Oktoba

Hapo irira ouzeu kove okukara nonḓuviro? Ombara David wina wa ri nongaro otja indjo. Ku nao, eye wa kumba ku Mukuru kutja: “Nu u ndji pe ombango yokukara nonḓuviro kOve.” (Eps. 51:12) David wa suverere Jehova. Nandarire nao, ya ri ouzeu ku David okukara nonḓuviro nu wina mai rire ouzeu kweṱe. Omena raye? Otjitenga, eṱe twa rumata ouvi wokuhinokukara nonḓuviro. Otjitjavari, Satan u kondja kutja atu ha kara nonḓuviro ku Jehova tjimuna eye tja tjita. (2 Kor. 11:3) Otjitjatatu, eṱe twa kondorokwa i yovandu mbe ha raisa onḓuviro “indji ombepo nambano ndji ungura movandu mbe hi nonḓuviro ku Ndjambi.” (Ef. 2:2) Eṱe matu sokuungura oukukutu okurwisa ouvi nu wina matu sokupirukira oṋiṋikizire Satan nouye mbwi ndji ve ungurisa okutjita kutja atu ha kara nonḓuviro. Eṱe matu sokukondja pu matu yenene okukara nonḓuviro ku Jehova na ku imba mbe nomerizirira motjira tje. w23.10 6 ¶1

Matu yenene okurihonga tjike okuza kotjihimise tja Jesus indu tja tanaura omeva momavinu? Eṱe matu yenene okurihongera ko omerisusuparisiro. Jesus ke na pe ritongamisira otjihimise ho, nu nandarire ke na pe ritongamisira oviṋa mbya tjita. Nungwari, eye nomerisusuparisiro wa kara pokuyandja ohiviro nondjozikiro ku Ihe. (Joh. 5:​19, 30; 8:28) Indu tji twa horere ku Jesus mokukara nomerisusuparisiro, eṱe kamaatu ritongamisire oviṋa mbi matu tjiti. Ngatu yandje ohiviro aihe ku Mukuru wetu omuwa, ngwe tu pa ondjingonekero yokumukarera. (Jer. 9:​23, 24) Ngatu kayende komurungu okumupa ohiviro ndje mu pwire. Kombanda yaavihe, kape notjiṋa ngamwa tji matu yenenisa nokuhinombatero ya Jehova. (1 Kor. 1:​26-31) Indu tji tu ri overisusuparise, eṱe katu hepa okutangwa mena roviṋa oviwa mbi tu tjitira varwe. Eṱe tu kara nohange mena rokutja tu tjiwa kutja Jehova u muna nu u vara imbi mbi twa tjiti. (Sasaneka Mateus 6:​2-4; Hebr. 13:16) Tjiri tu tjata ku Jehova indu tji matu horere ku Jesus mokuraisa omerisusuparisiro.—1 Petr. 5:6. w23.04 4 ¶9; 5 ¶11-12

Nombatero yombepo ondjapuke, omuapostele Paulus wa tunduuza Ovakriste okuyandja ombango kozonḓero zavarwe. Matu yenene vi okuungurira komatunduuziro ngo pozombongarero zombongo? Indu tji matu zemburuka kutja ovakwetu, tjimuna eṱe, mave vanga okukara norupa. Ripurira ku imbi. Ove tji mo hungire ku nomapanga woye, hapo ove otjo hungira tjinene kutja owo ave ha kara norupa? Kako. Ove otjo vanga kutja owo ve kare norupa mehungi. Momuano tjingewo, pozombongarero zombongo tu vanga kutja ovengi ve yandje eziriro. Momuano umwe omuwa mu matu yenene okupanḓiparisa ovakambure ovakwetu, eendu tji matu ve yandjere okuraisa ongamburiro mu imbi mbi mave ziri. (1 Kor. 10:24) Ku nao, matu sokuyandja omaziriro omasupi kutja tu yandjere varwe okukara norupa. Nandarire kutja mo yandja eziriro esupi, kondja kutja o ha yandja omapu omengi. Indu tji wa yandja omapu ayehe moparagrafa, mape kasewa oviṱiṱi ku varwe okuhungira. w23.04 22-23 ¶11-13

Eṱe matu sokuzemburuka ounahepero wokukayenda komurungu okuvatera varwe. Tu yenena okutjita nao okupitira motjiungura tjetu tjokuzuvarisa. Matu hepa okutjita omarundurukiro motjiungura tjetu tjokuzuvarisa nokupuratena koumune wavarwe. Ovandu mbu tu kazuvarisa ko ve noumune pekepeke ohunga na Mukuru nu va za kotuveze nozombazu pekepeke. Omuapostele Paulus aa tjiti omarundurukiro indu tje ri ohepero nokupuratena koumune wavarwe, nu eṱe wina matu yenene okurihongera kotjihorera tje. Jesus wa zika Paulus okurira “omuapostele woviwaṋa.” (Rom. 11:13) Ku nao, Paulus aa zuvarisa kOvajuda, kOvagrike, kovandu mba hongwa, kovaṱuta, kovandu mba ri mounane, na kozombara. Kokutja ma ṱune komitima vyovandu avehe mba, Paulus ‘ku avehe wa rira oviṋa avihe.’ (1 Kor. 9:​19-22) Eye aa yandja ombango kombazu, komekurisiro, na kozongamburiro zaimba mbaave puratene ku ye, nu otjiṋa ho tje mu vatera okuhungira ku na wo momuano mbu mau ve nanene ku Mukuru. Eṱe wina matu yenene okurira ovazuvarise ovawa, indu tji twa rundurura omuano wetu wokuzuvarisa nokukondja okuripurira komuano omusemba wokuvatera omundu auhe. w23.07 23 ¶11-12

