Ո՛վ երիտասարդներ՝ աշխարհի հոգիին ընդդիմացէք

«Մենք ո՛չ թէ այս աշխարհի հոգին առինք, հապա այն Հոգին որ Աստուծմէն է»։—Ա. ԿՈՐՆԹԱՑԻՍ 2։12

1, 2. (ա) Ի՞նչ հակադրութիւն կարելի է տեսնել աշխարհի պատանիներուն եւ Եհովայի Վկաներու ժողովքներուն մէջ գտնուող պատանիներուն միջեւ։ (բ) Պատանի Վկաներէն շատեր ի՞նչ ջերմ գովասանքի արժանի են։

«ՄԵՐ երիտասարդ սերունդը վհատած, հրաժարած եւ ըմբոստ է»։ Աւստրալիական Տը Սան–Հերըլտ լրագիրը այսպէս արտայայտուեցաւ։ Անիկա աւելցուց. «Դատական արձանագրութիւնները ցոյց կու տան որ լուրջ յարձակումներով ամբաստանուած պատանիներուն թիւը [անցեալ տարուան վրայ] 22 առ հարիւր յաւելում կրած է . . . Երախաներ անձնասպան կ’ըլլան, 1960–ական թուականներու կէսէն եռապատիկ համեմատութեամբ . . . Իսկ սերունդի խրամատը իրական անդունդի վերածուած է, ուր հետզհետէ աւելի մեծ թիւով երիտասարդներ կը սահին ու կ’իյնան թմրամոլութեան ու գինեմոլութեան մէջ եւ ինքնակործան մոռացութեան կը մատնուին»։ Այս կացութիւնը սակայն, մէկ երկրի սահմանուած չէ։ Համայն աշխարհի մէջ, ծնողներ, ուսուցիչներ եւ մտային առողջապահութեան մասնագէտներ երիտասարդներու վիճակին վրայ կ’ողբան։

² Ի՜նչ շշմեցուցիչ հակադրութիւն մը կայ ներկայ պատանիներուն եւ Եհովայի Վկաներու ժողովքներուն մէջ գտնուող առողջ պատանիներուն միջեւ։ Անշուշտ, անոնք կատարեալ չեն։ Անոնք ալ «երիտասարդական ցանկութիւններ»ու դէմ կը պայքարին։ (Բ. Տիմոթէոս 2։22) Բայց որպէս խումբ, այս երիտասարդները շիտակի հանդէպ քաջարի դիրք մը բռնած են եւ մերժած են աշխարհի ճնշումներուն տեղի տալ։ Մենք սրտանց կը գովենք ձեզ, ո՛վ երիտասարդներ, որ Սատանայի «հնարքներուն դէմ» մղուած պատերազմէն յաջող դուրս կու գաք։ (Եփեսացիս 6։11) Յովհաննէս առաքեալի նման, մենք ալ կ’ուզենք ձեզ գովել. «Գրեցի ձեզի, երի՛տասարդներ [ու երիտասարդուհիներ], վասն զի դուք ուժով էք եւ Աստուծոյ խօսքը ձեր մէջ կը բնակի ու չարին յաղթեցիք»։—Ա. Յովհաննու 2։14

3. «Հոգի» բառը ի՞նչ կրնայ նշանակել։

³ Այսուհանդերձ, չարին դէմ ձեր յաղթանակը շարունակելու համար, պէտք է ուժեղ կերպով ընդդիմանաք Աստուածաշունչի կոչած «աշխարհի հոգի»ին։ (Ա. Կորնթացիս 2։12) Յունարէն լեզուի հեղինակութեան մը համաձայն, «հոգի» կրնայ նշանակել «անհատի մը հոգին լեցնող ու կառավարող տրամադրութիւնը կամ ազդեցութիւնը»։ Օրինակ, եթէ նկատէք որ անհատ մը գէշ բնաւորութեան տէր է, կրնաք ըսել որ ան վատ «հոգի» մը ունի։ Ձեր «հոգին»՝ տրամադրութիւնը կամ մտայնութիւնը կ’ազդէ ձեր ընտրութիւններուն. անիկա կ’ազդէ ձեր արարքներուն եւ խօսակցութեան։ Հետաքրքրականօրէն, թէ՛ անհատներ եւ թէ խմբակցութիւններ կրնան «հոգի» մը դրսեւորել։ Պօղոս առաքեալ խումբ մը Քրիստոնեաներու գրեց. «Մեր Տէր Յիսուս Քրիստոսին շնորհքը ձեր հոգիին հետ ըլլայ»։ (Փիլիմոն 25) Արդ, այս աշխարհը ի՞նչ հոգի կը դրսեւորէ։ Քանի որ «բոլոր աշխարհ չարին մէջ է», Բանսարկու Սատանային զօրութեան ներքեւ է, կարելի չէ որ աշխարհի հոգին առողջ ըլլայ, այդպէս չէ՞։—Ա. Յովհաննու 5։19

