Եհովայի կազմակերպութիւնը կը գնահատէ՞ք

«Տէրը այսպէս կ’ըսէ. ‘Երկինք իմ աթոռս է ու երկիր իմ ոտքերուս պատուանդանն է’»։—ԵՍԱՅԵԱՅ 66։1

1, 2. (ա) Եհովայի կազմակերպութեան ո՞ր տեսանելի ապացոյցին կրնա՞ք մատնանշել։ (բ) Եհովայի բնակարանը ո՞ւր է։

ԿԸ ՀԱՒԱՏԱ՞Ք որ Եհովան կազմակերպութիւն մը ունի։ Եթէ այո, ձեր հաւատքը ի՞նչ բանի վրայ հիմնուած է։ Թերեւս պատասխանէք՝ ‘Քանի որ Թագաւորութեան Սրահ ունինք։ Երէցներու մարմին ունեցող լաւ կարգադրուած ժողովք մը ունինք։ Նշանակուած շրջանային տեսուչ մը ունինք, որ որոշուած ժամանակներուն մեզ կ’այցելէ։ Կազմակերպուած համաժողովներու կը յաճախենք։ Մեր երկրին մէջ Դիտարանի Ընկերութեան մասնաճիւղը ունինք։ Վստահաբար, այս բոլորը եւ տակաւին ուրիշ բաներ կը փաստեն որ Եհովա գործունեայ կազմակերպութիւն մը ունի’։

² Այս երեսակները կազմակերպութիւն մը կը նշեն։ Բայց եթէ մեր տեսած եւ գնահատած բոլոր բաները միմիայն երկրային են, այդ պարագային Եհովայի կազմակերպութիւնը լիակատար կերպով չենք ըմբռնած։ Եհովա Եսայիի ըսաւ որ երկիրը պարզապէս Իր ոտքերուն պատուանդանն է, բայց երկինքը՝ Իր աթոռն է։ (Եսայեայ 66։1) Եհովա ո՞ր ‘երկնքին’ ակնարկութիւն կ’ընէր։ Մեր մթնոլորտի՞ն, անջրպետի՞ն, թէ կեանքի ուրիշ մակարդակի մը։ Եսային կը խօսի Եհովայի ‘սուրբ ու փառաւոր բնակութեան’ մասին, իսկ սաղմոսերգուն այս երկինքը կը նկարագրէ, որպէս «իր բնակութեանը տեղ»ը։ Հետեւաբար, Եսայեայ 66։1–ի «երկինքը» կ’ակնարկէ անտեսանելի հոգեղէն ծիրին, ուր Եհովա գերագոյն դիրքը կը գրաւէ։—Եսայեայ 63։15. Սաղմոս 33։13, 14

3. Մեր կասկածները ի՞նչպէս կրնանք փարատել։

³ Ուստի, եթէ իրապէս կ’ուզենք ըմբռնել եւ գնահատել Եհովայի կազմակերպութիւնը, մեր աչքերը երկինք պէտք է ուղղենք։ Բայց ասիկա խնդիր մը կը յարուցանէ ոմանց։ Քանի որ Եհովայի երկնային կազմակերպութիւնը անտեսանելի է, ի՞նչպէս գիտենք որ անիկա իրապէս գոյութիւն ունի։ Ոմանք թերեւս որոշ ատեն տատամսին ու հարց տան. ‘Ի՞նչպէս կրնանք վստահ ըլլալ’։ Հաւատքը ի՞նչպէս կրնայ կասկածները փարատել։ Երկու գլխաւոր կերպերով. Աստուծոյ Խօսքը անձնապէս խոր կերպով ուսումնասիրելով եւ քրիստոնէական ժողովներուն կանոնաւորաբար յաճախելով եւ անոնց մասնակցելով։ Այդ ժամանակ փապուղիին միւս կողմը կը տեսնենք ճշմարտութեան լոյսը։ Աստուծոյ կարգ մը ծառաներն ալ կասկածներ ունեցած են։ Եղիսէի ծառային պարագան նկատի առնենք, երբ Իսրայէլ Սուրիոյ թագաւորին կողմէ յարձակումի ենթարկուած էր։—Բաղդատել՝ Յովհաննու 20։24-29. Յակոբու 1։5-8։

