«Ձեր խօսքը ամէն ատեն . . . աղով համովցած ըլլայ»

1. ‘Մեր խօսքը աղով համովցած ըլլալը’ ի՞նչ կը նշանակէ։

¹ «Ձեր խօսքը ամէն ատեն շնորհքով, որպէս թէ աղով համովցած ըլլայ ու գիտնաք թէ ի՛նչպէս կը վայլէ ձեզի ամէն մէկուն պատասխան տալ»։ (Կող. 4։6) Մեր խօսքը աղով համովցնելը կը նշանակէ շիտակ բառեր ընտրել եւ այնպիսի կերպով մը արտայայտուիլ որ մեր ըսածը ախորժելի ըլլայ լսողին։ Ծառայութեան մէջ ասիկա ընելը շատ կարեւոր է։

2. Յիսուս ի՞նչպէս կրցաւ Սամարացի կնոջ մը վկայել։

² Յիսուսի օրինակը. Մինչ Յիսուս ջրհորի մը քով կը հանգչէր, նախաձեռնութիւնը առաւ Սամարացի կնոջ մը խօսելու, որ ջուր քաշելու եկած էր։ Խօսակցութեան ընթացքին կինը քանի մը անգամ ակնարկութիւն ըրաւ Հրեաներուն ու Սամարացիներուն միջեւ վաղուց գոյացած թշնամութեան։ Ան նաեւ իր համոզումը յայտնեց թէ Սամարացիները Յակոբէ սերած էին, թէեւ Հրեաները բուռն կերպով կը հաւատային թէ Սամարացիները օտարազգիներէ սերած են։ Փոխանակ անոր ըսածներուն առարկութիւն ընելու, Յիսուս խօսակցութիւնը դրական պահեց։ Որպէս արդիւնք, ան կրցաւ վկայութիւն մը տալ, որ թէ՛ կնոջ եւ թէ քաղաքի մարդոց օգտակար եղաւ։—Յովհ. 4։7-15, 39

3. Ծառայութեան ընթացքին ի՞նչպէս կրնանք Յիսուսի օրինակին հետեւիլ։

³ Մինչ կը քարոզենք, պէտք է ի մտի ունենաք մեր նպատակակէտը,– «բարի բաներու աւետիս»ը տալ։ (Հռովմ. 10։15) Կ’ուզենք տանտիրոջ հետ խօսակցիլ Աստուածաշունչէն առնուած գրաւիչ ու շինիչ գաղափարի մը մասին, եւ ո՛չ թէ այն տպաւորութիւնը տալ թէ իր անձնական հաւատալիքներուն վրայ յարձակում կը գործենք։ Եթէ ան սխալ տեսակէտ մը արտայայտէ, մեր պատասխանը պէտք չէ իրեն ասպարէզ կարդայ։ Անոր պատասխանին մէջ բան մը կա՞յ, որուն հետ կրնանք համաձայնիլ կամ զայն գործածել անկեղծօրէն զինք գովելու համար։ Թերեւս կրնանք համար մը ներկայացնել, ըսելով. «Բնաւ այս կարելիութեան մասին խորհա՞ծ էիր»։

4. Ի՞նչ պէտք է ընենք եթէ տանտէրը նախատական խօսքեր ուղղէ։

⁴ Ի՞նչ կրնանք ընել եթէ տանտէրը նախատական խօսքեր ուղղէ կամ այնպէս թուի թէ միայն կ’ուզէ վիճաբանիլ։ Պէտք է շարունակենք մեր վարմունքով ու խօսքերով ազնուութիւն ու հեզութիւն ցուցաբերել։ (Բ. Տիմ. 2։24, 25) Եթէ անհատը Թագաւորութեան պատգամը չի գնահատեր, լաւագոյն բանն է փափկանկատօրէն հեռանալ։—Մատթ. 7։6. 10։11-14

5. Քոյր մը ի՞նչ դրական արդիւնք ձեռք ձգեց՝ երբ շնորհալի կերպով պատասխանեց։

⁵ Դրական արդիւնքներ. Երբ քոյր մը փորձեց իր դրացիին վկայել, կնոջ բարկութիւնը բորբոքեցաւ եւ հայհոյութիւններ տեղացուց։ Մեր քոյրը ազնուաբար ըսաւ. «Կը ցաւիմ որ այդպէս կը զգաս։ Կը ներես, ցտեսութիւն»։ Երկու շաբաթ ետք, կինը քրոջ դուռը զարկաւ, իր վերաբերմունքին համար ներողութիւն խնդրեց, եւ յայտնեց թէ պատրաստ է քրոջ ըսելիքները մտիկ ընելու։ Շնորհալի պատասխան մը յաճախ դրական արդիւնք կու տայ։—Առ. 15։1. 25։15

6. Ինչո՞ւ կարեւոր է որ ծառայութեան մէջ աղով համովցած խօսքեր խօսինք։

⁶ Շարունակէ աղով համովցած խօսքեր խօսիլ, երբ բարի լուրը կը ծանուցանես։ Նոյնիսկ եթէ տանտէրը չընդառաջէ, թերեւս յօժարի մտիկ ընել յաջորդ անգամ, երբ Եհովայի Վկաները իր դուռը զարնեն։