Ovandu mbe noupore ve nomasa, nungwari kavingundi. Pe hepa ongondjero okukara noupore, indu tji matu tuurunga ozongaro ozonḓeu. Oupore i tjimwe ‘tjovihape vyOmbepo.’ (Gal. 5:​22, 23) Embo ndi “oupore” mOtjigrike povikando tjiva aari ungurisiwa okusasaneka okakambe okahahu ku ka zeewa nawa. Ripura ohunga nokakambe okahahu nu ku ka rira okakozu. Nandarire kutja okakambe ngo okakozu, oko ngunda okapenda. Otjovandu, hapo eṱe matu yenene vi okurira ozongozu nokurira omapenda wina? Kamaatu yenene okutjita nao kourike wetu oveni. Eṱe matu sokuningira ombepo ya Mukuru, okutuvatera kutja tu kare notjikaṋena otjiwa ho. Tu novihorera ovingi vyovandu mbe rihonga okurira ozongozu. Otjotjihorera, ovakambure ovakwetu ovengi va raisa oupore indu ovandu tjaave kondjo okukara nombata ku na wo, nu ihi tja vatera ovandu ovengi okukara noumune ouwa ohunga nOvahongonone va Jehova.—2 Tim. 2:​24, 25. w23.09 14 ¶3

Motjirimunikise, omuapostele Johanes wa muna ovanene 24 meyuru amave rikotamene ku Jehova. Owo va tanga Mukuru na ve tja eye wa pwa okumuna “ondjozikiro nondengero nomasa.” (Omavan. 4:​10, 11) Ovaengeli ovaṱakame ve nomapu omengi okutanga Jehova. Owo ve ri meyuru pu na ye nu ve mu tjiwa nawa. Owo ve muna ovikaṋena vye moviṋa eye mbye tjita. Indu tji mave munu omuano Jehova me tjita oviṋa, iho tji ve hinga kutja ve mu tange. (Job 38:​4-7) Eṱe wina matu sokutanga Jehova mozongumbiro zetu. Matu yenene okutjita nao, mokumuraera kutja ovikwaye mbi twa suvera ohunga na ye nokutja ongwaye tji tu mu pa ondengero. Otja tji mo lese nokukonḓonona Ombeibela, kondja okutara kovikaṋena vya Jehova mbi ku tjatera tjinene. (Job 37:23; Rom. 11:33) Okuzambo raera Jehova kutja u noumune uṋe ohunga novikaṋena mbyo. Eṱe wina matu yenene okutanga Jehova, mena rokutja eye u tu vatera nu u vatera ovakambure ovakwetu.—1 Sam. 2:​1, 2. w23.05 4 ¶6-7

Mombura ndji 1919, Babilon Otjinene katja ri nouvara kombanda yovakarere va Mukuru rukwao. Mombura ndjo, “omukarere omuṱakame nomunazondunge” otja uta okuungura kokutja ovandu vomitima omiwa ve ute okukayenda ‘mOndjira yOuyapuke.’ (Mat. 24:​45-47; Jes. 35:8) Oviungura ovandu varwe mbi va ungura morukapitaveze okurongerisa ondjira ndjo vya vatera ovandu mba uta okukayenda mondjira ombaranga ndjo, okurihonga ovingi ohunga na Jehova nozondando ze. (Omiano 4:18) Owo wina va uta okuhupa otja komirari vya Jehova. Jehova kaa undjire ko kutja ovakarere ve, ve tjite omarundurukiro ayehe ngu maye heperwa po tjimanga. Posi yokutja, eye ee ve vatere okutjita omarundurukiro ngo kouṱiṱiṱiṱi. Tjiri matu kara nondjoroka indu atuhe tji matu kondjo okuyorokisa Mukuru wetu mu avihe mbi matu tjiti. Ondjira aihe i hepa okuṱunwa kutja i kare mongaro osemba. Okuza mombura ndji 1919 “Ondjira yOuyapuke” i kayenda komurungu okuṱunwa kokutja ovandu ovengi ve yenene okupita mu Babilon Otjinene. w23.05 17 ¶15; 19 ¶16

Orutu Orunane ru honga ovavatere mozokomiti pekepeke wOrutu Orunane. Ovavatere ovaṱakame mba nai ve nomerizirira omengi motjira tja Jehova. Owo ve rirongerisa nawa okukayenda komurungu okuungura otjiungura tjokutjevera ozonḓu za Kristus. Indu ovatwirisiwa ovasenina tji va twarewa keyuru kuṱa komaandero wondatumisire ondirise, ovakarere va Jehova mave kayenda komurungu okurikotamena ku ye nouṱakame kombanda yehi. Mena rokutja Jesus Kristus ongu me ve honaparere po owo kamaave isa okutjita nao. Eṱe matu tjiwa kutja oruveze ndwo, otjimbumba tjoviwaṋa mbye rikuta kumwe, Ombeibela tji tji isana kutja Gog wa Magog, matji wire ovakarere va Mukuru. (Esek. 38:​18-20) Posi yokutja omawiro omasupi ngo kaye nokukara nondoṋeno. Oyo kaye nokutjita kutja ovakarere va Jehova ve ise okurikotamena ku ye. Eye tjiri me ve yama. Motjirimunikise, omuapostele Johanes wa muna “otjimbumba otjinene” tjozonḓu zarwe za Kristus. Johanes wa raerwa kutja “otjimbumba otjinene” hi tja zira “mondatumisire ondirise.” (Omavan. 7:​9, 14) Ku nao, eṱe matu tjiwa nawa kutja Jehova me ve yama. w24.02 5-6 ¶13-14

