Եհովայի վկաները տասանորդ կու տա՞ն

Ո՛չ, Եհովայի վկաները տասանորդ չեն տար։ Մեր գործունէութիւնը կը ֆինանսաւորուի կամաւոր նուիրատուութիւններով։ Ի՞նչ կը նշանակէ տասանորդ տալ եւ ինչո՞ւ Եհովայի վկաները տասանորդ չեն տար։

Տասանորդ տալու պատուէրը, այսինքն՝ ունեցուածքին տասը առ հարիւրը նուիրելը, մաս կը կազմէր այն Օրէնքին, որ Աստուած վաղեմի իսրայէլ ազգին տուաւ։ Բայց Աստուածաշունչը յստակ կերպով ցոյց կու տայ թէ այդ Օրէնքը, ներառեալ՝ ‘ժողովուրդէն տասանորդ առնելու օրէնքը’, քրիստոնեաներուն վրայ չի կիրարկուիր (Եբրայեցիս 7։5, 18. Կողոսացիս 2։13, 14)։

Փոխանակ տասանորդ տալու եւ զոհեր մատուցանելու, Եհովայի վկաները առաջին դարու քրիստոնեաներուն օրինակին կը հետեւին եւ իրենց գործունէութեան թիկունք կը կանգնին երկու կերպերով. անոնք առանց աշխատավարձ ստանալու քարոզչութեան կը մասնակցին եւ կամաւոր նուիրատուութիւններ կ’ընեն։

Այսպիսով, կը հետեւինք քրիստոնեաներուն տրուած Աստուածաշունչի այս խրատին. «Ամէն մէկը ինչպէս իր սրտովը կը յօժարի՝ թող այնպէս տայ, ո՛չ թէ տրտմութեամբ կամ ստիպմամբ. վասն զի Աստուած յօժարակամ տուողը կը սիրէ» (Բ. Կորնթացիս 9։7)։