Աշխարհի Հոգին Բնորոշել

4, 5. (ա) Եփեսոսի ժողովքի անդամներ Քրիստոնեաներ ըլլալէն առաջ ի՞նչ հոգիէ ազդուած էին։ (բ) Ո՞վ է «օդին իշխանութեանը իշխան»ը եւ ի՞նչ է «օդ»ը։

⁴ Պօղոս գրեց. «Դուք յանցանքներու ու մեղքերու մէջ մեռած էիք, [Աստուած] ձեզ կենդանացուց։ Անոնց մէջ ժամանակին կը քալէիք այս աշխարհին բռնած ճամբովը, այս օդին իշխանութեանը իշխանին ուզածին պէս, այն ոգիին՝ որ հիմա ապստամբութեան որդիներուն ներսիդին կը ներգործէ։ Անոնց մէջ մենք ամէնքս ալ կը պտըտէինք մեր մարմնին ցանկութիւններովը եւ մարմնին ու մտքին ուզածը կը կատարէինք եւ բնութեամբ բարկութեան որդիներ էինք՝ ինչպէս ուրիշներ»։—Եփեսացիս 2։1-3

⁵ Քրիստոնէական ճամբան գիտնալէն առաջ, Եփեսոսի Քրիստոնեաները անգիտակցաբար «օդին իշխանութեանը իշխանին»՝ Բանսարկու Սատանային, հետեւորդները եղած էին։ Այդ «օդ»ը բառացի վայր մը չէ, ուր Սատանան ու իր դեւերը կը բնակին։ Երբ Պօղոս այս խօսքերը գրեց, Բանսարկու Սատանան ու դեւերը տակաւին կրնային երկինք մտնել։ (Համեմատել՝ Յոբայ 1։6. Յայտնութիւն 12։7-12) «Օդ» բառը կը նշանակէ Սատանայի աշխարհին տիրապետող հոգին, կամ մտայնութիւնը։ (Համեմատել՝ Յայտնութիւն 16։17-21) Մեր շուրջ գտնուող օդին նման, այս հոգին ամէն տեղ է։

6. Ի՞նչ է ‘օդին իշխանութիւնը’, եւ շատ մը պատանիներու վրայ անիկա ի՞նչ ազդեցութիւն բանեցուցած է։

⁶ Բայց ‘օդին իշխանութիւնը’ ի՞նչ է։ Հաւանաբար, ասիկա կ’ակնարկէ մարդոց վրայ այս «օդին» ունեցած ազդեցութեան։ Պօղոս ըսաւ որ այս հոգին «ապստամբութեան որդիներուն ներսիդին կը ներգործէ»։ Ուստի, աշխարհի հոգին, անհնազանդ եւ ըմբոստ հոգի մը յառաջ կը բերէ եւ այս իշխանութիւնը բանեցուած կերպերէն մէկն է շրջապատի ազդեցութիւնը։ Վկայ երիտասարդուհի մը կ’ըսէ. «Դպրոցին մէջ, ամէն մարդ յարատեւաբար քեզ կը քաջալերէ որ քիչ մը աւելի ըմբոստ ըլլաս։ Երախաները քեզ աւելի կը յարգեն, եթէ ըմբոստութեան սահմանին հասնիս»։