Matu yenene okutjita vi kutja tu mune ombepo ondjapuke? Matu yenene okuningira mongumbiro, okukonḓonona Embo ra Mukuru, nokukara pu notjira tje tji tji hongorerwa po i yombepo ye. Okutjita nao maku tu vatere okukara ‘novihape vyOmbepo.’ (Gal. 5:​22, 23) Mukuru u yandja ombepo ye ku imba mbe nomeripura nomeritjindiro omakohoke. Eye kamaa kayenda komurungu okutupa ombepo ye indu tji twa kayenda komurungu okuripura ohunga noviṋa ovihakohoke nokuvitjita. (1 Tes. 4:​7, 8) Kutja tu kayende komurungu okumuna ombepo ondjapuke, eṱe wina katu ‘sokunjengura omaprofetero.’ (1 Tes. 5:​20, EEP) Mezeva ndi “omaprofetero” ye heya ozombuze Jehova nḓe tu pa okupitira mombepo ye ondjapuke, ozo ze kamburira mo eyuva ra Jehova nounanḓengu woruveze mu tu hupira. Eṱe katu ripura kutja eyuva ra Jehova poo Armagedon kamaa i ya ngunda atu nomuinyo. Nungwari, eṱe tu raisa kutja eyuva ndo riri popezu, indu tji matu kayenda komurungu okutjita oviṋa ‘mbi tjata ku Ndjambi’ nokuritjinda momuano omukohoke.—2 Petr. 3:​11, 12. w23.06 12 ¶13-14

Matu yenene okutjita vi Otjovakriste indu tji twa munu otjiperendero tjakamuzu motjiungurisiwa tjetu nokuhinokuundjira ko? Tu sokuhakahana okuhinokutara ku tjo. Ma rire oupupu kweṱe okutjita nao indu tji matu rizemburuka kutja otjiṋa otjinanḓengu tjinene kweṱe, oupanga wetu ku na Jehova. Nandarire oviperendero mbi he ri oviperendero vyakamuzu mape ya avi pendura ozonḓuma. Omena raye tji twa sokuvinakaura? Mena rokutja katu nokuvanga okutoora omukambo nangarire omuṱiṱi mbu mau tjiti kutja tu ripure okutjita otjiṋa ngamwa otjivi. (Mat. 5:​28, 29) Omunene wombongo moThailand wena David wa tja: “Ami mbi ripura omuini kutja, ‘Nandarire kutja oviperendero mape ya kavyakamuzu, hapo Jehova ma kara nonyuṋe indu tji me kayenda komurungu okutara ku vyo?’ Ouripura otja imbwo u ndji vatera okutoora omikambo mbi ri vyo.” Tji twa kara nondira okutjita otjiṋa ngamwa atjihe tji matji tjiti Jehova a ha kara nondjoroka, matji tu vatere kutja tu toore omikambo omisemba. Ondira ku Mukuru oyo “ombutiro younongo.” w23.06 23 ¶12-13

‘Omatuwo’ mape ya aye kuramene po ozombongo zetu. Mozombamisiro ozonene tjinene Jehova wa kwizika kutja me tu vatere indu tji twa kayenda komurungu okumukarera pu novakambure ovakwetu. Mena ranao, matu sokuungura oukukutu nai okusuvera ovakambure ovakwetu tjinene. Eṱe matu sokutjita nao kutja tu hupe. “Eyuva enene raMuhona” mari rire oruveze oruzeu kovandu avehe. (Sef. 1:​14, 15) Ovakarere va Jehova wina mave munu omauzeu. Posi ya, indu tji twe rirongerisa nai, matu yenene okuporimana nokuvatera varwe. Eṱe matu yenene okukara nonḓarorure okutuurunga omauzeu ayehe ngu matu munu. Indu ovakambure ovakwetu tji mave munu omauzeu, eṱe matu tjiti otja pu matu yenene okuvevatera mokuveraisira otjari nokuvepa imbi mbi mave hepa. Nu indu tji twe rihongo okusuvera ovakambure ovakwetu nai, eṱe matu ve raisire orusuvero moruyaveze. Jehova me ketupa otjisuta tjomuinyo waaruhe mouye omauzeu ayehe mu maye zembwa nu mu ye hi nokuzemburukwa rukwao.—Jes. 65:17. w23.07 7 ¶16-17

