Egga Paga Kari i Pangirespeto na Totolay ta Familia?

NU NGATTA IMPORTANTE I PANGIRESPETO TA FAMILIA

• Kinagi na libru nga The Seven Principles for Making Marriage Work nga nu irespeto na magatawa i kataggi-tadday, ipasingadda i pangaya da “ari laman tu ta darakal nga gannug, nu ari ipasingadda yatun ta kada aggaw maski ta baraddi ira nga gannug.”

• Ipasingan na research nga mas egga i pattalo na abbing ta baggi da nu natudduan ira nga irespeto i tanakuan, makasta gapa i relasiodda ta magana da, anna malillitadda i problema ta emosional anna mental nga gawa-gawayyadda.

I MAKUAM

Mapplano kavulu i familiam. Ollu, siguraduan nga mantindian na kada miembro na familia i kebalinan na pangipasingan tu “respeto.” Mekadua, itura nu i kayà nu nga kuan na familia nu anna i mawag nga lillitan nu. Mekatallu, pabbiridan nu yatun na familiam tapenu ammu na kada tadday i kuadda anna mepasingadda i respeto.

Mabbalin tu makasta nga ehemplo. Insultowammu kari i ka-familiam ta liwa nga nakua da, uyawan ira ta opinion da, anna ari ira ginnan onu pagimmangan ira nu kibbidaddaka?

Tip: Maski nu mepangngo ira onu ari, mawag lagapa nga ipasingammu i respeto ta atawam anna ta ána mu.

Mangipasingan tu respeto maski ariannu makka-anugu. Nu egga i kayà mu nga ikagi, lillitan i uvovug ira nga “kanayummu na laman” onu “ariammu vuluvuga.” Matakitan anna mainsulto i familiam ta kunnatun ira nga uvovug anna mas paga nga dumakal i problema.

I KUAMMI IRA

Pagaramman na Saksi ira ni Jehova i miembro na familia nga irespeto i kataggi-tadday. Maruddu nga yatun i tema na artikulo, libru, brosiur, anna video ira nga ipublisa mi. Awayyam ma-access yatun nga awan tu paga na.

PARA TA MAGATAWA: Makoffun i serye na artikulo nga Uffun Para ta Familia para ta magatawa nga . . .

• mabbalin tu mapia nga magginna

• iyemmang i ari makkatattannug

• iyemmang i paddama

(Alegan i “Uffun Para ta Familia” ta jw.org)

PARA TA MAPPAGANA: Makoffun i serye na artikulo nga Uffun Para ta Familia ta mappagana ta pamadakal ta ána da nga . . .

• mabbalin tu minattuttul

• manuffun ta trabahu ta balay

• makkagi tu “please” anna “thank you”

(Alegan i “Pagatawa Anna Familia” anna umay ta “Pamadakal ta Ána Ira” ta jw.org)

Innan gapa i apendise nga “Tanong ng mga Magulang,” ta libru nga Ang mga Tanong ng mga Kabataan—Mga Sagot na Lumulutas, Tomo 1. (Alegan i “Tanong ng mga Magulang” ta jw.org/tl)

PARA TA KABATAAN IRA: Ta seksion na jw.org nga Tinedyer anna Kabataan, egga i artikulo, video, anna worksheet ira nga makoffun ta kabataan ira nga . . .

• mapeggan tu makasta nga relasion ta magana anna wawwaragi da

• marespeto nga ipakibbida ta magana da i meyannung ta bili-bilidda ira

• mattalo ta nira i magana da

(Alegan i “Tinedyer anna Kabataan” ta jw.org)

Libre i pangusa ta website nga jw.org. Awan tu mapagan, ari kawagan i subscription, onu membership, anna ari makiddaw i personal information mu.