Աստուծոյ Թագաւորութիւնը ի՞նչ կրնայ նշանակել ձեզի համար

ՅԻՍՈՒՍ ՔՐԻՍՏՈՍ իր հետեւորդներուն սորվեցուց այսպէս աղօթել. «Քու թագաւորութիւնդ գայ»։ (Մատթէոս 6։10) Յիսուսի հետեւորդներ ըլլալ դաւանողները որքա՜ն յաճախ այս խօսքերը ուղղած են Աստուծոյ։

Սակայն, Յիսուս իր աշակերտներուն Աստուծոյ Թագաւորութեան համար աղօթել սորվեցնելէն աւելին ըրաւ։ Ան Թագաւորութիւնը իր քարոզչութեան գլխաւոր նիւթերէն մէկը ըրաւ։ Պրիթանիքա Համայնագիտարանը (Անգլ.) կ’ըսէ որ Աստուծոյ Թագաւորութիւնը «ընդհանրապէս նկատուած է Յիսուսի ուսուցումին կեդրոնական բնաբանը»։

Երբ Քրիստոսի հետեւորդները Թագաւորութեան համար կ’աղօթեն, իրապէս ի՞նչ բանի համար կ’աղօթեն։ Աստուծոյ Թագաւորութիւնը ի՞նչ կրնայ նշանակել անոնց եւ ձեզի համար։ Իսկ Յիսուս ինչպէ՞ս կը նկատէր զայն։

Թագաւորութեան Մասին Յիսուսի Տեսակէտը

Յիսուս յաճախ ինքզինք կը կոչէր «Որդին մարդոյ»։ (Մատթէոս 10։23. 11։19. 16։28. 20։18, 28) Ասիկա մեզի կը յիշեցնէ Դանիէլ մարգարէին «Որդի Մարդոյ» արտայայտութիւնը։ Ապագային տեղի ունենալիք երկնային դէպքի մը մասին ակնարկելով, Դանիէլ ըսաւ. «Գիշերը տեսիլքի մէջ կը տեսնէի, թէ ամպերով Որդի Մարդոյ նման մէկը կու գար, մինչեւ հասաւ անոր որ յաւիտեան կենդանի է ու Որդին Մարդոյ անոր մօտեցուցին։ Անոր իշխանութիւն, պատիւ ու թագաւորութիւն տրուեցաւ, որպէսզի բոլոր ժողովուրդները, ազգերն ու լեզուները անոր ծառայութիւն ընեն»։—Դանիէլ 7։13, 14

Այս իշխանութիւնը ստանալու ժամանակին մասին խօսելով, Յիսուս ըսաւ իր առաքեալներուն. «Երբ Որդին մարդոյ իր փառաց աթոռը նստի, դուք ալ տասներկու աթոռներու վրայ պիտի նստիք»։ Ան նաեւ ըսաւ. «Երբ Որդին մարդոյ իր փառքովը գայ ... անոր առջեւ պիտի ժողվուին բոլոր ազգերը ու զանոնք իրարմէ պիտի զատէ, ինչպէս հովիւ մը ոչխարները այծերէն կը զատէ։ ... Ասոնք [ամբարիշտները] պիտի երթան յաւիտենական տանջանքը, իսկ արդարները՝ յաւիտենական կեանքը»։—Մատթէոս 19։28. 25։31, 32, 46

Աթոռներու եւ բոլոր ազգային խումբերու մասին այս մարգարէական ակնարկութիւնները կը մատնանշեն որ Թագաւորութիւնը կառավարութիւն մըն է, որու մէջ Յիսուս եւ իր հետեւորդներէն ոմանք մարդկութեան վրայ պիտի իշխեն։ Այդ կառավարութիւնը զօրութիւնը պիտի ունենայ ամբարիշտները մահուամբ բնաջնջելու։ Սակայն, Թագաւորութեան իշխանութեան ներքեւ արդարութիւնը սիրողները Աստուծմէ յաւիտենական կեանքի պարգեւը պիտի ստանան։

Բացայայտ է, ուրեմն, որ Աստուծոյ Թագաւորութիւնը Աստուծոյ կողմէ հաստատուած երկնային կառավարութիւն մըն է։ Թագաւորութիւնը եկեղեցին չէ եւ Սուրբ Գրութիւնները թոյլ չեն տար անոր մասին աշխարհական տեսակէտ մը ունենալու։ Ասկէ զատ, աստուածատուր կառավարութիւն մը անհատի մը սրտին մէջ չէր կրնար պարզապէս բան մը ըլլալ։ Քանի որ Աստուծոյ Թագաւորութիւնը կառավարութիւն մըն է, անիկա մեր սրտին մէջ բան մը չըլլար երբ Քրիստոնէութիւնը ընդունինք։ Բայց ոմանք ինչո՞ւ կը խորհին թէ Թագաւորութիւնը սրտի վիճակ մըն է։