Երկնային Զօրքերը Տեսած Անհատ մը

4, 5. (ա) Եղիսէի ծառան ի՞նչ բանի դժուարութիւն ունէր։ (բ) Եհովա ի՞նչպէս պատասխանեց Եղիսէի աղօթքին։

⁴ Սուրիոյ թագաւորը գիշերով հզօր բանակ մը ղրկեց Դօթայիմ, Եղիսէն ձերբակալելու համար։ Երբ Եղիսէի ծառան առաւօտ կանուխ զարթնեցաւ ու Միջին Արեւելեան իրենց բնակարանին տանիքը ելաւ թարմ օդ շնչելու, սարսափեցա՜ւ։ Ձիերով ու ռազմական կառքերով սուրիական ամբողջ բանակ մը քաղաքը շրջապատած էր, Աստուծոյ մարգարէն ձերբակալելու համար։ Եղիսէի ծառան բացագանչեց. «Ո՜հ, տէ՛ր իմ, ի՞նչ ընենք»։ Բացայայտօրէն հանդարտօրէն ու համոզումով Եղիսէ պատասխանեց. «Մի՛ վախնար, քանզի մեզի հետ եղողները անոնց հետ եղողներէն շատուոր են»։ Ծառան զարմացած՝ ինքնիրեն հարց տուած ըլլալու էր՝ ‘Ո՞ւր են. ես մէ՛կը չեմ տեսներ’։ Երբեմն մենք ալ այս դժուարութիւնը կրնանք ունենալ. կը թերանանք հասկացողութեան կամ իմացողութեան աչքերով երկնային զօրքերը տեսնել։—Դ. Թագաւորաց 6։8-16. Եփեսացիս 1։18

⁵ Եղիսէ աղօթեց որ իր ծառային աչքերը բացուին։ Անկէ ետք ի՞նչ պատահեցաւ։ «Տէրը ծառային աչքերը բացաւ ու տեսաւ որ ահա լեռը Եղիսէին չորս կողմը հրեղէն ձիերով ու կառքերով լեցուն էր»։ (Դ. Թագաւորաց 6։17) Այո, ան տեսաւ երկնային զօրքերը, հրեշտակային բանակները, որոնք Աստուծոյ ծառան պաշտպանելու պատրաստ էին։ Ա՛յն ատեն ան հասկցաւ Եղիսէի ունեցած վստահութիւնը։

6. Եհովայի երկնային կազմակերպութիւնը ի՞նչպէս կրնանք ըմբռնել։

⁶ Մենք ալ երբեմն Եղիսէի ծառային նման ըմբռնելու դժուարութիւն կ’ունենա՞նք։ Կարգ մը երկիրներու մէջ քրիստոնէական գործունէութեան կամ մեզի սպառնացող կացութիւններուն միայն ֆիզիքակա՞ն կողմը տեսնելու հակամէտ ենք։ Եթէ այո, մենք ալ կրնա՞նք մասնայատուկ տեսիլք մը ակնկալել, որ մեզ լուսաւորէ։ Ո՛չ, որովհետեւ մենք ունինք բան մը որ Եղիսէի ծառան չունէր. բազմաթիւ տեսիլքներ պարունակող գիրք մը՝ Աստուածաշունչը՝ որ մեզի հասկացողութիւն կու տայ երկնային կազմակերպութեան մասին։ Այդ ներշնչեալ Խօսքը ուղղութիւն տուող սկզբունքներ ալ կու տայ, որոնք կրնան մեր մտածելակերպն ու ապրելակերպը ուղղել։ Սակայն, ներատեսութիւն ունենալու եւ Եհովայի կարգադրութիւններուն հանդէպ գնահատութիւն մշակելու համար ջանք պէտք է թափենք։ Ասիկա կրնանք ընել անձնական ուսումնասիրութեամբ, աղօթքով ու խորհրդածելով։—Հռովմայեցիս 12։12. Փիլիպպեցիս 4։6. Բ. Տիմոթէոս 3։15-17

