Ipamavulummu nga Banna-bannayan Naka ni Jehova

1. Anni i kegafuan na avvuru-vurung, anna kunnasi ittam afektan natun?

NAPPASAMMU ngana kari i sobra nga pavvuru-vurung?b Baka mavuru-vurukka megafu ta natakitakka ta kinagi onu kingngua na tanakuan. Onu mavuru-vurukka megafu ta nakagim onu kingnguam. Angngariganna, nakaliwa ka yatutta mavurukka nga ari ka ngana vuluvuga mapakoma ni Jehova. Mas marake paga, megafu ta avvuru-vurummu, posible nga kurugammu nga makafi i pangurug mu anna marake ka nga tolay. Ngem kurug kari yatun?

2. Anni ira nga ehemplo ta Biblia i mangipasingan nga ari nga indikasion na makafi nga pangurug i pavvuru-vurung?

² Ikonsidera i karuan nga ehemplo ta Biblia. Si Hana nga nabbalin tu yena ni profeta Samuel ay tadday nga babay nga dakal i pangurugna. Ngem navvuru-vurung yayya turi ta marake i pinattratu na kabbalena nisa. (1 Sam. 1:7) Maladda i pangurug ni apostol Pablo ngem ‘ari yayya makapagimammo ta agga-nonona’ i ngamin nga kongregasion. (2 Cor. 11:28) Maladda gapa i pangurug ni Patul David yatutta kuruga iddukan yayya ni Jehova. (King. 13:22) Ngem maski kunnatun, nalaggabban si David ta liwana ira, yatutta kuruga nepallo i vuru-vurunna. (Sal. 38:4) Binanna-bannayan anna pinakalma ni Jehova i kada tadday nira. Innattam nu anni i magigiammu tam ta ehemploda.

I MAGIGIAMMU TAM TA MATALO NGA SI HANA

3. Kunnasi nga mamroblema ittam megafu ta kakkagian na tanakuan?

³ Nu mataki i kakkagian na karuan nittam onu ari masippo i pattratuda nittam, awayyana nga mamroblema ittam. Kurug yatun mas ngana nu madukko nga kofun onu kafamilia i nakataki nittam. Baka mavurung ittam nga nadaral ngana i relasiottam tatun nga tolay. Nu mittan, i tolay nga nakataki nittam ay arianna pinannonopan i kinagina yatutta matageno tam nga gittana naduddug ittam tu espada! (Prov. 12:18) Onu sadya nga nangikagi yayya tu gannug nga ammuna nga makataki nittam. Kunnatun nga kapurueba i neparubang ta tadday nga mabbing nga sister. “Piga dagun ngana i nappasa,” kunna, “nichi-chismisnà ta Internet na tadday nga pagabbo ku ay mapia nga kofukku. Natakitan ngà anna namroblema. Ariakku lang maimajin nu ngatta trinaidornà na pinattalakkakku nga kofun.” Nu natakitakka na madukko nga kofun onu kafamilia, aru i magigiammum kani Hana.

4. Anni ira nga mariga nga problema i inarubang ni Hana?

⁴ Mawag nga arubangan ni Hana i mariga ira nga problema. Ta aru nga dagun, ari yayya makka-ana. (1 Sam. 1:2) Ta kultura na Israel, mangurug ira nga awan tu bendision na Dios ta tadday nga baug. Yatutta nepasiranan si Hana. (Gen. 30:1, 2) Mas marake paga, egga i tadday paga nga atawa na atawa ni Hana. Yatun ay si Penina anna napeggan yayya tu ána. Karibal i tratu ni Penina kani Hana yatutta ‘kanayun nga insultuanna yayya tapenu matakitan.’ (1 Sam. 1:6) Ta ollu, narigatan si Hana tatun nga kapurueba. Kuruga maraddam yayya yatutta “tumangi yayya anna ari nga kuman.” “Kiteddammo i panageno” ni Hana. (1 Sam. 1:7, 10) Kunnasi nabanna-bannayan si Hana?

5. Kunnasi naduffunan na pakimallo si Hana?

⁵ Nivuvvu ni Hana i mataga-tagenona kani Jehova ta pakimallo. Kabalinna nga nakimallo, niyesplikana i situasionna ta Atannang nga Pari nga si Eli. Tapus kinagi ni Eli nisa: “Lubbe ka ngana, ari ka ngana mavurung anna paray nakuan tu iyawa na Dios na Israel i ikikkiddom.” Anni i resultana? ‘Nanaw ngana si Hana anna kiminan, anna ari ngana nga narraddam i mukana.’ (1 Sam. 1:17, 18) Nakoffun i pakimallo ni Hana tapenu metoli i memammo nga panagenona.