Embo ra Mukuru ri hungira ohunga novarumendu ovaṱakame otjovanamasa. Posi ya nandarire imba ovanamasa mokati kawo kaaruhe tjaave munu kutja ve nomasa. Otjotjihorera, Ombara David povikando tjiva ee rimunu kutja u nomasa “otja otjiṱunga tjondundu” posi povikando vyarwe aa ‘tira.’ (Eps. 30:7) Nandarire kutja Simson wa ri nomasa tjinene indu tjaa hingwa i yombepo ya Mukuru, eye aa tjiwa kutja nokuhinomasa ngu maye zu ku Mukuru ‘ma ngundipara na sana otja omundu ngamwa auhe.’ (Ovapang. 14:​5, 6; 16:17) Ovarumendu ovaṱakame mba va ri nomasa mena rokutja Jehova ongwe ve pe omasa. Omuapostele Paulus wa yakura kutja eye wina aa hepa omasa okuza ku Jehova. (2 Kor. 12:​9, 10) Eye wa ri nouzeu wouveruke. (Gal. 4:​13, 14) Povikando tjiva ya ri ouzeu ku ye okutjita imbi ri ovisemba. (Rom. 7:​18, 19) Nu povikando tjiva eye ee rikende nu aa tira imbi mbi mape ya ave tjitwa ku ye. (2 Kor. 1:​8, 9) Posi ya indu Paulus tja ngundipara, eye ee rimunu omasa. Omomuano uṋe? Jehova wa yandja omasa ku Paulus nga hepa okutuurunga omauzeu we. w23.10 12 ¶1-2

Indu povikando tjiva tji matu munu kutja katu nonḓengu, matu sokuzemburuka kutja Jehova omuini ongwe tu nanena ku ye. (Joh. 6:44) Eye u muna ovikaṋena oviwa mweṱe nu utu tjiwa nawa kutja oweṱe ovandu mbu tu ri vi. (2 Ekuruh. 6:30) Okutja, eṱe matu sokukara nongamburiro mu ye, indu tji ma tja oweṱe ovihuze ku ye. (1 Joh. 3:​19, 20) Ngunda atu hi ye rihonga ouatjiri, ovengi vetu twa tjita oviṋa mbi mape ya avi tjita kutja tu rimune ondjo. (1 Petr. 4:3) Varwe mbe karera Jehova nouṱakame mape ya ngamba ve kondja noungundipare kaaṋi. Tjike ohunga na ove? Hapo povikando tjiva u fula kutja Jehova kemee ku isire? Tji pe ri nao, otjihuhumiṋe okutjiwa kutja ovakarere va Jehova ovaṱakame aave kondjo noumune otja imbwo. Otjotjihorera, omuapostele Paulus aa fula navi indu tje ripurire koungundipare we. (Rom. 7:24) Otjingaperi kutja Paulus we ritanaura komauvi we na papitisiwa. Posi ya, eye wa tja: “Owami omuhinanḓengu tjinene povaapostele avehe.” Nu wina wa tja: “Owami ngu mbi ri omunauvi tjinene pu avehe.”—1 Kor. 15:9; 1 Tim. 1:15. w24.03 27 ¶5-6

Otjiṋa tjimwe tji matu yenene okurihongera komukambo omuvi Ombara Joas mbwa toora otjo hi tjokutja matu hepa okutoorora omapanga omawa nga suvera Jehova nu nge vanga okumuyorokisa. Omapanga otja ingo maye tu vatere okutjita oviṋa oviwa. Eṱe matu yenene okutjita oupanga ku na imba mbe ri ovanene poo ovaṱiṱi pweṱe. Zemburuka kutja Joas wa ri omuṱiṱi tjinene pepanga re Jojada. Tji wa toorora omapanga woye, ripura omuini kutja: ‘Hapo owo ve ndji vatera okukurisa ongamburiro yandje mu Jehova? Owo ve ndji tunduuza okuhupa otja komirari vya Mukuru? Hapo owo ve hungira ohunga na Jehova nouatjiri we ounanḓengu? Hapo owo ve raisa ondengero komirari vya Mukuru? Hapo owo ve ndji raera oviṋa mbi me vanga okuzuva poo ve kara nouvanḓe okundjivatera indu tji me toora omuhunga mbu he ri wo?’ (Omiano 27:​5, 6, 17) Tjiri, indu omapanga woye tji ye hi ya suvera Jehova, ko nokuyehepa. Posi ya, indu omapanga woye tji ya suvera Jehova, owo aruhe mave ku vatere.—Omiano 13:20. w23.09 9 ¶6-7

Embo ndi alfa mOtjingrike ri heya oletera ondenga yoalfabet nu omega i heya oletera osenina. Indu tji ma tja eye ‘oAlfa na Omega,’ Jehova me tu vatere okutjiwa kutja eye tja utu otjiṋa, me tji yenenisa nondoṋeno. Kombunda yaindu Jehova tja za nokumema Adam na Eva, eye wa tja: “Kwatasaneye, takavareye nu mu urise ehi, noro ngari kare kehi yeṋu.” (Gen. 1:28) Oruveze ndwo, Jehova wa raisa kutja ondando ye kehi na kovandu oyaye, indjo ondja ri ombutiro poo “Alfa.” Indu ondando ye tji ya yenenisiwa oparukaze na indu ozondekurona za Adam na Eva nḓe nonḓuviro tji ze urisa ehi na ze tjiti kutja ririre oparadisa, ingo maye rire omaandero poo “Omega.” Kombunda yaindu Jehova tja mana okumema “eyuru nehi noviṋa avihe, mbi ri mu vyo,” eye wa hungira otjiṋa okuraisa kutja ondando ye mai yenenisiwa tjiri. Ihi matji raisa kutja ondando ya Jehova kovandu na kehi mai yenenisiwa komaandero weyuva oritjahambombari.—Gen. 2:​1-3. w23.11 5 ¶13-14