Իմանալու Համար Ուսումնասիրել

7. (ա) Աստուածաշունչի անձնական ուսումնասիրութեան հարցով, ոմանք ի՞նչ դժուարութիւն ունին։ (բ) Ինչո՞ւ կ’արժէ անձնական ուսումնասիրութեան համար ջանք թափել։

⁷ Անձնական ուսումնասիրութիւնը կրնայ շատերուն համար հաճելի չըլլալ, մանաւանդ անոնց համար որոնք դպրոցի մէջ բնաւ ուսումը չեն սիրած կամ բնաւ ասիկա ընելու պատեհութիւնը չեն ունեցած։ Սակայն, եթէ Եհովայի կազմակերպութիւնը մեր հասկացողութեան աչքերով պիտի իմանանք ու գնահատենք, ուսումնասիրելու փափաք մը պէտք է զարգացնենք։ Եթէ պատրաստութիւն չտեսնէք, համադամ ճաշ մը կրնա՞ք վայելել։ Ոեւէ խոհարար ձեզի պիտի ըսէր որ համադամ ճաշ մը պատրաստութեան կը կարօտի։ Բայց անիկա կէս ժամէն աւելի նուազ ժամանակի մը մէջ կ’ուտուի ու կը վերջանայ։ Սակայն, անձնական ուսումնասիրութեան օգուտները ամբողջ կեանքի տեւողութեան կը մնան։ Երբ մեր ձեռք ձգած յառաջդիմութիւնը տեսնենք, կը սկսինք անձնական ուսումնասիրութեան համը առնել։ Պօղոս առաքեալ տեղին ըլլալով ըսաւ որ անդադար ուշադրութիւն պէտք է ընծայենք մենք մեզի եւ մեր ուսուցումին եւ շարունակենք հանրային ընթերցանութեամբ պարապիլ։ Յարատեւ ջանք կը պահանջուի, բայց անոր օգուտները յաւիտենական են։—Ա. Տիմոթէոս 4։13-16

8. Առակաց գիրքը ի՞նչ կեցուածք կը յանձնարարէ։

⁸ Վաղեմի իմաստուն մարդ մը ըսաւ. «Որդեա՛կ իմ [կամ դուստրս], եթէ իմ խօսքերս ընդունիս ու իմ պատուիրանքներս քովդ պահես, այնպէս որ ականջդ իմաստութեան տաս ու սիրտդ հանճարին բանաս, եթէ դուն իմաստութիւնը քեզի կանչես եւ քու ձայնդ հանճարին ուղղես, եթէ զանիկա արծաթի պէս փնտռես ու ծածուկ գանձերու պէս խնդրես [«շարունակես խնդրել», ՆԱ], այն ատեն Տէրոջը վախը պիտի հասկնաս եւ Աստուծոյ գիտութիւնը պիտի գտնես»։—Առակաց 2։1-5

9. (ա) ‘Աստուծոյ գիտութեան’ հետ բաղդատած ի՞նչ է ոսկիին արժէքը։ (բ) Ճշգրիտ գիտութիւն ձեռք ձգելու համար ի՞նչ գործիքներու պէտք ունինք։