Աշխարհի Հոգիին Դրսեւորումները

7-9. (ա) Թուեցէք կարգ մը կերպեր, որոնցմով աշխարհի հոգին կը տեսնուի ներկայ երիտասարդներուն մէջ։ (բ) Ասոնցմէ որեւէ մէկը տեսա՞ծ էք ձեր շրջանին մէջ։

⁷ Ներկայիս, երիտասարդներուն մէջ աշխարհի հոգիին կարգ մը դրսեւորումները ի՞նչ են։ Անպարկեշտութիւն եւ ըմբոստութիւն։ Պարբերաթերթի տեղեկագրութիւն մը կը նշէր թէ երկրորդական վարժարանի աշակերտներուն 70 տոկոսը դպրոցական շրջանին խարդախութիւն ըրած են։ Յանդուգն, հեգնական եւ պիղծ խօսակցութիւնն ալ համատարած է։ Ճիշդ է որ եղան պարագաներ, երբ Յոբ եւ Պօղոս առաքեալ ոմանց աչքին հեգնական թուող արտայայտութիւններ գործածեցին, իրենց արդարացի ցասումը արտայայտելու համար։ (Յոբայ 12։2. Բ. Կորնթացիս 12։13) Սակայն, շատ մը երիտասարդներուն բերնէն լսուած հեգնական կծու խօսքերը յաճախ նախատինքներու աստիճանին կը հասնին։

⁸ Չափազանց զբօսանքն ալ աշխարհի հոգիին դրսեւորումն է։ Երիտասարդներուն մէջ ժողովրդական դարձած են իրենց յատուկ նայթգլապները, մինչեւ ուշ ժամեր տեւող պարահանդէսներըa եւ անզուսպ խնճոյքները։ Հագուստի եւ յարդարանքի չափազանցութիւններն ալ համատարած են։ Շատ երիտասարդներ աշխարհի ըմբոստ հոգին կը ցուցաբերեն, իրենց չափէն մեծ, թափթփած հագուստի ոճերէն մինչեւ գայթակղեցուցիչ նորաձեւութիւնները, ինչպէս՝ մարմինը ծակելը։ (Համեմատել՝ Հռովմայեցիս 6։16) Ուրիշ դրսեւորումն մըն է նիւթական ստացուածքներով մտազբաղ ըլլալը։ Կրթական լրագրի մը համաձայն, «վաճառականները՝ իրենց արուեստագիտական զինանոցի ծանուցումներով եւ արտադրութիւններու տպաւորիչ այլազանութեան [շարանով] անդադար կը ռմբակոծեն երախաները»։ Միացեալ Նահանգներու մէջ, պատանի մը մինչեւ որ իր երկրորդականը աւարտէ, 360,000 ծանուցումներու ականատես եղած կ’ըլլայ։ Ձեր տարեկիցներն ալ ճնշում կը բանեցնեն ձեր վրայ որ գնէք։ 14 տարեկան աղջիկ մը կ’ըսէ. «Ամէնքն ալ անդադար կը հարցնեն. ‘Վերնաշապիկիդ, բաճկոնիդ կամ ճինզիդ վաճառանիշը ի՞նչ է’»։

⁹ Սուրբ գրային ժամանակներէն ի վեր, վատառողջ երաժշտութիւնը Սատանայի գործիքը եղած է, պիղծ վարմունքի դրդելու համար։ (Համեմատել՝ Ելից 32։17-19. Սաղմոս 69։12. Եսայեայ 23։16) Ուստի, զարմանալի չէ որ սեռային գետնի վրայ մոլորեցնող՝ երբեմն բացայայտօրէն ըսուած՝ բառեր, աղտոտ լեզու եւ անսանձ, գրգռիչ թէմբօ ունեցող երաժշտութիւնը ժողովրդական դարձած է։ Այս աշխարհի պիղծ հոգիին ուրիշ մէկ դրսեւորումն է սեռային անբարոյութիւնը։ (Ա. Կորնթացիս 6։9-11) Տը Նիու Եորք Թայմզ–ը (Անգլերէն) կը տեղեկագրէ. «Մեծ թիւով պատանիներու համար սեռը գրեթէ իրենց նմաններուն կողմէ ընդունուելու պահանջ մը դարձած է . . . Երկրորդական վարժարանի աշակերտներուն երկու երրորդը սեռային յարաբերութիւն ունեցած է»։ Տը Ուոլ Սթրիթ Ճորնըլ–ի մէջ (Անգլերէն) յօդուած մը ապացոյցներ ներկայացուց թէ 8–էն 12 տարեկան երախաներ «սեռային գետնի վրայ աւելի աշխոյժ կը դառնան»։ Վերջերս գործէ քաշուած դպրոցի խորհրդատու մը ըսաւ. «Սկսանք վեցերորդ դասարանի յղիներ տեսնել»։b