Ouyenda okuza koBabilon okuyenda koIsrael atjau kambura ape omieze vine, nungwari Jehova wa kwizika kutja ma isa po ovipwite avihe mbya tjaavi kara mondjira yawo. Ovajuda ovaṱakame aave ripurire kouwa mbu mave kamuna tji va yaruka koIsrael kombanda yomauzeu nozongondjero nḓa tja ve tjita. Otjisuta otjinene tjaave sokumuna aatji kamburire mo omerikotameneno wawo. Motjihuro Babilon kamwa ri ondjuwo ondjapuke ya Jehova. Kapa ri otjipunguhiro Ovaisrael paave sokupunguhira ozombunguhiro otja kOmatwako wa Moses nu kapa ri Ovapristeri mbaave sokutjita ozombunguhiro nḓo. Wina pa ri ovandu ovengi motjihuro ho mbaave rikotamene koomukuru wovisenginina okukapita imba mbaave hupu otja komirari vya Jehova. Ovajuda ovengi va ri nonḓero yokuyaruka kehi rawo ku mave yenene okukayarurako omerikotameneno watjiri. w23.05 14-15 ¶3-4

Eṱe tu hepa ombatero yombepo ondjapuke ya Muhona kutja tu kayende komurungu okuritjinda “otja ovandu vondjerera.” Omena raye? Mena rokutja ouzeu okupanḓera poukohoke mouye wourunde mbwi. (1 Tes. 4:​3-5, 7, 8) Ombepo ondjapuke mai yenene okutuvatera kutja atu he ripura tjimuna ovandu mouye mbe he ripura tjimuna Jehova. Ombepo ondjapuke wina mai yenene okutuvatera kutja tu kare ‘noviṋa ngamwa avihe vyouwa nousemba.’ (Ef. 5:9) Omuano umwe mu matu yenene okumuna ombepo ondjapuke, omokuningira okupitira mongumbiro. Jesus wa tja Jehova ma yandja “Ombepo ondjapuke” ku imba mbu mave mu ningire. (Luk. 11:13) Nu indu eṱe tji matu tanga Jehova pozombongarero zombongo, eṱe wina tu muna ombepo ondjapuke. (Ef. 5:​19, 20) Ombepo ondjapuke mai tu vatere okuhupa momuano mbu mau yorokisa Mukuru. w24.03 23-24 ¶13-15

Kumba kutja u kare nomuretima. Omuretima i tjimwe tjovihape vyombepo. (Gal. 5:​22, 23) Ku nao, matu yenene okukumbira ombepo ondjapuke nokuningira ku Jehova kutja me tu vatere okukurisa otjikaṋena ho. Indu tji tu ri mongaro ndji mai roro omuretima wetu, eṱe matu ‘sokukara pokuningira’ ombepo ondjapuke kutja i yenene okutuvatera okukara nomuretima. (Luk. 11:13) Eṱe wina matu yenene okuningira Jehova okutuvatera kutja tu mune oviṋa otja koumune we. Okuzambo kombunda yokukumba, eṱe matu hepa okutjita otja pu matu yenene okukara nomuretima eyuva arihe. Indu tji twa kumbu okukara nomuretima natu kayenda komurungu okuraisa omuretima, Jehova ma yenene okutuvatera okukara nomuretima, nandarire kutja katwa ri ovandu mbaari nomuretima rutenga. Wina, matu sokuripurira ko oukoto kovihorera vyOmbeibela. MOmbeibela mu novihorera ovingi vyovandu mba raisa omuretima. Indu tji matu ripurire ko oukoto kovihorera otja imbyo, matu yenene okurihonga omiano vyokuraisa omuretima. w23.08 22-23 ¶10-11

Jesus wa vatera omuapostele Petrus okumuna kutja Jehova me mu vatere novihepwa vye. Jesus tja za nokupendurwa wa vatera Petrus novaapostele varwe okupata omahundju momuano omuhimise. (Joh. 21:​4-6) Otjihimise hi tjiri tja vatera Petrus okumuna kutja Jehova ma yenene okumupa oviṋa avihe mbi ma hepa. Ngahino omuapostele Petrus okuzambo wa zemburuka omambo wa Jesus kutja Jehova ma parura imba ‘rutenga mbe paha ouhona waNdjambi.’ (Mat. 6:33) Oviṋa avihe mbi vya vatera Petrus okutwa po otjiungura tjokuzuvarisa poruveze orutenga mehupo re nu ka twapere ongetjefa ye yokupata omahundju poruveze orutenga. Eye wa zuvarisa nouvanḓe meyuva ra Pentekoste 33 O.Z., nu wa vatera ovandu ovengi okuyakura ombuze ombwa. (Oviung. 2:​14, 37-41) Okuzambo, eye wa vatera Ovasamaria nOvakriste mbe ha ri Ovajuda okuyakura Kristus. (Oviung. 8:​14-17; 10:​44-48) Jehova tjiri wa ungurisa Petrus momuano wapeke okuyeta ovandu pekepeke mombongo. w23.09 20 ¶1; 23 ¶11

