Աստուածաշունչի ազդու ուսումնասիրութիւններ վարել
1. Աստուածաշունչի ուսումնասիրութիւններ վարող հրատարակիչները ի՞նչ պատասխանատուութիւն ունին։
1 Ո՛չ ոք կրնայ Աստուծոյ ծառայել եթէ Աստուած «զանիկա չքաշէ» (Յովհ. 6։44)։ Ասով հանդերձ, Աստուածաշունչի ուսումնասիրութիւններ վարող հրատարակիչները պէտք է իրենց բաժինը բերեն՝ մարդոց օգնելու որ իրենց երկնաւոր Հօր մօտենան (Յակ. 4։8)։ Ասիկա պատրաստութիւն կը պահանջէ։ Պարզապէս իւրաքանչիւր պարբերութիւն կարդալն ու տպուած հարցումը հարցնելը բաւարար չէ մեր աշակերտներուն օգնելու, որ պատգամը ըմբռնեն եւ յառաջդիմեն։
2. Աստուածաշունչի ազդու ուսումնասիրութիւնը ի՞նչ պիտի իրագործէ։
2 Ազդու ուսումնասիրութիւններ վարելու համար, հրատարակիչները պէտք է օգնեն իրենց աշակերտներուն, որ 1) հասկնան ինչ որ Աստուածաշունչը կը սորվեցնէ, 2) ընդունին ինչ որ Աստուածաշունչը կը սորվեցնէ եւ 3) կիրարկեն ինչ որ Աստուածաշունչը կը սորվեցնէ (Յովհ. 3։16. 17։3. Յակ. 2։26)։ Այս քայլերը առնելը կրնայ աշակերտին հետ ամիսներ տեւել։ Բայց իւրաքանչիւր քայլ հանգրուան մըն է, որ իրեն կ’օգնէ Եհովային հետ իր փոխյարաբերութիւնը զարգացնելու եւ իրեն նուիրուելու։
3. Ազդու ուսուցիչներ ինչո՞ւ տեսակէտ պարզող հարցումներ կ’ուղղեն։
3 Աստուածաշունչի աշակերտը ի՞նչ կը մտածէ։ Գիտնալու համար թէ մեր Աստուածաշունչի աշակերտը իր սորվածը կը հասկնայ եւ կ’ընդունի, խօսողը միայն դուն մի՛ ըլլար, այլ զինք քաջալերէ որ արտայայտուի (Յակ. 1։19)։ Արդեօք ան կը հասկնա՞յ թէ Աստուածաշունչը այդ նիւթին մասին ի՛նչ կ’ըսէ։ Նիւթը իր բառերով կրնա՞յ բացատրել։ Իր սորվածին մասին ի՞նչ կը խորհի։ Աստուածաշունչին սորվեցուցածները տրամաբանական կը գտնէ՞ (Ա. Թես. 2։13)։ Կը հասկնա՞յ թէ իր սորվածները պէտք է իր ապրելակերպին ազդեն (Կող. 3։10)։ Այսպիսի հարցումներու պատասխանները առնելու համար, պէտք է տեսակէտ պարզող հարցումներ ուղղենք, եւ ապա մտիկ ընենք (Մատ. 16։13-16)։
4. Ի՞նչ պէտք է ընել եթէ աշակերտը Աստուածաշունչէն իր սորվածը հասկնալու կամ կիրարկելու դժուարութիւն կ’ունենայ։
4 Սովորութիւններն ու տարբեր մտածելակերպերը յաճախ արմատ կապած կ’ըլլան եւ ժամանակ կ’առնէ որ մարդիկ ատոնցմէ ձերբազատուին (Բ. Կոր. 10։5)։ Ի՞նչ ընել եթէ աշակերտը սորվածը չընդունի կամ չկիրարկէ։ Պէտք է որ համբերատար ըլլանք եւ թոյլ տանք որ Աստուծոյ Խօսքն ու սուրբ հոգին ժամանակի ընթացքին աշակերտին սրտին ազդեն (Ա. Կոր. 3։6, 7. Եբ. 4։12)։ Աշակերտին ճնշելու տեղ, յաճախ աւելի լաւ է ուրիշ նիւթի մը անցնիլ, եթէ ան դժուարութիւն կ’ունենայ Աստուածաշունչին սորվեցուցածը հասկնալու կամ կիրարկելու։ Մինչ կը շարունակենք Աստուածաշունչէն իրեն սորվեցնել համբերատարութեամբ եւ սիրով, ան կրնայ ժամանակի ընթացքին մղուիլ հարկ եղած ճշդումները ընելու։