Աշխարհի Հոգին Մերժել

10. Քրիստոնեայ ընտանիքներու պատանիներէն ոմանք ի՞նչպէս աշխարհի հոգիին անձնատուր եղած են։

¹⁰ Դժբախտաբար, Քրիստոնեայ պատանիներէն ոմանք ալ աշխարհի հոգիին անձնատուր եղած են։ «Ես ծնողքիս եւ Քրիստոնեայ հաւատակիցներուս դիմաց լաւ վարք մը ունէի, բայց միեւնոյն ատեն ուրիշ կեանք մը կը վարէի», կ’ընդունի Ճափոնցի պատանուհի մը։ Քենիայէն 17 տարեկան պատանուհի մը կ’ըսէ. «Ժամանակ մը ես կրկնակ կեանք ապրեցայ. հաւաքոյթներ, ռոք երաժշտութիւն եւ սխալ ընկերներ։ Գիտէի որ ըրածս սխալ էր, բայց կը փորձէի չմտածել, յուսալով որ ժամանակ մը ետք անիկա վերջ պիտի գտնէր։ Բայց վերջ չգտաւ։ Կացութիւնը միայն վատթարացաւ»։ Գերմանիայէն ուրիշ պատանուհի մը կ’ըսէ. «Ամէն բան սխալ ընկերներ ունենալէն սկսաւ։ Յետոյ սկսայ ծխել։ Կ’ուզէի ծնողներուս ցաւ պատճառել, բայց իրականութեան մէջ ես ինծի ցաւ պատճառեցի»։

11. Քաղէբ ի՞նչպէս բազմութեան չհետեւեցաւ, երբ տասը լրտեսները վատ տեղեկագրութիւն մը բերին։

¹¹ Այսուհանդերձ, կարելի է ընդդիմանալ, այո, մերժել աշխարհի հոգին։ Նկատի առէք անցեալէն Քաղէբին օրինակը։ Երբ տասը վախկոտ լրտեսները գէշ տեղեկագրութիւն մը բերին Խոստացեալ Երկրին մասին, ինք եւ Յեսուն երկչոտելով բազմութեան չմիացան։ Անոնք խիզախօրէն ըսին. «Այն երկիրը, որուն մէջէն անցանք զանիկա լրտեսելու համար, խիստ լաւ երկիր մըն է։ Եթէ Տէրը մեզի հաճի, մեզ այն երկիրը տանի եւ զանիկա մեզի տայ, որ կաթ ու մեղր բղխող երկիր մըն է»։ (Թուոց 14։7, 8) Քաղէբ ի՞նչպէս կրցաւ այդ ճնշումին ընդդիմանալ։ Եհովա Քաղէբի մասին ըսաւ որ ան «ուրիշ միտք [«հոգի», Արարատ] ունեցաւ»։—Թուոց 14։24