6. Anni ira i magigiammu tam kani Hana anna ta Filipos 4:6, 7 meyannung ta pakimallo?

⁶ Metoli i memammo nga panageno tam nu kanayun ittam nga makimallo kani Jehova. Aru nga oras i inusa ni Hana tapenu makiyuvovug ta nelangitan nga Yamana. (1 Sam. 1:12) Puede tam gapa nga makiyuvovug tu mabayag kani Jehova anna kagiattam nisa i pakavurungattam, i paganassingattam, anna i pakkafiattam ira. Ari nga mawag nga perfekto onu makakkasta i pakimallo tam. Nu mittan, awayyana paga nga itangi tam kani Jehova i pakavurungattam. Maski paga nu kunnatun, ari vuluvuga mabannag si Jehova nga magginna nittam. Fuera ta pappakimallo ta problema tam ira, mawag nga daddammattam i tabarang ta Filipos 4:6, 7. (Bibbigan.) Espesipiko nga kinagi ni Pablo nga makimallo ittam nga navulunan tu pappabalo. Aru i rasottam tapenu mappabalo kani Jehova. Angngariganna, mappabalo ittam nisa ta regalu nga inango, ta makasta ira nga pinaratuna, ta matalo nga ayana, anna ta kappabbaw nga iddanama nga neyawana nittam. Anni paga i magigiammu tam kani Hana?

7. Anni i kanayun nga kukukuan ni Hana anna na atawana?

⁷ Maski problemadu si Hana, kanayun lagapa nga umay ira na atawana ta lugar na paddayarayawan kani Jehova ta Shilo. (1 Sam. 1:1-5) Egga si Hana ta tabernakulo turi ta pinagaram yayya na Atannang nga Pari nga si Eli gukaban na pakkagina nga iddanamanna nga tabbagan ni Jehova i pakimallo ni Hana.​—1 Sam. 1:9, 17.

8. Kunnasi ittam moffunan na study ira? Ipakanawag.

⁸ Metoli i memammo nga panageno tam nu tulu-tuloy ittam nga magatende ta study ira. Ta pamegafu na study tam ira, maruddu nga makimallo anna makkiddaw i tadday nga brother tu espiritu na Dios. Tadday nga aspeto na vunga na espiritu i imammo. (Gal. 5:22) Nu magatende ittam ta study ira maski nu egga i pakavurungattam, iddattam si Jehova anna i wawwaragi tam tu tiansa tapenu pagaramman anna uffunan ittam nga metoli i imammo na nono anna futu tam. Importante i pakimallo anna study ira megafu ta danaw i usan ni Jehova tapenu banna-bannayan ittam. (Heb. 10:24, 25) Ikonsidera tam paga i tadday nga magigiammu tam ta ekspiriensa ni Hana.

9. Anni i ari nga nanguli ta situasion ni Hana, ngem anni i nakoffun nisa?

⁹ Ari insigida nawawan i problema ira ni Hana. Ta pallabbe ni Hana naggafu ta paddayaw ta tabernakulo, mawagna lagapa i makikabbalay kani Penina. Awan tu kagian na Biblia nga nanguli i ugali ni Penina. Yatutta posible nga nattulu-tuloy lagapa nga inattamman ni Hana i makapataki ira nga uvovug ni Penina. Ngem nawayya ni Hana nga itoli anna pattalupaddianan i imammo nga mataga-tagenona. Daddamman nga kabalinna nga nitalo i problemana kani Jehova, ari ngana mavurung si Hana. Nipamavulunna nga banna-bannayan anna pakalman yayya ni Jehova. Ari nabbayag, sinabbag ni Jehova i pakimallo ni Hana anna napeggan yayya tu sarilina nga ana!​—1 Sam. 1:19, 20; 2:21.

10. Anni i magigiammu tam ta ehemplo ni Hana?

¹⁰ Metoli i memammo nga panageno tam maski nu ari nga mawawan i pakavurungattam. Maski nu kanayun ittam nga makimallo anna magatende ta study ira, ari lagapa mawawan i karuan nga problema. Ngem magigiammu tam ta ehemplo ni Hana nga awan tu maski anni nga makefugag kani Jehova tapenu banna-bannayan i mavuru-vurung nga futu tam. Ari ittam vuluvuga makattaman ni Jehova anna aranni ngana i tiempo nga balakkanna i kinamatalo tam.​—Heb. 11:6.