Ozombura ape mbari kombunda yaindu Ovababilon tji va nyona Jerusalem, Ombara Nebukadnesar wa Babilon wa rota oruroto orutirise ohunga notjiserekarera tjomundu otjinene. Eye wa rakiza ovarumendu ovayandjandunge ve nga ku Daniel, okumuraera kutja wa roto tjike, nokutja oruroto maru hee tjike. Indu tji ve hi nokuyenena okutjita nao, eye me ve zepa avehe. (Dan. 2:​3-5) Daniel aa sokuhakahana okutjita otjiṋa poo tjarwe ovandu ovengi mave ṱu. Eye “wa ya tjimanga kombara ne keiningira kutja i mu pe oruveze ndwa yenene kutja a sore okuiraera omaheero woruroto.” (Dan. 2:16) Ihi tja raisa kutja Daniel wa ri nouvanḓe nongamburiro. Omomuano uṋe? Ombeibela kai raisa kutja Daniel aa mangurura oturoto komurungu wanao. Eye wa ningira omapanga we “kutja ve kumbe ku Ndjambi weyuru e ve ṱire otjari, nokumuningira kutja e ve mangururire otjiundikwa tjoruroto.” (Dan. 2:18) Jehova wa zira ozongumbiro nḓo. Nombatero ya Mukuru, Daniel wa mangurura oruroto rwa Nebukadnesar. Daniel nomapanga we va yamwa. w23.08 3 ¶4

Ripurira kouwa mbu matu munu indu tji tu nomuretima. Indu tji tu nomutima, tu kara nondjoroka nohange. Okukara nomuretima ku tjita kutja tu kare nouveruke ouwa. Indu tji tu nomuretima ku na varwe, tu yorokera oupanga ouwa ku na wo. Nu ombwaneno mombongo i kurira ko. Indu omundu tji me tu pindikisa, natu ha hakahanene po okupindika, ku tjita kutja ouzeu mbwo au ha rire ounene. (Eps. 37:8; Omiano 14:29) Nu tjinenenene, eṱe tu horera ku Tate wetu womeyuru nu tu tumbuka popezu na ye. Omuretima tjiri otjikaṋena otjiwa nu tji tji tu etera ouwa. Katjiṋa otjipupu okukara nomuretima, posi ya nombatero ya Jehova matu yenene okukurisa otjikaṋena ho. Nu indu tji matu undju nomuretima ouye oupe, eṱe tu nongamburiro kutja “Muhona u tjevera avehe mbe nonḓuviro ku Ye, avehe mbe undja ombatero ye.” (Eps. 33:18) Atuhe ngatu rimanene okukayenda komurungu okukara nomuretima. w23.08 22 ¶7; 25 ¶16-17

Jakobus wa raisa kutja omundu mape ya atja u nongamburiro, posi ya ovitjitwa vye avi ha raisa nao. (Jak. 2:​1-5, 9) Jakobus wina wa tamuna omundu ngwa muna omukambure omukwao ‘ngwa hepa ozombanda nu ngu ha ri notjiṋa okurya’ nu ehe mu vatere. Nandarire kutja omundu ngo wa tja u nongamburiro, ovitjitwa vye vya raisa kutja ke nongamburiro. (Jak. 2:​14-16) Jakobus wa tamuna Rahab otjotjihorera tjomundu ngwa raisa movitjitwa vye kutja u nongamburiro. (Jak. 2:​25, 26) Eye wa zuva ohunga na Jehova nu aa tjiwa kutja eye aa vatere Ovaisrael. (Jos. 2:​9-11) Ovitjitwa vye vya raisa kutja eye wa ri nongamburiro. Nu mena rongamburiro ye, eye wa yama ozohoze mbari zOvaisrael indu omiinyo vyawo tji vya ri moumba. Epu orondi rokutja, Rahab na Abraham va varwa otjovasemba nandarire kutja kava ri ohomonena nu kaave kongorere Omatwako wa Moses. Twe rihongo okuza ku Rahab kutja ohepero tjinene okuraisa movitjitwa vyetu kutja tu nongamburiro. w23.12 5 ¶12-13

Otjovakriste eṱe katu nokuvanga okutjiwa ovirihongwa ovitenga vyOmbeibela uriri. Nombatero yombepo ya Mukuru, eṱe tu nonḓero okurihonga “nangarire imbi oviundikwa ovikoto tjinene vyaNdjambi.” (1 Kor. 2:​9, 10) Ove mo yenene okutjita omakonḓononeno woye omuini nondando yokutumbuka popezu na Jehova. Otjotjihorera, ove yenene okukonḓonona omuano ma raisa orusuvero kovakarere ve voruveze orukuru nomuano me raisa kutja eye wina we ku suvera. Ove wina mo yenene okukonḓonona omuano Jehova maa vanga Ovaisrael okurikotamena ku ye, nosasaneke nomuano eye me vanga kutja tu rikotamene ku ye nai. Poo ove mape ya o konḓonona oukoto omaprofetero Jesus nga yenenisa mehupo re na motjiungura tje tjokuzuvarisa. Ove mo yenene okukara nondjoroka onyingi mokukonḓonona omapu ohamukwao na ingo nombatero yo-Watch Tower Publications Index poo Okambo komakonḓononeno kOvahongonone va Jehova. Tji wa tjiti omakonḓononeno wOmbeibela omakoto maye yenene okukurisa ongamburiro yoye nu maye ku vatere “okukara nondjiviro yaNdjambi.”—Omiano 2:​4, 5. w23.10 18-19 ¶3-5