«Ուրիշ Հոգի» մը Ցոյց Տալ

12. Ինչո՞ւ կարեւոր է որ անհատ մը իր խօսակցութեամբ «ուրիշ հոգի» մը ցոյց տայ։

¹² Ներկայիս, աշխարհէն տարբեր «ուրիշ հոգի» մը կամ մտայնութիւն մը ցոյց տալը քաջութիւն եւ զօրութիւն կը պահանջէ։ Ասիկա ընելու կերպերէն մէկն է հեգնական եւ անյարգալից խօսակցութենէ խուսափիլ։ Հետաքրքրականօրէն, Անգլերէն «հեգնանք» բառը Յունարէն բայէ մը ծագում առած է, որ բառացիօրէն կը նշանակէ «շուներու նման միսը փրցնել»։ (Համեմատել՝ Գաղատացիս 5։15) Ճիշդ ինչպէս շունը իր ակռաներով ոսկորին վրայէն միսը կը փրցնէ, հեգնական «կատակ»ը կրնայ ուրիշներէն խլել իրենց արժանապատուութիւնը։ Բայց Կողոսացիս 3։8–ն կը յորդորէ. «Մէկդի՛ ձգեցէք դուք ալ այն ամէնը՝ բարկութիւնը, սրտմտութիւնը, չարութիւնը, հայհոյութիւնը, անհամեստ խօսքերը ձեր բերաններէն»։ Իսկ Առակաց 10։19–ն կը նշէ. «Շատ խօսքերու մէջ յանցանք պակաս չէ, բայց իր շրթունքները զսպողը խելացի է»։ Եթէ մէկը ձեզ նախատէ, ժուժկալութիւն ունեցէք ‘միւս ծնօտը դարձնելու’, թերեւս նախատողին հետ առանձնաբար հանդարտօրէն եւ խաղաղօրէն խօսելով։—Մատթէոս 5։39. Առակաց 15։1

13. Պատանիները ի՞նչպէս կրնան հաւասարակշռուած տեսակէտ մը ունենալ նիւթական բաներու հանդէպ։

¹³ «Ուրիշ հոգի» մը ցոյց տալու այլ կերպ մըն է, նիւթական բաներու հանդէպ հաւասարակշռուած տեսակէտ մը պահպանել։ Անշուշտ, սիրուն բաներ ունենալու փափաքը բնական բան մըն է։ Յիսուս Քրիստոս ինք ալ առնուազն սուղնոց հանդերձ մը ունէր։ (Յովհաննու 19։23, 24) Բայց, երբ նիւթական բաներ ունենալը մոլուցք մը կը դառնայ եւ դուք անդադար կը խնդրէք ձեր ծնողներէն որ գնեն բաներ, որոնք իրապէս անոնց կարողութենէն վեր են, կամ երբ կ’ուզէք պարզապէս ուրիշ պատանիներ ընդօրինակել, այդ պարագային թերեւս աշխարհի հոգին ձեր կարծածէն աւելի իշխանութիւն կը բանեցնէ ձեր վրայ։ Աստուածաշունչը կ’ըսէ. «Ամէն բան որ աշխարհի մէջ է՝ մարմնի ցանկութիւնը ու աչքերու ցանկութիւնը եւ այս կեանքին ամբարտաւանութիւնը՝ Հօրմէն չէ, հապա այս աշխարհէն է»։ Այո, աշխարհի նիւթապաշտական հոգիին իշխանութեան անձնատուր մի՛ ըլլաք։ Ձեր ունեցածով գոհանալ սորվեցէք։—Ա. Յովհաննու 2։16. Ա. Տիմոթէոս 6։8-10

14. (ա) Եսայիի օրերուն, Աստուծոյ ժողովուրդը ի՞նչպէս զբօսանքի հանդէպ անհաւասարակշիռ տեսակէտ մը ցոյց տուաւ։ (բ) Կարգ մը Քրիստոնեայ պատանիներ ի՞նչ վտանգներ դիմակալած են նայթգլապներու եւ անզուսպ հաւաքոյթներուն մէջ։