⁹ Կը նկատէ՞ք որ պարտականութիւնը որու վրայ դրուած է։ Յաճախ կրկնուած նախադասութիւնն է՝ ‘Եթէ դուն’։ Նաեւ նկատի առէք հետեւեալ արտայայտութիւնը. ‘Եթէ ծածուկ գանձերու պէս շարունակես խնդրել’։ Պահ մը մտածեցէք հանքահաններու մասին, որոնք Հարաւային Ափրիկէի, Մեքսիկայի, Պոլիվիայի եւ ուրիշ երկիրներու մէջ դարեր փորեցին արծաթ ու ոսկի գտնելու համար։ Անոնք տքնաջան աշխատեցան բահերով եւ բրիչներով ժայռին մէջ փորելով, որպէսզի այս թանկարժէք մետաղները հանեն։ Անոնք ոսկին այնքան թանկարժէք կը նկատէին որ Գալիֆորնիայի (Ա.Մ.Ն.) մէջ միայն մէկ հանքին մէջ 591 քմ. փապուղի մը փորեցին, շուրջ 1.5 քմ. ուղղահայեաց խորութեամբ՝ պարզապէս ոսկի գտնելու համար։ Բայց ոսկին կրնա՞ք ուտել. կրնա՞ք խմել։ Եթէ անապատին մէջ անօթութենէ ու ծարաւէ կը մեռնիք, անիկա կրնա՞յ ձեզ ողջ պահել։ Ո՛չ. անոր արժէքը շինծու եւ մարդոց քմահաճոյքէն կախեալ է, միջազգային շուկային համաձայն, յարատեւ փոփոխութեան ենթակայ։ Այսուհանդերձ, մարդիկ անոր համար մեռած են։ Արդ, որքա՞ն ջանքի արժանի է հոգեւոր ոսկին, «Աստուծոյ գիտութիւնը»։ Պահ մը խորհեցէք. տիեզերքի Գերիշխան Տիրոջ, իր կազմակերպութեան եւ իր նպատակներուն մասին գիտութիւն։ Ասիկա ընելու համար հոգեւոր բահեր եւ բրիչներ՝ Աստուածաշունչի վրայ հիմնուած օգնական գրականութիւններ՝ կրնանք գործածել, Եհովայի Խօսքին խորը փորելու եւ անոր իմաստին թափանցելու համար։—Յոբայ 28։12-19

Ներատեսութեան Համար Փորել

10. Դանիէլ տեսիլքի մը մէջ ի՞նչ տեսաւ։

¹⁰ Հիմա քիչ մը հոգեւորապէս փորենք, որպէսզի Եհովայի երկնային կազմակերպութեան մասին սկսինք գիտութիւն ձեռք ձգել։ Հիմնական ներատեսութիւն ունենալու համար, երթանք իր աթոռին վրայ նստած Հինաւուրցին մասին Դանիէլի տեսիլքին։ Դանիէլ կը գրէ. «Երբ կը դիտէի, աթոռներ դրուեցան ու Հինաւուրցը նստաւ։ Անոր զգեստը՝ ձիւնի պէս ճերմակ ու գլխուն մազը մաքուր բուրդի պէս էր։ Անոր աթոռը՝ կրակի բոցի պէս ու անիւները վառած կրակի պէս էին։ Անոր առջեւէն կրակի գետ մը կ’ելլէր ու կը վազէր։ Հազարաւորներ ծառայութիւն կ’ընէին անոր եւ բիւրաւորներ անոր առջեւ կը կայնէին։ Ատեանը բազմեցաւ դատելու ու գրքերը բացուեցան»։ (Դանիէլ 7։9, 10) Որո՞նք են այս բիւրաւորները որոնք Եհովայի կը ծառայէին։ Նոր Աշխարհի Թարգմանութեան լուսանցքի բացատրութիւնները որպէս «բահեր» եւ «բրիչներ» գործածելով, մեզի կը տանին կարգ մը վերագրումներու, ինչպէս Սաղմոս 68։17 եւ Եբրայեցիս 1։14–ին։ Այո, սպասարկողները՝ երկնային հրեշտակներ են։

11. Դանիէլի տեսիլքը ի՞նչպէս Եղիսէի խօսքերը հասկնալու կ’օգնէ։

¹¹ Դանիէլի տեղեկութիւնը մեզի չ’ըսեր որ ինք Աստուծոյ հրամանին ներքեւ եղող բոլոր հաւատարիմ հրեշտակները տեսաւ։ Թերեւս միլիոնաւոր ուրիշներ ալ կային։ Բայց վստահաբար հիմա կը հասկնանք թէ ինչո՛ւ Եղիսէ ըսաւ՝ «Մեզի հետ եղողները անոնց հետ եղողներէն շատուոր են»։ Սուրիոյ թագաւորին բանակը՝ որուն ետին կը գտնուէին անհաւատարիմ հրեշտակները կամ դեւերը՝ շուքի մէջ կը մնային Եհովայի երկնային բանակներուն քով։—Սաղմոս 34։7. 91։11

