերպերը գործածելու, Ստեղծիչը հոյակապ կերպով իմաստութիւն ցոյց տուաւ։ Ան գիտէր ինչպէս բուժել բորոտութիւնը։ Ան նաեւ ներատեսութիւն եւ արդարութիւն ցոյց տուաւ, թոյլ չտալով որ խաբեբայութիւնը յաջողի։ Ասիկա ալ Մովսէսի լսած Եհովայի անձնաւորութեան հետ չի՞ ներդաշնակուիր։ Թէեւ Աստուածաշունչի այս դէպքը երկար չէ, բայց անկէ շա՛տ բան կրնանք երեւան հանել մեր Ստեղծիչին մասին։—Սաղմոս 33։5. 37։28

13. Բացատրեցէք թէ ի՛նչպէս կրնանք արժէքաւոր դասեր քաղել Աստուածաշունչի պատմութիւններէն։

¹³ Իսրայէլի ապերախտ արարքներուն մասին ուրիշ դրուագներ եւ անոնց հանդէպ Աստուծոյ ընդառաջումը կ’ապացուցանէ որ Եհովա իրապէս կը հոգայ։ Աստուածաշունչը կ’ըսէ թէ Իսրայելացիները կրկին անգամ փորձեցին զինք՝ ցաւցնելով ու վշտացնելով։ (Սաղմոս 78։40, 41) Հետեւաբար, Ստեղծիչը զգացումներ ունի, եւ մարդոց ըրածով հետաքրքրուած է։ Շատ բան կրնանք սորվիլ նաեւ լաւածանօթ անհատներու մասին եղած դէպքերէն։ Երբ Դաւիթ Իսրայէլի Թագաւոր ընտրուեցաւ, Աստուած Սամուէլի ըսաւ. «Մարդը երեւցածին կը նայի, բայց Տէրը սրտին կը նայի»։ (Ա. Թագաւորաց 16։7) Այո, Ստեղծիչը մեր ներքինին կը նայի եւ ոչ թէ պարզ երեւոյթին։ Ասիկա որքա՜ն կը հանգստացնէ մեզ։

14. Մինչ կը կարդանք Եբրայերէն Գրութիւնները, ի՞նչ օգտակար բան կրնանք ընել։

¹⁴ Աստուածաշունչի երեսունինը գիրքերը Յիսուսէ առաջ գրուած էին եւ անհրաժեշտ է որ զանոնք կարդանք։ Ասոր նպատակը պէտք չէ ըլլայ պարզապէս Աստուածաշունչի դէպքերը կամ պատմութիւնները սորվիլ։ Եթէ իրապէս կ’ուզենք մեր Ստեղծիչին ի՛նչպիսի մէկը ըլլալը գիտնալ, այդ դէպքերուն մասին պէտք է խոկանք, թերեւս մենք մեզի հարց տալով՝ ‘Այդ դրուագը ի՞նչ կը յայտնէ իր անձնաւորութեան մասին։ Ասոր մէջ իր ո՞ր յատկութիւնները կը տեսնուին’։b Այսպէս ընելը կրնայ նոյնիսկ կասկածոտ անհատներու օգնել տեսնելու որ Աստուածաշունչը աստուածային ծագում ունի եւ թերեւս այսպիսով անոր սիրալիր Հեղինակը ճանչնալու հիմ մը նետուի։

Մեծ Ուսուցիչ մը կ’Օգնէ որ Ստեղծիչը Ճանչնանք

15. Յիսուսի արարքներն ու ուսուցումները ինչո՞ւ կրնան դաստիարակիչ ըլլալ։

¹⁵ Ճիշդ է որ Ստեղծիչի գոյութեան վրայ կասկածող, կամ Աստուծոյ հանդէպ տարտամ տեսակէտ ունեցող անհատներ շատ քիչ բան գիտեն Աստուածաշունչի մասին։ Թերեւս հանդիպած էք անհատներու որոնք չեն կրնար ըսել որ Մովսէս՝ Մատթէոսէն առա՞ջ թէ վերջ ապրած է, եւ գրեթէ ոչինչ գիտեն Յիսուսի արարքներուն եւ ուսուցումներուն մասին։ Ասիկա շատ ցաւալի է, քանի որ անհատ մը շատ բան կրնայ սորվիլ Մեծ Ուսուցիչէն՝ Յիսուսէն։ Աստուծոյ հետ սերտ յարաբերութիւն վայելած ըլլալով, ան կրնար յայտնել թէ Ստեղծիչը ի՛նչպիսի մէկն է։ (Յովհաննու 1։18. Բ. Կորնթացիս 4։6. Եբրայեցիս 1։3) Յիսուս ասիկա ըրաւ։ Ան նոյնիսկ առիթով մը ըսաւ. «Ան որ զիս տեսաւ՝ Հայրը տեսաւ»։—Յովհաննու 14։9