Թագաւորութիւնը Մեր Ներսիդի՞ն Է

Ոմանք կը խորհին որ Թագաւորութիւնը մեր սրտին մէջ է, Աստուածաշունչի կարգ մը թարգմանիչներու կողմէ Ղուկաս 17։21–ի թարգմանուած կերպին պատճառաւ։ Այս համարին մէջ, Յիսուս ըսաւ. «Աստուծոյ թագաւորութիւնը ձեր ներսիդին է»։

Աստուածաշունչի Բացատրական Բառարանը (Անգլ.) ասոր մասին կ’ըսէ. «Թէեւ յաճախ մէջբերուած է որպէս օրինակ տալու Յիսուսի ‘խորհրդաւորութեան’ կամ ‘ներքնութեան’, այս մեկնութիւնը գլխաւորաբար հին թարգմանութեան վրայ կը հանգչի, ‘ձեր ներսիդին’, ... ուր ‘ձեր’ը հասկցուած է որպէս եզակի, անճիշդ արդի իմաստով. ‘Ձեր’ը ... յոգնակի է (Յիսուս կը խօսի Փարիսեցիներուն—տես հմր. 20) ...։ Այն վարկածը, ըստ որուն, Աստուծոյ թագաւորութիւնը մտքի կամ անձնական փրկութեան ներքին վիճակ մըն է, կը հակասէ այս համարին բովանդակութեան, ինչպէս նաեւ ամբողջ Ն[որ] Կ[տակարանին] անոր մասին տուած գաղափարին»։

Նոր Միջազգային Թարգմանութիւնը (Անգլ.) Ղուկաս 17։21–ի լուսանցքի բացատրութեան մէջ ցոյց կու տայ որ Յիսուսի խօսքերը կրնային թարգմանուիլ. «Աստուծոյ թագաւորութիւնը ձեր մէջ է»։ Աստուածաշունչի ուրիշ թարգմանութիւններու մէջ կը կարդանք. «Աստուծոյ թագաւորութիւնը ձեր մէջ է» կամ՝ «ձեր մէջտեղն է»։ (The New English Bible; The Jerusalem Bible; Revised Standard Version) Ըստ Սուրբ Գրութիւններու Նոր Աշխարհի Թարգմանութեան, Յիսուս ըսաւ. «Աստուծոյ թագաւորութիւնը ձեր մէջտեղն է»։ Յիսուս ըսել չէր ուզեր որ Թագաւորութիւնը հպարտ Փարիսեցիներուն սրտերուն մէջ էր, որոնց կ’ուղղէր իր խօսքերը։ Այլ, ինք՝ որպէս երկար ատենէ սպասուած Մեսիան եւ Նշանակուած Թագաւորը՝ անոնց մէջտեղը կը գտնուէր։ Բայց Աստուծոյ Թագաւորութեան գալէն առաջ որոշ ժամանակ մը պիտի անցնէր։

Անիկա Ե՞րբ Պիտի Գար

Յիսուս Քրիստոսի քանի մը հետեւորդներ Մեսիական երկնային Թագաւորութեան մէջ որպէս իր իշխանակիցները ընտրուած են։ Յիսուսի նման, անոնք Աստուծոյ հաւատարիմ կը մեռնին եւ երկնքին մէջ հոգեղէն կեանքի կը յարուցուին։ (Ա. Պետրոս 3։18) Բաղդատաբար թիւով քիչ, անոնք մարդոց մէջէն գնուած 144,000 թագաւորներ եւ քահանաներ պիտի ըլլան։ (Յայտնութիւն 14։1–4. 20։6) Յիսուսի իշխանակիցներուն մէջ մաս կը կազմեն իր հաւատարիմ առաքեալները։—Ղուկաս 12։32

Առիթով մը իր հետեւորդներուն խօսելով, Յիսուս խոստացաւ. «Հոս ներկայ եղողներէն մէկ քանիները կան՝ որոնք մահուան համը պիտի չառնեն, մինչեւ տեսնեն Որդին մարդոյ իր թագաւորութիւնովը եկած»։ (Մատթէոս 16։28) Յաջորդ համարը ցոյց կու տայ որ Յիսուսի այս խոստումը կատարուեցաւ քանի մը օրեր ետք։ Ան իր աշակերտներէն երեքը առաւ ու լեռ մը բարձրացաւ, ուր անոնց առջեւ այլակերպեցաւ։ Այս կերպով, անոնք իրմէ Թագաւորութեան փառքին մէջ տեսիլք մը ունեցան։ (Մատթէոս 17։1–9) Բայց Թագաւորութիւնը այդ ատեն չհաստատուեցաւ։ Ե՞րբ պիտի հաստատուէր անիկա։