12. Հրեշտակներու մասին ի՞նչպէս կրնաք աւելին գիտնալ։

¹² Թերեւս կը փափաքիք աւելի լայն տեղեկութիւն ստանալ այս հրեշտակներուն՝ զոր օրինակ Եհովայի ծառայութեան մէջ անոնց խաղցած դերին՝ մասին։ Հրեշտակ բառին Յունարէն գործածութենէն կրնանք տեսնել որ անոնք պատգամաբերներ են, քանի որ այս բառը կը նշանակէ նաեւ «պատգամաբեր»։ Բայց անոնց պարտականութիւնները շատ աւելի են։ Սակայն ասիկա գիտնալու համար, պէտք է փորէք։ Եթէ ձեզի մատչելի է Խորաթափանց Ակնարկ Սուրբ Գրութիւններուն Վրայ գիրքը, կրնաք անկէ ուսումնասիրել «հրեշտակներ» նիւթը, կամ Դիտարան–ի անցեալի յօդուածներուն երթալ։ Պիտի ապշիք, տեսնելով թէ որքա՜ն բան կրնաք սորվիլ Աստուծոյ այս երկնային ծառաներուն մասին եւ անոնց օգնութիւնը պիտի սկսիք գնահատել։ (Յայտնութիւն 14։6, 7) Սակայն, Աստուծոյ երկնային կազմակերպութեան մէջ, հոգեղէն արարածներէն ոմանք մասնայատուկ նպատակներու կը ծառայեն։

Եսայի Ի՛նչ Տեսաւ

13, 14. Եսային տեսիլքին մէջ ի՞նչ տեսաւ, եւ ասիկա ի՞նչ ազդեցութիւն ունեցաւ իր վրայ։

¹³ Հիմա քիչ մը Եսայիի տեսիլքը փորենք։ Երբ կարդաք Եսայեայ 6–րդ գլուխին 1-7–րդ համարները, մեծապէս պիտի տպաւորուիք։ Եսային կ’ըսէ որ «Տէրը տեսայ, որ . . . աթոռի վրայ նստեր էր» եւ «վերի կողմը սերովբէները կը կենային»։ Անոնք կը ծանուցանէին Եհովայի փառքը, գովաբանելով իր սրբութիւնը։ Այս տեղեկութիւնը կարդալն իսկ կրնայ մեծ ազդեցութիւն ունենալ ձեր վրայ։ Եսայիի հակազդեցութիւնը ի՞նչ եղաւ։ «Եւ ըսի. ‘Վա՜յ ինծի, ահա կը կորսուիմ. վասն զի ես պիղծ շրթունք ունեցող մարդ մըն եմ ու պղծաշուրթն ժողովուրդի մէջ կը բնակիմ եւ իմ աչքերս զօրքերու Տէրը, Թագաւորը տեսան’»։ Ան որքա՜ն տպաւորուած էր այդ տեսիլքով։ Իսկ դո՞ւք։

¹⁴ Արդ, Եսային այս փառաւոր երեւոյթին ի՞նչպէս կրցաւ տոկալ։ Ան կը բացատրէ որ սերովբէ մը իր օգնութեան փութաց ու ըսաւ. «Քու անօրէնութիւնդ վերցուեցաւ եւ մեղքիդ քաւութիւն եղաւ»։ (Եսայեայ 6։7) Եսային Աստուծոյ ողորմութեան կրնար վստահիլ եւ ուշադրութիւն ընծայել Եհովայի խօսքերուն։ Հիմա չէ՞ք ուզեր աւելի լաւ ճանչնալ այս բարձրաստիճան հոգեղէն արարածները։ Ի՞նչ պէտք է ընէք։ Աւելի լայն տեղեկութիւն ստանալու համար՝ պէտք է փորէք։ Ասոր կրնայ օժանդակել Դիտարանի Գրականութիւններու Նիւթերու Ցանկ–ը, լուսաբանութիւն տուող կարգ մը տեղեկութիւններու աղբիւրներուն ղրկելով։

