Usan i Magayayya nga Mattolay tu Mannanayun! Tapenu Malladda i Pangurug na Bible Study

Mawag tu mapeggan tu masikan nga pangurug i Bible study ira tapenu mapagayayya da i Dios. (Heb 11:6) Maduffunattam ira nga mapasikan i pangurug da ta pangusa tam ta libru nga Magayayya nga Mattolay tu Mannanayun! Nelagum ta libru i importante ira nga teksto, pakanawag, efektibo ira nga pakkiavu, makapagaram ira nga video, anna makasta ira nga artwork. Nu duffunattam i Bible study tam ira nga mapeggan tu nacristianuan ira nga kualidad tapenu maddukko ira ta Dios, kagitta tam i mangusa tu materiales nga ari nga matuggi ta pamataddag tam.​—1Co 3:12-15.

Marigatan i karuan nga nonopan nga maddukko ira ta Dios ta ari da mabba yayya nga masingan. Duffunattam gafu ira nga malladda i pangurug da ta minaggiddu nga Dios nga si Jehova.

GIRAWAN I VIDEO NGA PALADDAN I PANGURUG KANI JEHOVA GUKABAN NA “MAGAYAYYA NGA MATTOLAY TU MANNANAYUN!” KABALIN NA, TABBAGAN I TUMUNUG IRA NGA PAKKIAVU:

• Ngatta ammu tam nga nakaprepara tu mapia i sister ta paggigiammu da?

• Kunnasi yayya nga nangusa tu napannonopan ira nga pakkiavu tapenu mekagi na Bible study i egga ta nono na meyannung ta Isaias 41:10, 13?

• Anni i efekto na video anna na teksto ta Biblia ta Bible study?

Ari nga malippawa na aru nga tolay i tavvu, onu ari da nga imammatan nga regalu yatun na Dios ta nira mismu. (Gal 2:20) Duffunattam gafu ira nga malladda i pangurug da ta sakrifisio nga tavvu ni Jesus.

GIRAWAN I VIDEO NGA PALADDAN I PANGURUG KANI JESUS GUKABAN NA “MAGAYAYYA NGA MATTOLAY TU MANNANAYUN!” KABALIN NA, TABBAGAN I TUMUNUG IRA NGA PAKKIAVU:

• Ngatta ammu tam nga nakaprepara tu mapia i brother ta paggigiammu da?

• Kunnasi na nga nibagay i material nga egga ta seksion nga “I Awayyam Paga Kuan” tapenu uffunan i Bible study?

• Ngatta importante nga makimallo i Bible study?