16. Սամարացի կնոջ մը հետ Յիսուսի գործառնութիւնը ի՞նչ ցոյց կու տայ։

¹⁶ Հետեւեալ օրինակը նկատի առէք։ Առիթով մը, երբ Յիսուս ճամբորդելէն յոգնած էր, ան Սուքարի մօտ Սամարացի կնոջ մը հետ խօսեցաւ։ Անոր խոր ճշմարտութիւններ յայտնեց ‘Հայրը հոգիով ու ճշմարտութիւնով պաշտելու’ շուրջ։ Այդ ժամանակ, Հրեաները կը զգուշանային Սամարացիներէն։ Անոնց հակառակը, Յիսուս արտացոլացուց ամէն ազգերէն անկեղծ այրեր ու կիներ ընդունելու Եհովայի պատրաստակամութիւնը, ինչպէս նշեցինք Եղիսէի ու Նէեմանի դէպքով։ Ասիկա մեզ կը հանգստացնէ, գիտնալով որ Եհովա ներկայ աշխարհը պատող կրօնական նեղմիտ մոլեռանդութեան ենթակայ չէ։ Կրնանք նաեւ ուշադրութիւն ընել այն իրողութեան որ Յիսուս ուզեց կնոջ մը սորվեցնել, եւ այս պարագային, կնոջ մը, որ իր ամուսինը չեղողի մը հետ կը կենակցէր։ Փոխանակ զինք դատապարտելու, անոր հետ այնպիսի յարգանքով վարուեցաւ որ իրապէս օգնեց անոր։ Անկէ ետք, ուրիշ Սամարացիներ ալ մտիկ ըրին Յիսուսի եւ եզրակացուցին. «Գիտենք թէ անիկա է ճշմարտապէս աշխարհի Փրկիչը»։—Յովհաննու 4։2-30, 39-42. Գ. Թագաւորաց 8։41-43. Մատթէոս 9։10-13

17. Ղազարոսի յարութեան պատմութիւնը ի՞նչ եզրակացութեան կը յանգեցնէ։

¹⁷ Հիմա ուրիշ օրինակով մը տեսնենք որ Յիսուսի արարքներուն եւ ուսուցումներուն հետ ընտելանալով ի՛նչպէս կրնանք սորվիլ Ստեղծիչին մասին։ Յիսուսի բարեկամին՝ Ղազարոսի մահուան պարագան նկատի առէք։ Յիսուս նախապէս իր զօրութիւնը ցոյց տուած էր մեռելներ յարուցանելով։ (Ղուկաս 7։11-17. 8։40-56) Արդ, ան ի՞նչպէս հակազդեց, երբ տեսաւ Ղազարոսի քրոջ՝ Մարիամի՝ ողբը։ Յիսուս «իր հոգիին մէջ հառաչեց ու խռովեցաւ»։ Ան անտարբեր կամ վերապահ մէկը չէր. «Յիսուս լացաւ»։ (Յովհաննու 11։33-35) Ասիկա պարզապէս զգացումներու յայտնաբերում մը չէր։ Յիսուս դրական քայլի անցաւ, ան յարուցանեց Ղազարոսը։ Կրնաք երեւակայել թէ ասիկա որքա՛ն օգնեց առաքեալներուն, որ Ստեղծիչին զգացումներն ու արարքները գնահատեն։ Անիկա մեզի եւ ուրիշներուն ալ պէտք է օգնէ որ Ստեղծիչին անձնաւորութիւնը եւ ճամբաները հասկնանք։

18. Ի՞նչ պէտք է ըլլայ մարդոց զգացումը Աստուածաշունչ սերտելու նկատմամբ։

¹⁸ Աստուածաշունչը սերտելը եւ Ստեղծիչին մասին յաւելեալ տեղեկութիւն առնելը ամչնալիք բաներ չեն։ Աստուածաշունչը ժամանակավրէպ բան մը չէ։ Յովհաննէս մէկն էր որ զայն ուսումնասիրեց եւ Յիսուսի մտերիմ բարեկամը եղաւ։ Ան հետագային գրեց. «Գիտենք թէ Աստուծոյ Որդին եկաւ ու մեզի կարողութիւն տուաւ որպէս զի ճշմարիտը ճանչնանք։ Մենք այն ճշմարիտին մէջ ենք, իր Որդիին Յիսուս Քրիստոսին մէջ։ Անիկա է ճշմարիտ Աստուածն ու յաւիտենական կեանքը»։ (Ա. Յովհաննու 5։20) Նկատի առէք որ ‘ճշմարիտ Աստուծոյ’՝ Ստեղծիչին մասին գիտութիւն ստանալու համար ձեր «կարողութիւն»ը գործածելը կրնայ «յաւիտենական կեանք»ի առաջնորդել։