Եզեկիէլ Ի՞նչ Տեսաւ

15. Ի՞նչ բան ցոյց կու տայ որ Եզեկիէլի տեսիլքը վստահելի է։

¹⁵ Հիմա հոգեղէն արարածներու տարբեր տեսակի մը երթանք։ Եզեկիէլ առանձնաշնորհումը ունեցաւ ներշնչեալ տեսիլք մը ունենալու, մինչ Բաբելոնի մէջ գերի էր։ Բացէք ձեր Աստուածաշունչը Եզեկիէլ առաջին գլուխը եւ կարդանք առաջին երեք համարները։ Տեղեկութիւնը ի՞նչպէս կը սկսի։ Արդեօք կ’ըսէ՞՝ ‘Կար ու չկար, հեռաւոր երկրի մը մէջ . . . ’։ Ո՜չ, ասիկա առասպելական ժամանակներու մէջ եղած հեքիաթ մը չէ։ Առաջին համարը կ’ըսէ. «Երեսուներորդ տարուան չորրորդ ամսուան հինգին, երբ ես գերիներուն հետ Քոբար գետին քովն էի, երկինքը բացուեցաւ ու Աստուծոյ տեսիլքները տեսայ»։ Այս համարին մէջ ի՞նչ կը նկատէք։ Անիկա ճշգրիտ թուական մը եւ որոշ վայր մը կու տայ։ Այս մանրամասնութիւնները կը նշեն Յովաքին Թագաւորին գերութեան հինգերորդ տարուան, Հ.Դ.Ա. 613–ին։

16. Եզեկիէլ ի՞նչ տեսաւ։

¹⁶ Եհովայի ձեռքը Եզեկիէլի վրայ եկաւ եւ ան ահաւոր տեսիլք մը տեսաւ. Եհովան գահի մը վրայ նստած էր, հսկայ անիւներ ունեցող եւ անոնց շրջանակները չորս կողմէն աչքերով լեցուն երկնային կառքի մը մէջ։ Հոս մեզ հետաքրքրող մանրամասնութիւնը այն է թէ չորս արարածներ կային, ամէն մէկը անիւի մը քովը կայնած։ «Անոնց երեւոյթը այսպէս էր։ Անոնք մարդու կերպարանք ունէին։ Ամէն մէկը չորս երես եւ չորս թեւ ունէր։ . . . Անոնց երեսներուն ձեւը այսպէս էր։ Չորսն ալ մարդու երես ունէին։ Աջ կողմէն առիւծի երես, չորսն ալ ձախ կողմէն եզի երես, չորսն ալ արծիւի երես ունէին»։—Եզեկիէլ 1։5, 6, 10

17. Քերովբէներուն չորս երեսները ի՞նչ կը ներկայացնեն։

¹⁷ Այս չորս կենդանի արարածները ի՞նչ էին։ Եզեկիէլ մեզի կ’ըսէ որ անոնք քերովբէներ էին։ (Եզեկիէլ 10։1-3, 14) Անոնք ինչո՞ւ չորս երես ունէին։ Գերիշխան Տէր Եհովայի չորս ուշագրաւ յատկութիւնները ներկայացնելու համար։ Արծիւի երեսը հեռատես իմաստութիւն կը խորհրդանշէր։ (Յոբայ 39։27-29) Եզին երեսը ի՞նչ կը ներկայացնէր։ Անոր վզին եւ ուսերուն ունեցած հսկայական ոյժով, գիտցուած է որ կռուող եզ մը կրնայ ձի մը եւ անոր հեծեալը օդը բարձրացնել։ Վստահաբար, եզը կը խորհրդանշէ Եհովայի անսահման զօրութիւնը։ Առիւծը կը գործածուի որպէս քաջարի արդարութեան խորհրդանիշ։ Վերջապէս, մարդու երեսը տեղին ըլլալով կը ներկայացնէ Աստուծոյ սէրը, քանի որ մարդը միակ երկրային արարածն է որ այս յատկութիւնը իմացականօրէն կրնայ արտայայտել։—Մատթէոս 22։37, 39. Ա. Յովհաննու 4։8