Յիսուսի առակներէն մէկը ցոյց կու տայ որ ինք անմիջապէս որպէս Մեսիական Թագաւոր պիտի չգահակալուէր։ Ղուկաս 19։11–15–ի մէջ կը կարդանք. «Առակ մը ... ըսաւ իր Երուսաղէմ մօտենալուն եւ անոնց այնպէս կարծելուն համար թէ՝ շուտ մը Աստուծոյ թագաւորութիւնը պիտի յայտնուի։ Ուստի ըսաւ. ‘Ազնուական մարդ մը հեռու երկիր գնաց՝ իրեն թագաւորութիւնը [արքունական զօրութիւն (ՆԱ)] առնելու եւ դառնալու։ Իր տասը ծառաները կանչելով՝ իւրաքանչիւրին տասը մնաս տուաւ ու ըսաւ անոնց. «Բանեցուցէք ատոնք մինչեւ ես գամ»։ ... Բայց երբ անիկա թագաւորութիւնը առնելով ետ դարձաւ, իրեն կանչեց այն ծառաները, որոնց ստակը տուեր էր, որպէսզի գիտնայ թէ՝ ո՞վ ինչ շահ ըրած է’»։

Այդ օրերուն, որոշ ժամանակ կ’առնէր որ անհատ մը Իսրայէլէն Հռովմ երթար, այդ քաղաքին մէջ սպասէր մինչեւ արքունական զօրութիւն առնէր եւ իր հայրենիքը վերադառնար որպէս թագաւոր։ Յիսուսն էր «ազնուական մարդ»ը։ Երկնքին մէջ, ան իր Հօրմէն արքունական զօրութիւն պիտի ստանար, բայց անմիջապէս պիտի չգահակալուեր որպէս Մեսիական Թագաւոր։ Ան որպէս Թագաւոր վերադառնալէ առաջ, իր հետեւորդները երկար ժամանակ պիտի բանէին Թագաւորութեան բարի լուրը քարոզելով։

Թագաւորութիւնը Ինչպէ՞ս Կու Գայ

Երբ Աստուած սիրողները կ’աղօթեն որ իր Թագաւորութիւնը գայ, ի՞նչ կը խնդրեն։ Անոնք իրապէս կը խնդրեն որ երկնային Թագաւորութիւնը վճռական քայլեր առնէ մարդակերտ կառավարութիւնները բնաջնջելով, որոնք թերացած են իրական խաղաղութիւն եւ բարգաւաճում բերելու իրենց խոստումին մէջ։ Այս դէպքին վրայ ուշադրութիւն հրաւիրելով, Դանիէլ մարգարէն գրեց. «Այն թագաւորներուն օրերը երկնքի Աստուածը ուրիշ թագաւորութիւն մը պիտի հանէ, որ յաւիտեան պիտի չաւերուի։ Այս թագաւորութիւնը ուրիշ ժողովուրդի պիտի չթողուի։ Անիկա այս բոլոր թագաւորութիւնները պիտի փշրէ ու պիտի հատցնէ ու ինք յաւիտեան պիտի մնայ»։ (Դանիէլ 2։44) Ասիկա ե՞րբ տեղի պիտի ունենար։

Յիսուս նախագուշակեց որ ասիկա տեղի պիտի ունենար այն մարդոց սերունդին մէջ, որոնք մարդկային գործառնութիւններուն մէջ անսովոր խռովքի մը վկաներ պիտի ըլլային։ Իր ‘ներկայութեան’ նկատմամբ, Յիսուս բաղադրեալ «նշան» մը տուաւ, բովանդակելով դէպքեր, ինչպէս՝ անզուգահեռ պատերազմներ, երկրաշարժներ, սովեր, համաճառակներ, ինչպէս նաեւ Աստուծոյ Թագաւորութեան բարի լուրի աշխարհածաւալ քարոզչութիւնը։—Մատթէոս 24, 25 գլուխները. Մարկոս 13–րդ գլուխը. Ղուկաս 21–րդ գլուխը։