I MAGIGIAMMU TAM KANI APOSTOL PABLO

11. Anni ira i rason nu ngatta mavurung si Pablo?

¹¹ Aru i rason ni Pablo nu ngatta mavurung yayya. Angngariganna, megafu ta ayana ta kapangngurugna, mavuru-vurung yayya megafu ta agga-nonona i problemada ira. (2 Cor. 2:4; 11:28) Durante nga mallayyagayya si Pablo, binubbug anna nifuku yayya na totolay nga kumokkontra nisa. Kawaganna gapa nga attamman i ziga-riga nga namavvurung nisa, gitta na “pakkuru-kurang.” (Fil. 4:12) Megafu ta maturu tu mamillu nga nakaekspiriensa si Pablo tu kadaral na barku, siguradu nga mavurung ngana yayya ta pabbiahe ta barku. (2 Cor. 11:23-27) Kunnasi nga inarubang ni Pablo i vuru-vurunna?

12. Anni i nakoffun kani Pablo tapenu ari yayya kuruga mavvurung?

¹² Mavurung si Pablo ta wawwaragina turi ta neparubang ira ta problema, ngem arianna nga pinurueban nga solban i ngamin nga problemada nga magitetadday. Ammu ni Pablo i limitasionna. Nikiddona i uffun na tanakuan tapenu tangngallan i kongregasion. Angngariganna, niddanna tu responsibilidad ira i mapattalakkan nga lallaki gitta da Timoteo anni Tito. Siguradu nga napakarianan i vuru-vurung ni Pablo megafu ta uffun naw nga lallaki.​—Fil. 2:19, 20; Tito 1:1, 4, 5.

13. Kunnasi nga maparigan na elder ira si Pablo?

¹³ Mappoffun ta tanakuan. Kagitta ni Pablo, aru ta minaggiddu nga elder ira ta maddaggun i mavurung ta wawwaragi nga egga i problemada ira. Ngem ari nga moffunan na tadday nga elder i ngamin ta kongregasion. Megafu ta ammuna i limitasionna, makkiddaw yayya tu uffun ta tanakuan nga kualipikadu nga lallaki anna sanayanna i mabbing nga lallaki tapenu uffunan yayya nga tangngallan i totolay na Dios.​—2 Tim. 2:2.

14. Anni i ari nga inimportan ni Pablo, anna anni i magigiammu tam ta ehemplona?

¹⁴ Rekunnisian nga mawag mu i banna-bannay. Minappakalinno si Pablo yatutta ammuna nga mawagna i pamagaram na kokkofunna. Arianna inimportan nu nonopan na tanakuan nga makafi yayya megafu ta pinagaram yayya na kokkofunna. Ta turana kani Filemon, kinagi ni Pablo: ‘Dakal i pagayaya ku, anna mapasikan i nono ku, megafu ta pangaya mu!’ (Flm. 7) Tinukoy gapa ni Pablo i karuan nga katrabahuna nga kuruga namagaram nisa ta tiempo na ziga. (Col. 4:7-11) Nu sigga-pakalinno nga rekunnisiattam nga kawagattam i pamagaram, magayayya i wawwaragi tam nga iyawa i suporta nga kawagattam.

15. Kunnasi nga nabanna-bannayan si Pablo turi ta neparubang yayya ta mamavvurung ira nga situasion?

¹⁵ Mattalo ta Uvovug na Dios. Ammu ni Pablo nga mabanna-bannayan yayya na Katurakan. (Roma 15:4) Mangiyawa gapa yatun tu sirib tapenu marubanna i anni laman nga kapurueba. (2 Tim. 3:15, 16) Ta mekadua nga kefukuna ta Roma, natageno ni Pablo nga aranni ngana i patena. Tatun nga mamavvurung nga situasion, anni i kingngua ni Pablo? Nikiddona kani Timoteo nga insigida nga umay nisa anna iyangay “i libru ira.” (2 Tim. 4:6, 7, 9, 13) Ngatta? Megafu ta danatun nga libru ay posible nga parte na Hebreo nga Katurakan nga awayya usan ni Pablo ta personal nga paggigiammuna. Nu parigattam si Pablo gukaban na regular nga paggigiammu ta Uvovug na Dios, iyusa ni Jehova i Katurakan tapenu pakalman ittam maski nu anni i mamavvurung nittam.