18. Յովհաննէս առաքեալ ի՞նչպէս կ’օգնէ մեզի որ երկնային կազմակերպութիւնը աւելի լաւ ըմբռնենք։

¹⁸ Ուրիշ տեսիլքներ ալ կան որոնք մեզի կ’օգնեն որ ընդհանուր պատկեր մը ունենանք։ Աստուածաշունչի Յայտնութիւն գրքին մէջ Յովհաննէսի տեսիլքները անոնց մէկ մասն են։ Ան Եզեկիէլի նման, Եհովան կը տեսնէ փառաւոր աթոռի մը վրայ՝ քերովբէներու ընկերակցութեամբ։ Քերովբէները ի՞նչ կ’ընեն։ Անոնք Եսայեայ 6–րդ գլուխին մէջ սերովբէներուն ծանուցումը կ’արձագանգեն. «Սուրբ, Սուրբ, Սուրբ Տէր Ամենակալ, որ էր եւ որ է եւ որ պիտի գայ»։ (Յայտնութիւն 4։6-8) Յովհաննէս աթոռին քով գառնուկ մըն ալ կը տեսնէ։ Անիկա զո՞վ կը ներկայացնէ։ Աստուծոյ գառնուկը՝ Յիսուս Քրիստոս։—Յայտնութիւն 5։13, 14

19. Այս ուսումնասիրութեամբ, Եհովայի կազմակերպութեան մասին ի՞նչ հասկցաք։

¹⁹ Ուստի, այս տեսիլքներուն միջոցաւ, ի՞նչ ըմբռնեցինք։ Հասկցանք թէ երկնային կազմակերպութեան զենիթին կը գտնուի Եհովա Աստուած՝ իր գահին վրայ, որու կ’ընկերակցի Գառնուկը, Յիսուս Քրիստոս, որ Բանը կամ Լոկոսն է։ Ապա տեսանք հրեշտակներու երկնային զօրքը, մէջը ըլլալով սերովբէները եւ քերովբէները։ Անոնք Եհովայի նպատակներուն ծառայող միակ ընդարձակ ու միակամ կազմակերպութեան մաս կը կազմեն։ Իսկ այդ նպատակներէն մէկն է այս վերջին ժամանակին, համայն աշխարհի մէջ բարի լուրը քարոզել։—Մարկոս 13։10. Յովհաննու 1։1-3. Յայտնութիւն 14։6, 7

20. Յաջորդ յօդուածով ո՞ր հարցումին պիտի պատասխանուի։

²⁰ Վերջապէս, երկրի վրայ կան Եհովայի Վկաները, որոնք իրենց Թագաւորութեան Սրահներուն մէջ կը հաւաքուին, որպէսզի սորվին թէ ի՛նչպէս կրնան Գերիշխան Տիրոջ կամքը կատարել։ Վստահաբար, հիմա կրնանք գնահատել որ մեզի հետ եղողները շա՜տ աւելի են, քան Սատանայի եւ ճշմարտութեան թշնամիներուն հետ եղողները։ Հետեւեալ հարցը կը մնայ. Երկնային կազմակերպութիւնը ի՞նչ կապ ունի Թագաւորութեան բարի լուրի քարոզչութեան հետ։ Յաջորդ յօդուածը այս եւ ուրիշ հարցեր պիտի շօշափէ։

Վերաքաղի Հարցումներ

◻ Եհովայի կազմակերպութիւնը գնահատելու համար ի՞նչ պէտք է ըմբռնենք։

◻ Եղիսէի ծառան ի՞նչ փորձառութիւն ունեցաւ եւ մարգարէն ի՞նչպէս քաջալերեց զինք։

◻ Անձնական ուսումնասիրութիւնը ի՞նչպէս պէտք է դիտենք։

◻ Դանիէլ, Եսային եւ Եզեկիէլը ի՞նչ մանրամասնութիւններ տուին երկնային կազմակերպութեան մասին։