Ի՞նչպէս Կրնաք Ուրիշներուն Օգնել որ Իր Մասին Սորվին

19. Սկեպտիկ անհատներուն օգնելու համար ի՞նչ քայլ առնուած է։

¹⁹ Կարգ մը անհատներ շատ ապացոյցներ կ’ուզեն որպէսզի հաւատան թէ կարեկից Ստեղծիչ մը կայ, որ մեր մասին կը մտածէ, եւ գնահատեն անոր ի՛նչպիսի մէկը ըլլալը։ Միլիառաւոր անհատներ կան որոնք դեռ կը կասկածին Աստուծոյ վրայ, կամ Անոր մասին անոնց ունեցած աշխարհահայեացքը Աստուածաշունչէն չէ։ Անոնց ի՞նչպէս կրնաք օգնել։ Եհովայի Վկաներու 1998/1999 նահանգային եւ միջազգային համաժողովներուն, ազդու գործիք մը լոյս տեսաւ, բազմաթիւ լեզուներով՝ Մեզի Հոգ Տանող Ստեղծիչ մը Կա՞յ։

20, 21. (ա) Ստեղծիչ գիրքը ի՞նչպէս կարելի է յաջող կերպով գործածել։ (բ) Փորձառութիւններ պատմեցէք Ստեղծիչ գրքին արդէն իսկ ունեցած ազդեցութեան մասին։

²⁰ Այս գրականութիւնը ձեր հաւատքն ալ պիտի զօրացնէ մեր Ստեղծիչին վրայ, ինչպէս նաեւ ձեր գնահատութիւնը՝ իր անձնաւորութեան եւ ճամբաներուն հանդէպ։ Ինչո՞ւ կրնանք վստահութեամբ ասիկա ըսել։ Քանի որ, Մեզի Հոգ Տանող Ստեղծիչ մը Կա՞յ գիրքը յատկապէս պատրաստուած է այսպիսի նպատակներ ի մտի ունենալով։ Ամբողջ գիրքը բնաբանի մը շուրջ կը դառնայ՝ «Ի՞նչ Բան Ձեր Կեանքը Աւելի Իմաստալից Կրնայ Դարձնել»։ Բովանդակութիւնը այնպիսի կերպով մը ներկայացուած է, որ նոյնիսկ որոշ ուսում ունեցող անհատներ մեծապէս հետաքրքրական պիտի գտնեն զայն։ Սակայն, անիկա մեր բոլորին տենչերուն հետ առնչութիւն ունի։ Ստեղծիչին գոյութեան վրայ կասկած ունեցողներուն համար ալ հետաքրքրաշարժ եւ համոզիչ նիւթեր կան։ Գիրքը չի թելադրեր որ ընթերցողը Ստեղծիչի մը հաւատայ։ Սկեպտիկ անհատներ մեծապէս պիտի յափշտակուին գիտական վերջին յայտնագործութիւններուն եւ մտայղացումներուն ներկայացուած կերպով։ Այս իրողութիւնները նոյնիսկ Աստուծոյ հաւատացողներուն հաւատքը պիտի զօրացնեն։

²¹ Այս նոր գիրքը երբ ուսումնասիրէք, պիտի տեսնէք թէ անոր կարգ մը մասերը Աստուածաշունչի ընդհանուր պատմութեան վրայ աչք մը կը նետեն, այնպիսի կերպով մը որ Աստուծոյ անձնաւորութեան երեսակները կ’ընդգծեն, ընթերցողներուն օգնելով որ Աստուած աւելի լաւ ճանչնան։ Զայն կարդացողներէն շատեր, ըսած են թէ ասիկա ճշմարիտ եղած է իրենց պարագային։ Կը մաղթենք որ ձեզի համար ալ պարագան նոյնը ըլլայ, մինչ այս գրքին հետ կ’ընտելանաք եւ զայն կը գործածէք ուրիշներուն օգնելով որ իրենց Ստեղծիչը աւելի լաւ ճանչնան։

[Ստորանիշներ]

Նշմարեցի՞ք

◻ Մովսէս ի՞նչպէս Եհովայի հետ աւելի լաւ ծանօթացաւ Սինա Լերան վրայ։

◻ Աստուածաշունչի ուսումնասիրութիւնը ինչո՞ւ կ’օգնէ գիտնալու թէ Աստուած ի՛նչպիսի մէկն է։

◻ Մինչ կը կարդանք Աստուածաշունչը, ի՞նչ կրնանք ընել մեր Ստեղծիչին աւելի մօտենալու համար։

◻ Ստեղծիչ գիրքը գործածելու ձեր ծրագիրները ի՞նչ են։

[Նկար՝ էջ 15]

եռեալ Ծովու Մագաղաթներէն հատուած մը, ուր ընդգծուած է Քառագիրը (Եբրայերէնով Աստուծոյ անունը)

[Նկարին աղբիւրը]

Courtesy of the Shrine of the Book, Israel Museum, Jerusalem