Usu-usammu Kari i JW Library?

Usu-usammu Kari i JW Library? Libre nga app (software application) i JW Library nga meyusam ta pangi-download tu Biblia anna tanakuan paga nga publikasion, video, anna audio program ira ta cellphone, tablet, onu computer-mu.

NU KUNNASI YAW MALA: Makkonekta ta internet, anna i-install i JW Library nga malegan ta app store. Available i app ta nadduruma ira nga device. Nu naka-online ngana, vukatan i app anna pilian i kayamu nga i-download ta device-mu. Nu awan tu internet ta balenu, puedem yaw nga kuan ta Kingdom Hall, ta publiko nga libraria, onu ta tanakuan ira nga lugar nga egga internet access-na. Nu na-download-mu ngana i publikasion ira ta device-mu, puedem i-access yatun ira maski ari nakakonekta ta internet. Megafu ta kanayun nga egga ira i bagu nga feature nga melanno ta JW Library, mawag tu saggi-mittan ka ma-online tapenu i-update yatun.

NGATTA IMPORTANTE? Dakal i meyuffun na JW Library ta personal nga paggigiammu anna ta pattuttul ta study ira na kongregasion. Makasta gapa yaw nga usan ta ministerio mas ngana ta informal nga pallayyagayya.