Omambo womuapostele Petrus ngu maye tja “nomasa tjinene” maye hee “okuvandeka poo okukutjira.” Orupa orutjavari rwezeva ndo maru hungire ohunga noviṋa mbi tu tjita indu tji twa suvera varwe nomasa tjinene. Orwo ru tu vatera okuvandeka omauvi wovakambure ovakwetu. Ripura notjitiha tji tja kururuka tjinene. Mape ya atu toora erapi natu “vandeke” naro otjitiha kutja atu ha munu omakururukiro. Momuano tjingewo, indi tji twa suvera ovakambure ovakwetu nomasa tjinene, matu yenene okuvandeka poo okuisira “omauvi omengi.” Orusuvero rwetu ku varwe ru sokukara nomasa nga yenene kutja tu yenene okuisira ozondataiziro zovakambure ovakwetu, nandarire kutja povikando tjiva irira ouzeu okutjita nao. (Kol. 3:13) Indu tji twa isire varwe matu raisa kutja orusuvero rwetu ru nomasa nokutja tu vanga okuyorokisa Jehova. w23.11 10-12 ¶13-15

Indu Ombara Josija tja ri nozombura 26, wa uta okuṱuna ondjuwo ondjapuke ya Muhona. Momaṱunino ngo, pa munikwa “Embo rOmatwako waMuhona Ndjambi nga yandjere ku Moses.” Indu Ombara tji ya zuva amari lesewa, oyo ya hakahana okutjita omarundurukiro okukara nonḓuviro ku imbi mbya tjangerwe mu ro. (2 Ekuruh. 34:​14, 19-21) Ove mo vanga okulesa Ombeibela aruhe? Ngahino ove u kondjisa okuilesa eyuva arihe. Hapo u tjaterwa okuilesa? Hapo u zemburuka omazeva ngu mape ya aye ku vatere? Indu Josija tja ri nozombura ape 39, eye wa tjita ondataiziro ndja tjita kutja ma ṱe. Eye we riyamekere ku ye omuini pendje yokuningira omuhunga ku Jehova. (2 Ekuruh. 35:​20-25) Pe notjiṋa tji matu yenene okurihongera ko. Eṱe matu sokukayenda komurungu okutumbuka popezu na Jehova, kainatja kutja tu nozombura ngapi poo twe rihonga Ombeibela oure mbu ṱa pi. Iho tji kamburira mo okuningira omuhunga wa Jehova aruhe mongumbiro, nokukonḓonona Embo re, nokupuratena komaronga wOvakriste mbe noupanga ouwa ku na ye. Indu tji twa tjiti nao, maku tu vatere kutja atu ha tjiti ozondataiziro ozonene nu matu kara nondjoroka.—Jak. 1:25. w23.09 12 ¶15-16

Ombeibela i tamuna ovakazendu ovengi mba suverere Jehova nu mbaave mu karere. Owo “va ri nomuungutima” nu va ri “ovaṱakame moviṋa avihe.” (1 Tim. 3:11) Nu wina ovakazendu ovakambure mave yenene okumuna ovihorera vyovakazendu mombongo yawo mba suvera Jehova ku mave yenene okuhorera ko. Vakazendu ovakambure omitanda, paheye ovakazendu ovakambure mbu mamu tjiwa mbe novihorera oviwa ku mamu yenene okuhorera ko. Tareye kovikaṋena vyawo oviwa. Nu okuzambo ripurireye komuano mu mamu yenene okuraisa ovikaṋena mbyo. Omerisusuparisiro otjikaṋena otjinanḓengu Omukriste tji ma sokukara na tjo. Indu omukazendu tje ri omurisusuparise, eye ma kara noupanga ouwa ku na Jehova na ku novandu varwe. Otjotjihorera, omukazendu ngwa suvera Jehova eye nomerisusuparisiro u toorora okukongorera imbi mbya tjangwa 1 Ovakorinte 11:​3, Jehova ma kahurura kutja wa yandja ku uṋe omerizirira wokuhongorera po ombongo neṱunḓu. w23.12 18-19 ¶3-5

Jehova u undjira ko kutja omurumendu ma suvere omukazendu we, me mu parure, nu ma rire epanga re nokumuvatera kutja a kare noupanga ouwa ku na Jehova. Okuripura nawa, okuraisa ondengero kovakazendu nokurira omundu varwe mu mave yenene okukambura mo, mavi tjiti kutja u rire omurumendu ngu novikaṋena oviwa. Nu iho matji tjiti kutja u yenenise omerizirira ngu u na wo otjomurumendu ngwa kupa notjiuru tjeṱunḓu. Kombunda yokukupa, mape ya o kara novanatje. Ovikwaye mbi mo yenene okurihongera ku Jehova ohunga nokurira omunene omusemba? (Ef. 6:4) Jehova wa raera Omuna we Jesus kutja we mu suvera nu u nonyuṋe mu ye. (Mat. 3:17) Ove tji wa kakara novanatje, raisira ovanatje voye aruhe kutja we ve suvera. Aruhe ve tanga mena roviṋa oviwa mbi va tjiti. Ovarumendu mbe horera ku Jehova ve vatera ovanatje vawo okukarira ovarumendu novakazendu Ovakriste mbe noupanga ouwa ku na Jehova. Ove mo yenene okurirongerisa nai mokuraisa orusuvero nokurikendera ku imba veṱunḓu roye na kombongo. Nokurihonga okuveraera kutja we ve suvera nu ovahuze kove.—Joh. 15:9. w23.12 28-29 ¶17-18