I MAGIGIAMMU TAM KANI PATUL DAVID

16. Anni i natageno ni David turi ta nakaliwa yayya tu madammo?

¹⁶ Rasonable laman nga mavvurung si David megafu ta makokkonsensia yayya. Sinaddena si Bat-seba, niplanona i kapatay na atawa ni Bat-seba, anna ginakkagna nga itagu i liwana ira. (2 Sam. 12:9) Ta ollu, ari nga gininna ni David i konsensiana. Megafu tatun, nadaral i relasionna kani Jehova, anna nafektan i mental anna pisikal nga gawa-gawayyanna. (Sal. 32:3, 4) Anni i nakoffun kani David nga arubangan i vuru-vurung megafu ta madammo ira nga liwana, anna anni i makoffun nittam nu nakaliwa ittam tu madammo?

17. Ta Salmo 51:1-4, kunnasi nga nepasingan ni David i napafutuan nga pabbabawina?

¹⁷ Makimallo para ta pamakoma. Nakimallo gabbalaman si David kani Jehova. Napafutuan i pabbabawina anna kinagina kani Jehova i ngamin nga liwana. (Bibbigan i Salmo 51:1-4.) Anni mabba nga banna-bannay i neyawa natun nisa! (Sal. 32:1, 2, 4, 5) Nu nakaliwa ka tu madammo, ariammu purueban nga itagu yatun. Lallagu, ikagim i liwa mu kani Jehova ta pakimallo. Matageno mu nga mabanna-bannayakka anna ariammu ngana makokkonsensia. Ngem nu ikaya mu nga itoli i pakikkofummu kani Jehova, ari laman tu pappakimallo i mawag nga kuammu.

18. Anni i reaksion ni David ta disiplina?

¹⁸ Alawatan i disiplina. Turi ta zinog ni Jehova si profeta Natan tapenu ikagina i liwa ni David, ari nga narrason si David onu pinalappawna i liwana. Insigida nga nirekunnisina nga arianna laman nakaliwa ta atawa ni Bat-seba, nu ari, mas ngana kani Jehova. Inalawana i disiplina ni Jehova yatutta pinakoma yayya ni Jehova. (2 Sam. 12:10-14) Nu nakaliwa ittam tu madammo, mawag nga makiyuvovug ittam ta sinunno ira ni Jehova nga manangngal nittam. (Sant. 5:14, 15) Lillitattam gapa nga irasonan i baggi tam. Nu mas mabi tam nga alawatan anna iyaplika i disiplina nga malawa tam, mas mabi nga metoli i imammo anna pagayayya tam.

19. Anni i determinadu tam nga kuan?

¹⁹ Determinadu nga ari ngana kuan uli i parehu nga liwa. Ammu ni Patul David nga mawagna i uffun ni Jehova tapenu malillitanna nga kuan uli i nakaliwatanna ira. (Sal. 51:7, 10, 12) Kabalin nga pinakoma ni Jehova si David, determinadu ngana yayya nga lillitan i makadaral nga appana-panono. Megafu tatun, netoli i memammo nga panagenona.

20. Kunnasi tam mepasingan nga appresiattam i pamakoma ni Jehova?

²⁰ Mepasingattam nga appresiattam i pamakoma ni Jehova nu ipakimallo tam yatun, alawatan i disiplina, anna mappursigi nga ari ngana kuan uli i nakaliwatattam ira. Nu kuattam danatun nga dakkua, metoli tam i memammo nga panageno tam. Napakurug yatun ni James, tadday nga brother nga nakaliwa tu madammo. Kinagina: “Turi ta kinagì i liwa ku ta elder ira, napalubbangan ngà. Netoli i memammo nga panageno ku.” Kuruga makapagaram nga mammuan nga “si Jehova ay aranni ta nabigaran i futuna; paliaranna danuri nadammakkan i espirituda”!​—Sal. 34:18, NW.

21. Kunnasi tam mepamavulun nga banna-bannayan ittam ni Jehova?

²¹ Durante nga umara-aranni ngana i panuppalan naw nga pangurianan ira nga aggaw, mas aru i mamavvurung nittam. Nu mavvuru-vurung ittam, insigida nga ipakimallo i uffun ni Jehova. Mallallappo nga gigiammuan i Biblia. Gigiammuan i ehemplo da Hana, Pablo, anni David. Ikiddaw ta nelangitan nga Yamam nga uffunan naka nga malippawa i kegafuan na vuru-vurummu. (Sal. 139:23) Ipamavulummu nga uffunan naka ta problemam ira, mas ngana yuri ira ariammu kuruga kontroladu. Nu kuammu yatun, maparigammu i salmista nga nangikansion kani Jehova: “Nu aru i kavuru-vurungan na nono ku, i pamanna-bannem i mangiyawa ta pagayaya ku.”​—Sal. 94:19.