Anni Meuffun Nittam na Libraria na Kingdom Hall?

Ikayamu kari mangusito (research) tapenu umaru i pakannammum ta Biblia? Egga kari pakkiavumu meyannung ta teksto, tolay, lugar, onu gannug nga malegan ta Biblia? Onu napanonomu kari nu moffunannaka na Biblia ta personal nga problemam? Nu kunnatun, umeka ta libraria na Kingdom Hall.

Egga ira materiales nga makoffun nikaw nga mangusito. Baka awan tu kompletu nga kopiam ta nebase-Biblia nga publikasion na Saksi ni Jehova ta lengguahem. Egga pinakabagu nga publikasion ta libraria na Kingdom Hall. Puede nga egga paga nadduruma nga bersion na Biblia, diksionario anna karuan paga nga makoffun nga referensia. Puedem usan i libraria nige anna kabalin na study. Nu egga computer, puede nga egga Watchtower Library na. Program na computer yatun nga neluganna i aru nga koleksion na publikasiommi. Egga gapa search feature na nga puedem pagalegan tu referensia meyannung ta topiko, termino onu teksto. Malogon nga usan yatun.

Kuruga makoffun ta estudiante ira na Study nga Pattolay Anna Ministerio. Makoffun nikaw i libraria na Kingdom Hall ta pangipreparam ta asaymentmu. I mangiyorollu ta Study nga Pattolay Anna Ministerio i manangngal ta libraria. Siguraduanna nga naunnug anna egga i pinakabagu ira nga publikasion. Yayya onu i mattuddu nikaw tu Biblia i manguffun nikaw nu kunnasi mangusito. Ngem ari puede nga mangilawan tu libru ta Kingdom Hall. Anna siempre, ikayatam nga magimmugug ta pangiyusa anna ari turakan yatun.

Kagian na Biblia nga tapenu “malegan i mismu nga pakannammu ta Dios,” mawag tu siggaanugu ittam nga alegan yatun “kagitta na nakatagu nga kayamanan.” (Proverbio 2:1-5) Makoffun ta pangusitomu i libraria na Kingdom Hall.

• Anni ira nga materiales i makoffun ta pangusito i egga ta libraria na Kingdom Hall?

• Sinni i makoffun nikaw ta pangusa ta libraria?