Nandarire kutja oweṱe ovakarere va Jehova ovaṱakame, eṱe wina tu muna omauzeu nu tu vera, tjimuna ovandu avehe. Eṱe nandarire mape ya atu hepa okutuurunga ondatumisire poo omapirukiro okuza ku imba mba tonda ovakarere va Mukuru. Nandarire kutja Jehova ke tu tjevere kutja atu ha munu omauzeu otja ingo, eye wa kwizika kutja me tu vatere. (Jes. 41:10) Nombatero ye, eṱe matu yenene okukara nondjoroka, okutoora omikambo omiwa, nokurira ovaṱakame ku ye nandarire tji tu kehi yozongaro ozonḓeu. Jehova wa kwizika okutupa ‘ohange yaNdjambi’ ndja tamunwa mOmbeibela. (Fil. 4:​6, 7) Ohange ndjo i tjita kutja tu porimane mena rokutja tu noupanga wopopezu ku na Jehova. Ohange ndji ya “kapita ozondunge azehe zovandu,” pu mape hee kutja oyo tjiri otjiṋa otjiwa. Ove mape ya wa rora okukara nohange momuinyo kombunda yokukumba nomasa ku Jehova. Ove oo fula nao mena rokutja Jehova we ku pa ohange ye. w24.01 20 ¶2; 21 ¶4

Imba mba suvera Mukuru ve vanga okutanga ena re nomitima vyawo avihe. Ombara David aa tjiwa kutja indu matu tanga ena ra Jehova, i ri tjimuna matu tanga Jehova omuini. Indu tji twa zuu ena ra Jehova, eṱe tu ripura ohunga novitjitwa vye novikaṋena vye avihe oviwa. David aa vanga okutjinda ena ra Ihe otjoyepuke nokuritanga. Eye aa vanga okutjita nao notjiṋa “atjihe tji tji ri mourekoto” we, poo nomutima we auhe. Momuano tjingewo, Ovalevi aave hongorere po mokutanga Jehova. Owo va yakura nomerisusuparisiro kutja omundu ka yenene okuyandja ondangero ndja pwire ena ra Jehova eyapuke. (Neh. 9:5) Otjingaperi kutja ondangero otja indjo ya yorokisa omutima wa Jehova. w24.02 9 ¶6

Jehova kemee ku vara kutja oove otjingundi, indu tji u ha yenenisire ondando ndja ri onḓeu kove okuyenenisa. (2 Kor. 8:12) Rihongera kotjiṋa tji tje ku tjaera okuyenenisa ondando yoye. Zemburuka oviṋa mbi wa yenenisa rukuru. Ombeibela i tja: “Ndjambi Eye omunausemba. Eye ke nokuzemba otjiungura tjeṋu.” (Hebr. 6:10) Ove wina ko sokuzemba imbi mbwa yenenisa. Ripurira ku imbi mbi wa yenenisa rukuru. Mape ya a rire okutunga oupanga woye ku na Jehova, okuhungira ku na varwe ohunga na ye, poo okupapitisiwa. Tjimuna tji wa yenenisa ozondando zoye morukapitaveze, ove wina mo yenene okuyenenisa ondando ndji u na yo nai. Nombatero ya Jehova, ove mo yenene okuyenenisa ondando yoye. Aruhe kondja okumuna omuano Jehova mu me ku vatere nu iho matji ku vatere okukara nondjoroka indu tji mo kondjo okuyenenisa ozondando yoye. (2 Kor. 4:7) Indu tji u hi nokurihahiza, mo munu ozondaya ozengi.—Gal. 6:9. w23.05 31 ¶16-18

Jehova u paha omiano okuraisira ovakarere ve kutja eye we ve suvera nu u nonyuṋe mu wo. Omatjangwa ye hungirira kovikando vivari indu tja raera Jesus kutja eye Omuna we omusuverwa nu u nonyuṋe mu ye. (Mat. 3:17; 17:5) Mo vanga okuzuva Jehova tji me ku kwizikire kutja u nonyuṋe move? Jehova ka hungire ku na eṱe okuza keyuru, nungwari u hungira okupitira mEmbo re, Ombeibela. Indu tji matu lese omambo wa Jesus worusuvero tji ma hungire kovahongewa ve, i ri tjimuna Jehova ma hungire omambo ngo kweṱe. Jesus aa horere kovikaṋena vya Ihe. Ku nao, indu tji matu lese omuano Jesus maa raisa kutja u nonyuṋe movahongewa ve ovaṱakame mbe ha ri ohomonena, matu yenene okuripura aayo Jehova ma hungire omambo ngo kweṱe. (Joh. 15:​9, 15) Indu tji tu ri kehi yomarorero, katji nokuheya kutja Mukuru ke nonyuṋe mweṱe. Nungwari, owo ye tjita kutja tu raise kutja twa suvera Mukuru nu tu nongamburiro mu ye.—Jak. 1:12. w24.03 28 ¶10-11