¹⁴ Զբօսանքն ալ իր տեղը պահելը կարեւոր է։ Եսայի մարգարէն ըսաւ. «Վա՜յ անոնց, որոնք առտուն կանուխ կ’ելլեն ու ցքի խմելու ետեւէ կ’ըլլան եւ իրիկունն ալ կ’ուշանան, մինչեւ որ գինին իրենց գլուխը տաքցնէ։ Անոնց խնճոյքներուն մէջ քնար ու տաւիղ, թմբուկ ու սրինգ եւ գինի կը գտնուի, բայց Տէրոջը ըրածներուն ուշադրութիւն չեն ըներ եւ անոր ձեռքերուն գործերուն չեն նայիր»։ (Եսայեայ 5։11, 12) Դժբախտաբար, կարգ մը Քրիստոնեայ պատանիներ նոյնանման անսանձ հաւաքոյթներու մասնակից եղած են։ Երբ խումբ մը Քրիստոնեայ պատանիներէ խնդրուեցաւ որ նկարագրեն ինչ որ տեղի կ’ունենայ երիտասարդներու նայթգլապներուն մէջ, երիտասարդ քոյր մը ըսաւ. «Անդադար կռիւ կայ։ Ես ալ անզգալաբար ինքզինքս անոնց մէջ գտայ»։ Ուրիշ երիտասարդ եղբայր մը աւելցուց. «Խմել, ծխել եւ ասոնց նման բաներ»։ Երիտասարդ եղբայր մը ընդունեց. «Մարդիկ կը գինովնան։ Յիմարաբար կը վարուին։ Նաեւ թմրեցուցիչ կայ։ Շատ գէշ բաներ կը պատահին։ Եթէ հոն երթաս եւ խորհիս որ դուն չես ազդուիր անոնցմէ՝ կը սխալիս»։ Ուստի, տեղին ըլլալով Աստուածաշունչը անառակութիւնները կամ «անսանձ հաւաքոյթները» «մարմնի գործեր»ուն հետ կը դասէ։—Գաղատացիս 5։19-21, Պայինկթըն. Հռովմայեցիս 13։13

15. Աստուածաշունչը զբօսանքի նկատմամբ ի՞նչ հաւասարակշռուած տեսակէտ մը կը ներկայացնէ։

¹⁵ Վնասակար զբօսանքներէն խուսափիլը տխուր կեանք մը ունենալու պիտի չդատապարտէ ձեզ։ Մենք ‘ուրախ Աստուած’ մը կը պաշտենք, որ կը փափաքի որ դուք հաճոյք առնէք ձեր պատանեկութենէն։ (Ա. Տիմոթէոս 1։11. Ժողովողի 11։9) Բայց Աստուածաշունչը կ’ազդարարէ. «Ուրախութիւն [«զբօսանք», Լամսա] սիրողը կարօտութեան մէջ կ’իյնայ»։ (Առակաց 21։17) Այո, եթէ զբօսանքը ձեր կեանքին մէջ կարեւորագոյն բանը դարձնէք, հոգեւոր կարօտութենէ պիտի տառապիք։ Ուստի, զբօսանքի ընտրութեան մէջ Աստուածաշունչի սկզբունքներուն հետեւեցէք։ Զուարճանալու շատ կերպեր կան, որոնք կրնան ձեզ կերտել եւ ոչ թէ քանդել։c—Ժողովողի 11։10

16. Քրիստոնեայ պատանիներ ի՞նչպէս կրնան ցոյց տալ որ իրենք տարբեր են։

¹⁶ Դուք ձեր պարկեշտ հագուելակերպով, յարդարանքով ու աշխարհային նորաձեւութիւնները մերժելով, պիտի յայտնէք որ տարբեր էք։ (Հռովմայեցիս 12։2. Ա. Տիմոթէոս 2։9) Երաժշտութեան ձեր ընտրութիւնն ալ նոյնը պիտի ընէ։ (Փիլիպպեցիս 4։8, 9) Քրիստոնեայ ուրիշ երիտասարդուհի մը ըսաւ. «Ես երաժշտութիւններ ունիմ, որ պէտք է որ նետեմ, բայց ա՜յնչափ կը սիրեմ»։ Ուրիշ պատանի մըն ալ ընդունեց. «Ինծի համար երաժշտութիւնը ծուղակ մըն է, քանի որ զայն կը սիրեմ։ Երբ անոր մէջ սխալ բան մը գտնեմ, կամ եթէ ծնողքս իմ ուշադրութեանս յանձնեն, իրապէս հարկ կը տեսնեմ իմ մտքիս ստիպելու որ սրտիս տիրէ, քանի որ սրտիս մէջ իրապէս կը սիրեմ այդ երաժշտութիւնը»։ Ո՛վ երիտասարդներ, ‘Սատանայի խորհուրդներուն’ նկատմամբ տգէտ մի՛ ըլլաք։ (Բ. Կորնթացիս 2։11) Ան երաժշտութիւնը կը գործածէ որպէսզի երիտասարդ Քրիստոնեաները Եհովայէ հեռացնէ։ Դիտարանի հրատարակութեանց մէջ յօդուածներ կան, որոնք կը խօսին ռէբ, հէվի մէթըլ եւ տարբեր տեսակի ռոք երաժշտութեան մասին։d Սակայն, կարելի չէ որ Դիտարանի հրատարակութիւնները երեւան եկող իւրաքանչիւր նոր երաժշտութեան մասին բացատրութիւն տան։ Ուստի, պէտք է «խոհեմ» ու «ներատես» ըլլաք, երբ երաժշտութիւն կ’ընտրէք։—Առակաց 2։11, ՆԱ։