Յիսուսի մարգարէութիւնը կը բովանդակէ դէպքեր որոնք հիմա, մեր Ի. դարուն տեղի կ’ունենան։ Հետեւաբար, շուտով Աստուծոյ Թագաւորութիւնը հոյակապ օրհնութիւններ պիտի բերէ մարդկութեան։ Դուք կրնաք Թագաւորութեան իշխանութեան օրհնութիւնները վայելողներուն մէջ ըլլալ։ Բայց Աստուծոյ Թագաւորութիւնը ի՞նչ կրնայ նշանակել ձեզի եւ ձեր սիրելիներուն համար։

Թագաւորութեան Իշխանութեան Օրհնութիւնները

Համայն երկրի վրայ ուրախութիւն պիտի տիրէ։ «Նոր երկինք»ի մը՝ երկնային Թագաւորութեան՝ ներքեւ պիտի ըլլայ «նոր երկիր մը»՝ Թագաւորութեան հնազանդ հպատակներու համերկրային ընկերութիւն մը։ «Աստուած ինք անոնց հետ պիտի ըլլայ», գրեց Յովհաննէս առաքեալ։ «Եւ ինք անոնց աչքերէն բոլոր արցունքները պիտի սրբէ»։ Այն ատեն միայն ուրախութիւն պիտի ըլլայ, քանի որ «ո՛չ սուգ եւ ո՛չ աղաղակ եւ ո՛չ ցաւ պիտի ըլլայ ասկէ յետոյ»։—Յայտնութիւն 21։1–4

Այլեւս մահ պիտի չըլլայ։ Վշտի այս սարսափելի պատճառը այլեւս մեզմէ պիտի չխլէ մեր բարեկամներն ու սիրելիները։ «Վերջին թշնամին որ պիտի խափանուի՝ մահն է»։ (Ա. Կորնթացիս 15։26) Ի՜նչ ուրախութիւն պիտի ըլլայ երբ յուղարկաւորութիւնները փոխարինուին Աստուծոյ յիշողութեան մէջ եղողներուն յարութիւններով։—Յովհաննու 5։28, 29

Հիւանդութեան եւ խեղանդամութեան տեղը պիտի առնէ կայտառ առողջութիւնը։ Այլեւս հիւանդանոցի անկողինները պիտի չլեցուին ֆիզիքական եւ մտային հիւանդութիւններէ տառապողներով։ Վարպետ Բժիշկը՝ Յիսուս Քրիստոս՝ իր փրկանքի զոհին արժէքը պիտի կիրարկէ ‘հեթանոսներուն բժշկութեան’ համար։ (Յայտնութիւն 22։1, 2. Մատթէոս 20։28. Ա. Յովհաննու 2։1, 2) Երկրին վրայ եղած ատեն իր կատարած բուժումները միայն նմոյշ մըն էին Թագաւորութեան միջոցաւ իր ընելիքներուն։—Բաղդատել Եսայեայ 33։24. Մատթէոս 14։14։

Առատ ուտելիք պիտի ըլլայ։ Ինչպէս սաղմոսերգուն ըսաւ, «ցորենի առատութիւն պիտի ըլլայ երկրի մէջ։ Լեռներուն գլուխը»։ (Սաղմոս 72։16) Ասոր վրայ Եսայիի մարգարէութիւնը կ’աւելցնէ. «Զօրքերու Տէրը այս լերան վրայ բոլոր ազգերուն կոչունք մը պիտի ընէ, պարարտ բաներու եւ հին գինիներու, ծուծով լեցուած պարարտ բաներու ու զտուած հին գինիներու կոչունք»։ (Եսայեայ 25։6) Վստահօրէն, Թագաւորութեան իշխանութեան ներքեւ, երկրի բնակիչները սովէ պիտի չտառապին։

Ամբողջ երկիրը դրախտ մը պիտի ըլլայ։ Այս կերպով պիտի իրագործուի զղջացած չարագործի մը տուած Յիսուսի սա խոստումը. «Դուն ... ինծի հետ դրախտին մէջ պիտի ըլլաս»։ (Ղուկաս 23։43) Դուք ալ կրնաք յաւիտենական կեանք վայելել այս երկրին վրայ. չարութենէ մաքրուած եւ հաճոյալի համերկրային պարտէզի մը վերածուած երկիր մը։—Յովհաննու 17։3

Այս հոյակապ հեռանկարները բոլոր հնազանդ մարդոց կը մատուցուին։ Եհովայի ներշնչեալ Խօսքը՝ Աստուածաշունչը՝ մեզի կու տայ այս օրհնեալ երաշխիքները։ Աստուծոյ Թագաւորութիւնը այս բոլոր բաները կրնայ նշանակել ձեզի համար։

[Նկար՝ էջ 7]

Կը հաւատա՞ք ինչ որ Յիսուս ըսաւ Աստուծոյ Թագաւորութեան մասին։