17. (ա) Բոռ·նէա–ն ի՞նչ է, եւ ի՞նչ արարքներ ներփակուած են անոր մէջ։ (բ) Բարոյութեան հարցին մէջ ի՞նչ է Աստուծոյ կամքը։

¹⁷ Վերջապէս, դուք ձեզ բարոյապէս մաքուր պէտք է պահէք։ Աստուածաշունչը կը յորդորէ. «Պոռնկութենէն փախէք»։ (Ա. Կորնթացիս 6։18) Պոռնկութեան համար Յունարէն բառը՝ բոռ·նէա, ամուսնական կապէ դուրս սեռային անդամները որեւէ տեսակի սեռային անօրէն արարքներու համար գործածելուն կ’ակնարկէ։ Անիկա կրնայ ներփակել բերանային ճամբով սեռային յարաբերութիւն եւ սեռային անդամներու դիտումնաւոր փաղաքշում։ Քրիստոնեայ պատանիներէն ոմանք այսպիսի բաներու անձնատուր եղած են, խորհելով որ իրենք որեւէ կերպով պոռնկութեան միջամուխ չեն ըլլար։ Սակայն, Աստուծոյ Խօսքը յստակօրէն կ’ըսէ. «Աստուած կը կամենայ որ դուք սուրբ ըլլաք, ետ կենաք պոռնկութենէ. ձեզմէ ամէն մէկը գիտնայ իր մարմինը սրբութիւնով ու պատուով պահել»։—Ա. Թեսաղոնիկեցիս 4։3, 4

18. (ա) Պատանի մը աշխարհի հոգիէն վարակուելէ ի՞նչպէս կրնայ խուսափիլ։ (բ) Ի՞նչ բան պիտի քննարկուի յաջորդ յօդուածով։

¹⁸ Այո, Եհովայի օգնութեամբ, կրնաք աշխարհի հոգիէն վարակուելէ խուսափիլ։ (Ա. Պետրոս 5։10) Այսուհանդերձ, Սատանան յաճախ կը քօղարկէ իր մահացու ծուղակները եւ երբեմն խոհեմութիւն կը պահանջէ, որ անհատ մը վտանգը զգայ։ Մեր յաջորդ յօդուածին նպատակն է պատանիներուն օգնել որ իրենց ըմբռնողութիւնը զարգացնեն։

[Ստորանիշներ]

Վերաքաղի Հարցումներ

◻ Ի՞նչ է «աշխարհի հոգին» եւ անիկա ի՞նչպէս ‘իշխանութիւն’ ունի մարդոց վրայ։

◻ Ներկայիս, պատանիներուն մէջ աշխարհի հոգիին կարգ մը դրսեւորումները ի՞նչ են։

◻ Քրիստոնեայ պատանիները ի՞նչպէս «ուրիշ հոգի» մը ցոյց կու տան խօսակցութեան եւ զբօսանքի առնչութեամբ։

◻ Քրիստոնեայ պատանիներ ի՞նչպէս կրնան «ուրիշ հոգի» մը ցոյց տալ բարոյական ու երաժշտական հարցին մէջ։

[Նկար՝ էջ 19]

Բազմաթիւ պատանիներ իրենց վարքով ցոյց կու տան որ աշխարհի հոգիին «իշխանութեան» ներքեւ են

[Նկար՝ էջ 21]

Աշխարհի հոգիին ընդդիմանալը քաջութիւն կը պահանջէ